((( تجمع أمهات حواء ))) .............................2

[ابتسامة صمت]

احلى صباح لبسومة .. يا وحشانا ..
يضحكوا الأولاد ..ما يلهم بد ما يتضاربوا.. ..
عندي نفس المشكلة .. ضرابة على المكان .. بس الصراحة اخليهم يجلسوا بالدور.. تفاهم

تصدقي كيونه رجعت الحياه لماميز شوي برجوعك
يعني الحمد لله أنه اجازتك خلصت
حسد عمانييين لاه
من شوقنا حالك والله
شكلهم أولادي ما ينفع معهم الدور
من قبل لا نطلع نقولهم واحد يجلس في الروحه والثاني في الرجعه تو عاد الضرابه أنهم ثنينتهم يريدوا في الروحه عشان في الرجعه يناموا
ما شي حيله

صبااااااااااااااااااااح الخير والسرور

لكم وحشة ماميز

بسومة من اسبوعين حلمتك تصدقي بس ما اعرف شو هو الحلم

هلا بك ملاااااااااين الغااااااليه
أللك وحشه من القلب
فديييييييييييييت أللي حلمتني لكن لا تقولي أني حامل

اقول بسوم سوي مثل ما قالت كيان ...ف كل طلعه دور واحد والي ما ينفذ يعاقب بحرمانه يومين..شو رايك

هلا الغااااليه أخبارك ؟
طمنيني حبيبتي كيف رزان مع الامتحانات ؟ عسى يااا رب الأمور طيبه
الحين هذي الخطه أللي نعملها أنا وأبوهم وبعدهم يتضاربوا ما شالله عليهم
البنت هيه أللي تعاند أكثر الولد أحسه ممكن يتقبل أكثر منها
عاد دلع البنات أكيييد ما حد ما يعرفه

[ام رزان]

هلااا وغلااااا...اخباري تمام ولله الحمد...انت شخبارك؟؟ وين بقية المامييز اليوم

الحمدلله رزان ماشيه تمام مع الامتحانات...بس الكيمياء والفيزياء هم الي كانوا صعبين
بس البقيه سهلات ولله الحمد والشكر
الله يعينك الغلا شكلهم عيالك صغار...صبري عليهم لين يكبروا بترتاحي

[كيان بلقيس]

كلك ذوق بسومة .. التجمع يفتقد طلة كل الامهااات ..

[rataj]

هلا معاكم ام حسين حبيت اشاركم انا ع 3 بنتين وولد حسين مرال رتاج

[rataj]

هلا كيفكم اخواتي العزيزات

[فلسطينية في عمان]

مرحبا اميات الله يخليكم اولادكن يارب

بدي اسألكم شو احسن مستشفى للولادة ؟ وكم بتكلف لو سمحتو

[فوق النجم]

كيفكم يا أمهات وينكم انقطعتوا كلكم مرة وحدة عسى المانع خير ولا هي الاجازة كلنا مأجزين مع أولادنا؟؟؟
عزيزاتي بما إنا كلنا أمهات وصارلهم مأجزين فترة كيف استغليتوا الاجازة مع أطفالكم؟
ووين ممكن نوديهم غير السنترات والألعاب باقي9 أيام وتبدأ الدراسة يعني أماكن يستفيدوا منها ما بس لعب ونزه
وعندي موضوع ثاني كيف أخلي أولادي يحافظوا على أدواتهم المدرسية؟تعبت من كثر الروحة على المكتبات
أقولهم لو كل هذي المبالغ أصرفها في شراء الكتب كنا بنسوي دار مثل دار الأوبرا من الكتب:كاشخ:

[حياتو أنا]

اختي فوق النجم
ممكن توديهم مكتبة ال PDO
اللي قبل شاطي الحمراء على اليمين
عشان يستفيدو بقراءة الكتب

[كيان بلقيس]

كيفكم يا أمهات وينكم انقطعتوا كلكم مرة وحدة عسى المانع خير ولا هي الاجازة كلنا مأجزين مع أولادنا؟؟؟
عزيزاتي بما إنا كلنا أمهات وصارلهم مأجزين فترة كيف استغليتوا الاجازة مع أطفالكم؟
ووين ممكن نوديهم غير السنترات والألعاب باقي9 أيام وتبدأ الدراسة يعني أماكن يستفيدوا منها ما بس لعب ونزه
وعندي موضوع ثاني كيف أخلي أولادي يحافظوا على أدواتهم المدرسية؟تعبت من كثر الروحة على المكتبات
أقولهم لو كل هذي المبالغ أصرفها في شراء الكتب كنا بنسوي دار مثل دار الأوبرا من الكتب:كاشخ:

فوق النجم.. منورة بهالطلة ..
انا ناوية باذن الله اسجل اولادي دائما بالعطلات لحد ما يتخرجوا من الجامعه ( ) باذن الله .. في مدارس تحفيظ القران لحد ما يحفظوا القران كامل باذن الله ..
اعتقد فكرة مناسبة لعيالك بعد .. ايش رايك؟


نفس الشئ ممكن تسجليهم في انشطة ريايضية:ركوب خيل-سباحة او اي شئ يحبوه و يشغل وقتهم و يخفف ربشتهم في العطلة




..ادوات المدرسة اذا ما خبيتيها في مكان بعيد عن متناول ايديهم فما أظن راح تسلم ..

[كيان بلقيس]

اختي فوق النجم
ممكن توديهم مكتبة ال PDO
اللي قبل شاطي الحمراء على اليمين
عشان يستفيدو بقراءة الكتب

جميل..
هل تحتاج المكتبة التابعه لل PDO الى اشتراك؟ و لا خاصة بس لموظفي الشركة و عائلاتهم؟

[فوق النجم]

[COLOR="#ff00ff"]فوق النجم.. منورة بهالطلة ..

منورة بوجودك عزيزتي

انا ناوية باذن الله اسجل اولادي دائما بالعطلات لحد ما يتخرجوا من الجامعه ( ) باذن الله .. في مدارس تحفيظ القران لحد ما يحفظوا القران كامل باذن الله ..
اعتقد فكرة مناسبة لعيالك بعد .. ايش رايك؟

أنا أسوي هالشي في العطلة الصيفية والحمدلله متابعة معهم بنفسي حفظ القرآن بس في هذي الفترة برد للخروج

نفس الشئ ممكن تسجليهم في انشطة ريايضية:ركوب خيل-سباحة او اي شئ يحبوه و يشغل وقتهم و يخفف ربشتهم في العطلة

يالله كيونة ضريت على الوتر الحساس إحنا فالولايات محرومين حتى من منتزة مش مثل الناس والعالم كله بس نركض مسقط للأقل القليل الله يعين مع إن ولايتنا فيها من مقومات السياحة كثير بس لا حياة لمن تنادي
تصدقي إحنا عندنا فلة توها جاهزة في الموالح من أصل توين فلة وزوجي يصر علي ننتقل بس ما حابه أطلع عن بيتي كبير وعلى قولة المصريين (شرح وبرح )وصارلنا ست سنوات من سكناه وبانينه على الديزاين إل كنت أتمناه ونفس الشي صعب النقل بالنسبة لدوامي أونة يقولي كل يوم نسير ونجي صحيح تبعد ما45 دقيقة بس أحسها صعبة
ولا تزعلوا مني ما أحب عيشة مسقط ما أعرف ليش

..ادوات المدرسة اذا ما خبيتيها في مكان بعيد عن متناول ايديهم فما أظن راح تسلم ..

أنا مخبتنها بس إل يطلع ما يرجع تخيلي بشكل يومي

[فوق النجم]

جميل..
هل تحتاج المكتبة التابعه لل PDO الى اشتراك؟ و لا خاصة بس لموظفي الشركة و عائلاتهم؟

عزيزتي حياتو نفس السؤال تحتاج لاشتراك ؟ولا كيف نظامهم؟

[كيان بلقيس]

واااابوي فوق النجم طلعتي دهيرية بو ما تحب تطلع عن البلاد ...
سبحان الله..يمكن جو البلد هادي و انتي ما تحبي الربشة ..

[ريم الأريام]

مساء الخير يا جماعه

عساكم بخير وصحه



لكم وحشة والله

[فجر جديد]

اهلين ماميز
السموحة على الأنقطاع صار لي فترة اخوض نوبة من نوبات اكتئابي
حبيت موضوعك الجديد كيونة

[فجر جديد]

حبيت كلمة اخوض تعطيني احساس انها حرب

ويش يدور معي هالايام ....... تجهيزات العيد اولا ...... تجهيزات اعراس الأهل في الإجازة ثانيا
تجهيزات وترتيبات للإجازة الصيفية ثالثا .......

شيء ثاني: كنت اعاني من ازمة كثرة الصرف على خرجات برع ..... ومع تغير وضعي وزيادة مصاريفنا العائلية بحكم صار لنا بيت كبير مصرفة اكبر طبعا من منزلنا السابق
صرت افكر في كيفية تقليل المصاريف الشهرية بتقليص مصاريف الخرجات من دون التقصير في حق البنات ونصيبهم في الترفيه عن عمارهم

محصلة افكاري : لمات اسبوعية لهم مع بنات عمامهم في منزلنا (بلاي ديت) يعني
مع توفير برامج تلفزيونية ورسوم اطفال يتابعوها ..... + سناكس صحية لأنه بنت عمهم تعاني من مرض السكري
+ نشاطات معينة يمارسوها .....
كل اسبوع انظم شيء ..... الأسبوعين الماضيات كان عبارة عن متابعة برامج تلفزيونية ولعب
الأسبوع القادم ناوية على حركة في حركة ( سكوترز وسياكلهم في الحارة خاصة انه حارتنا ما زالت مهجورة وما فيها حركة سيارات وما في جنبنا جيران مباشرين )
وعطلت الأسبوع إلي بعد ناوية على اعمال رسم وتلوين واشغال يدوية
ممكن تساعدوني بافكار ؟؟؟؟ اعمار البنات تتراوح من عمر 3 سنوات وحتى 6 سنوات

[كيان بلقيس]

اشرقت و انورت ريم الأريام و فجر الجديد .. تصدقوا كثير مفتقدة كل الماميز ما حلو التجمع ابدا بدون طلتكم .. انجولة القاطعه .. و ام يعرب .. و كل الماميز المختفيات عسى ما شر.. يالله ننتظر السوالف الحلوة ..

فجورة .. ما شاء الله عليك عيني عليك بادرة .. تجهيزات العيد من تو؟ بيقدمن الملابس..!!
بس على فكرة كثير تعجبيني ..تخلصي نفسك من عوار الراس و القلب .. التسوق للعيد .. متعب و مرهق على أصول ..
انا دووم اتأخر و اتسوق في اخر الاسابيع و تكون البضائع حظ و نصيب.. مرات حلوة و مرة ابيخ شئ و اضطر اشتري اي شئ ارضاءا للضمير..
كثير عاجبتني سالفة التسوق من النت ..تصدقي واجد تنفع للكسالى امثالي .. يوصلني كل شئ لحد عندي ..شئ احسن عن كذا؟ ما اظن!

يا اختي بخصوص توفير المصاريف .. ضربتي عل الوتر الحساس .. كانت عندي بدائل حماسية بس زوجي قطعها من جذورها بسبب كم حادث صاروا لاطفال من اهله و صار هالترفيه محرم علينا الى اجل غير معلوم.

1- كنا نتناول الافطار (الريوق) على شاطي البحر .. من الصبح اول ما يقوموا نعمل هجوم على البحر بعد ما اجهز الافطار في البيت .. تعرفي حاجة خفيفة ما تحتاج تحضير طويل .. و بعد ما يفطروا يلعبوا بالرمل و يتسبحوا..تكون الشمس خفيفة اول الصباح ..نجلي مال ساعتين و بعدين نرجع البيت .. هالبرنامج كثير كثير يحبوه ..بس خلاص كنسل بسبب حوادث غرق الاطفال لجماعه من اهل زوجي.. كثير يحاتي و يرفض رفض قاطع ..

2- يوم الجمعه لانه ما فيه زحمة اوديهم يلعبوا في الحداشق العامة بدون كهرباء.. مال رنجوحة و يتركضوا في الحديقة و يلعبوا كورة و خلصت الرحلة ..نفس الشئ يستانسوا و ينبسطوا

3- ايام كنا نعمل مشاكيك في البحر بعد المغرب ..

4- و مرة بالشهر اوديهم يلعبوا لحد ما يشبعوا في ملاهي الكهرباء او ياكلوا من المطاعم و اشتريلهم هدية

5-احيانا ابوهم يودينا جولة في السيارة في انحاء مسقط .. القصر .. مسقط داخل..اي مكان .. نجلس ندور في المكان شوية و نرجع ..



و خلص البرنامج ..
بس عن جد.. احنا برنامجنا خالي.. فراغ .. ما في شئ كثير مثير و ممتع .. الاولاد كثير يملوا و يتعبوا بسرعه..

[فجر جديد]

كيونة انا واهل زوجي نسوي تقريبا نفس الأشياء
اسبوعيا يا نروح الشاطي العصر نتقهوى ونتعشى يا نروح الصبح نفطر ونتغدى
تعرفي الجو الحين يساعد وكلها شوي ويصير الجو ابدا مال مال اوت دورز
عاد ننحبس داخل السنترات

اما عن العيد يا اختي اكره اتسوق في رمضان وقبل رمضان بشهر
احس اخذ حي الله اي كلام + الزحمة وانا انسانة اتعب نفسيا من الزحمة واحب كل شيء مخطط له بدقة
لا تنسي ان المدارس بعد راح تكون بعد العيد مباشرة وعشان كذا افضل اخلص نفسي وارتب اموري

[كيان بلقيس]

يا اختي.. انت في عمان ..يعني اماكن الترفيه محدودة جدا جدا .. للاسف

ما شئ غير عليكي بالسياحة الداخلية .. ناوية اجربها الحين .. طلعوا الانجليز مفصصين بلدنا سياحيا اكثر عنا و يعرفوا اماكن احنا اول مرة نسمع عنها..وافشلتاه ..

التلفزيون مع ربعهم ما يكفي..اسميه حبسة بيت .. و بنهاية الاسبوع ..يحتاجوا يطلعوا يتنفسوا و لو بمنتزه عادي..

[كيان بلقيس]

طيب..ايش هوايات العسولات؟اذكر وحده منهن تحب التصوير.. ممكن تاخذيها بره تصور مناظر..
اعتقد احنا محتاجين ننمي مواهبهم نفس الشئ في هذي المرحلة بالعطلات .. بكذا يتسانسوا و يمضوا وقتهم في شئ مفيد و يحبوه

[فجر جديد]

كيونة الحقيقة انا انسانة ما تستحمل تمرميطة من دون حمامات نظيفة عقدتي الأزلية وعشان كذا ما اقدر على روحة اماكن بعيدة ......
حاليا برنامجنا يوم لمة في البيت مع بنات عمهم وصدقيقيني مع ركيضهم طالعين نازلين بالبيت وفي الحوش هم يحرقون وايد وياكلون وايد
ثانيا كل جمعة بعد يا نطلع نفطر ونتغدى البحر
يا نطلع نتقهوى ونتعشى على الشاطي ونفس الشيء ركض ولعب وربشة وينامن من التعب في السيارة

بثنيناتهم يحبن التصوير ومعاهم كمرات ويحبن يصورن وايد ويمارسن هالهواية كل ما طلعنا مكان على طول
ويحبن التلوين والرسم والاشغال اليدوية
ومؤخرا بدن يكونن ميل للطبخ والمطبخ واحاول انمي هالشيء فيهم
+ ميل للكمبيوتر والالكترونيات بعد
يوم برع يوم في البيت احس فير انف
وايحانا اسوي رحلة الحوش على قيلة اخواني يوم نطلع العصر متأخر الحوش ونجلس نسولف ونلعب ونشوي مشاكيك ونتعشى في الحوش وعاد من الحوش للغرف يتغسلون ويبدلون وينامون على طول
حل جميل وفيه تغير بعد عن المعتاد

[فوق النجم]

واااابوي فوق النجم طلعتي دهيرية بو ما تحب تطلع عن البلاد ...
سبحان الله..يمكن جو البلد هادي و انتي ما تحبي الربشة ..

نعم إنك ضحكتيني بس صدقيني هي ما مسألة دهورية أنا إنسانة روتينية أخاف التغير
ونفس الشي ما أحب أبهدل نفس في السيرة والجية عشان خاطر أسكن مسقط بيتي لدوامي خمس دقائق لا غير ونقلي صعب أفر راسي من الموالح إلى شغلي ب45 دقيقة صراحة ما يخلص ونفس الشي بيتي قريب من بيت أخوي أمي تجي وقت الصباح تجلس عند ولدي وتشوف الشغالة بصراحة من إل أشوفه وأسمعه ما أقدر أخلي ولدي بروحه مع الشغالة فالموالح من لي لا لا ما أقدر

[فوق النجم]

حبيت كلمة اخوض تعطيني احساس انها حرب

ويش يدور معي هالايام ....... تجهيزات العيد اولا ...... تجهيزات اعراس الأهل في الإجازة ثانيا
تجهيزات وترتيبات للإجازة الصيفية ثالثا .......

شيء ثاني: كنت اعاني من ازمة كثرة الصرف على خرجات برع ..... ومع تغير وضعي وزيادة مصاريفنا العائلية بحكم صار لنا بيت كبير مصرفة اكبر طبعا من منزلنا السابق
صرت افكر في كيفية تقليل المصاريف الشهرية بتقليص مصاريف الخرجات من دون التقصير في حق البنات ونصيبهم في الترفيه عن عمارهم

محصلة افكاري : لمات اسبوعية لهم مع بنات عمامهم في منزلنا (بلاي ديت) يعني
مع توفير برامج تلفزيونية ورسوم اطفال يتابعوها ..... + سناكس صحية لأنه بنت عمهم تعاني من مرض السكري
+ نشاطات معينة يمارسوها .....
كل اسبوع انظم شيء ..... الأسبوعين الماضيات كان عبارة عن متابعة برامج تلفزيونية ولعب
الأسبوع القادم ناوية على حركة في حركة ( سكوترز وسياكلهم في الحارة خاصة انه حارتنا ما زالت مهجورة وما فيها حركة سيارات وما في جنبنا جيران مباشرين )
وعطلت الأسبوع إلي بعد ناوية على اعمال رسم وتلوين واشغال يدوية
ممكن تساعدوني بافكار ؟؟؟؟ اعمار البنات تتراوح من عمر 3 سنوات وحتى 6 سنوات

ما شاء الله هلا بفجر وين هالغيبة ؟؟صدق إن الواحد م يعرف وين يسير بعدكم أنتوا رحمة فمسقط كله قريب منكم إحنا البحر نهاية الأسبوع نسير نشل غدانا أو عشانا ويقضوا الأطفال وقت جميل يشيلوا سياكلهم وسكوتراتهم والبنات زلاجاتهن ويستمتعوا بس فجر الملل يصيب الأطفال أيام الاجازات بس أيام المدارس ما في مجال إلا نهاية الأسبوع يوم عند أهلي ويوم نسير مسقط ويوم عند أولاد عمهم وخلصنا

[فجر جديد]

انا ايام الإجازات دائما ادخلهم مدارس صيفية
وهالسنة ناوية على مدرسة قرءان بعد ما نرجع من سفرتنا إن شاء الله
وناوية مرة نطلع إجازة بعد إجازة العيد ونروح نزور اهل لزوجي في قطر
والفترة بين الإجازتين مثل ما قلت لك ناوية على مدرسة قرءان
نفس نظامي وانا صغيرة

والحقيقة ايام المدارس هم يرجعون من المدرسة ثلاثة العصر وعشان كذا ما احب اضغط عليها واجد

الحين بشكل عام معظم الولايات الكبيرة بدت تتطور وتحصلين فيها اشياء حلوة مثل صحار ومثل بركاء لكن الباقي للاسف لا زالت حالته مش ولا بد

على العموم بنات حد فيكم سمع عن الأكوريوم غلي فتح في الشارقة؟ افيدوني اريد اشل البنات يتشوفونه

[كيان بلقيس]

نعم إنك ضحكتيني بس صدقيني هي ما مسألة دهورية أنا إنسانة روتينية أخاف التغير
ونفس الشي ما أحب أبهدل نفس في السيرة والجية عشان خاطر أسكن مسقط بيتي لدوامي خمس دقائق لا غير ونقلي صعب أفر راسي من الموالح إلى شغلي ب45 دقيقة صراحة ما يخلص ونفس الشي بيتي قريب من بيت أخوي أمي تجي وقت الصباح تجلس عند ولدي وتشوف الشغالة بصراحة من إل أشوفه وأسمعه ما أقدر أخلي ولدي بروحه مع الشغالة فالموالح من لي لا لا ما أقدر

كذي السالفة ..عيل معاك مليووون حق الصراحة ..
ما شئ احسن من السكن قريب الأهل كثير يساعد ..

[كيان بلقيس]

فجر.. ما انفعك عن سياحة دولة الامارات ..المعومات صفر

===

عندي تساؤل بسيط ..
كيف ممكن نحمي افكار و اخلاق اولادنا من البيئة المحيطة؟
تعرفوا قبل ما يدخلوا روضة ومدارس يكونوا اكثر شئ في حضنا و يكتسبوا منا الكثير.. بس اول ما يبدأوا يطلعوا بره و يحتكوا بالعالم المحيط..تلاقي كثير كثير مؤثرات ..سواء من الاقارب او المدرسة .. فيه سلوكيات سيئة يكتسبها الطفل في مراحل العمر المختلفة و متخوفة لاني احس اني ما قادرة اسيطر على الوضع

تصرفات اولاد حميتي ما تعجبني ابدا.. مال 9 و 12 سنة بس ابدا ما يتطرشوا.. ما يحترموا لا ام لا عم .. اذا حد طرشهم فما يقوموا و يتصرفوا تصرفات ما حلوة على المائدة..
ولد عاد تو" اعتبره شايب صراحة " عمره 12 سنة و يعمل حركات على المائدة ما تعجبني و كاتمة غيظي دام الام راضية و تضحك على تصرفاته و الكل راضي فانا ما دخلني صراحة.. مرة ولدهم سكب العصير على الكوب لحد ما انكب على بساط الأكل.. و بعدين الكل بدأ يضحك...و انا مستعجبة ليش؟ طلع الولد متعود يعمل هالحركة عشان يضحكوا عليه .. اونه لازم يذوق البساط من العصير..حركات ما احبها ابدا و ما اقدر اتدخل ..تراها مناسبات قليلة جدا تجمعنا على مائدة واحدة..

بس بشكل عام ..اكثر اولاد يحتكموا فيهم اولادي هو اولاد عمتهم فقط.. وطبعا اولادي يكتسبوا .. و يقلدوا... صايرين كانهم قرود ..همج ..يتقفزوا في الاثاث و يطلعوه من مكانه و ما يسمعوا الكلام..يطنشوا..نفس طبع اولاد عمتهم..
اضرب و ما شئ فايدة.. العناد العكس يزيد ..و طيعا ما احب اخليهم على راحتهم لاني ما اريدهم يكبروا مثلهم بلا رقيب و لا احترام للكبير..

اكره العشوائية في الحياة و احب النظام.. كيف افرض نظام حياتي على اولادي..؟ساعدوني؟

[احلام العمر]

بنتي عمرها 3 سنوات و7 اشهر وااايد حركيه ومن زود الحركه مفتر راسي بالبيت يوم اجلس معها بداية السنه قررت ادخلها مدرسة تحفظ قران الحمدالله تروح المدرسه وترد تنام
المشكله الي تعاني منها انه ما اعرف كيف اسوي لها اشياء حلوه لانها حركيه ووايد وما عندها شي بالاجازه تحرق هالطاقه والحركه يالليت تنقضوني من هالشي وتعطوني كم فكره لها خاصه انها وحدها بالبيت وطفلي الي اصغر منها عنده شهر يعني تمل وتزهق وما تعرف تلعب مع من ؟؟

[فوق النجم]

فجر.. ما انفعك عن سياحة دولة الامارات ..المعومات صفر

===

عندي تساؤل بسيط ..
كيف ممكن نحمي افكار و اخلاق اولادنا من البيئة المحيطة؟
تعرفوا قبل ما يدخلوا روضة ومدارس يكونوا اكثر شئ في حضنا و يكتسبوا منا الكثير.. بس اول ما يبدأوا يطلعوا بره و يحتكوا بالعالم المحيط..تلاقي كثير كثير مؤثرات ..سواء من الاقارب او المدرسة .. فيه سلوكيات سيئة يكتسبها الطفل في مراحل العمر المختلفة و متخوفة لاني احس اني ما قادرة اسيطر على الوضع

تصرفات اولاد حميتي ما تعجبني ابدا.. مال 9 و 12 سنة بس ابدا ما يتطرشوا.. ما يحترموا لا ام لا عم .. اذا حد طرشهم فما يقوموا و يتصرفوا تصرفات ما حلوة على المائدة..
ولد عاد تو" اعتبره شايب صراحة " عمره 12 سنة و يعمل حركات على المائدة ما تعجبني و كاتمة غيظي دام الام راضية و تضحك على تصرفاته و الكل راضي فانا ما دخلني صراحة.. مرة ولدهم سكب العصير على الكوب لحد ما انكب على بساط الأكل.. و بعدين الكل بدأ يضحك...و انا مستعجبة ليش؟ طلع الولد متعود يعمل هالحركة عشان يضحكوا عليه .. اونه لازم يذوق البساط من العصير..حركات ما احبها ابدا و ما اقدر اتدخل ..تراها مناسبات قليلة جدا تجمعنا على مائدة واحدة..

بس بشكل عام ..اكثر اولاد يحتكموا فيهم اولادي هو اولاد عمتهم فقط.. وطبعا اولادي يكتسبوا .. و يقلدوا... صايرين كانهم قرود ..همج ..يتقفزوا في الاثاث و يطلعوه من مكانه و ما يسمعوا الكلام..يطنشوا..نفس طبع اولاد عمتهم..
اضرب و ما شئ فايدة.. العناد العكس يزيد ..و طيعا ما احب اخليهم على راحتهم لاني ما اريدهم يكبروا مثلهم بلا رقيب و لا احترام للكبير..

اكره العشوائية في الحياة و احب النظام.. كيف افرض نظام حياتي على اولادي..؟ساعدوني؟

كيونة أنا أمي ربتنا على النظام والترتيب كانت تأكلنا بنفسها عشان ما نبهدل ونوسخ ملابسنا مع إنا كنا في سن يسمح إن ناكل بنفسنا عل الرغم إنها ما متعلمة عندها خامس ابتدائي كان لما يجي عندنا ضيوف ونغلط بس تشوف علينا بنظرة نعرف إنا واحد منا ارتكب خطأ لأن جدتها لما كانت هي وخالتي صغار جابتلهم مؤدبة تعلمهم السناعة على قولتها وهذا الجيل تربيت شغالات واجد أمور تستاء منها لما تشوفها تصدر من أولاد أولادها أنا الحمدلله أولادي مسيطرة عليهم وتربيتي أنا وأبوهم نفس الشي بس أبدا ما مثل تربيت الوالدة الله يحفظها يعني السيطرة عليهم يحتاجلها حزم وتعب أكثر منا
تعرفي من أكبر الأخطاء إن الطفل يخطأ والأهل يرضوا ويضحكوا على أخطاؤه أنا ألاحظ ولدي الصغير لما يخطأ وأخوانه يضحكوا يكرر الخطأ لذلك دايما أعاقب الأربعة وأوضح لهم سبب العقاب ولأن بناتي شوي أكبر أفهمهم ليش أنا غضبانة وليش عاقبتهم وأخليهم يلاحظوا تصرفات أخوهم
استغرب من أمهات عندهن كل شي عادي أقول لزوجي والله إن ولادي أرحم من إل أشوفه من بعض أولاد أقاربنا أخاف لا يقلعونا عيونا والأم تناظر ولادها ولا تقول حتى كلمة عيب ولا خطأ
بس عندي مشكلة تجيني حالة نفسية عند وجبات الأكل تعرفي ليش أول ما أحط الأكل على الطاولة تبدأ كل السوالف أذيك الساعة يعني لو قلتلك يجلسوا أكثر عن ساعتين ياكلوا نعم مالأكون بالغت أبوهم ياكل ويقوم وهم كل سوالف الدنيا يطلعوها على الأكل كم مرة أعاقبهم أشل الأكل من قدامهم وأخليهم بدون أكل بس ما نفع نعاهم ويش أسوي عييت

[ابتسامة صمت]

أفتقدتكم ماميز
فجوره
ما شالله عليكي شطوره خلصتعي أغراض العيد
أنا اذا أشتريت من الحين بيلبسوهن العيال وما أقدر ما أشتري غيرهن أتحانق
ما شالله حبيت برنامجك للبنات كثيييير مميز
أنا بنتي واااايد تحب الرسم وما شالله عليها أنا في نظري فنانه طريقة تلوينها مميز وأكبر من سنها
أحب أنميلها هذي الموهبه أجيبلها دفاتر وألوان من كل الأنواع أللي مساعدني أنه مدرسة الفنيه ملاحظه موهبتها وتشجعها كثير ولوحاتها أحيانا تعلقهن في ممرات المدرسه
الأطفال يتعلقوا بالموهبه أكثر كل ما شافوا أحد يساندهم ويشجعهم للأستمرار والمتابعه
كيان
أحس الطفل أهم شي مراحل الأولى من حياته أذا أسستيه زين ما راح يتأثر واااايد بالمحيطين بالذات اذا يشوفهم قليل أو في المناسبات
ألاحظ على أولادي ( البنت ) الحمد لله عاقله وأحسها ما شيه معي ع الخط يعني الشي أللي تحسه غلط أبدا ما تسويه حتى لو شافت أولاد خالها المشاغبين يسويوه
أما الولد فأحسه غير لما يشوفهم جايين أحسه أذا طول معهم بيجي مثلهم
أحاول قدر الامكان أني ما أخليهم واجد معهم أحاول أنتقي الاشخاص أللي يماشوهم عشان ما يكسبوا تصرفات خاطئه
أناأحب النظام والترتيب والولد صراحه أبدا ما يعرف شي أسمه نظام مجننني
أما البنت فديتها وربي يحفظها عكسه تمام ما تحب تنام ألا لما تكون مرتبه غرفتها وكل شي نظيف وفي مكانه

[فجر جديد]

كيان هم التقاط اطفالنا للعادات السيئة هم وكابوس يطارد كل ام
وكل وحدة فينا تبذل المستحيل عشان تجنب اولادها وتعلمهم الصحيح
عن نفسي احاول استخدم لغة الحوار معاهم
وبما انهم بنات فدائما ابدا حواري بهالجملة "انتي اميرة صح وإلا لا؟"
الأميرة ما تركض داخل البيت .... الأميرة تركض لما تلعب برع ولما تسوي رياضة بس الأميرة ما تنط على الاثاث الاميرة تاكل اكل صحي الأميرة ما تلعب بالتلفونات وهلم جرا
ما اقولك 100% تنفع .... ولكن 80% تنفع ..... وهذي نسبة جدا مقنعة لي حتى يوصلون سن اكبر يستوعبون فيه اكثر كلامي ويوصلون لنسبة الـ 100% وياي