وأخيراً نودع بنك مسقط

[BaSeM]

بسم الله الرحمن الرحيم

عندي اقتراح قبل لا أترك بنك مسقط ان شاء الله وأتجه الى احد البنوك الأخرى التي اخبرني صديقي عن انها افضل

بحكم انه شخصياً كان حسابه في بنك مسقط ، وبسبب نفس السبب من سوء الخدمة بداخل المصرف ، حيث طوابير الانتظار

يعني تروح تاخذلك ورقة كوبون من الكاونتر ، بتشوف انه فرق بين رقمك وبين الرقم المكتوب على الشاشة يمكن 60 شخص


مع ان الحضور الي جالسين ينتظروا عالكراسي لا يتعدى 12 شخص واحياناً أقل

ولما تجلس عاد تنتظر ويعطوك المعاناة على أصولها ، يعني بتنتظر ساعة ونص لين يجي دورك

وانا جربتها بنفسي ، حيث اني ذهبت لسحب مبلغ من بنك مسقط (فرع صحـــار)

ولكن الصراف جالس وصدقوني اعطيكم بالكلام انه جالس اكثر من نص ساعة محد جاه

والسبب انه ما مشى الرقم ، لانهم عندهم جهاز يضغطوا عليه عشان يتغير الرقم ، وتضايقت صراحة وانا انتظر كان اروحله اقوله تو انته ما صراف

انا اريد اخلص ، كان يقولي روح الصرف الي جمبي ، والي جمبه بنت ولين تخلص واحد راحت وما ترد غير بعد فوق 10 دقائق

يعني مشقة صارت وعذاب

يعني لا كأني عميل عندهم من سنين طويلة ولا هم يحزنون

البرذلة وايد والتقاعس عن اداء الواجب واضح ولا أعمم هي حالات ، لكن نروح مكان ثاني ما فيه زحمة أفضل

لين يمكن هذيلا يتعدلوا ويحاولوا يبذلوا قصارى جهدهم في تخليص الناس

بدل الطوابير



عالعموم ما أبي اطول عليكم ، واقتراحي هو :

ليش ما يتم تعليم الجالية الهندية والبنجالية انه شي برنامج يقدر فيه يحوّل المبالغ دون صف طوابير عند ماكينات السحب الالي والايداع ، وحتى عدم التزاحم بداخل البنوك على شي ما يسوا او حاجات تافهة كان ممكن يخلصها في التلفون .

لأنهم بتشوفوهم بكثرة عند الايداع والسبب انهم يسحبوا فلوس ويركضوا على الايداع يودعوا 20 ريال

ويرجعوا مرة ثانية الصراف وبعدين الايداع ، ويكرروا هالحركة وشفتهم وحدي واستغربت منهم من هالتفكير العميق ما شاء الله



وأخــــيراً راح نودع بنك مسقط

شكراً

ومع السلامة

متجهين الى بنك ....

[ساعة عربية]

اي بنك اللي بتروحله؟

بتحصل مكاين منتشره مثل بنك مسقط؟

[برشلوني إلى الأبد]

أنا انتظر أي بنك إسلامي يفتح فرع في ولايتي و مباشرةً انتقل له ... مستحيل أبقى في بنك مسقط بسبب الزحمة

[BaSeM]

اي بنك اللي بتروحله؟

بتحصل مكاين منتشره مثل بنك مسقط؟

ووين راحت الفيزا كارد

والا فقط هي حقوق محفوظة لبنك مسقط

وما شي بنوك اخرى تكون معها فيزا كارد؟

اريد اروح مكان يخلصوني ما انتظر بالساعات لحد ما يرتفع ضغط الواحد

عذرنا خلاص دام كذا بسحب من المكاين على قولتك في حدود 2000 ريال يحتاجلها 4 ايام

كل يوم 600 وخلاص

[تغريدة حب]

أنا كنت أعاني نفس المشكلة طارح الموضوع والحمد لله انتقلت الى بنك نزوى أموري في الروب☺�� من انتقلت يوم تدخل داخل البنك تنتظر تقرببا 3 دقائق وطالع كرتي��, والسحب أقدر أسحب من أي مكينة من أي بنك في السلطنة بدون خصم

[سلطان19888]

أنا كنت أعاني نفس المشكلة طارح الموضوع والحمد لله انتقلت الى بنك نزوى أموري في الروب☺�� من انتقلت يوم تدخل داخل البنك تنتظر تقرببا 3 دقائق وطالع كرتي��, والسحب أقدر أسحب من أي مكينة من أي بنك في السلطنة بدون خصم

مثلك بالضبط. كنت في بنك مسقط وانتقلت لبنك نزوى لحسن معاملتهم وتسهيلات الخدمة ونظام الماستر كارد .

[التربوي المتقاعد]

كما يقال ...سيم ...سيم ..سيم ياعزيزي احسن لك بنك مسقط ... والمثل يقول اصبر على مجنونك ليجيك اجن منه

[صهيب الحارثي]

بنك مسقط حاس انه عنده واجد زبائن ف ماخذ راحته ولا شي مبالاه الا ف بعض الاحيان .انا جربت نظام اصاله الي هو نظام مثل VIP وحتى مكانك غير عن الي يصفوا وفوق هذا بعض الموظفين ما يعرفوا يتعاملوا مع الزبائن وكله تعقيد ف تعقيد .صار هذا البنك مثل الحكومه لازم تعرف حد عشان تمشي امورك اسرع .بنك نزوى لا بأس فيه.بنك ظفار جربته قبل زين ما فيه صف طوابير.بنك عمان العربي عليه زحمه بس زينين صراحه عدا فرع الخوير الي نفس خط اثاث فهمي وفرايديز انتظار لين ٦٠ شخص

[كيم جونغ أون]

هدي ، بنك مسقط ، بنك جيد وخدماته رائعه .

[شموخ العز 448]

وانا بعد راح اودع بنك مسقط اخر الشهر ان شاء الله...واروح بنك نزوى...
والسبب المعامله الرديئه من موظفين البنك والمكاين التعبانه اغلب الوقت خربانه وتاخير في انجاز المعاملات والزحمه كثيره

[البلوشي990]

هدي ، بنك مسقط ، بنك جيد وخدماته رائعه .

خدماته رائعة ف تعطل اجهزة السحب... وعدم وجود مبالغ نقدية فالاجهزة

الى متى هذا الحال

[أبو ريناف]

كلهن ف الهواء سواء

[الشيخ 1989]

الحمد لله خلصت من بنك مسقط
وانتقلت بنك العز

[بو جوري]

تم الانتقال الى بنك مزن لصيرفه الاسلاميه

[صعصع]

انا عن تفسي انتقلت من بنك مسقط من زمان ارتحت منه انصحك ببنك نزوى تسحب من اي مكينه بلاش م يخصمو من راتبي فلس احمر
اما بنك مسقط ياساتر خصومات بالهبل وم تحس يسرقوك وانت تضحك

[lob soldier]

ووين راحت الفيزا كارد

والا فقط هي حقوق محفوظة لبنك مسقط

وما شي بنوك اخرى تكون معها فيزا كارد؟

اريد اروح مكان يخلصوني ما انتظر بالساعات لحد ما يرتفع ضغط الواحد

عذرنا خلاص دام كذا بسحب من المكاين على قولتك في حدود 2000 ريال يحتاجلها 4 ايام

كل يوم 600 وخلاص

عندك بنك ظفار جيد ممكن تسحب من الجهاز في اليوم لغاية 1000 ريال وعندك بنك العز ولكن هذا الخدمة ما متوفره في جميع الاجهزة فقط في جراند مول ممكن تسحب لغاية 10,000

[salim122]

أحسن البنوك الاسلامية عن البنوك الاخرى
مثل بنك نزوى والعز

[Pilot]

كل البنوك مثل بعض الربا موجود شيء منهم عيني عينك والأخرى من تحت الطاولة (البنوك الاسلامية ) بطريقة منمقه وهم اكثر ربحا ....

[ساعة عربية]

سوي خزنه صغيره ف البيت وريح نفسك

[مرتاح007]

الى نزوى ولله الحمد........ وباي باي باي باي بنك مسقط

[بسمة البراري]

إذا على سالفة الزحمة ماشي باس
لكن للأسف صارن موظفات بنك مسقط ماشي معاملة زينة أبداً
يعاملن الموظفين كأنه جايين يشحتوا من عندهن!!
مرة كنت في البنك وجاي شاب مسكين يريد يغيرالبنك ويتكلم بصوت واطي
وهذيك الموظفة قامت تصرخ وخلت كل اللي في البنك يسمعوا سالفته وهو محرج مسكين!! والله كسر خاطري
بسبب إنه يريد ياخذ قرض وبنك مسقط رافضين يعطوه قرض لان عليه 50 ريال بعده ما دافعنهن!!
وجلست تذله.. ليش باغي تطلع من البنك؟
وليش ما عطوك قرض من هنا؟
ومن قال لك ما يعطوك قرض
ووين تداوم إنت؟!!
كم راتبك إنت؟!!! من الإحراج قال لها مامعقولة تسأليني كم راتبي!!!
أنا نفس الشي اريد اودع بنك مسقط للبنك الأهلي...سمعت معهم ميزات حلوة..ما يخصموا عليك لما تسحب من مكاين ثانية وماشي زحمة ..
وفوق كذا لو سافرت يدخلوك قاعة كبار الشخصيات في المطار وتسمع بالميزات هناك مثل كبار الشخصيات مثل الاكل غيره وأمورك طيبة J

[عماني 2015]

اي بنك اللي بتروحله؟

بتحصل مكاين منتشره مثل بنك مسقط؟

هي عملية نسبة وتناسب
يعني هل اعداد الزبائن ببنك مسقط مثل اعداد الزبائن البنوك الأخرى
وهل عوائد بنك مسقط مقارنة بالبنوك الأخرى بسبب اعداد الزبائن هي نفسها؟
طبعا لا
اذا
على عدد عملاء بنك مسقط يجب ان تكون الأجهزة اكثر بكثير

[الجنان الخضراء]

الحمد لله من زمان حولت راتبي واموري طيبه الى نزوى فلله الحمد والشكر.

[دواعي الأمل]

كلامك صحيح .. مذلة في مذلة صار هالبنك في جميع الفرووع انتظار وانتظار لشي بسيط ساعة ونصف عشان بس استلم (ATM Card) المشكلة تشوفهم ما عندهم حد ولما تروحلهم يقولوا انتظر دورك .. أي دور هذا؟ بس جالسين يطقطقون ع الجهاز يخلصوا المعاملات عشان ما يجلسوا بعد الدوام .. عاد اياك وتروح لموظفة كلهم رافعين خشومهم وكانك جاي تشحت منهم. والمدير ما يسوي شي ولا نائبه المفروووض هم يهتموا بالزبائن لأنه قدامهم يلي يصير بس ما يحرك ساكن .. هذا من غير بعض الموظفين ما يعرفوا يشرحوا الخدمات المقدمة من البنك .. انتظر حتى يروح يسأل زميلة

[فخر الشمال]

يضحكني اللي يقول ما بتلقى مكائن منتشرة مثل بنك مسقط


بنك مسقط 70% من أيامه

المكينة ما فيها فلوس
المكينة ما تسحب غير 50
و الجمعة ما يحتاج تروح تسحب لأن المكينة متحولة كيرلا من كثرة العمالة


و الخدمة زبالة في زبالة مع كل احترامي ولكن هذا الواقع


اذكر مرة رحنا نستلم فقط بطاقة بنك مسقط الجديدة و انتظرنا حوالي 3 ساعات




و بالمناسبة
بخصوص المكائن المنتشرة
ترا عادي تسحب بدون دفع في المكائن الثانية
واذا دفعت بتدفع بالكثير 100 بيسة
يعني ما بتفتقر



عن نفسي المكينة اللي اكون جنبها و شغالة اسحب منها

[سبلة بيتنا]

مشكلة اننا ليس معنا الصبر والنفس الطويل
بنك له ما يميزه انه اكبر بنك ف عمان ويستحدث بياناته وبطاقت البن باستمرار لاجل الحفاظ على أموال العملاء هذا من خلال تعاملي معه لعده سنوات

[عفوسامي]

بنك مسقط خبره عتيق تركته من عام 2012 صار من الذاكرة استخدمه للضرورة القصوى فقط وهو عند انعدام مكائن السحب بالمنطقة ولا يوجد غيره .

[سفير الورد]

اي بنك اللي بتروحله؟

بتحصل مكاين منتشره مثل بنك مسقط؟

والله مو فايده المكاين الاخرى دام يوفن الغرض
هذا البنك موظفينها الاغلب الاغلب خاصه معاملتهم للمراجعين مافيها احترام
يوجب عليهم يعرفو كيف يتعاملو مع العميل وغير هذا تاخير في ايداع المبالغ اقصد رواتب في فترات الاعياد

[مثيرللجدل]

بنك مسقط الميزه الوحيده التي فيه مكائن السحب منتشره فكل مكان

لكن شي غيره ماشي واجد بنوك افضل منه فالمزايا

بختصار بنك مسقط شافو نفسهم واجد

[عمان الغالية 22]

اله يرحمه بنك مسقط
ماكينات خربانه أغلب الوقت , دايما لما تتصل مشغول أو system خربان
غير الزحمة وخدماته الردئية