تحذير للجميع من الأخ العضو الرواحي22 (أرجو الإنتباه)

**ViiP** · 18/02/2015 01:24 AM

السلام عليكم

أخواني الأعضاء.. الأخ العضو @الرواحي22 نزل بداية الأسبوع موضوع يبيع فيه قرية كلاش أوف كلانس بلفل 128 .. اتواصلت معاه على أساس أشتريها .. وللأسف من حولت له المبلغ قفل جهازه ولا رسل لي الايميل والباسورد ... بالعربي أخذ الفلوس وأغلق جهازه ...

واليوم وبالصدفة وأنا أتصفح السبلة حصلته منزل القرية نفسها (أو وحدة ثانية بس بنفس الإعلان والكلام)
ف هذا الرابط http://avb.s-oman.net/showthread.php?t=2329196

علما بأني حاط صورة للموضوع السابق اللي طرحه في بداية الأسبوع!!!

ما أعرف ايش اطلق عليه بالضبط أو شو أقوله بس كل انسان ينعرف بأخلاقه!!

عموماً هذا تحذير للجميع منك يا لؤي @الرواحي22 لأنك للأسف ما تستحق إن أحد يعطيك الثقة ..

والله ما أعرف كيف ضميرك سمح لك ٤ ايام تنام وانت ماكل حق انسان..

والقهر بكل بساطة تمسح الموضوع السابق وتنزل موضوع جديد وبنفس الطريقة المخجلة !!

شو ممكن تقول لربك يوم القيامة وبشو راح ترد عليه ؟؟

بالنسبة لي ٨٥ ريال مب مبلغ كبير ، بس عندي سؤال واحد بشو حاس؟ فرحان؟؟ وإلا متوقع راح يبنن لك بيت!!

حقي راح أحصله من رب العباد يوم الحساب.. وما مسامحنك لا دنيا ولا اخرة ..

اتمنى من المشرفين مراقبة مثل هالأعضاء..

والدليل بالصور:

هذي صورة الموضوع الساابق لما كانت القرية 128 وطبعا اليوم بعد الظهر تم مسح الموضوع ، وأمس كنت كاتب تم البيع

هذا بداية اتفاقنا في الواتس أب .. ولاحظوا يا مشرفين ويا أعضاء رقم التليفون (مسحت اسم لؤي على اساس تتم المقارنة) .. وطبعا نفس الكلام إن القرية ماكس

تكلمة النقاش وارساله صورة للقرية ... ويمكن ملاحظة اتفاق كلامه في الموضوع الحالي مع القرية اللي ارسلها لي..

هنا فشل محاولة الإرسال الأولى بواسطة الEbanking واصراره على ارسال المبلغ (توجد لدي صور اضافية).. علما بأن سعره النهائي كان 85 (سعر العرض كان 90 ريال)

الإرسال بواسطة جهاز الإيدااع النقدي من بنك مسقط بعد اصرار منه وتأكيد إنه زميله ارسل له وصار ، وفعلا تم تحويل المبلغ ..
والصورة دليل:

من بعد ارسالي للمبلغ بحوالي ربع ساعة قام الأخ لؤي الرواحي بإغلاق الواتس أب بوضع حالة (مغلق مؤقتا) ، علما بأنه غير في الموضوع في السبلة وكتب (تم البيع) .. بس لا حول لي الإيميل ولا الباسورد..

قمت بارسال مسجات نصية لعل وعسى يتفضل علي لؤي ويكمل الإتفاق ، وللأسف ما رد علي والصورة دليل

حاولت أتصل فيه بس جهازه مغلق !! صارلي 3 أيام اتصل والرقم مغلق ..

طبعا كنت معطنه عذر وما اشتكيت ولا اتكلمت .. بس قمة قلة الذوق والأخلاق اني اجي وأحصل الأخ منزل موضوع يبيع نفس القرية!! وبنفس الكلام!!

لاحظوا رقم التيلفون.. والرقم في هذا الموضوع...

المشرفين
@نهله
@الشبل البري
@إدارة التسويق

تعليقكم واجراءاتكم لو سمحتوا... واعتذر إن كان مكان الموضوع خطأ .. بس ما في اليد حيلة .. لما نتعرض للظلم ردة فعلنا تختلف من شخص لآخر بس يعلم الله إني عطيته العذر من يوم الأحد الماضي وكنت أحاول اتواصل معاه بس شي يقهر تجي وتحصل نفس القرية يرجع يبيعها من أول وجديد..

شكرا للجميع..

**فعايل شيوخ** · 18/02/2015 01:37 AM

لاحول ولاقوة الا بالله العلي العظيم
الله يعينك وتحصل حقك

**عامري أمير** · 18/02/2015 01:49 AM

اتجه إلى حماية المستهلك

**imanga** · 18/02/2015 01:54 AM

شكراً على التحذير اتمنى تروح الادعاء العام

**ViiP** · 18/02/2015 02:53 AM

@فعايل شيوخ .. شكراً ياخوي.. ياليت الجميع بأخلاقك في التعامل سواءً الشخصي أم التجاري.. أكرر شكري وإعتزازي بمعرفتك..
@عامري أمير والله ياخوك يا حلوه حقي يوم القيامة، ما مستعجل، قيمة حقي في يوم الحساب أكبر بوايد من حقي في الدنيا..
@imanga شكراً على النصيحة أخوي..

**كاسر الشفرة** · 18/02/2015 03:38 AM

اذا ما خاب ظني هو نفس الشخص اللي بادلني ب ps3 ضايعه وما تشتغل مقابل اكس بوكس بس رجعتها الا الجهاز قالي بعته !

**حسام ثابت** · 18/02/2015 03:51 AM

حاط موضوع ثاني يعني ضحك عل الاول ويكمل طريقة للثاني مع انة اعتقد انك مو الاول ^^

الاخلاق والكرم انتها زمانة ما ينفع بهذا الجيل كل واحد ماشي مزاجه عل قولتنا (شارع ابوة)

مب مبلغ كبير بالنسبه لك --طيب سوالي لك هل راح يكون المبلغ كبير بالنسبة لك لما يضحك عل عشرة اشخاص بنفس القيمة ؟^^

كل الاي اقوله انة لا تخليه يكمل بنفس الخدعه عل الناس

**ViiP** · 18/02/2015 04:14 AM

وهنا موضوع آخر كان كاتب فيه (آيفون 5s للبيع ب٩٠ ريال)
http://avb.s-oman.net/showthread.php...9#post44726649

ولو تلاحظوا أنه السعر هو القاسم المشترك في كل المواضيع ...
بمعنى يعرض اشياء جيدة بسعر يعتبر ممتاز (٩٠ ريال في كل المواضيع)!! يعني صعب جداً تحصل ايفون ٥ اس أو قرية في لعبة كلاش او كلانس بهذا السعر ولذلك يعتبر الموضوع فرصة.. وهو كذا يجذب الناس..

أنا الحين بس جلست أدقق وأربط بين الأشياء..

**ViiP** · 18/02/2015 04:15 AM

@كاسر الشفرة .. ممكن جداً وهذا الرابط
http://avb.s-oman.net/showthread.php?t=2295131
@حسام ثابت .. كلامك صحيح أخوي.. شكراً لك على نصيحتك

**الشيخ 1989** · 18/02/2015 04:30 AM

اخوي مثل ذيه الاشكال روح بلغ عليه
طبعا بيعرفوه عن طريق رقم التلفون او رقم الحساب البنكي
اليوم سواها فيك بكره بيسويها ف واحد فقير ويبهدله

**فعايل شيوخ** · 18/02/2015 06:06 AM

أرسل أصلا بواسطة ViiP

@فعايل شيوخ .. شكراً ياخوي.. ياليت الجميع بأخلاقك في التعامل سواءً الشخصي أم التجاري.. أكرر شكري وإعتزازي بمعرفتك..
@عامري أمير والله ياخوك يا حلوه حقي يوم القيامة، ما مستعجل، قيمة حقي في يوم الحساب أكبر بوايد من حقي في الدنيا..
@imanga شكراً على النصيحة أخوي..

تسلم يالحوسني احرجتني بكلامك
في النهاية كل شخص وضميرة والي مايخاف ربه وقلبه ميت ويش نسوي فيه
كل شخص بتعامله وتصرفاته يمثل ترتبيته ويعكس تربية البيئة الي عايش فيها

والله يهدينا ويهدي الجميع
اتمنى تحصل حقك

**POPOkarimu** · 18/02/2015 07:25 AM

ۈعـْليگمٌ-ٱلسّلٱمّ:ﯙرحـّمَة ٱللـّہ ۈبٌرگـّاتہ ، إن شاء اللّـہ̣̥ أخوي حقك ما يضيغ فالأخرة،، "حَسْبِى الْلَّه وَنِعْم الْوَكِيْل"

**alzaabialzaabi** · 18/02/2015 10:41 AM

عليك بالدعاء العام والمحكمة
راح يتبهذل ... الله يرجعلك حقك

**راضي طول حياتي** · 18/02/2015 01:09 PM

حقك بيرجع لك ، دام عندك البرهان ورقم حسابه
المهم للبيع وي يو ، هذا الموضوع
��http://avb.s-oman.net/showthread.php?t=2325393

**ViiP** · 18/02/2015 01:38 PM

@POPOkarimu تسلم اخوي على الدعاء ومثل ما يقولون الحساب يوم الحساب ان شاء الله
@alzaabialzaabi شكراً على النصيحة أخوي
@راضي طول حياتي.. شكراً صاحبي.. القانون يقوم الأشخاص.. بس من خلال متابعتي لمواضيعه @الرواحي22 اتضح لي بإنه متمرس في السرقة وبالنسبة له اللي يسوي نمط حياة مش خطأ يرتكبه..

@الشيخ 1989 تسلم على النصيحة اخوي

**ولوج الحق** · 18/02/2015 02:03 PM

حسبي الله ونعم الوكيـل!!!

فقط للمعلومـات.. لمـا أي رقم ما يرضى يدخل بالبرنامج. اتصل ببنك مسقط وبيعطوك الحساب الجديد للرقم.. لأن البرنامج يستقبل الحسابات الجديدة.. لكن ضروري تحفظ صفحة الإرسال وصفحة رقم العملية بعد كل تحويل لضمان الحقوق..

وبخصوص البيانات اللي عرضتهـا.. كافية. وزيادة أنك ترفع عليه قضية!

**ghost from 1991** · 18/02/2015 02:05 PM

الله يعينك صاحبي... حقك مابضيع

خذ نصايح الشباب وعلمه درس !!

**musab alzakwani** · 18/02/2015 03:11 PM

نصيحتي روح الادعاء العام عندك اكثر من دليل ويمكن تسترجع المبلغ
وانتبه لاتحذف اي شي مثل الرسائل عشان يكون الدليل موجود

انت تقول انه الحساب عند رب العالمين كلامك صحيح
ولكن يمكن يسويها فاكثر من شخص فانت امنع هذا الشي بتصرفك بذهاب الى الادعاء العام

**gharib** · 18/02/2015 05:24 PM

أخوي لو كنت متنازل عن المبلغ فبعد ما تحصله تبرع فيه

لكن ارفع عليه دعوى قضائية ! ولك الأجر لا تنسى انك يمكن تحمي ناس ثانيين.

وبأمانه تشكر على شجاعتك برفع الموضوع ، فيه ناس كثير يمكن تسكت وتخجل من نشر الموضوع ، لكنك برهنت شجاعتك وأتمنى تبرهنها أكثر وترفع عليه قضيه

**جروب معبيلة** · 18/02/2015 05:29 PM

حسبي الله و نعم الوكيل

**حكيم الصحراء** · 18/02/2015 09:23 PM

انسان سبال

**حكيم الصحراء** · 18/02/2015 09:23 PM

أقل ما يقال عنه بصراحة انه سبال

**حكيم الصحراء** · 18/02/2015 09:24 PM

عندك رقمه والمحادثات ورقم الحساب هذا اكبر دليل

**الشبل البري** · 18/02/2015 09:25 PM

أخي الكريم ، لنتعاون معاً حتى لا يقع غيرك في نفس الفخ...

سأتصرف معه في العالم الإفتراضي.. وتصرف أنت معه في العالم الحقيقي..

تقديري.

اسم المؤسسة	موقع المؤسسة
الوظيفة	المستوى التعليمي
وقت الدوام	نوع عقد العمل

الموضوع: تحذير للجميع من الأخ العضو الرواحي22 (أرجو الإنتباه)

أدوات الموضوع

البحث في الموضوع

نمط العرض

تحذير للجميع من الأخ العضو الرواحي22 (أرجو الإنتباه)

مواضيع مشابهه

الشريش الكويتي أو شجرة الدمس ... خطر قادم أرجو الإنتباه..!!

أرجو الإنتباه لهذة المسئلة مهمة لأولياء الأمور خاصه وللجميع عامة

تحذير للجميع من رادارات العين - بوظبي = مع صور اشكال الرادارات اللي يجب التحذر منها

أرجو الإنتباه !!

أرجو الإنتباه إلى رسوم يوم يوم قمة التقليدوالسخرية من العمانين

قواعد المشاركة