حصريا لـ "سبلة السيارات" : تجربتي في صبغ كليبرات سيارتي ..

[أحلام كبيرة]

مراحب بالشباب


انا من هواياتي السيارات
واكثر شي يعجبني في هذا المجال هو الميكانيكا وتوابعه
يعني أصلح الخراب بنفسي .. في البداية أحاول بنفسي وإذا ما قدرت أحل المشكلة أشل السيارة جراج
وفي بعض المرات أقوم بتجميل أو بتركيب شي معين في السيارة بنفسي بدون ما أروح المحلات المتخصصة
طبعا بعد ما أبحث في المواقع والمنتديات المتخصصه من تجارب أشخاص آخرين وأشوف إمكانياتي وأبدأ العمل



اليوم جايب لكم تجربتي الخاصه واللي فيها صبغ كليبرات السيارة
كلنا نلاحظ السيارات الرياضية يكون الكليبرات مصبوغة مما يعطي السيارة شكل جذاب أكثر
وتختلف الألوان .. أصفر أحمر أزرق و.. ألخ




طبعا في يوم من الأيام .. كنت عند أحد المحلات بدون ذكر المحل ( يعرض شغلات في السبلة ) وشفته يصبغ كليبرات لأحد السيارات فسألته بكم تصبغوهن .. رد علي وقال بـ 35 ريااااااااااااااااال !!!!
يمكن توجد أماكن أخرى في الصناعية أنا ما رحت لها وسعرهم أقل


لكن بما اني أحب هالسوالف .. قلت خلني أسويهن بنفسي وبأقل تكلفة وأفيد الشباب اللي يريد يعمل هالحركة على سياراتهم



الخطوات اللي أتبعتها :

أولا توقف السيارة على مستوى مستقيم بحيث ما يكون نازل من جهة ( لأنك راح ترفع السيارة بالكامل )

راح تحتاج لأربع طابوقات وأربع ألواح ( مربعه )

الصبغ اللي أستخدمته هو السبريه ( الرش ) الأحمر العدد 2 يكفي و " يفضل تآخذ 3 إحتياط " .
يفضل شراء DW-40 مكافح الصدأ .. " راح تستخدمة في تنظيف الكليبر وبعض أجزاء البيرينج قبل الصبغ أو الرش ( يفضل تشتري صغير ما أعرف كم قيمته )







بداية تقوم بتنسيم البلوط عشان تقوم بفك التواير بأربعهن .. وتقوم برفع كل جهة على حده
يعني تجي للتاير الأمامي وترفع السيارة وتفك التاير وتحط الطابوقه وفوقها المربعه وتنزل السيارة على الطابوقة ( ملاحظة مهمه : المكان اللي تحط فيه الطابوقة يكون مكان صلب ويتحمل وزن السيارة , حاول تحطه على الشاصي ولا تحطة على الطرف مكان الجيك اللي ترفع به السيارة )

وتقوم بالعملية على جميع التواير إلى أن تكون السيارة واقفة على الطابوق ( بيطلع شكلها جلحا ..هاهاها )


المهم





العملية الأولى وهي رش الأماكن اللي فيهن صدأ والكليبرات بس على الخفيف وتنظفهن على طول بـمنشفه ( ملاحظة مهمه : لا تقوم برش الدسك أو البيرنج مكان الإحتكاك بين السفايف والدسك , وأيضا لا ترش الأماكن المذكورة كثيرة .. فقط قليلا جدا وتقوم بعدها بتنظيفة بالمنشفه )
















العملية الثانية وهي أنك تقوم بغلق جميع المنافذ المؤدية للدسك بالجرائد مثل ما موضح في الصور










( ملاحظة مهمة : يجب عليك غلق كل المنافذ .. لكي تظهر النتائج جميلة وراقيه مو شغل لعب صغيريين
وأيضا كل المساحات الأخرى للبدي الداخلي والخارجي مثل ما موضح في الصور)



العملية الثالثة وأهم عملية وهي الرش ( سبريه ) الأحمر
تقوم برش السبريه بطريقة واحده ومن نقطة معينه مع التحريك
يعني لا تقم بتركيز مدة وقت الرش على مكان معين وبعدها يقطر الصبغ
حاول ترش وتحرك يدك على جميع الأماكن عشان يتوزع الصبغ بالتساوي على جميع الأماكن
( ملاحظة مهمه : لما تقوم بالرش .. توجد أماكن ما يوصل لها الرش .. وبعض الأجزاء اللي ملتصقة بالجرائد من الجنب .. ف تحاول تضرب هالأماكن بالرش بدقه يعني تحرك الجريدة أو تضغط عليها عشان ينكشف المكان بس لا ترش الدسك حاول قدر الإمكان )

(خطوة مهمه جدا جدا : حاول ترش كامل .. بعدها تخليه ثلاث - خمس دقائق وترشة مرة أخرى كامل .. لكي يكون الصبغ دبل ويعطي لون أفضل )

















بعد ما تقوم بالرش .. تترك السيارة لمدة ساعتين ليجف الصبغ بالكااااااااامل



روح ريح .. وتمشى شوي .. واشرب شاهي مثلا .. أو ديو أحسن




..


..



...


...



...


..



أكيد متحمسين للنتائج


..


.. بس بعد الساعتين ما خلصن !!


..


..


..


وصلنا بعد الساعتين

راح نقوم بفك الجرائد بخفه عشان ربما يوجد اماكن بعدها ما جافة


وراح نحصل على هذي النتائج


























وتترك السياره نص ساعه على الأقل بدون الجرائد قبل تركيب التواير






وأخيرا تقوم بإرجاع التواير( لا تنسى الطابوق تحت السيارة .. هاهاها )
تقوم بهالعملية بحذر وما تستعجل






بعدها الصور النهائية بعد تركيب التواير




















ملاحظات ما بعد التجربة :
السيارة طلعت بشكل أحلى من السابق
الصبغ أو الرش المستخدم جودتة ضعيفة فيمكن على الأمد البعيد بيتقشر ( لأنه الجزء المصبوغ راح يتعرض لحرارة علية جدا ) لكن يعني يجلس تقريبا سنه إلا إذا أستخدمت رش أفضل ويتحمل الحرارة فأمورك طيبه
حاول تطبق الطريقة الصحيحة وما تستعجل عشان تحصل على النتائج المرجوه
بأمانة التجربة كانت متعبة قليلا في عملية فك وتركيب التواير .. لكن مع النتائج ترتاح نفسيا أنك قمت بالعمل بنفسك

التكلفة :
3 سبريه ... بـ 1.500
DW-40 .. بـ ريال
منشفة .. حدود 500 بيسة عدد 2
ديو 250 بيسة الكبير 500 مل

المجموع .. 3.250 ريال !!





وهذي هي تجربتي الحصرية فقط على سبلة السيارات
طبعا اللي حاب ينقل الموضوع الرجاء ذكر المصدر و من عملي
وعذروني على رداءة الصور
التصوير كان من خلال هاتفي المحمول
وإن شاء الله توفقت في سرد التجربة


اللي عنده أي أستفسارات .. أرحب بإستفساراتكم


إن شاء الله التجربة تكون مفيدة وممتعه





قريبا : تجربتي في تبديل فلتر المكيف لألتيما 2008 و البايثفيندر 2006

صورة تشويقية للتجربة القادمة
فلتر مكيف سيارتي بعد ما فكيته اليوم من مكانة !!!!!




وبشتري جديد طبعا






تحياتي

[بيرناندو]

قسم بالله انته سوالف

ترتيب فنان

انزين ما يضر

[HASSASOMAN]

جهد مميز وتجربة أكثر من راااائعة صديقي
وتشكر ع الشرح الوافي للتجربة
تحياتي

[Abo0d90]

شغل عدل ...

لك الشكر و التقدير .

[تغاريد الفرح]

ما شاء الله عليك ^_^ لو اني ما من مؤيدين صبغ الكليبرات
لكن جهد ما شاء الله _ تشكر عليه كثير
وتشويق حلو لتجربتك القادمة
بانتظار نقل اثرها لنا

[Hyundai World]

تباع بعض الكفرات بعدة الوان بعضها بشعار بريمبو والاخرى بدون شعار وهي افضل من الصبغ

ولكن عملك ومجهودك جميل ومنسق ورائع

وهوه مثل ماذكرت اقل تكلفه ,, فـ للاسف الاغلبيه حتا على الاعمال البسيطه ياخذها للكراج او للمحل .. ويقوله تكلفه مبالغ فيها جدا بالمقارنه مع العمل الي يقوم به ..

والشخص عندما يقوم بعمل ما بنفسه لسيارته .. سوف يحس بالتغيير ويرتاح لأمانة الشغل اكثر من اي كراج او شخص اخر يقوم به

كل التوفيق للجميع

[zr1farsi]

يارب تكثر هذي المواضيع بهذ القسم عشان نستفيد ويطور اكثر

[أحلام كبيرة]

قسم بالله انته سوالف

ترتيب فنان

انزين ما يضر

مشكور صاحبي ع المرور

جهد مميز وتجربة أكثر من راااائعة صديقي
وتشكر ع الشرح الوافي للتجربة
تحياتي

العفو حساس

تسلم على المرور الجميل
فك والتركيب متعب قليلا ما مثل محلات الإطارات بالمكيينه ف دقيقة يخلصهن كلهن

شغل عدل ...

لك الشكر و التقدير .

مرورك العدل أخي

نورت الموضوع
أشكرك

ما شاء الله عليك ^_^ لو اني ما من مؤيدين صبغ الكليبرات
لكن جهد ما شاء الله _ تشكر عليه كثير
وتشويق حلو لتجربتك القادمة
بانتظار نقل اثرها لنا

يسلموا ع المرور الجميل

التجربة القادمة إن شاء الله تكون تجربة مفيدة لملاك كلا السيارتين

تباع بعض الكفرات بعدة الوان بعضها بشعار بريمبو والاخرى بدون شعار وهي افضل من الصبغ

ولكن عملك ومجهودك جميل ومنسق ورائع

وهوه مثل ماذكرت اقل تكلفه ,, فـ للاسف الاغلبيه حتا على الاعمال البسيطه ياخذها للكراج او للمحل .. ويقوله تكلفه مبالغ فيها جدا بالمقارنه مع العمل الي يقوم به ..

والشخص عندما يقوم بعمل ما بنفسه لسيارته .. سوف يحس بالتغيير ويرتاح لأمانة الشغل اكثر من اي كراج او شخص اخر يقوم به

كل التوفيق للجميع

بصراحه أخي هيونداي ما خطرت في بالي هالكفرات ولا كنت بفكر إيش بسوي
لكن الصبغ اللي عملته ليس بالسيئ

صراحه ارتحت كثير بعد ما أنجزت العمل اللي سويته نستني كل التعب


أسعدني مرورك

[بطل عمان]

تجربة مفيدة اخي الكريم شاكل لك عالمجهود والطرح

[الإرهابي]

أحلام كبيرة الطريقة حلوة للصبغ ولكن عندي بعض النقاط..
أولا إنت استخدمت صبغ عادي وهذا ممكن يتقشر بعد فترة..هناك نوعية من الصبغ يسمى بالصبع الناري ويباع في علب مضغوطة بحدود 6 ريال يمسك أكثر ولا يتأثر بالحرارة..
إنت صبغت كل حاجة في الكاليبر ومن مكوناته الربلات الصغار الموجودة في البلط الطويل اللي يتحكم في البستنات لما تضغط البريك وربلة موقع البليدينج (الربلة الصغيرة فوق الكاليبر من الخارج على الكورنر) وهذا ممكن يسبب لها تيبس لاحقا ويأثر عليها ..لو كنت شلتها من مكانها قبل الصبغ بيكون افضل
اتمنى ما يكون الرش وصل لربلات البساتن اللي تضغط على السفايف لأنها تتأثر على طول وتعمل تيبس وما يخليها تضغط على السفايف بشكل سلس اثناء الضغط على البريك ونفس الالة للسفايف نفسها..لأنك لما تضغط البريك ترتخي السفايف شوي عشان تنزل نتائح الحك من الرماد الناتج من البريك..

[أحلام كبيرة]

يارب تكثر هذي المواضيع بهذ القسم عشان نستفيد ويطور اكثر

إن شاء الله نقدم الأفضل

تجربة مفيدة اخي الكريم شاكل لك عالمجهود والطرح

تسلم ع المرور أخي
نسعى لنقدم الأفضل

أحلام كبيرة الطريقة حلوة للصبغ ولكن عندي بعض النقاط..
أولا إنت استخدمت صبغ عادي وهذا ممكن يتقشر بعد فترة..هناك نوعية من الصبغ يسمى بالصبع الناري ويباع في علب مضغوطة بحدود 6 ريال يمسك أكثر ولا يتأثر بالحرارة..
إنت صبغت كل حاجة في الكاليبر ومن مكوناته الربلات الصغار الموجودة في البلط الطويل اللي يتحكم في البستنات لما تضغط البريك وربلة موقع البليدينج (الربلة الصغيرة فوق الكاليبر من الخارج على الكورنر) وهذا ممكن يسبب لها تيبس لاحقا ويأثر عليها ..لو كنت شلتها من مكانها قبل الصبغ بيكون افضل
اتمنى ما يكون الرش وصل لربلات البساتن اللي تضغط على السفايف لأنها تتأثر على طول وتعمل تيبس وما يخليها تضغط على السفايف بشكل سلس اثناء الضغط على البريك ونفس الالة للسفايف نفسها..لأنك لما تضغط البريك ترتخي السفايف شوي عشان تنزل نتائح الحك من الرماد الناتج من البريك..

ملاحظاتك في محلها الإرهابي
المشكلة وانا أخوك كل ما تروح محل زينة السيارات كل واحد يقول لك هذا اصلي وهذا اصلي
ما تعرف من اللي صادق
آخر رحت محل أدوات بناء وخذيته من هناك
واعرف انه بعد فترة بيتقشر وذكرت ذلك في الموضوع لكن يمشي الحال


إن شاء الله يكون ما وصل للربلات .. لأني ما ركزت على المنطقة الخلفية من الكليبر فقط المنطقة الأمامية والجانبية .. راح أكون متابع له بين فترة وفترة وإن شاء الله بشيك عليه لما أبدل السفايف

أشكرك على الملاحظات اللي إن شاء الله راح آخذها مع الشباب اللي يحب يصبغ بعين الإعتبار

[الإرهابي]

أشكرك على تقبل ملاحظاتي عزيزي..
إذا حبيت مرة ثانية تصبغ أو أي أحد خبرني وانا أوفر لك صبغ ناري..عندي اعتقد بالبيت علبتين أو 3 متوفرة باللون الأحمر..ماخذها من دبي

[أحلام كبيرة]

أشكرك على تقبل ملاحظاتي عزيزي..
إذا حبيت مرة ثانية تصبغ أو أي أحد خبرني وانا أوفر لك صبغ ناري..عندي اعتقد بالبيت علبتين أو 3 متوفرة باللون الأحمر..ماخذها من دبي

تسلم أخي
كلك ذوق

[RED SS]

اهم حاجه لما تروح تغسل السياره قوله لايسوي بريشر هناك لانه بيطير الصبغ

هذه سيارتي

[tricky]

تجربة حلوة وجميلة

بس سؤال : الصبغ المستخدم في هذي التجربة ما راح يتقشر بعد فترة بسيطة ؟

شكرًا لك

[المحيط الهادئ]

خمس *****نجوم لهذا الموضوع
ابداع اخي احلام كبيرة وعقبال ما نشوف اعمالك القادمة

[fire under ash]

شغل جميل عزيزي ، بس الرش جودته ضعيفه جدا + بالاضافة انه بعد شهر او شهرين بتبدا تحس انه لمعته تقل كثير ..!

انا اول مره صبغتهم في ورشة سيارتي و كان فعلا شغلهم نظيف و دقيق بس قيمتهم تعتبر كانت مرتفعه نوعا ما اتوقع كان ب 40 او 30 ريال ... بعد سنتين بدا يتقشر لكن بشكل خفيف جدا جدا ، و رحت على طول اشتريت فرشات تلوين بعدة احجام اصليه طبعا + و صبغ خاص للحديد مع الهاردتر من ورشة تكنيك اللي بالغبره نصف لتر تقريبا و ما كلفني كل هالاغراض منهم غير 6 ريال و قمت بصباغتهن بنفسي بالمنزل بس بامانه الصبغ محتاج خلط دقيق 50 بالمية صبغ مع 50 بالمية هاردنر و خلطه و من ثم الصباغه بالفرشاه بشكل خفيف لازم تكون !

و الامور طيبه و الحمد لله و الصبغ مكانه ما مستهلك و يكفي ل 4 مرات صباغه على ما اظن ، ف تقدر من يجف الصبغ انك تعيد الصباغه مره ثانيه عشان تعمل طبقتين للصبغ على الكاليبرز بحيث ما تتقشر ولو 4 سنوات

و بالنسبة لشغلك ف جميل لكن ملاحظ انك صبغت كامل كل شي رشيته ، على سبيل المثال السفايف لاحقنهن الصبغ من الجنب و لما يبدين يستهلكن عندك فاتوقع فيه احتماليه خفيفة يسويلك صوت مع تقشر الصبغ من السفايف من الجنب و لكن ما اعتقد بيكون صوت واضح ... عموما لو ظهرت عندك اي مشاكل للبريك من قلة سلاسة بالاستجابة بسبب الصبغ او غيره لما يتيبس ف ضروري تشتري brake cleaner لكن احذر و اشتري امريكي او الماني ، لا تشتري النوعية الصينيه ! و يباع ف اغلب المحلات !

و البريك كلينر لا تكثر منه لانه ينظف بعد السفايف و الدرام ويل فاحتمال يستهلك حاجه بسيطة من طبقة السفايف لتنظيفها ..

موفق ان شا الله و تسلم على الموضوع

[أحلام كبيرة]

تجربة حلوة وجميلة

بس سؤال : الصبغ المستخدم في هذي التجربة ما راح يتقشر بعد فترة بسيطة ؟

شكرًا لك

والله ما عندي فكرة عن المدة اللي يستغرقها لين يتقشر
بس اللي اعرفه انه بعد فترة راح يتقشر حسب ما أشاروا الأخوة من تجربتهم



تسلم ع المرور

[أحلام كبيرة]

خمس *****نجوم لهذا الموضوع
ابداع اخي احلام كبيرة وعقبال ما نشوف اعمالك القادمة

مشكووور ع المرور الجميل
بعده تجربتي الأولى وعليها ملاحظات كثيرة وإن شاء آخذ بجميعهن بعين الإعتبار
وإن شاء الله في التجارب القادمة تقل الملاحظات

[أحلام كبيرة]

شغل جميل عزيزي ، بس الرش جودته ضعيفه جدا + بالاضافة انه بعد شهر او شهرين بتبدا تحس انه لمعته تقل كثير ..!

انا اول مره صبغتهم في ورشة سيارتي و كان فعلا شغلهم نظيف و دقيق بس قيمتهم تعتبر كانت مرتفعه نوعا ما اتوقع كان ب 40 او 30 ريال ... بعد سنتين بدا يتقشر لكن بشكل خفيف جدا جدا ، و رحت على طول اشتريت فرشات تلوين بعدة احجام اصليه طبعا + و صبغ خاص للحديد مع الهاردتر من ورشة تكنيك اللي بالغبره نصف لتر تقريبا و ما كلفني كل هالاغراض منهم غير 6 ريال و قمت بصباغتهن بنفسي بالمنزل بس بامانه الصبغ محتاج خلط دقيق 50 بالمية صبغ مع 50 بالمية هاردنر و خلطه و من ثم الصباغه بالفرشاه بشكل خفيف لازم تكون !

و الامور طيبه و الحمد لله و الصبغ مكانه ما مستهلك و يكفي ل 4 مرات صباغه على ما اظن ، ف تقدر من يجف الصبغ انك تعيد الصباغه مره ثانيه عشان تعمل طبقتين للصبغ على الكاليبرز بحيث ما تتقشر ولو 4 سنوات

و بالنسبة لشغلك ف جميل لكن ملاحظ انك صبغت كامل كل شي رشيته ، على سبيل المثال السفايف لاحقنهن الصبغ من الجنب و لما يبدين يستهلكن عندك فاتوقع فيه احتماليه خفيفة يسويلك صوت مع تقشر الصبغ من السفايف من الجنب و لكن ما اعتقد بيكون صوت واضح ... عموما لو ظهرت عندك اي مشاكل للبريك من قلة سلاسة بالاستجابة بسبب الصبغ او غيره لما يتيبس ف ضروري تشتري brake cleaner لكن احذر و اشتري امريكي او الماني ، لا تشتري النوعية الصينيه ! و يباع ف اغلب المحلات !

و البريك كلينر لا تكثر منه لانه ينظف بعد السفايف و الدرام ويل فاحتمال يستهلك حاجه بسيطة من طبقة السفايف لتنظيفها ..

موفق ان شا الله و تسلم على الموضوع

أشكرك جزيل الشكر أخي على الرد الجميل وقلّت خبرتي هي سبب كل هالملاحظات ( وكل ملاحظاتك على عيني وراسي )
إن شاء الله راح أتعلم من هالتجربة أشياء كثير
فأكيد ما كل شخص ينجح من المرة الآولى

انا رشيته كامل .. لأني لما كنت عند المحل المتخصص كان يستخدم رش بالغاز مثل اللي يستخدموه في صبغ السيارات , وكان مسوي نفس الحركة والخطوات اللي طبقتها انا على سيارتي

سؤال : هل يستحسن أني أقوم باللي قمت انت فيه من الآن .. أو أنتظر لحد ما يتقشر ولكل حادثة حديث ؟؟

[أحلام كبيرة]

اهم حاجه لما تروح تغسل السياره قوله لايسوي بريشر هناك لانه بيطير الصبغ

هذه سيارتي

إن شاء الله

تسلم ع النصيحة
وجزاك الله خير

[Tiida BoYz]

كم نجمه تريدني اعطيك ع هالمجهود الاكثر من ممتاز

شي مميز جداا وفخر لنا هالشياء يسويوها اعضاء منتدانا الغالين
الف شكر ع الطريقه النظيفه والرائعه

[al7arthii mswahili]

ما شاء الله عليك وسيارتك اشوفها ف التقنيه

[supa snake]

حلوه هذي المواضيع العمليه

تذكرنا بدروس العلوم ايام الدراسه

موصوع مميز كفكره

لكن انا مع البعض بان الاهتمام بجودة الصبغ شيء اساسي لقطعه يتطلب فكها مستقبلا جهدا اضافيا

[fire under ash]

أشكرك جزيل الشكر أخي على الرد الجميل وقلّت خبرتي هي سبب كل هالملاحظات ( وكل ملاحظاتك على عيني وراسي )
إن شاء الله راح أتعلم من هالتجربة أشياء كثير
فأكيد ما كل شخص ينجح من المرة الآولى

انا رشيته كامل .. لأني لما كنت عند المحل المتخصص كان يستخدم رش بالغاز مثل اللي يستخدموه في صبغ السيارات , وكان مسوي نفس الحركة والخطوات اللي طبقتها انا على سيارتي

سؤال : هل يستحسن أني أقوم باللي قمت انت فيه من الآن .. أو أنتظر لحد ما يتقشر ولكل حادثة حديث ؟؟

كان بامكانك عاد تبطل السفايف بكل سهولة دام مبطل الاطارات ، كلها ثانيتين لتبطيل السفايف ، و بالاضافة انه الطبقه الخلفيه الظاهرة باللون الاسود هذيك اغلبهم ما يصبغوها ، عشان لما تركبها تطلع البريكات منظرهن احلى بلونين ، على سبيل المثال اللون الاحمر للحديد + لون الاصلي لكوفر السفايف اللي يبين من الخلف يكون اسود ، ف يعطي حركه حلوة باعتقادي ، بس بالنهاية اذواق


و بالنسبة لسؤالك عزيزي ف يعتمد حسب " البارض " اذا حاس فاضي و فيك بارض ف توكل على الله و سوي و انا حاضر للمساعدة ، و لكن دامنك تو مسوي هالحركه ف جربها كم شهر و شوف معدل تماسك الصباغه عن طريق هالسبراي اللي شارنه و خبرنا لكم شهر ظل صامد ؟!

السبراي كل مره ترشه ماي بتنقص لمعته ، لكن ميزة الصبغ انه تظل لمعته مثل هي باهية بعد كل غسله للبريكات ... و عادي صدقني لو رحت ورشة تكنيك بالغبره بيشرحولك بسهوله كيف خلط الاصباغ و طريقة وضعه و كذا و لكن نصيحه مثل لحين بطل التاير كامل ، ترا الصبغ سريع ييبس ع الرنج و يحتاجلك عاد تونر لو بغيت تشيله من الرنج ! طبعا سرعة جفاف الصبغ يعتمد على كمية الهاردنر اللي خالطنه للصبغ ...! و حاجه ثانيه لما تروح تشتري الصبغ خبرهم انك تريد النوعية اللي تكون جاهزة للمواد الحديدية و الي تكون بدون طبقة اللمعه ! لانه طبقة بودي السيارة يجي طبقة اللون + طبقة اللمعه + الهاردنر و يتم خلطهم جميعا ، لكن للبريك ما تحتاج طبقة اللمعه ..!

موفق عزيزي و الشغل ممتع مع السيارات لكن اهم شي بعيدا عن الشمس و الحرارة

[fire under ash]

اهم حاجه لما تروح تغسل السياره قوله لايسوي بريشر هناك لانه بيطير الصبغ

هذه سيارتي

مثل هالحركه اخي طارح الموضوع ، شوف بالنص لخلفية السفايف مثل لونهن بالوكالة اسود ، و باقي البريك هو اللي يتم صباغته ..! عشان بهالركه تقدر تضمن انه الصبغ ما يلحق للسفايف ابدا ابدا لانه يخرب الدرام ويل حسب كلام الاخوان في الجراجات ..!

عموما الرش لا يشكل طبقة عاليه مثل الصبغ ، فما اتوقع انه بياثر على الدرام ويل عندك ولا السفايف ...

و الاس اس رهيب يا رد اس اس

[fire under ash]

و اما بالنسبة لل دي دبليو 40 فما مصنوع خصيصا للامور الاستهلاكية مثل السفايف ، فمثل نصحتك خذلك بريك كلينر من اي محل ادوات زينة السيارات و خذلك ماركه امريكية او المانية و تقدر ترش كل اجزاء البريك و الدرام ويل ! بالاضافة انه يزيل صدأ او الاوساخ المتراكمه في نظام البريك و يزيل اصوات السفايف و اصوات لما تشيل رجلك من البريك اللي تظهر بالدرام ويل و غيره و غيره ...!

[الصبح المنير]

شغل حلو .. و التجربة اروع

يعطيك ال GT-R

[Benjamin Button]

جميل جداً أخي الكريم .. جهد يشكر فيذكر.
وبالتوفيق إن شاء الله.

[nawaf1992]

انا بعد سويت نفس الحركه قبل 5 اشهر تقريبا
بس بعد كم شهر تحس ان الضصبغه تصبح باهته مافيه لمعه فـ الأفضل انك تشترى صيغ وتصبغهم بفرشاه بيكون اللون اكثر لمعه ويبقى لمده طويله


موفق أخوي