قاله هين ساير ؟ ... قاله ساير الدوام

[المندوب السامي]

صباح الخير

المندوب : صباح الخير أستاذ مشهور
مشهور : صباح الخير المندوب ... زارتنا البركه
المندوب : ما شاء الله الشباب كلهم هنا اليوم ، بالعاده ما نشوفهم هنا
مشهور : هيوا ، مرات يطلعوا برع يستوي عندهم مهمات ، ومرات حد منهم إجازات ... أما اليوم كلهم مداومين الحمدلله ... يعني كما يقولوا ... فول هاوس
المندوب : مداومين ، ولا يشتغلوا ؟
مشهور : موه الفرق المندوب ، صاه بو مداوم ساير يشتغل ، وبو يشتغل صاه مداوم ... مالك إنته دومك كذاك تسويلنا كما الألغاز ؟
المندوب : أستذا مشهور أنا بصراحه مصدوم ... مصدوم بشدة
مشهور : سلامات سلامات ... من بو صادمنك ؟ ... عسى محد تعور ؟
المندوب : هاعه أنا ما مدعوم ولا داعم ... انا قصدي مصدوم فيك إنته
مشهور : مصدوم فيي أنا !!!؟ خير إن شاء الله !!!! موه هناك ؟
المندوب : مصدوم ، إنك بعد ذي الخبرة الطويلة ، وذا السجل الحافل بالإنجازات ، وبعدك علين تو ما تعرف الفرق بين الدوام والشغل
مشهور : وموه الفرق ؟ ... حنه من 20 سنه فذي المؤسسة نقول بو ساير الدوام ، يعني ساير يشتغل
المندوب : أخوي مشهور (بسك من استاذ أستاذ ، طلعت غشيم أصرك) ، الدوام يحسبوه بالساعات ، يعني دوامك من الساعه كذا على الساعه كذا
مشهور : والشغل بموه يحسبوه ؟ صاه نوبه لهيه السالفه ... ولا باغي تسويلي "هين ذنينك يا جحا؟" كما العاده ؟
المندوب : هاعه هاذي ما يخصها فذنين جحا ولا مناخر أشعب ، هذا علم - الله هداك - هذا علم
مشهور : إنزين هات قول ... نورنا بذا العلم ... طاح شعر راسنا كله وحنه بعدنا لنتعلم من المندوب ورباعته ولاد البارحه
المندوب : أخوي مشهور .... بيكون ما تزعل يوم اقولك أخوي؟
مشهور : هاعه ما أزعل ... الله يصرف بليسك ضغطتني ... خلصني الشيمه ، وراي شغل باغي أخلصه
المندوب : هااااااااااااااااااااه ... جات والله جابها
مشهور : من هيه ذي بو جات ؟ ... مالك باه المندوب بيكون شارب شي ؟
المندوب : (بو ينهض من الكرسي ويدور دوره كامله ويخلي يدينه على مكتب مشهور) .... لا لا لا ... ما حرمه بو جات ما حرمه ... عقلكم إنتوه الشياب دومه يسير رونج سيد
مشهور : وابوي ... اشوفك وقفت واقف ... على موه ناوي !!!؟؟؟
المندوب : ناوي أخبرك الفرق بين الدوام والشغل ... الدوام كما خبرتك ... فترة زمنيه تقضيها في موقع عملك ... أما الشغل غير ... الشغل إنجاز ... يعني موه أنجزت خلال الوقت بو داومت فيه ؟
مشهور : وحدي دار رأسي نعم ... تو إنته موه باغي تقول ؟
المندوب : باغي اقول إنك إنته تو مداوم لكن ما تشتغل ، وقبل شوي قلت إنه وراك شغل (مدري ليش شغلكم دوم ورا ما قدام !!!؟) ... يعني باغني أسير عسب تسوي شغلك ... ما كذاك ؟
مشهور : هيوا صح ... عندي شغل متأخر وباغنه سعادته قبل نهاية الدوام
المندوب : هذا حنه بو هالكنا ... باغنه سعادته وباغنه معاليه ... بو باغنه البوس لازم ايتم حتى لو تداوم على الليل ، ولا بو ما سائل عنه البوس لو يخرس سنه فالطاوله محد يحرك ساكن
مشهور : تو بالله عليك ... باغني أقلب ألوليات عملي ؟ ... يعني أخلي طلبات سعادته آخر شي ، وأجلس أشتغل فالمعاملات العادية ؟ عجب كدينا باه ... كما يقول الآخ سعيد راعي الشريجه "تغانينا"
المندوب : يا مشهور يا أخوي ... هذا ما موضوعنا ... سوي أولوياتك بالطريقه بو تريحك ... المهم اشتغل ... لكن لا تحسب وقت الدوام على أنه وقت شغل
مشهور : عجب حنه لو جلسنا نحسب المسائل على ما تقول إنته ... ما نشتغل 10% من الوقت بو نداوم فيه
المندوب : وهذا مربط الفرس ... الزين فينا بو يقول أنا وأنا .... ما يستغل أكثر من 20% من وقت الدوام ... أما الدوام فمداومين تمام ... لا ناقص دقيقه ولا زايد دقيقه (الحق ينقال)
مشهور : وهذيلا بو نشوفهم يوميا جالسين فمكاتبهم ويشتغلوا ؟
المندوب : أخوي مشهور ... هذيلا مداومين ما يشتغلوا ... الوقت بو الإجتماعات والوقت بوالتلفون والوقت بو الإيميل والوقت بو الإنترنت والوقت بو الريوق والوقت بو الصلاة والوقت بو الزيارات ... وقت ما فيه شغل وما يضيف شي للإنتاج ... حسب ذا الوقت كله وشوفه كم يستغرق من وقت الدوام ؟

يا جماعه ... طلب بسيط ...
- حسبوا الوقت بو تقضوه في الأنشطة التي لا علاقة لها بالمهام الرئيسية لوظايفكم ... أتلقيوه يتعدى الـ 75%
- موه بقى عجب وقت للإنتاج ؟ 25% ؟ ... واجد عجب ... يعني الشغل بو باغي يوم يجلس على الأقل 4 ايام ... ما كذاك ؟
- ما نتنرفز يوم حد يقولنا إنه حنه نأخر معاملات الناس ولا نتأخر على المسؤول في تقرير أو اي شي ... لازم شيه .. يوم نشتغل ربع وقت دوامنا موه قايمين ننجز ؟

أرجوكم أرجوكم ... غيروا مصطلح الدوام إلى مصطلح الشغل ... وبو يسالكم هين سايرين ... قولوا سايرن نتشغل ما تقولوا سايرين الدوام

وبو ما زين ما زين

وايقونات ما أعرف أحط

وعاد الباقي عليكم

[الأمير خالد]

لحظه اقرأ

[البنفسج]

الشيوبة امبونهم ما يعرفوا يحطـوا ايقونات ..

[وردة حياة]

جميل جدا جدا

[المندوب السامي]

لحظه اقرأ

عجب أقصانا نحرص

الشيوبة امبونهم ما يعرفوا يحطـوا ايقونات ..

وما يلهم بارض ما لما يعرفوا

جميل جدا جدا

وجودك الأجمل (تعابير شيوبه شيه)

[up to the sky]

موضوع رائع وسمحولي بروح عنكم عندي شغل تابع للدوام
كذاك صح شيه المندوب؟

ينجم ذا الموضوع بسبعتعشر نجمه ويا ليت بعض الناس يفهمو المغزى

[البنفسج]

توني فالشغل ..

[المندوب السامي]

موضوع رائع وسمحولي بروح عنكم عندي شغل تابع للدوام
كذاك صح شيه المندوب؟

ينجم ذا الموضوع بسبعتعشر نجمه ويا ليت بعض الناس يفهمو المغزى

صح كذاك هيوا
مسموحه باه مسوحه ، سيري حللي معاشش
ماشي مغزي ولا شي ، ما تجلسي تسويلنا مشاكل

[المندوب السامي]

توني فالشغل ..

ومتى أيخلص دوامش ؟

[up to the sky]

صح كذاك هيوا
مسموحه باه مسوحه ، سيري حللي معاشش
ماشي مغزي ولا شي ، ما تجلسي تسويلنا مشاكل

ما شاء الله علي دائما وابدا شاطره
انته نوبه صدقت كيه انا مخلصه شغلي
يعني افرح بنورلك موضوعك اليوم
عب كأني احس انك تقصد اشخاص معينين بكلامك

[الأمير خالد]

صح كذاك هيوا
مسموحه باه مسوحه ، سيري حللي معاشش
ماشي مغزي ولا شي ، ما تجلسي تسويلنا مشاكل

بالله ضحكتني

[ترويحي مجنون]

ابو رعد .. كيفك ؟


للاسف صرت مثل موسى الفرعي .. بصعوبه التواصل معك..
موسى قبل لايستوي مذيع كان نقدر نحاكيه .. والحين خليها ع الله
وانت ماعرفنالك ..


عموما .. طمنا عليك وعلى الصغيرين ...

[المندوب السامي]

وابوي ... لبو يقرأ يسير !!!!!
تو المشاركة هنا تعتبر إنجاز صلها ... ما تخافوا
يعني يضيف قيمة للصالح العام

(تو موه ذي الورطة بو أنا تورطها !!!!؟)

[المندوب السامي]

ما شاء الله علي دائما وابدا شاطره
انته نوبه صدقت كيه انا مخلصه شغلي
يعني افرح بنورلك موضوعك اليوم
عب كأني احس انك تقصد اشخاص معينين بكلامك

خلا أكوه عندش نوريه محد قابضنش
هاعه ما أقصد حد ... لا معينين ولا مفنشنين

[المندوب السامي]

بالله ضحكتني

إضحك انته العود ... صاه الدنيا ليومين باه
ما دامنك قادر تضحك لتقصر ... ضحك ليل ونهار

[دمعة أمـل]

كيف دواماتكم
قصدي شغلكم ؟

[البنفسج]

ومتى أيخلص دوامش ؟

ما عندي دوام أجي أشتغل وأرجع ..

[المندوب السامي]

ابو رعد .. كيفك ؟


للاسف صرت مثل موسى الفرعي .. بصعوبه التواصل معك..
موسى قبل لايستوي مذيع كان نقدر نحاكيه .. والحين خليها ع الله
وانت ماعرفنالك ..


عموما .. طمنا عليك وعلى الصغيرين ...

ود الحلال موسى عنده بروتوكول ، أما أنا لا بروتوكول ولا شي
بروتوكولي أم رعد وربشتها ... الحمدلله الأولاد كلهم بألف خير
تصدق لو قلت لك ما متفيق أحك رأسي ؟
لكن مرات أشتهي الترويح ... كما بو ضاري على نشوق

[المندوب السامي]

كيف دواماتكم
قصدي شغلكم ؟

النص كذا والنص كذا
يعني أمرار نداوم بلا شغل ، وأمرار نشتغل حتى لو ماشي دوام
يعني كما الخنباشه ... في غياب سيستم شخصي يومي للواحد

[المندوب السامي]

ما عندي دوام أجي أشتغل وأرجع ..

عجب كما اليابانيين يوم ماشي شغل فالمكتب ما يداوموا

[دمعة أمـل]

النص كذا والنص كذا
يعني أمرار نداوم بلا شغل ، وأمرار نشتغل حتى لو ماشي دوام
يعني كما الخنباشه ... في غياب سيستم شخصي يومي للواحد

أحلى شئ السيستم الشخصي

[camellia rose]

ياخي الخط متراص مارمت اقرأ

.
.
بس اكيد ارجع اقرأها ع فاقه

[المندوب السامي]

أحلى شئ السيستم الشخصي

ما سمعتي أغنية ... "كيف نعيش بلا سيستم" ؟
هاذي نزلت بعد دعاية السعوديين ... "كيف نعيش بلا كابريس"

[الأمير خالد]

المشكله طابقه فلساني اللي يسألني اقوله ساير الدوام

مو الحل عمي المندوب

[المندوب السامي]

ياخي الخط متراص مارمت اقرأ

.
.
بس اكيد ارجع اقرأها ع فاقه

إنزين عجب ... أنحرصش لين تتفيقي
تو الوقت بو قضيتيه هنا يعتبر دوام بس
وقت الشغل هو وقت الإنجاز ... يعني من تقريي

[الأمير خالد]

المندوب لو تصير مشرف الترويح يكون أحسن

[Royal Queen]

المندويّ هين سرت فـ الأجازة؟

أترخص عندي شغل

[دمعة أمـل]

ما سمعتي أغنية ... "كيف نعيش بلا سيستم" ؟
هاذي نزلت بعد دعاية السعوديين ... "كيف نعيش بلا كابريس"

ما أسمع أغاني

[المندوب السامي]

المشكله طابقه فلساني اللي يسألني اقوله ساير الدوام

مو الحل عمي المندوب

سوي شباصه فشفايفك مكن جانب واحد ... متروم تقول دوام
كلمة الشغل ميحتاجلها تفك حلقك
جرب رص مزابلك من جانب واحد ، وقول دوام وقول شغل

[المندوب السامي]

المندوب لو تصير مشرف الترويح يكون أحسن

مروم حبابي مروم ... أخبصها الدنيا فوق تحت
تو أنا مال سياسه وكذاك ، كيف لو استوي مال ترويح ؟