☺☻(( التـــحــــــدي ))☺☻ ... شاركونا مع مـــــواقف الاعضاء في سوالف التـــحدي هههههههه.. ☺☻

[شهوووودة]

صباح الخير مساء الورد وشذى الطير
صباح هلا اف ام واغنية عبدالله بالخير

اليوم حبيت أطرح لكم موضوع خفيف على القلب والمعدة وأعتقد منكم بيرجع ريوس في ذكرياته ايام الشبابية ( الكلام موجه للشيوبة ) وايضا حياتكم المراهقية ( الكلام موجه حال بو باغين يتزوجوا ) وترجعوا ايام الجنون والطفوله ( الكلام موجه حالي خخخخ ) اليوم خلونا نتكلم سويا عــــــــــن :

يفهم الناس التحدي بطرق مختلفة
كيف تفهم أنت التحدي ؟
التحدي ,,, هل تعرف ما معنى التحدي ... اعتقد احنا العمانين مفسرينها غير سالفة التحدي :- التحدي عندنا هو انك تسابق بالركض او بالسيارة او تتحدى من يخلص يزعط غرشة داغوص او تحدي من يغوص في الماي وما يطلع او تتحدوا من ينام اول ويشخر أكثر او من يجيب الذيب من ذيلة او تتحدوا من يعق سلوم في الطوي او تتحدوا من يكفخ الثاني اكثر ,,, هههه هذي قوية وجديدة بس توقع عادي كل شئ جايز ههه .. الحين خلينا نشوف رأي الاعضاء عن التحدي وما الموقف اللي صعب ينسوه بسبب التحدي من ذكريات ..

أبو جهاد الهنائي ( الدختر )

أنا قايل من أشوف رسالة منك .. أعرف إنه وراها بلاووي وورطة ، عموما التحدي شئ جميل .. وفيه يمكن أن يظهر الشخص مهاراته وقدراته في مجال معين .. ولربما يظهر فيه مدى إصراره وعزيمته على إنجاز وتحقيق ذلك الأمر .. :بو يتفلفس وكأنه في العامة: ، شخصياً أحب التحدي وأعشقه .. وأكره شئ عندي حاجة إسمها الهزيمة .. ما أقتنع أبداً بالهزيمة .. وكما إنتوا شايفين .. الدختر ما يطيق يشوف إسمه إلا على رأس القائمة :بو يغاير بعض الناس: ..
بصراحة فيه مرة من المرات ومن زمان .. يعني أيام الغوص .. أيام الثانوية العامة في مدرسة الخوض الثانوية .. كنت متريش وأروح المدرسة بسيارة وطبعاً بدون ليسن .. المهم ذك الأيام كان الصيف ما كما تو .. نار من خاطر .. وماشئ مظلات .. المهم تحداني واحد من زملائي إني ما أقدر أدخل سيارتي مع سيارات المعلمين داخل المواقف في ساحة المدرسة .. طبعاً إتفقنا على يوم معين .. ومن وراهم رحت وتفاهمت مع الحارس .. وركبوا معاي في السيارة .. عشان يشوفوا كيف الدختر يدخل سيارته .. المهم دخلت وكأنه العيد .. وبعدني ومن شدة الثقة .. قلت لهم .. اليوم ماشئ طابور .. وأنجلس في السيارة وأنشغل المسجل والمكيف .. لييين يخلص الطابور .. قالولي ما تروم .. قلت لهم أروم وبعدني أوقف السيارة مقابل الطابور .. الخاتمة وقفت السيارة نعم مقابل سارية العلم مع السيارات الثانية .. وجلسنا في السيارة مستمتعين .. الله يجازي بليس معلم الرياضة .. وقت الإذاعة .. قام وضرب لفة قدام السيارات .. وتفاجأت به قدامي .. ومن شدة الخوف وعشان ما يشوفني .. قلت أضم رأسي تحت .. إلا أنا أكبس برأسي ويضرب الهرن .. وعاد ما هرن على السيارة .. أظني كل الطابور صدوا صوبي .. ونزلونا وبهذلونا وإستدعاء ولي أمر وتعهد .. وضرب في البيت .. ما أولياء مال تو يركضوا بولادهم مراكز الشرطة يشتكيوا على المعلمين .. نوبة إحنا طلعنا مصطلبين .. ما قوم سبيس تون

ومنكم السموحة .. وهذا أقل شئ يمكن البوح به .. والباقي خلوووه مدفون أحسن ..

غوغائي

بحسب فهمي المتواضع عن التحدي
التحدي يعتبر من اهم عوامل نجاح الانسان في الحياه بكافة مجالاتها بشرط انك تتغلب على الصعوبات والعوائق وما تقف عند اول مطب وتستلم.. فنلاحظ انه الشخص الناجح فحياته من اهم صفاته هو التحدي والعزيمه والاصرار وعدم اليأس .. فالتحدي يجعل الحياه اجمل واروع .. ويشحن الهمه والاصرار في الانسان لتتغلب على الصعاب
والتحدي يمكن نقسمه الى قسمين
1- تحدي ذاتي (يكون بينك وبين نفسك)
2-التحدي الثاني يكون بينك وبين الاخرين
بالنسبة للمواقف المضحكه كثيره
ولكن الموقف اللي ما راح انساه هو موقف كان فيه تحدي بيني وبين صاحبي هالصاحب البخيل يحب الفلووووس حب اعمى من كثر ما يحب الفلوس من خوفه لحد يسرقهم يضمهن تحت الوساده يوم ينام ويشمهن في الصباح المهم مره رحنا مطعم وطبعا على المائدة كان فيه صحن متروس فلفل حار ( اللي يحرق المصرون الاعور ) وعاد طلبنا اكل والطلبيه تأخرت وجاتني فكره جهنمية اني اتحدى صاحبي البخيل انه ياكل هالفلفل كله !! قالي كم تعطيني قلت المبلغ الفلاني بشرط تاكل الفلفل اللي بالصحن كله قالي خلي الفلوس قبل فالطاوله ؟؟ المهم فكرته يمزح لانه هذا فلفل ما لعبه ويمكن يتقطع مصارينه خخخ المهم اول ما حطيت المبلغ فالطاوله الرجال قام ياكل الفلفل قلت له انته صاحي ! قال عادي ما يحرقني قلت له خلي عنك وجهك صار احمر من الحراره المهم انه حاول يبين لي انه عادي عنده اخر شي زعط جلاصين ماي خخخخخخ المهم انه فاز فالتحدي واخذ الفلوس بس ما مشكله هالفلوس اللي خذهم راح فيهم العياده بعدين لانه عوره بطنه خخخخ وما قدر ينام بليل يصيح ويون ون ياحليله

أم استبرق ( البرق )

والله التحدي مو اقولش بس عن التحدي هو ان تقومي بشي لا يستطيع الاخرون القيام به (ياخي العربيه الفصحى صعبه) التحدي هو اثبات للذات
ياخي ذكرتيني بسالفه الولد السوداني
تحذير بو يتلوع لا يقرأ
يوم كنا صغار اسمينا ما كان عندنا سالفه انا واخوي العود واخوي الاعود جالسين وداقنا الملل والا يجيش اخوي العود بفكره جهنميه اوين خلا البلكونه وانشوف من يتفل ابعد شي : وعاد انا وحليلي الحكم واخواني بدأو لعبه التتفيله الابعد طبعا جيرانا بو تحت سودانين وعندهم ولد بغيض بغيض من فواده المهم طبعا اخوي الاعود جالس يجمع التفال وفي لحظه انطلاق التفال انصدمو ان الولد تحت وجالس يشوف عليهم واخوي الاعود حاول يرجع التفال بس للاسف الشديد الكثير المحزن التفله العوده طاحت فوق جبين الولد السوداني
ياخي ما اعرف كيف اوصف المنظر وانا واخوي العود ماشي مارايمين انشل عمارنا من الضحك والسالفه وصلت عند ابوي وقشبنا بس الحمدلله انا ما انقشبت
دايما اطلع برائه

لحظة لحظة هين سايرين .. صبروا شوية نزلوا تحت لاه
محد يطلع

[شهوووودة]

مخاوي السبلة

التحدي يكون أمران ،، بأن تتحدى نفسك في مواجهة الحياة ومتطلباتها ،، وبأن تتحدى أشخاص على فعل أمرٍ ما ،،
بالنسبة لي ،، التحدي هو صراع الهموم والاحزان في سبيل الوصول الى الأمـل البعيد والتغلب على كل العوائق التي تمر عليك والصبر هو أساس التحدي في مثل هذي الامور ،،
أيام صف أول اعدادي تقريباً ،، تحدينا أنا و ولد عمي بالسياكل ومن أسرع واحد يكون .. وخاصه انه كنا مركبين عدادات سرعه ،، يعنا فرحانين كأنا نسوق سياره ،، المهم بداية السباق كان فوق نزله تساعد على السرعه لـمسافة 400 متر تقريباً ،، وبدأ السباق وأنا بدوس بكامل قواي برجلي على تلك الدواسه واصوات الصنقل كانت حاضرة بقوه ،، وايضاً عض اللسان من اهم السلوكيات ههفي نص المسافة تقدمت على ولد عمي ،، وانا عيوني تناظر السرعه ومبسوط ولكن وما هي الا شويّات ،، والا يقحم هندي قدامي وانا ما منتبه !! والسرعه تقريبا 45 او 50 ،، وخلاص ماقدرت اتفاداه .. ولا اضرب فيه ،، وطاح الهندي هو والكرتون ماله وانا طحت والسكيل راح ذاك الصوب .. وانشمخت فأيدي ورجولي ،، وفاز ولد بالسباق .. تحدي فيه نوع من الخبال والجنون نعم ندمت لاني ما فزت بالسباق .. وسمعتي طاحت قدام اصحاب السياكل ربعنا ف الحاره

غزالة الشمال

+ =
المهم بخبرك اخر موقف صارلي طازج بعد عن التحدي ههههه صديقتي عندها أرنوب جايبتنه من الاردن ومن شفته وانا اتحيل عليها عشان تعطيني اياه لانه يجنن وعيونه يلمعن زنن ورديات ويوميا لما اشوفها بالكليه احن ع راسها بيعي لي الارنوب واترجاش ومدري شو ..المهم هي عاد مسكتني من ايدي الي تعورني قالت بعطيج الارنوب هدية اذا بغيتيه بس بشرط ؟؟ قلت وااااااابختي يو حبابي طلعتي تحبيني !! قالت شرط بجيب صرصور عرري بالكلاس وبخليه يمشي فوقك أول الحصه وما اريدج تصرخي وخليه الصرصور يمشي ولا تخوفيه وتفزعيه بصراخش.. قلت وابوي حرام انتي بتقتليني انا اخاف من الصراصير عطيني شرط ثاني الشيمة قالت مافي غير هالشرط اذا تريدي الارنب فكري وردي علي ؟؟ المهم رجعت البيت افكر وافكر خايفه وبنفس الوقت اريد الارنوب !! قلت ابوي بتصبر بخليه يمشي الصرصور ترا ما بيعضني ولاشي المهم رسلت مسج لي صديقتي وقلت لها خلاص موافقه وهي ما صدقت جايبه يوم الثاني الصرصور فقوطي هههه اول ماشفت الصوصور بغيت اموت نعم انها مجرمه ما اعرف من هين جايبه هذاك الصرصور متربي في حمام 5 نجوم الله يعزكم ,,, متعرعر برابر وانا شوي واموت قلت أبوي بتحمل وأول ما بدت الحصه هي طبعا تجلس جمبي وأول ما دخل الدكتور طلعت الصرصور وعقته فوقي وانا فيني ما فيني والصرصور يمشي على عبايتي ومكشر عن انيابه الشريرة وماااا يشوفوا فالكلاس غير وحدة تقحم وتصورخ وقمت اتلبط بالصف والكل ما عارف ع موه ازعق وفكروا فيني جني من كثرما اتنطط والصرصور النذل متمسك فيني فجاء واحد من الطلاب بصراحة بطل خازه الصرصور بملفه الفتاك ولكن محد ما ضحك عليي شلحت حتى عبايتي وفي الاخير بعد ما اخذت نفس جلست عند صديقتي واقول حالها : هااااااء كيف بتعطيني الارنب واااموو هههههههه

LAIGHTMOON

بصراحة مو اقولش شهووودة التحدي عبارة عن الاصرار والعزيمة لتحقيق هدف او مراهنة او اثبات الذات عند الجميع والتحدي الشريف اسمى انواع التحدي الذي لا يخالطه الغش ..
: بوتصفق حال عمرها : اقولش سالفة التحدي مال اولاد خالتي .. عندي اثنين من اولاد خالتي التوأم لقبهم في العائلة بلوط وعلقم الشريران وبغيضان من مشاكلهم ومقالبهم الثقيلة الله يسلمش هذول يغاروا من ولد عمتي عوين شعره ناعم وحرير ، ومسوين تحدي انهم بيقصوله شعره في الرحلة .. المهم طلعوا الرحلة ووصل الخبر لولد عمتي عن نية بلوط وعلقم .. وقام يتحذر منهم وناوي عليهم نية .. بعد السهرة الكل نام الفجر الاااااا بلوط وعلقم عينهم على ولد عمتي وفي ايدهم مقص حبوتي مال الكرخانه .. وماشي من تاكدوا ان ولد عمتي نايم تقربوا حيته ومسكوا جذلته وقبل لا يقصوها تحرك ولد عمتي وطشووو من مكانهم وسويوا عمرهم نايمين وللاسف هي نومتهم وحدة هههههه في الصباح سمعوا الصياح والدموع عشرة عشرة والبكوسات ما ولد حد
صاه ولد عمتي ما قصر فيهم قص شعرهم وجزه جزز وخلاهم كما المغايبة واضطروا يا حليلهم يحلقوا شعرهم صفر ... وجلس ولد عمتي يضحك عليهم ويزعق لهم جح جح جح من يريد جح ببلاااش ويغايرهم لين تطيح البكوسات مرة سانية

البرستيج

الله يسلمك التحدي بـالنسبة لي حــاجــه حـــلــوة لـكـســر الــروتــيــن ..فـيـهـا نــوع مــن الـأثـــارة عــلى شــويـــة حماااااس ممـزوجـــات بـروح المغامرة ..
والله بصراحه التــحـديــات واجـد بس غـــابــن عــن بــالي الـحــين ..
بــس أتــذكــر واحــد .. كــنــا جــالــســين أنــا وواحــد مــن الشــبـــاب الله يستر عليه وكـــنـــت أنـــا أشـــرب بـيـربـيـكـان " مـا أتذكر أي نوع " ..وجــلــســت أرمــق الـغــرشــة بـ عــدة نــظــرات .. إلــى أن قــلت لـلـصــاحب : تــتــحــدانــي أصــبــها بـرأســـك ؟ وجلس يتنعـتــر وخلى عـــمــره أبــو الــثــقة ومــا تــقــدر ووو وجــيــت أصــبــها بــرأســـه كــلهــا .. وكــــــــــــان الــــجـو بررررد والبربيكان باااااااااااااااااااااااا ااارد ومـــــا شــيء قـــام يصـــورخ ويتنافــض المسكين طلعت قـــــــــد التحــــــدي

الجوري

التحدي بالنسبة لي .. شي كنت استصعب اداءه لكن يأتي وقت لا بد من انجازه رغم الظروف ..
شوفي اعطيش امثلة شهدهد والاخوة المتابعين :بو مصدقة عمرها: ...
تحدي 1:
ما كنت اعرف اطبخ قبولي البر وما جالي يوم ضبطته يا احرقه او اهرسه او يطلع تفل .. وتجي الأخت العزيزة الوحيدة وتفضحني قدام خالاتي قلت لازم اثبت اني انا شطورة .. رحت طبخت من فواد فوادي وجبت كتاب ماما زيانة في الطبخ ومو اقولش خبصت وتعذبت وفي الاخير عرفت اضبطها صح واختي استوا وجهها كما الطماطة هع هع
التحدي في اني قدرت اثبت اني اعرف اسوي قبولي
تحدي 2/
أميروه تسوق سيارتها الايكو وتتفاجأ بوادي قدامها .. تشوف يمين يسار وقالت اتحداهم ذيلا بو يشوفوا علي اني اقدر اخوض الوادي بسيارتي ..وتفرها فرير السيارة وتعبر الوادي وما تدرى غير بالتصفير والتصفيق تشجيعا لها :تعجبش اميروه: والموقف حقيقي نعم: هذي عتوجة طلعت ؟؟

اما انا احب التحدي يااااااااي حمااااس واني لاقف وبوجه شرس أمام كل من يتحداني في كل شيء :بو تتنافض:

[شهوووودة]

alfarooq-2
"
"

والله انا حياتي تقريبا كلها تحدي يعني ان صح التعبير
اما فهمي للتحدي فأنا أشوف انه الحياة بدون تحديات كعيش بلا ملح وسيارة بدون تواير موقف صار معي اممممممم هذا الموقف صار بكاس الخليج 20كنت متفائل كثير بمنتخبنا وكنت دايم اتحدى خوالي وقلتلهم المنتخب بيشل كأس الخليج .. وقالولي اذا ما فاز المنتخب تدفع لنا 100 ريال وللأسف وافقت من زود الثقة ولما خرج المنتخب هلكوني بالمغاير والرسايل وادقها بشردة عنهم سويولي رسالة تعال بس باغين عليك عشى " تشاينيز رايس " قلتلهم لا حيلة بو يتحداكم مره ثانية

"
"

ترويحي مجنون

اذا بنتكلم عن مفهوم ومعنى التحدي ..فيجب ان نتكلم عن التحدي المهم وليس التحدي اللي مال لتني والتك او من يسبق من!! أو من يأكل هالوجبه بكمية اكثر .. طبعا ان من وجهة نظري اذا كان هناك فيه تحدي فهو التحدي الذي يجب علينا أن نواجهه وبقوه وهو كيفية استخدام التكنولوجيا الحديثة من أجل إحداث نهضة حديثه وتقنيه تواكب العصر ومتطلباته .. طبعا فيه مواقف مضحكه كثير لاتعد ولا تحصى .. بخبركم عن تحدي صار بيني وبين احد اعضاء السبله.. التحدي هذا فردي يعني هو مسكين ماكان قصده يتحدى .. بس يريد يتفشر وانا قلبتها جد .. هالعضو لما سجل في السبله وصار عضو خاطر .. بسرعه راح واشترى لابتوب جديد اول مره يشتري لابتوب .. وانا كنت اخمس قبله بكم شهر ويمكن اكثر وماعندي لابتوب .. كنت اخمس من كمبيوتر المكتب او البيت .. فدقني غم عاد ماغم .. هذا العضو الخاطر ولا بعد مخبرينه عن التخميس ومعطينه معلومات حلوه عن السبله .. فقط من مشاركه وحده ويشتري لابتوب ؟ وقلت ف نفسي مستحيل طبعا يكون احسن مني .. ورحت تسلفت كم بيسه واشتريت لابتوب احسن من لابتوبه وعاد قام يتحداني .. مايمرن كم شهر الا غير لابتوبه .. وانا نوبه يوم اشوفه يغير لابتوبه .. اقوم اتركوض المجمعات التجاريه ادوّر ع لابتوب حديث وميزاته اكثر واشتريه واراوييييه عشان يجيه غم
وما يخلص التحدي الين ما تخلص الغوازي ..
"
"
دمـــــا

البعض يعتبر التحدي موضوع حياة أو موت والبعض يتحدى على أمور تافهة والبعض يتحدى بـفلوس
أو أمور ثانية ! أول مرة تحديت في حياتي كأس العالم 98 كان عمري 10 سنوات كنت من مشجعي المانيا وأختي من مشجعي البرازيل والتحدي أنه من فريقه راح يوصل والتحدي بمبلغ " 500 "بيسه وفي ذاك السن يعتبر هالمبلغ شيء المهم خسرت التحدي ولانه ما كان عندي سيوله دفعت لها "300"بيسه ولحين لما اتذكر هذاك التحدي أضحك على نفسي لاني كنت اتحسر على 300 بيسه

حبيت أقول خذوا موضوع التحدي بروح حلوه بعيد عن الاستياء من الخسارة ..

"
"
يا عين لا تدمعي

التحدي اعتبره شئ كبير في حياتي لولا التحدي ما كنت اقدر احقق هدفي و حلمي ,, وافضل انواع التحدي هو تحدي الذات لانها تكسبك الثقة في النفس وتكرس فيك العزيمة والاصرار .. اوووه اذا عن موقف التحدي اذكر سالفة من ايام المراهقة انا واصدقائي تحدينا من يقدر ينتقم من بابو راعي الدوبي واحد بطران وشحطة وصنفنا نكسر خشمه المهم اتفقنا نسوي فخ لبابو في سكة الظلام والجماعه بيلبسوا اقنعه وحوش عشان يخاف وبالمرة تجيله سكته قلبية ونفتك منه المهم سمعنا صوت بابو يسوق سيكله ويصفر محسب عمره عصفور والشلة تحرصه متعلقين فوق الجدار واول من وصل قريب نطوا عليه الشباب وصرخوله واااااااااااااااااع وما نشوف غير بااااابو يقحم من سيكله تقولي بروسلي ومسك لوح فيه مسامير وعطاه في ظهر صديقي وقام يركض وراء الثاني في الحارة بصراحة استغربت اول مرة اشوف هندي شجاع رامبو ..

واخيرا
"
"

أميرة فقيرة

ياخي اخجل اقولبها ذي السالفه
فيه مره كنا انا وزميلاتي بو المدرسه بعدنا تتونات ذيك الايام جالسين ف سيارة هندي ف الدبه ناكل مينو وبطاطس ولبن ثلج تقولي مطعم ما دبه سيارة تصرقيعه شيه المهم جاء الهندي باغي يسير الدوام الصبح وانا كله ولا يناقرني هندي من يوم صغيره مرتكبه فيهم جرايم وعمليات انتحاريه المهم يوم شافنا جالسين ف سيارته وناكل مينو عصب تشوط وقف شعر شنباته قال إييييه تشيكو ايش هذا نمونه يالله برا وصديقاتي متقبضات فيني وانا كنت البوس هناك أنا شفت عليه بنظرات ونافخه عمري اتقولوا انترتيجر صغير قلتله تشب خوز انته ذي بلادي روح بيتك يالله قال وين ماما قلتله ما يخصك قال خوز منا ولا اي ويل كيل يو !! انا كنت مااعرف اتهرج عنجريزي ذاك الزمان ، قلتله دوك ذا الهندي بو حل نارجيل قال اوكي عب جاء ودخل سيارته وشغلها وصديقاتي فزعانات ومتقبضات ويقوللي ايييه خلا ننزل ..قلتلهن ماانزل ما يروم يسوي شي !!؟؟ عب نعم حركها السياره وتسرقفنا بثلاثنا ف الشارع كما الفراخ وشرد الحص وما خبرنا حد البر صاه عارفه عمري غلطانه بس كنت بايه اتحدى الهندي

اتمنى انمكم استمتعم بتحدي الاعضاء وخلونا نشوف سوالف التحدي اللي عندكم .. شاركووووووونا ..

[مدمن سح]

هيني انا عنكم

[Ms HinD]

وانا ماحد قالي

[مدمن سح]

وانا ماحد قالي

انتي ما حد يبغاش بغيضه

[دهن العود 1989]

مرااااحب و هلا و الله

شحااالكم؟؟

[دهن العود 1989]

وانا ماحد قالي

محد قااالك ايش؟؟

[Ms HinD]

انتي ما حد يبغاش بغيضه

مايت فيني فار

[Ms HinD]

محد قااالك ايش؟؟

اتحدى

[مدمن سح]

مايت فيني فار

والله من حقه الفار يموت يعني الي يشوفه ويشمه تبغي يبقى حي

[مراسي القصيد]

خلا ليل

[ام استبرق]

مو ذي الفضايح شهوده

صباحكم تحدي وذكريات طريفه

[مراسي القصيد]

وانا ماحد قالي

هلا والله بالرفيقة

[شهوووودة]

اااااخ اخيرا خلصت انكسر ظهري وجنني نعم هذا النت الكحيان

[عادل عباس]

اااااخ اخيرا خلصت انكسر ظهري وجنني نعم هذا النت الكحيان

هذا وحده نوع من أنواع التحدي

[Ms HinD]

والله من حقه الفار يموت يعني الي يشوفه ويشمه تبغي يبقى حي

الله كريم خيو

[Ms HinD]

هلا والله بالرفيقة

اهلين وسهلين
خبارش؟

[ام استبرق]

اااااخ اخيرا خلصت انكسر ظهري وجنني نعم هذا النت الكحيان

سلامة ظهرك حبيبتي

نوبه ذا وحده تحدي لاه

[الجوري]

مامبو

من ذيك السودا بو اتحت عن كلامي

المووهم .. التحدي شي جميل بس يكون في الوقت الصح :غمزة:

شكراااا شهوووووووووووووووووووووود ة

[قمر راكبه همر]

شهووووووودي وأنا00

[Fullmark]

صباح الخير

ماشاءالله الموضوع ابداع

وما غريب عليك هالشي اختي شهوده

من تميز لتميز


بو يغير لونه مؤقتا بسبب الجوري:/

[أميرة بس فقيرة]

الله يخس بليسش ياام استبرق ما قصرتوا فيه الولد

[الدختر]

:بو يقول يارب ما يكون حد هنا دارس في مدرسة الخوض الثانوية:

سلمت يمناك أستاذتي وكالعادة .. إبداع بلا حدووود

والسلام عليكم ورحمة الله وبركاته

وصباااااااااااح الجحححححححح

[شهوووودة]

هذا وحده نوع من أنواع التحدي

صح كلامك والله تعذبت اكتب وارتب هالموضوع كم مرة تشكل علي النت وامتسح واعيده مرة 2 و3 مشكلة راسي عص كما نارجيل الهنود

[أميرة بس فقيرة]

مامبو

من ذيك السودا بو اتحت عن كلامي

المووهم .. التحدي شي جميل بس يكون في الوقت الصح :غمزة:

شكراااا شهوووووووووووووووووووووود ة

تو يعني واضحات عندش الصور

عب ماله انا عندي ما واضحات

اظني مسويه شي ف ملفي الشخصي ذيك اليوم يوم قالولي ايميلش ظاهر

[الجوري]

أم استبرق تحفة نعم

اقول مو نوبة الأعود


:تففففففففففففف : شوفوها هين واصلة

[Fullmark]

اااااخ اخيرا خلصت انكسر ظهري وجنني نعم هذا النت الكحيان

سلامتك

اهم شي الموضوع فالاخير نزل بعد معاناه

في انتظار النجوم

[أميرة بس فقيرة]

عب هينها صورتي بو شعر حرير

بس تو طلعن الصور عندي

[الجوري]

تو يعني واضحات عندش الصور

عب ماله انا عندي ما واضحات

اظني مسويه شي ف ملفي الشخصي ذيك اليوم يوم قالولي ايميلش ظاهر

واضحات

اظنش قالعة كل الوايرات