الـــعـــيديــــــــة .....

[الوافي]

كل عام وأنتم بألف خير
أنتم وأسركم الكريمة وكل عزيزٍ لديكم

العيدية من مظاهر العيد ولاتكتمل فرحة الأطفال الا بالعيدية وكل واحد يحسب كم حصل من والده وامه واخوانه وخواته وعماته واعمامه وخالاته وخواله وجيرانه و,,,,,,
بالأول العيدية كانت يالله يالله على زمانا توصل خمسة ريالات ونطير من الفرحة اليوم ماشاء الله بعض الأطفال توصل عيديتهم فوق العشرين ريال ومضاعفات المبلغ

كم كانت توصل عيديتكم لما كنتوا صغار وهل تضموها او تصرفوها ؟
وهل لازال البعض منكم يحصل عيدية ؟ ؟؟ لأن بعض الأباء لازم يعيد بناته أو خواته ولو متزوجين ....
وفي حال تعيدون أطفالكم واخوانكم وخواتكم كم تعيدوهم ؟ لايكون بخيليين تعيدونهم نص ريال ؟

هل للوالدين الله يطول بعمارهم نصيب من العيدية معاكم ؟

حفظكم ربي وبارك فيكم

[الوافي]

انا عن نفسي كل عيد اخرد مبلغ بين ال100 ريال وال 120 ريال عيدية
للأولاد والأسرة والشماج - أهم شي الشماج

وتو عاد يوم كبرت ماحد يعديني

بس هالعيد الحمد لله صادف عيد ميلادي 4 - 9
وحصلت هدية تلفوون جديد

[الوافي]

@نور الهدى 11.. @الرجوع من الماضي.. @الرأسية. @متكى ع قمر. @البلوشية الزمردة العنيدة. @توليب96. @التيتشر غزلان.. @صمود. @السحاري122. @باحث عن زوجة.. @أسد البلوش@أوزان I.. @ابن حبس. @واصل. @راعي الضبعة. @كيان آخر @محارب من زمن السلام. @رقيقة الآحساس.. @المسعودي. @أعجوبه.. @المرعبه 11. @بنت الذئب. @حياة النور. @روح الزهور.. @اليمامة بنت كليب@الموثقف.. @خفايا القلوب. @ام فيصل2011. @العذراء الحزين.. @شموخي وفا.. @عبق الحيآه. @ساعة عربية. @الكاتب العماني. @الصافي787. @سيلفا.. @خندق مسقط.. @الوافي. @خافق الشوق.. @القلب المظلوم@أناقه حرف.. @أسديه@مهندسة فزارية1989. @معانق السحاب.. @ @قناطيب@غيوم عبري. @انا كلي رهن امي. @قليل شغل ومتفيق. @ربيع التفاؤل. @زبيب بني. @فسيولوجي عماني. @زبيب وردي.. @مازن السمائلي. @بايعنها ومظلوم. @عطر الاندلس. @صوت الظلام. @زين سويت.. @عذبةالمشاعر.. @ناعومي. @ريم الرميثي.. @ربيع التفاؤل.. @ابتسامة الشمس.. @انا تو مخلص صايح.. @ماسكه خط.. @مآجستير شقآوة. @عذبةالمشاعر. @زين الشياب.. @noor umri.. @BnShams.. @asma al busaidi.. @fox 1919.. @zulfa1981.. @creative15 @Phantom pain @armada

[فسيولوجي عماني]

السلام عليكم ورحمة الله وبركاته
كل عام وأنتم بالف خير يا جماعة وعساكم من عواده...

[ربيع التفاؤل]

يآ سلاآم موضووع حلو

أول كل عام وانت واهلك واحبابك بخير وسعادة

أنا لما كنت صغيرة ما اصدق يعطوني عيدية اركض الدكان ولا اشتريبها من العزوة
بس من كبرت طشونة يمكن مال عمر ١١ سنة بديت افهم فـ سياسة الفلوس صرت اضول عيديتي وبعد العيد اغايض اخواني عندي فلوس واجد


والحين عيدياتي تعودت ما اصرف منهن ولا بيسة الا وقت الضرورة .. وفي الاجازة استثمرهن واسوي مشاريع وهيك


بالنسبة يوم اعيّد الصغيرين .. بعدني صغيرينة
يعني يعيدوني ما اعيّد


شوووكراً ع الطرح @الوافي

[فسيولوجي عماني]

اشوف دخاخين الظاهر حد بادي يشوي مشاكيك

[ابتسامة الشمس]

السلام عليكم

اولا...كل عام وانت بخير @الوافي

بالنسبه للعيديه كنت يوم صغيره يعطوني تو من كبرنا ما ناخذ هههه كانت توصل 10 ريال...طبعا يروحن بالالعاب..والحلاو وكذاايام ياريت ترجع

[البلوشية الزمردة العنيدة]

وحدي من توظفت ما حصلت عيديه حتى ٥٠ بيسه وقبل عيديتي ما تعدى حتى ال ٤ريالات وبعد اتفشربهن

***ع كل عيد اخرد من ٨٠ ل ١٠٠ ريال عيديه واني مسكينه محد يعطيني عباره كبرتي وشليتي عمرك خلاص

@الوافي
كل عام وانت بخيير ابووويه عساك من العايدين والفايزين والعمر كله ان شاء الله

ومبااارك عليك التلفون الجديد عن تقول ما حصلت شي ..

ايفون ٧ ولا :شرير:

[بنت الذئب]

السلام عليكم

لازلت اخذ العيديه
بس نصها أعيد فيهايعني تدور
احلى وأكثر عيديه هي عيديه ابوي واخواني وخالي
صار لي سنتين افتقد عيدية خالتي الله يرحمها ويغفر لها مع انها كانت بسيطه لكنها كانت تعني لي الكثير

شكرًا لك @الوافي كل عام وانت بخير

[البلوشية الزمردة العنيدة]

اشوف دخاخين الظاهر حد بادي يشوي مشاكيك

الظاهر من صوبكم لانه معنا مااشي

لا تنسى نصيبي

[لحظة غضب]

ما شاء الله عائلتنا في قمة البخل بس عمتنا كانت تعطينا ٢٠٠ بيسة وفرحانين بها وجدتي الله يرحمها كانت تعطينا ١٠٠ بيسة تراها ما عندها فلوس الجدة الثانية نادرا تعطينا ومن الجيران صفر خخخخخخ أماكن ثانية ١٠٠ بيسة ونادرا نحصل نص ريال
حاليا صفر بيسة

[الكاتب العماني]

وانتم والاسرة الكريمة بالف خير ..|| أعادهـ اللهـ علينا وعليكم أعوام مديدة وأنتم ترفلون بالصحة والعافيهـ ..|| @الوافي ..||
بعدك تدور عيديهـ ..؟؟ |- عن نفسي من زمان ما شفتها 100 بيسة الصفراء ..|| طولها ما تتعدى طول صبعك السبابه
:
انا بتكلم عن نفسي مواليد السح والمالح ..|| كنا ما نفكر بالمال بقدر ما كنا نفكر بلمة الاهل وفرحة العيد ..||
العيدية كنا نحصلها ولكن ما كانت تتعدى يمكن الـ3 ريالات عمانية .. ||
:
ومن وصلنا مرحلة الاعدادية كان وضعنا في ذلك الزمان يختلف عن الان ..||
كنا نعتمد على أنفسنا وما كان ينظرون لنا كأطفال بل كانوا يمسكونا السكين والبهمية ساعتها ..||-
لذلكـ نفتقد تلك اللحظات الجميلة ..||

اما الان فنحن من نخرد العيدية ويتنتف الجيب وبعدهم ما قانعين ..||
الحمدللهـ الله يديم علينا الفرحة والسعادة والاعياد يارب العالمين ..

كــــل عام وأنتم بالف خير ..|| طاب مساؤكم

[فلاح الوطن]

عن نفسي كرهت كثير اشياء في حياتي والسبب التلفون...


أحد هالاشياء العيدية اللي تتكلموا عنها.

صرنا نصور المشاكيك.
نصور الحنا
ونخرد العيدية ونصورها
ونختار الطفل اللي لابس اكشخ واحد ونصوره واحنا نعطيه عيديه.
واصلا نخرد من الاساس عشان الصور.



كان للعيدية مغزى وهدف جمييييييل.... كنا نأخذ العيديه ونشوف الصدق في عيون اللي يعيدنا.

والحين للأسف.... لا أعمم.... بل فئه مادية دنيوية... تخرد و تعيد و تصور للانستجرام...

عشان كذا عادتي الغريبه اني اذا بغيت اعطي شي.... يكون قبل العيد بأسبوع.... عشان أتقي الشر.... واللي متعسر عليه شي يساعده المبلغ ولو انه هين.





ادري ألف شخص بيظن اني معقد نفسي ومعقد العيدية معاي..... ولكن لي ما اظن ولكم ماتظنون.







عيديتي ما كانت تتعدى 10 ريالات.... وانقطعت بعدما توظفت.





وكل عام وانتم واهلكم وكل من يعز عليكم في صحة وعافيه وخير وفير.

[Phantom pain]

يوم كنت صغير عيديتي توصل من 10 إلى 20 أو أقل لأني كنت بس أروح الهبطة وأرجع البيت أنام إلى الليل وطبعا ما كان يبقى منها شي كله ح الألعاب

لحد الحين العيدية واصلة ريالين وميتين لكن الله كريم الله يزيدها..

وأعيد
الصغيرين ريال والكبار 3
والكبار الكبار خمسة

[الوافي]

السلام عليكم ورحمة الله وبركاته
كل عام وأنتم بالف خير يا جماعة وعساكم من عواده...

عليك السلام أخي الكريم
وانت من عواده يارب

[بنت السالم]

انا عن نفسي كل عيد اخرد مبلغ بين ال100 ريال وال 120 ريال عيدية
للأولاد والأسرة والشماج - أهم شي الشماج

وتو عاد يوم كبرت ماحد يعديني

بس هالعيد الحمد لله صادف عيد ميلادي 4 - 9
وحصلت هدية تلفوون جديد

عيل نريد عيدية من معك يالله غايتة هات
هههههه

[الوافي]

يآ سلاآم موضووع حلو

أول كل عام وانت واهلك واحبابك بخير وسعادة

أنا لما كنت صغيرة ما اصدق يعطوني عيدية اركض الدكان ولا اشتريبها من العزوة
بس من كبرت طشونة يمكن مال عمر 11 سنة بديت افهم فـ سياسة الفلوس صرت اضول عيديتي وبعد العيد اغايض اخواني عندي فلوس واجد


والحين عيدياتي تعودت ما اصرف منهن ولا بيسة الا وقت الضرورة .. وفي الاجازة استثمرهن واسوي مشاريع وهيك


بالنسبة يوم اعيّد الصغيرين .. بعدني صغيرينة
يعني يعيدوني ما اعيّد


شوووكراً ع الطرح @الوافي

والحين عيدياتي تعودت ما اصرف منهن ولا بيسة الا وقت الضرورة .. وفي الاجازة استثمرهن واسوي مشاريع وهيك

ماشاء الله مشروع مستثمر صغير
أخاف تشريبهن تلفوون فالحلقة الأخيرة

وانتي بصحة وسلامة يارب بارك الله فيك

[الوافي]

اشوف دخاخين الظاهر حد بادي يشوي مشاكيك

من تو وغادي لاااه
كل عام وانت طيب

[الوافي]

السلام عليكم

اولا...كل عام وانت بخير @الوافي

بالنسبه للعيديه كنت يوم صغيره يعطوني تو من كبرنا ما ناخذ هههه كانت توصل 10 ريال...طبعا يروحن بالالعاب..والحلاو وكذاايام ياريت ترجع

كل عام وانتو بالف صحة وسلامة يارب
ماشاء الله يعني اكثر عني

[noor umri]

هلا وغلا
عيدك مبارك وافينا
كانوا يعيدوني بس ما اذكر كثر وش اجمع ..وما اروح الدكان اضمهن ..ههه تفكيري بزنس من الصغر ...ههه
وعيدية الوالد باقيه للحين ربي يحفظه
الحين اعيد الاطفال من 200 بيسة الى خمسه بس.

مبروك على التلفون وعيد ميلاد سعيد..
وشكرا @ الوافي

[الوافي]

وحدي من توظفت ما حصلت عيديه حتى 50 بيسه وقبل عيديتي ما تعدى حتى ال 4ريالات وبعد اتفشربهن

***ع كل عيد اخرد من 80 ل 100 ريال عيديه واني مسكينه محد يعطيني عباره كبرتي وشليتي عمرك خلاص

@الوافي
كل عام وانت بخيير ابووويه عساك من العايدين والفايزين والعمر كله ان شاء الله

ومبااارك عليك التلفون الجديد عن تقول ما حصلت شي ..

ايفون 7 ولا :شرير:

هااعه ما ايفون 7
شي دفش مايدخل فالمخبا عبارة
الله يبارك فيك وكل عام وانتوا بالف صحة وسلامة
يعني انا اعيد اكثر منك

حتى انا عاد تو ماحد يعيدني

[الوافي]

السلام عليكم

لازلت اخذ العيديه
بس نصها أعيد فيهايعني تدور
احلى وأكثر عيديه هي عيديه ابوي واخواني وخالي
صار لي سنتين افتقد عيدية خالتي الله يرحمها ويغفر لها مع انها كانت بسيطه لكنها كانت تعني لي الكثير

شكرًا لك @الوافي كل عام وانت بخير

الله يرحمها يارب ويصبركم وكل عام وانتي بالف خير أختي الكريمة
حتى الوالدة تريد عيدتها خردة ميات عشان تدوور نفس الشي فالعيلة

اهم شي تشتريبها من المخرج يضحكوا علينا اسكريم صبيغة ب100 بيسة

[الوافي]

الظاهر من صوبكم لانه معنا مااشي

لا تنسى نصيبي

ههههه وانا بعد

[الوافي]

ما شاء الله عائلتنا في قمة البخل بس عمتنا كانت تعطينا 200 بيسة وفرحانين بها وجدتي الله يرحمها كانت تعطينا 100 بيسة تراها ما عندها فلوس الجدة الثانية نادرا تعطينا ومن الجيران صفر خخخخخخ أماكن ثانية 100 بيسة ونادرا نحصل نص ريال
حاليا صفر بيسة

الله يكون بعونك الغالي يمكن ماعندهم اعدرهم

[الوافي]

وانتم والاسرة الكريمة بالف خير ..|| أعادهـ اللهـ علينا وعليكم أعوام مديدة وأنتم ترفلون بالصحة والعافيهـ ..|| @الوافي ..||
بعدك تدور عيديهـ ..؟؟ |- عن نفسي من زمان ما شفتها 100 بيسة الصفراء ..|| طولها ما تتعدى طول صبعك السبابه
:
انا بتكلم عن نفسي مواليد السح والمالح ..|| كنا ما نفكر بالمال بقدر ما كنا نفكر بلمة الاهل وفرحة العيد ..||
العيدية كنا نحصلها ولكن ما كانت تتعدى يمكن الـ3 ريالات عمانية .. ||
:
ومن وصلنا مرحلة الاعدادية كان وضعنا في ذلك الزمان يختلف عن الان ..||
كنا نعتمد على أنفسنا وما كان ينظرون لنا كأطفال بل كانوا يمسكونا السكين والبهمية ساعتها ..||-
لذلكـ نفتقد تلك اللحظات الجميلة ..||

اما الان فنحن من نخرد العيدية ويتنتف الجيب وبعدهم ما قانعين ..||
الحمدللهـ الله يديم علينا الفرحة والسعادة والاعياد يارب العالمين ..

كــــل عام وأنتم بالف خير ..|| طاب مساؤكم

امين ياررب كل عام وانت بالف خير
اظن انك من جيلي

بس ماخبرتنا كم خارد للعيد وتعيد لايكون ربطة مال مية بيسة
احيدك كريم

[عذبةالمشاعر]

عيديتي إني أشوف أهلي والغوالي ع قلبي بخير وسلامه

[asma al busaidi]

مساء الخير
كل عام والجميع بخير وصحة وسلامة يا رب العالمين
ما حد ربحان ويحب العيد إلا الصغار ما شاء الله يحصلو
نحنا لكبار خلف الله علينا
ما عليه أهم شي لمة الاهل واللحم
تسلم أخوي بارك الله فيك

[ابتسامة الشمس]

كل عام وانتو بالف صحة وسلامة يارب
ماشاء الله يعني اكثر عني

اكثر عنك....انت يمكن تشتري فون بالاخير اصلا كم تحصل
@الوافي

[الوافي]

وانت ب

عن نفسي كرهت كثير اشياء في حياتي والسبب التلفون...


أحد هالاشياء العيدية اللي تتكلموا عنها.

صرنا نصور المشاكيك.
نصور الحنا
ونخرد العيدية ونصورها
ونختار الطفل اللي لابس اكشخ واحد ونصوره واحنا نعطيه عيديه.
واصلا نخرد من الاساس عشان الصور.



كان للعيدية مغزى وهدف جمييييييل.... كنا نأخذ العيديه ونشوف الصدق في عيون اللي يعيدنا.

والحين للأسف.... لا أعمم.... بل فئه مادية دنيوية... تخرد و تعيد و تصور للانستجرام...

عشان كذا عادتي الغريبه اني اذا بغيت اعطي شي.... يكون قبل العيد بأسبوع.... عشان أتقي الشر.... واللي متعسر عليه شي يساعده المبلغ ولو انه هين.





ادري ألف شخص بيظن اني معقد نفسي ومعقد العيدية معاي..... ولكن لي ما اظن ولكم ماتظنون.







عيديتي ما كانت تتعدى 10 ريالات.... وانقطعت بعدما توظفت.





وكل عام وانتم واهلكم وكل من يعز عليكم في صحة وعافيه وخير وفير.

وانت بالف صحة وسلامة يارب
معاك حق اخي العزيز
اول كان مانخبر عن عيديتنا واليوم كل طفل يتباهى كم واصله عيديته مع اخوه او ولد عمه او جاره او زميله فالصف

الزمن اختلف والله يستر من الجاي اخاف بعدين العيدية تكون شي كبير مثل هدية تلفون او ايباد ماحد يطيع يشل فلووس

[الوافي]

يوم كنت صغير عيديتي توصل من 10 إلى 20 أو أقل لأني كنت بس أروح الهبطة وأرجع البيت أنام إلى الليل وطبعا ما كان يبقى منها شي كله ح الألعاب

لحد الحين العيدية واصلة ريالين وميتين لكن الله كريم الله يزيدها..

وأعيد
الصغيرين ريال والكبار 3
والكبار الكبار خمسة

ياخي احس انك تشبهني فكل شي
يوم صغير ويوم كبير بس الشيمة لاتخبر علينا حد