ماي رادييتر سيارتي هين يسير ؟؟ وحدي ما أعرف !

[هامور مدلل]

ماي رادييتر سيارتي هين يسير ؟؟ وحدي ما أعرف !

هيه عب موه ... أشوفها سيارتي من أمس ما برابر جاينها مكر ودوااااااوين ... أونها تنقص ماي من ذا الرادييتر بو فيها
زين الحظ اني امس كشفت غطاء الرادييتر .. ويا خووووووك ما اشوف انه الماي ناقص وتو كيف الحل ونا باغي اسير الدوام وعاد الساعة 7 وربع حتى كوب الشاي برررررررررد من حيت مخلـّنه قلت ما عليه شيء دبّة ماي اخضر مخلايه في المطبخ في كيس وهيه وحده ... بووووع ركض 700 خاطف على حياني بو في المجلس مسّوي وراااااايي غبره من الركض ... وجلست ادور الكيس بو هناك ويا خوك السالفة انه خوتي مخليين ميت كيس شيء بو فيه صبغ ابيض وشيء بو معجون مال بلاط حتى ملمع النعلان مضموم معهن ... قلنا ما عليه بدور علين يفتررررررررررر رااااااااااااااسي 5 دقايق ونا اعاشن فوق الكبتات وحظني يا هامور حصلت دبة الرادييتر

جلست اعبيء الرادييتر علين انترس قياس كوب ماي رحت الدوام ورجعت ... قلت عاد في الليل بشيك عليها مرة ثانية ما بداني افتح غطاة الرادييتر حصلت الماي ناقص عصريتنها ذي السيارة موه جاينها اليوم سرت عند بابوه بو يصلح الرادييترات .. جاني ركض بنظارته العوده المهم فحص وما قصر ... لكنه ما حصل شيء البررررررررررررررر كيف الراي تو بابووووووه ... قال صبررررر ارباااااااااب .. نفر ميكانيكي فااااجد معلوووووم مشان انته سياره الله يغربل بليسك خلصني عاد ليل وولدي الصغير عزووووز ما متعشي والرووووتي معقوق في السيت الورااااااني

وهاوه عن سيعه جي أنيش راعي الميكانيكا بذاك التلفون بو بجلي وجالس يعشي الرادييتر ... فكرته باغي يوصله في التااااااير أنيش كيف ترتيب مشان سياره مشان أنا عاد من المفيتره بو فيه .. أرباب نص ماكينة يريد بطططططططل غير بدل أنيش لا لا ارباااااب انته ماكينه يشرب مااااااي كيه موه عصريتني رابط ثور داخلها صاها مكينة ما بطن عطشان

عاد انيش وبابوه جلسو يتهرتموا وكل واحد يفتي من جانب انزين خلصوني عاد باغي اسير البيت اعشي عزووووزي انيش يقول وديها الجراج يبطلوا الماكينة وخليهم يعدلوا الجازجيت يمكن ذااااااااااااااايب

بابوه وانيش ما نفعوني اشوفهم فقلت عاد ما شيء غير ذيلا الشباب مال السبلة ما بيقصروا نعم ... بخلي كل واحد يعطيني الحل بو عنده


واحد منكم @NITRO نعم هو ذا بو متفيقلي واااااااجد

يعني الماي ينقص من السيارة .. بس هين يروح

قبل 3 اشهر مغير الهوزات .. اصليات من الوكالة
وقبل سنة مصلح الرادييتر

نوع السيارة التيما 2008
4 سلندر
محافظ عليها وصيانة وكالة وبريسشن تيون
ماشية بس 296000
واليوم والحمد لله تدخل السنة الثامنــة ... خخخخخ

[Business dealers]

أخي شيك علئ الدبة مال الراديتر يمكن فيها ثقب و الماي يسيح من الدبة ههه ، مشكلتك نفس مشكلة شمجي و طلعت الدبة منثقبة ،، و طبعا انا استبعد هذا ما دامك غيرت و فحصت الراديتر و غيرت الهوزات ،، بس انت شيك يمكن ،،

الاحتمال الثاني حاول اخي تحط ماي راديتر premix .
لان الوكالة فيه نؤعين يجي ،

ماي الراديتر العادي و هذا الي تضيف فيه ماي مع ماي الراديتر،

و النوع الثاني اسمه premix . هذا من تحطه أنساه ماي الراديتر ما يحتاج تغيره الا بعد 100 الف او 5. سنوات ،و اذا حبيت تحط و تزيد لازم تزيد نفس هذي النوعية ،، premix .

و النوع الاول ألعادي الي تضيف معه الماء الصحي ، بعد فتره يتبخر ينقص و لازم تزيده ماي علئ فترات ،،

قوله بابوه لو السيارة تخلط ماي كانت المكينة منكسره من زمان ،، ههههه ،،، ،،


@هامور مدلل

[المسعودي]

نفس المشكله صارت لي .. بس فوق هذا كانت سيارتي ترفع حراره .. وكم ميكانيكي قال لازم ننزل المكينه ..

طلعت دبة الراديتور حليانه و فيها ثقب و تسرب ماي .. بدلتها و جبت غطاة وكالة و تحولت الامور في السليم ..

شوف بعدك السبب لكن ما اتوقع شي كبير ..

[شبح السبله]

كم الكمية الي تنقص معاك ؟! يعني كم عبيت فالصبح و كم عبيت فالمساء ؟!

[هامور مدلل]

@شبح السبله ... الصبح قياس كوب مال ماي ... والعصر قياس نص كوب ... لأني سقتها لمدة ساعه ورديتها البيت ... فاستعملت سيارة ثانيه

[شبح السبله]

خلك مراقب مستوى الماي من دبه الراديتر الخارجيه فقط بدون ما تفتح غطا الراديتر

و اذا نقص من الدبه بالنفس ف بامكانك تبدا تشيك ع غطا الراديتر و تشوف الربله ماله اذا موجوده و انه ما يسرب

[NITRO]

حياك الله عمي هامور
سمحلي عالتاخير

شوف هو يحتاجلها هالمشكلة تتبع،انا حدثت عندي نفس المشكلة اني لما اضرب مشاوير والسيارة تحتر يقطر الماي وطلعن كتاوت خربانة وبدلتهن

كذلك يجوز ان الريديتر فيه تسريب دام مسبقا انته مصلحنه

هو يبغالها فاقة وتعطيها ميكانيكي يشيك الريديتر والتوصيلات من تحت

[oman empire]

خلك مراقب مستوى الماي من دبه الراديتر الخارجيه فقط بدون ما تفتح غطا الراديتر

و اذا نقص من الدبه بالنفس ف بامكانك تبدا تشيك ع غطا الراديتر و تشوف الربله ماله اذا موجوده و انه ما يسرب

+1111
ابدا بالاشياء السهله
اهم شي مستوى الماء فالدبه مازايد عن حده ولاناقص واجد

[H-A-M-A-D]

النقص بسبب الهيد جازجيت يكون كميه بسيطه ولو بالكمية الي ذكرتها لكان شفت دخان ابيض يطلع من الجزوز والايل لونه كريمي حليبي وبتحصل فالبلكات لما تبطلهن قطرات ماي...

ابدأ بتشييك الرديتر والدبه ... وشيك ايضا اذا تجيك ريحة كولنت داخل عند فالكبينه معناها ال heater core عند فيه ليك مجرد فصل لالبيبات الداخله للكبينه وشيك عليهن ايضا يمكن يكون فيهن قطع بلاستيكيه مهترئه بسبب الحراره وتليك مثل ماحصل معي .

فالعاده لما يكون ناقص الماي بشكل كبير وتزيده بيحتاج مره ثانية تزيده ايضا يعني عادي ..

[Radioactive]

شيك على ايل مكينه, اذا يمكس ايل وماي للاسف مكينتك انكسرت .....الحق عليه يمكن تقدر تصلحه ..لكن اكثر شي المكينه راحت ....
من واقع خبره شخصيه وغيرت مكينه بكبرها

[هامور مدلل]

@شبح السبله

@NITRO

@oman empire

@H-A-M-A-D

@Radioactive

@Business dealers

@المسعودي


هلا بالشبــــاب ....
أمس رحت المعبيلة الصناعية ومريت على كمين محل وخليتهم يشيكو السيارة وبو فيها ... الماكينة والرادييتر ومن تحت الطبلون وعند دواسة البترول والبريك ... وبعد ما قصروا بعضهم فحصوا آيل الماكينة والبيبات ... ويا سبحان الله ما حصلوا شيء يليك

المهم انا قبل عن اسيرلهم ... قلت ليش ما اجرب وحـدي .. جيت مناك وطولت على المكيف وعطيته فوووووووووول والسيارة شغالة ... ويا خوك فتحت غطاة الراديييييتر زين الحظ اني ماسك الغطاء بخلقه اما كنت مشتوي ما عليكم مني متعود ابطل غطيات الرادييتر كذاك خليت الماي يفوح شويه والسيارة بعدها شغالة قلت ابا اشوف موه المكر بو طالع منها اليوم

سكرت غطاة الرادييتر وخليت السيارة واقفة علين العصر في لهيب الشمس بدون طربال ... قلت اذا فيها شيوخ بيطلعوا من اللواهيب والحمد لله العصر شيكت الآيل والماي وشفت امورهن طيبة وبعدين عاد رحت المعبيلة حال التشييك

ومن خلصت من عندهم اشتريت من نيسان العربية غطاة رادييتر وفلتر هواء قلت يمكن مفتررررر رااااااسها بس ووقفتها علين الساعة 9 بالليل عند البيت بعدين ركبت الفلتر والغطاء ... قلت يا الله يا كريم ارزقنا خيرها وكفينا شرها ... والحمد لله اشوف الماي الصبح ما ناقص والآيل ما فيه شيء ...

بعدني بجررررررربها في الليل وأشيك فيها الآيل وعسى الأمور طيبة

[هامور مدلل]

شيك على ايل مكينه, اذا يمكس ايل وماي للاسف مكينتك انكسرت .....الحق عليه يمكن تقدر تصلحه ..لكن اكثر شي المكينه راحت ....
من واقع خبره شخصيه وغيرت مكينه بكبرها

عندك التيما او غير سيارة

[oman empire]

بالتوفيق

احلى شي انك متفيق يوم تكتب موضوع

لو انه طويل وسالفه طويله وعريضه وروح هنا وهناك لكن غاوي ياخي

[أبوفاطمة22]

السلام عليكم
يمكن الغطاء اللي على الراديتر فيه كسر حتى لو بسيط
ويتبخر الماي من تزيد درجة الحراره
صارت معي قبل كم شهر والحمد لله صلحتها
نظفت الراديتر وغيرت القطعه و راحت المشكله

[هامور مدلل]

رغم ان الموضوع صار له فترة طويلة ... وأنا من ذيك الأيام باغي أعرف المشكلة
إلا أني أشوف بأني أحتاجه اليوم
ذي الفترة كل ما أجيت اشيك على دبة ماي الرادييتر أشوف ما فيها ماي
صراحة مستغرب منها
واليوم سرت صوب الجراج ,,, شيك على الرداييتر قالي فيه تلييك ويحتاج تغيير
قالي ركب تجاري نوعية تايلاند او ماليزي او كوري بقيمة 35 ريال
ومع التركيب 15 ريال

صراحة من بحثت في جوجل ووصلت إلى هذا الموضوع ...
بعدني ما مقتنع من الرادييتر التجاري ...

في الوكالة أكيد الرادييتر غالي

[إبداع الأنامل]

السلام عليكم
يمكن الغطاء اللي على الراديتر فيه كسر حتى لو بسيط
ويتبخر الماي من تزيد درجة الحراره
صارت معي قبل كم شهر والحمد لله صلحتها
نظفت الراديتر وغيرت القطعه و راحت المشكله

نفس المشكلة صارت عندي في نيسان صني وطلعت المشكلة انه يسرب ماي داخل الطلبون عن طريق انابيب التدفئة ، الغريب انه ما يظهر انه الماي ينزل الى داخل المقصورة او ينزل تحت السيارة ... وين يروح الماي ؟ ما اعرف !!

المهم لما فصلت انابيب التدفئة اختفى نقصان الماي وصارت السيارة طبيعية !!!

[هامور مدلل]

رغم ان الموضوع صار له فترة طويلة ... وأنا من ذيك الأيام باغي أعرف المشكلة
إلا أني أشوف بأني أحتاجه اليوم
ذي الفترة كل ما أجيت اشيك على دبة ماي الرادييتر أشوف ما فيها ماي
صراحة مستغرب منها
واليوم سرت صوب الجراج ,,, شيك على الرداييتر قالي فيه تلييك ويحتاج تغيير
قالي ركب تجاري نوعية تايلاند او ماليزي او كوري بقيمة 35 ريال
ومع التركيب 15 ريال

صراحة من بحثت في جوجل ووصلت إلى هذا الموضوع ...
بعدني ما مقتنع من الرادييتر التجاري ...

في الوكالة أكيد الرادييتر غالي

توكلت على الله وخذيت رادييتر اصلي من الكيومي بقيمة 106 ريال ... وماي رادييتر اصلي جلنين
والحمد لله

[شخص آخر]

بصراحه خليتوني أتشكك في سيارتي، ملاحظ نفس المشكلة من بدلت الراديتر و ركبلي ماي أخضر مال ريالين، و تو أشوف صار لون الماي كما التراب