¨o.O ( مطلوب رأيكن : *مـــع أو ضــــد *) O.o¨

[غـلاي]

الـســلام ع ــلــيــكــم ورحــمــة الله وبــركــاتــه..||~

يسعد صباح الجميع ،،،

هاليومين محتاسة شوي في موضوع بالنسبة لــي أعتبره جديد كليا ولحد ألحين ما قادرة أرسى على بر

فقلت خليني أستشيركن على الأقل تنورني بأفكاركن خاصة للي مثل وضعي

وللتذكيــر بوضعي الحالي

1.إمرأة عاملة (دوامي من 8 - 3 )
2. أم لطفلين : ولد وبنت الله يحفظهم
3. بيني وبين دوامي نص ساعه : بس أضطر اوصل اليهال بيت أمي فياخذ مني ساعه
(يعني ساعتين يومين فالطريج رايح راد )
4. ساكنة فـ شقة (غرفتين وصالة ومطبخ ودورتين مياه وإنتو بكرامه)
5.ما عندي خدامة >> ف تخيلو حجم الشغل اللي ينتظرني

بس استجدت بعض الأمور اللي تخليني أجيب خدامة
لذلك فكرت وفكرت وفكرت وقررت أجيب وحدة
بس طبعا مستحيل أخليها وحدها مع اليهال
يعني المشوار اليومي راح يظل مثل ما هو عليه والخدامة يكون دورها التنظيف والغسيل والكوي ومع الوقت الطبخ


الأسئلة اللي تسدح نفسها :
هل تشجعوني أجيب خدامة ؟؟
أيهم أفضل وليش: الأندونيسية أو الفلبينية ؟؟؟ >>> لا تطلعوا عن هالجنسيتين
3. هل فإعتقادكم إنها راح تتقبل المشوار اليومي ؟؟ أو إنهن من النوع اللي ما يحبن التنقل ؟؟

فــ إنتظار آرائكن

[بنت الباشا]

هلا غلاي

وضعك تقريبا نفس وضعي..بس عندي طفل واحد..واوديه الحضانه لانه بعيد عن اهلي..بس نفس الشي من ارجع من الدوام ارجع لشغل البيت لحد س9 بليل اكون طايحه عاد

بس ما فكرت اجيب شغاله ما ادانيهن احسهن عذاب نفسي والله من معاناه امي

انا اشجعك عالاندونيسيه صراحه ..بنت خالتي عندها ومريحتنها لابعد الحدود زينه فالشغل ونفس الشي مع الاطفال..

بس الفلبينينه ما سمعت واجد يمدحون ...بنت عمي جابت بس اسبوع ورجعتها قالتلها اريد بوي فريند

بس فالنهايه الشغالات احسهن بالحظ..وموفقه

[حواء84]

صباح الخير اختي غلاي

الله يوفقك ان شاء الله ...

ما اقدر افيدك ايهم ا فضل لان على حسب طبيعتها ... في ناس تطلع عندهم الاندونيسية احسن وفي ناس الفلبينية

يعني يعتمد عليها هيه

وعلى استفسارك اذا تتقبل او لا الروحه والجيه ...

لا تخلي لها مجال انها ما تتقبل ولكن حسبي حسابك الصباح لما تقوم يعني تقوم بواجبات كذا وكذا وتروح تاخذ معك الاولاد ولما ترجع تجهز الغدا والغسيل والكواي .. انتي صاحبة البيت وما تحملتي ... فما بالك هيه ومن هذي الجنسيتين

اقتراح خلي الوالدة اذا تسمح ظروفها تجي معك الشقة فترة بسيطة ما من البداية اول ما توصل على هالروتين لانها ما بتتحمل على حسب ما اتوقع

فكري بالجنسية قبل وبالامور اللي عليها وشوفي من جرب مثل ما قلتي

[sweet stuff]

لا حول ليش ما نطلع عن هالجنسيتين؟؟؟
تصدقي حسبالي بتجيبي موضوع اول حمل
وانتي ما شاء الله عندج واني توني اعرف طلعتي عجووووز
اممممم والله يعتمد عليج انتي!!!
طريقة تعاملج وتفاهمج معاها.. من اللي اشوفه بيت عمي كل م يجيبو بشكاره تطلع سنعه
لان زوجة عمي تسنعها من البداية وتحط لها حدود لكل شيء عشان م يكبر راسها!!
مره وحده اندونيسيه تقريبا كبر راسها خذتها المكتب ادبوها ورجعت سنعه من الخاطر
وهي مسافره لمن خلصت مدتها كان خاطرها تجلس معاهم!!!
هو الاحسن تاخذي وحده جديدة وتعلميها بروحج كل شيء عشان م تقارن و لا تقول م متعودة ع درب السيارة ووو
بس انا اصوت اكثر للفلبينية!! احس لهن بارض اكثر من الاندونيسيات!!!
واهم شيء تشيكي ماضيها لا يكون احد ف عايلتها مسولها عقده من شيء وتجيها حالات

[غـلاي]

@بنت الباشا
موو أنا قلت مثلك بالبداية ما راح أجيب شغالات أبدا أبدا أبدا
وكل حد كان يحسدني على إني قادرة أرتب اموري ووضعي
بس بعد ما جبت الثاني زاد العبء علي أكثر وأكثر
هذا غير الربشة اللي يسووها قالشارع وأنا أسوق
زوجي مساعدني على جد ما يقدر ،،، ويمسكهم عني لغاية ما اخلص شغل البيت
بس احس نفسي ما اجلس مع اولادي إلا فترة بسيطة
تخيلي من الصبح بيت أهلي والمسا عند أبوهم وانا ما يشوفوني إلا حزة تغيير الملابس والنوم


@حواء84
وصباحك أسعد
فكرت أجيب امي تجلس معي في بداية الأيام
واحيانا أقول بوديها بيت أمي أسبوع وبجيب أمي معي أسبوع
بس أمي ما بترضى تجي عندي اعرفها
بتقول وحدها شقتك ضيقة .. بعدني أجي أزاحمكم ؟؟

[غـلاي]

@sweet stuff
عجوز ف عينك

جبت بنوته الله يحفظها توها 8 شهور
ما أريد أطلع عن هالجنسيتين لأني أحس الشكاوي عليهن قليلة >> ما صح ؟؟
هذا غير إنهن نظيفات ومرتبات وكيوتات
بالنسبة للتعامل معهن لا تحاتي
ياخي أنا طيبة وأنحب بسرعه

[حواء84]

من ناحية شغالة وجودها ضروري احس

تعرفي شوفي وضعك بوجودها تخيليه

ترجعي البيت امورك مرتبة تجلسي مع اولادك وزوجك

ما شاء الله عليك ان شاء الله الشغالة بترتاح معك لان شغل خفيف والمكان صغير

ان شاء الله بتضبط امورك .. لا تجلسي واجد تحاتي في نقاط تقدري تسيطري عليها الا لما تجي

اول ما تجي عطيها شروطك بتتقبل لانها جديدة عندك ان شاء الله

بس خلي في بالك ما تتحمل يوميا تروح

[التاجرة متميزة]

الله يعينك صراحه
انا دوامي الى الساعه 5 واوصل البيت س 5:30
قبل ما يشرف البيبي الاول مضطره اجيب شغاله عشان تساعدني في البيت والبيبي وقت الدوام لان اهلي يسكنوا بعدي عندي مسافة نص ساعه اطلع من مسقط الى بركا وارجع الى مدينة قابوس

بالنسبه للجنسيه يعتمد انتي وحظك وظيف تتعاملي معها وتعلميها قوانينك ونظامك من البدايه
انا احس انك راح تتعبي اول ايام لانك ما تعودتي حد يقوم بشغل بيتك عنك بس لازم تحاولي تضغطي على نفسك ولا تتدخلي في شغلها في كل شي حتى ما تطفش منك وتقولك اشتغلي بدالي ههههه سواتها شغالة حمية اختي

من الحين ابدي ادعي ربك في كل صلاه انه يرزقك الشغاله الطيبه الزينه الامينه يللي تعينك على مشاغل البيت
ممكن تحطي كمرات في البيت مال مراقبه بدل لا تشليها هي والعيال الى بيت اهلك لان ما اظن كل الشغالات يوافقن على كذا

[غـلاي]

@حواء84
مشكوورة الغلا وبعدني بنتظر باقي آراء البنات وبدرس الموضوع

[غـلاي]

@التاجرة متميزة
مشكورة حبيبتي ،،، بس مستحيل جدددددا إني أخلي لشغالة مع اليهال بروحهم فالشقة
بجلس طول الوقت أحاتيهم ،،،

وبالفعل مثل ما قلتي إني من ألحين ما عارفة كيف بتقبلها لأني تعودت أسوي كل شي بروحي
أحيانا أقول بجيب شغالة بالبارت تايم ،، بس اللي أحصلهن يقولن نريد حد يوصلنا ويرجعنا

وأكثر شيء أحاتي ربشة اليهال فالسيارة وأنا أسوق
يحتاج لي حد معي يشغلهم شوي عني

[قمر تركي]

جيبي شغاله فلبينيه
احسهن الفلبينيات احســـــــــن وانظف ..
وخليها مثل ما قلتي للتنظيف وغيره والعيال مع ماماتك

[التاجرة متميزة]

@التاجرة متميزة
مشكورة حبيبتي ،،، بس مستحيل جدددددا إني أخلي لشغالة مع اليهال بروحهم فالشقة
بجلس طول الوقت أحاتيهم ،،،

وبالفعل مثل ما قلتي إني من ألحين ما عارفة كيف بتقبلها لأني تعودت أسوي كل شي بروحي
أحيانا أقول بجيب شغالة بالبارت تايم ،، بس اللي أحصلهن يقولن نريد حد يوصلنا ويرجعنا

وأكثر شيء أحاتي ربشة اليهال فالسيارة وأنا أسوق
يحتاج لي حد معي يشغلهم شوي عني

البارت تايم ما سهل تحصلي و اسعارهن وااااااايد خياليه
انا ما قدرت احصل في المعبيلة اما هنا صوب الخوير هيل بلا كيل لكن رواتبهن فوق 150

اممم كان من الضروري تعملي كراسي للأطفال في السياره ويتعودوا عليها امان حالهم وحالك في الطريق

[دلالي غير]

جيبي شغاله فلبينيه
احسهن الفلبينيات احســـــــــن وانظف ..
وخليها مثل ما قلتي للتنظيف وغيره والعيال مع ماماتك

انا مع هذا الرأي الفلبينية احسن

[وردة الشتااء]

أيوااا جيبي شغالة بما انك تشتغلي وذلك لكي تتفرغي اكثر لبيتك واولادك,,

اماا نوع الشغالات ما ادري بصراحة لأنه ع الحظ يعتمد,,,,بس الفلبينية يمكن احسن

وشغالة تراهاا تتبرمج من البداية ع الشغل والمشاااوير لأن بعدين صعب جدا تقنعيها ع شئ جديد.

[sweet stuff]

@sweet stuff
عجوز ف عينك

جبت بنوته الله يحفظها توها 8 شهور
ما أريد أطلع عن هالجنسيتين لأني أحس الشكاوي عليهن قليلة >> ما صح ؟؟
هذا غير إنهن نظيفات ومرتبات وكيوتات
بالنسبة للتعامل معهن لا تحاتي
ياخي أنا طيبة وأنحب بسرعه

ما شاء الله!!! الله يحفظكم لبعض يا رب!!
عسى تشوفيها عروس قمر
نحن عندنا سواحيلية عسل!!! تو مسافرة باغيتنها ترجع
حتى يوم اتزوج ابغاها تجي معي:فيس طفحان صياح:
ياخي كله تسويه بدون م تقوليلها شيء ما شاء الله عليها!!
وطباخها حمااااااااس
و تعرف تتعامل مع الاطفال وايد زين!!!

الله يعينك صراحه
انا دوامي الى الساعه 5 واوصل البيت س 5:30
قبل ما يشرف البيبي الاول مضطره اجيب شغاله عشان تساعدني في البيت والبيبي وقت الدوام لان اهلي يسكنوا بعدي عندي مسافة نص ساعه اطلع من مسقط الى بركا وارجع الى مدينة قابوس

بالنسبه للجنسيه يعتمد انتي وحظك وظيف تتعاملي معها وتعلميها قوانينك ونظامك من البدايه
انا احس انك راح تتعبي اول ايام لانك ما تعودتي حد يقوم بشغل بيتك عنك بس لازم تحاولي تضغطي على نفسك ولا تتدخلي في شغلها في كل شي حتى ما تطفش منك وتقولك اشتغلي بدالي ههههه سواتها شغالة حمية اختي

من الحين ابدي ادعي ربك في كل صلاه انه يرزقك الشغاله الطيبه الزينه الامينه يللي تعينك على مشاغل البيت
ممكن تحطي كمرات في البيت مال مراقبه بدل لا تشليها هي والعيال الى بيت اهلك لان ما اظن كل الشغالات يوافقن على كذا

صحيح حطي كاميرات مراقبة!
عشان من ناحية لمن ترجعي البيت يكون كل شيء مرتب وجاهز ونظيف!!!
بدل م تبدء هذيك الساعة لمن ترجع من عند اهلك تسوي كل الشغل!!
وبعدين دامها شقة صغيرونه م رح يكون ف شغل وايد!!!
و ممكن لو في عندكم جيران تدخلوا معاهم ويكونوا موجودين هناك مو دوامات
تخلي حرمة الجيران بين فترة وفترة تشيك عليهم!!!
واهم شيء تفرضيلها قوانينك من الاول عشان تكون عارفة موقعها من الاعراب!!
وتفاديا للمشاكل وريها العين الحمراء من البدايه قبل لا تسوي شيء شو بيصير لها
وخليها ما تستهين فيج!!
وبعدين هو مو وايد يعتمد ع الجنسية كثر م يعتمد عليج معاها!! واهم شيء لا تخلي ابو الشباب يتساهل!!
لان لمن تشوف "بابا" عنده عادي، ف م رح تهتم باللي تقوله "ماما" لان "بابا" م تهون عليه وعنده عادي!!!

[غـلاي]

@ قمر تركي
أكثر شي أميل للفلبينية بس البعض يقول أندونيسية كونهم فالطبخ أحسن

@التاجرة متميزة
الكراسي موجودة حبيبتي >>> بس من اللي يجلس عليهن ؟؟
يتعودوا يجلسوا ل 7 أو 8 شهور وبعدها تصير مناحة فالسيارة

@دلالي غير
إن شاء الله خير

@وردة الشتاء
مع كلامك إن شاء الله

[غـلاي]

@sweet stuff
ضحكتيني على سالفة ماما وبابا

جيراني تقريبا كلهم وافدين ،،، وما متداخلة معه
بسير أسجل قوانيني وعسى ما أنسى شيء

[قمر تركي]

@غلاي
ما كلهن الاندونيسيات شاطرات ف الطبخ
جبنا 4 حبات منهن ولا وحده منهن فالحه
وف النهايه كما يقولوا تراهن بالحظ
موفقه :ورده:

[sweet stuff]

@sweet stuff
ضحكتيني على سالفة ماما وبابا

جيراني تقريبا كلهم وافدين ،،، وما متداخلة معه
بسير أسجل قوانيني وعسى ما أنسى شيء

@غـلاي بس ترا هذا اللي يصير!!
اهم شيء سجل كل القوانين ولمن تسيري تشوفي
جيبه وحده جديده بقراطيسها ما مستعمله عشان م تجلس تقارن!!!
وعوديها من اولها ع كل شيء!!!
واهم شيء الاماكن الربشة والتجمعات عوديها عليها!
عشان لمن تقوليلها بتروحوا المكان الفلاني م تقولك م لازم اروح ووو
ترا بعضهن منكريات اوين م يتحملن الازعاج ووو لان تكون متعودة البيت اللي تشتغل فيه اهدء واقل شغل!!
بالتوفيق

[طيبتي الزائدة]

هلا بالمشرفة الغالية الغائبة علينا

الله يعطيكي الصحة والعافية ويعيينا جميعا على مسؤولية البيت والشغل

أنا موظفة شغلي من 8 إلى 5

وعندي ولد واحد الله يخليه الحين في الروضة

عايشة ببيت مع زوجي وحماتي عااد تخيلي

المهم أهل زوجي ما يحبوا الشغالات أبدا أبدا

فإيش الحلو إلي بحياتي إنه عندنا واحد بنجالي يجي الصبح ينظف البيت والحمامات الله يكرمكم والمطبخ

وبحكم إنه إحنا عايلة صغيرة الحمدلله أمورنا في الروووب

حتى زوجي يساعدني في أشغال البيت ونوبة حماتي ليها يد في البيت تساعد بإلي تقدر عليه

طبعا الغسيل الأوتوماتيك ما مقصر الكوي نأخذهم الكواي الدشاديش والعبايات فقط أما الباقي ف اليوم إلي ألبسه أكويه ولو إنه بنسبة قليلة

من ناحية الشغالات أحسن لك أندونيسية

لآنه الفلبنيات عليهن شرروط ما تنتهي

صديقتي جابت وحدة فلبينية صغيرونة وعااد الحلوة كانت حاطة عيونها على زوجها تخيلوا وما تحملت صديقتي سفرتها وإستقالت هي من شغلها عشان ولدها
المصيبة هالشغالة لما راحت الفلبين قاامت تتصل في زوجها وتحاول تكلمه وكذى لكن هي وقفت بالمرصاد في شكلها

أما الثانية أوين أخوي باغي يسوي مفاجأة لزوجته وجاب لها شغالة فلبينية الحلوة تقوم وقت ما تريد وتجلس ما تشتغل أوين تتطرش البنت تقول لها خبري أمش ويش أسوي تخيلي
في الأخير هم يومين لا زيادة ولا نقصان قالت لها أريد أرجع المكتب ما أريد أشتغل وسيييدا المكتب بلا تفاهم

أنا عن نفسي ما أريد شغالة عارفة راح أوصل مرحلة بضطر أجيب بس الله يعيني لآنه بلاويهم وااجد والوحدة تخاف على أولادها

[فجر الهدى]

@غـلاي
الله يعينك بصراحة ع دوخة الشغالات وبلاويهن
عن نفسي مريحة راسي ما أريد اشتغل أكرف وحدي فالبيت

والشغالات الواحد ما يجيبهن إلا من حاجة
فأحسن تجيبي أندونسية جديدة ما مشتغله قبل
وسنعيها بروحك

وبالنسبة لربشة عيالك سويلهم شاشه فالسيارة
وشغليلهم رسوم وشوفيهم كان ما انطبوا خخخ

أتذكر أولاد أخوي ماشاءالله عليهم حشرة فالسيارة
وراح أخوي ركبلهم شاشة ومنها اصطموا فالسيارة
بس هذيك التنصوخة خخخخ

[اسيرة الشعور]

مساء الخير اختي
بما انك عامله وعندك اطفال انصحك بشغاله لان شغل البيت مايخلص
ولا تكرفي نفسك وما تلحقي تجلسي مع اولادك وزوجك جيبي شغاله وريحي دماغك
وجيبي جديده علميها من البدايه صح بيكون تعب بس حلو انت تعلميها ع مزاجك الشغل
واحسن تخليها ف البيت تتعود تكمل وتخلص شغلها شهر شهرين وتتعودي عليها بعدهاا ابدي خلي العيال عندها
اذا شفتيها زينه صدقيني بترتاحي بدل بهدله العيال وقومتهم من الصباح
بعدها بيتعلقو فيهاا ويحبوهاا وتروحي الدوام وانتي مرتاحه بس انتي تعاملي معاها بلطف ولا تشدي ولا ترخي عليها
وعلى سالفه الجنسيه كل الجنسيات فيها الشين وفيها الزين
حتى البنجاليات عندنا ف العيله واااجد زينات ومال اطفال يحبن الاطفال
ونحن عندنا اثيوبيه حنوونه وعسل ماشاءالله وكملت سنتين وبتروح وبترجع
اهم شي انتي كيف تتعاملي معاها وبترتاحي صدقيني لا تهلكي نفسك ف الشغل وشغل البيت

[أحلى مسقط]

شوفي الشغالات بالحظ

للاطفال الفلبينيه افضل ونظافه بعد

الاندونيسيات بعد بالحظ في منهم الزين وفي العكس
المشكله يوم يطلعوا برع يفسدوا يصادقوا

انتي وديهم بيت اهلك لا تخليها وحدها بالبيت ماتعرفي شو تسوي

تطلع برا تجيب رجال ولا سوالفهم ماتخلص البطاله

جيبيها ووديها بيت اهلك مع عيالك لتتعود ويكون بعد الدوام ترجعيها وهي تحت ناظرك تسوي كل الشغل

[غـلاي]

@قمر تركي
على قولك بالحظ
أسعدني وجودك فالموضوع ،،، ولا تروحي بعيد


@sweet stuff
الله يعين بس ،، دعواتك

@طيبتي الزائدة
نسيت سالفة الشروط اللي تطلعها الفبينيات
جاني إحباط منهن من قريت قصتهن مع صديقتك وزوجة أخوك

@فجر الهدى
مدام إنك جالسة بالبيت نصيحة لا تفكري إنك تشتغلي
ومشكورة الغالية ذكرتيني بموضوع الشاشة ،،، مدري كيف غاب عن بالي

@اسيرة الشعور
تسلمي الغلا ،،، وأحيانا أفكر بنفس كلامك

@أحلى مسقط
صحيح والله بالحظ ،،، وأنا متخوفة من الاندوونيسيات بسبب سوالف السحر اللي يسونها

[طيبتي الزائدة]

@غلاي
والله أنا دفرت عمري ليين ما كبر ولدي الحلو إنه أهلي وأختي قربين مني

ومسوية نظام بالمدرسة أسبوع ينزل عند عمتي وأسبوع ينزل عند أمي

وأختي أستغلها لما تكون عندي مشاوير وما أقدر أشله أحطه معاها بكذى بااالي يكون مرتااح من ناحية وجوده مع حد أتطمن عليه

الله يعطيهم الصحة أهالينا والله من غيرهم إحنا ما نسوى شيء

[طيبتي الزائدة]

الله يعينك على هالقرار

مصيرنا لهم كلنا إحنا الموظفات بيجي يووم وبتذكر هالموضوع

[غـلاي]

@طيبتي الزائدة

صحيح كلامك والله يعينا عليهن

[درس الحياة]

صباح النور والسرور

دائما ما تكون الموظفه مضطره انها تلجأ لشغالات وخصوصا اللي يكون دوامها لفتره طويله

بالنسبه لموضوع الشغاله فنصيحتي اذا تقدري تكملي بدونها أفضلك... فاهمه وضعك تعبانه وتحتاجي حد يساعدك شوي

بس وجود الشغاله معك بيأخذ جزء كبير من خصوصيتكم وخاصه انه شقتكم صغيره بتحسي بوجود حرمه غربيه بينكم... وعاد الفلبينيات مال دلع وتكمله دراسه وغيره

وان كان ولا بد انك تجيبيها... فنصيحتي تجيبي أندونسيه أحسهن نظيفات ولهلوبات والفلبنيات بعد نظيفات لكن الأكثر ان الفلبنيات للأطفال فقط يعني ما مال شغل وهياسه

موووفقه @غلاي

[غـلاي]

@درس الحياة
مشكوورة الغلا هالنصيجة
بجد بجد ماني عارفة أقرر ،،، خاصة فالمسألة المتعلقة بضيق الشقة
بدونها ماخذة حريتي ف كل شي وأولهم اللبس ،،، وجودها بيعرقلني شوي

مرات فعلا أقول بتحمل لين ما يجهز بيتي اللي راح نبدأ ف بنيانه قريب
بس من الضغوط اللي من كل صوب أقول بجيب

[أم فراس ونبراس]

هلا اختي غلاي
اذا مضطره تجيبي جيبي اندونيسيه
انا ضد وجود الشغاله فمملكتي لان احس اريد اخذ راحتي انا اداوم لكن بالرغم
من كذا ماجبت لان مااحبهن ابدا
الحمدلله اولادي مع امي
الله يسر امورنا يارب جميعا