/\/\/\/\/\/\/| ( رحلـــة في عالــم الولادة ,, دليــلك في يوم ولادتــــك) |\/\/\/\/\/\/\/\

**JuSt FeeliNg** · 20/03/2011 05:46 PM

شخباركم بنيات

بصطحبكم شوي ف رحلة ف عالم الولادة

طبعا المعلومات والصور اللي يتضمنها موضوعي هي ما تختص بمستشفى معين

هي تقريبا الطريقة المتبعه ف جميع مستشفيات السلطنة الحكومية

وبأمانه الموضوع مجهود شخصي من معلوماتي واغلب الصور من تصويري

يلا نبدأ

أكيد تبدأ رحلة الولادة مع بداية الألم

ألم الولادة ما جربته شخصيا بس يقولوا كما نوعية آلام الدورة بس اشد

في منكم اللي تتوجه المستشفى ع طول مع بداية الوجع ,, وفي اللي تفضل انها تجلس فالبيت شوي لحد ما يزيد اكثر الالم وبعدين تروح

وفي اللي تتأخر واجد وعاد تولد فالطريق او عند باب المستشفى

وبالنسبة للبكر دايما نلاحظ امها وعمتها ينصحوها تجلس فالبيت بألمها وما تتسرع لأنها تآخذ وقت اكثر من غيرها

عموما راح ندخل ف التفاصيل اكثر

وكل حامل وهي تقرأ تتخيل نفسها عاد فالموقف

طبعا لما تجين راح تتوجهين لطوارئ الولادة راح تدخلين قبل غرفه يسموها غرفة التقييم

فهالغرفة راح تتقيم حالتك ,,

- راح ينعمل لك تخطيط لدقات قلب الجنين للتطمن ع صحته

هذه صورة لبعض انواع اجهزة التخطيط

متصل بوايرين يثبتوهن ف بطنك واحد يقيس دقات قلب جنينك والثاني يقيس شدة انقباضات رحمك

وهذه صورتهم

والنتيجة تطلع ف ورقة من الجهاز ’’

- بيقيسوا ضغطك وحرارتك

وهذا بعد مثال لجهاز قياس الضغط

- وثالثا والاهم راح ينعمل لك فحص للرحم عشان يعرفوا كم مفتوح عندك الرحم وكيف وضعك بالضبط في مرحلة الولادة ,,

انا الحين اتكلم بالنسبة للحالة الطبيعيه يعني بالنسبة للحرمة الطبيعيه اللي ما عندها مضاعفات ,,

اللي عندها امراض ومضاعفات يمكن تنعمل لها اشياء زيادة بس اللي ذكرته هو الغالب حدوثه مع كل الحريم ,,

بالنسبة لفحص الرحم

ينعمل عن طريق الممرضة او الدكتورة

وهذا ال set المستخدم فالفحص

طبعا مثل ما شايفة مصكر ومعقم المرهم اللي جنبه هذا جل ضروري فالفحص عشان ما تحسي بأي ألم اثناء الفحص

وهذه صورة ال set وهو مفتوح من داخل وكل محتوياته معقمة لمنع انتقال الجراثيم وحدوث الإلتهابات

وهذه صورة للقفازات المستخدمه طبعا معقمة 100%

كيف يتم الفحص ؟؟

اللي تفحص تدخل صبعين السبابه والوسطى ف منطقة الرحم مثل الصورة

ما يعور ابدا بس اهم شئ تسترخي وتآخذي نفس عميق أثناء الفحص

من خلال هالفحص تتبين 4 أشياء ,,

1- طول عنق الرحم

2- كم سم منفتح

3- وضعية الراس ,, يعني بعده فوق او نازل وهكذا

4- الغشاء المحيط بالبيبي هل موجود او ما موجود خاصة اذا الحرمة نزل عندها الماي قبل ,,

عاد بعد هالفحص تتضح حالتك ويتضح وضعك

اذا كنتي بكريه والرحم مفتوح 1 سم او 2 سم راح يرجعوك البيت ويقولولك لما يزيد الوجع تعالي مرة ثانية وبنعيدلك الفحص

بس اذا كنتي الولاده الثانية والثالثة وما فوق راح تتنومي وتكوني تحت الملاحظة فقط لحد ما ينفتح رحمك

لان الغير بكريه المنطقة عندها تكون سهلة وعضلاتها ألين من البكرية لأنها مرت بولادة او ولادات سابقة ,, فولادتها متوقع انها تكون اسرع

اما اذا تبين من الفحص ان رحمك مفتوح 3 سم وما فوق طبعا خلاص تعتبري انك دخلتي مرحلة الولاده وراح ينقلوك لغرفة الولادة اللي راح تولدي فيها

حياك الله ف غرفة الولادة تفضلي

طبعا الغرفة تكون لك وحدك وتكون معاك ممرضة طول الوقت تتابع حالتك وتطورات الولاده

والغرفة تكون مجهزة بكل شئ تحتاجيه ف ولادتك

مثلا

هالتروليات فيها الاغراض الضرورية للولاده

هذا ال set فيه حاجه تلبسها الممرضة عشان تكون معقمة وهي تولدك وفيه اقمشة ينحط فيه البيبي واقمشة تكون قريبة من منطقة خروج البيبي عشان كذاك تكون معقمة

وهذا يحتوي ع الادوات مثل المقص وغيره وطبعا نفس الشئ معقمة ,,

المهم خلال فترة وجودك الممرضة راح تقيسلك الضغط والحرارة باستمرار وراح تعيدلك التخطيط ع فترات وراح تعيدلك فحص الرحم اللي شرحته فوق ع فترات بعد

ممكن بعد تحطلك سقاية تغذيه عشان تعطيك طاقة

واذا كنتي تعبانه كثير وما تتحملي الألم في بعض الاشياء اللي تنسيك او تخفف عليك الألم

مثل هالجهاز

البالون الأزرق فيه غاز عبارة عن مكس اوكسجين + نيتروجين متصل بالانبوب الاسود اللي ف نهايته ماسك مثل ما شايفه بالصورة

تحطي الماسك ع انفك وفمك وخذي نفس عميق راح تحسي بالغاز ,,

طبعا بعد فترة من استخدامه بتحسي بدوار بس لا تخافي هذا طبيعي من تأثير الغاز بس ما يدوم تأثيره ,,

وبعد ما تولدي وتخلصي الماسك ينشال وينغسل وينظف ح الاستخدام الجاي من حرمة ثانية

وفي حل ثاني لتخفيف الألم اللي هي ابرة تريحك شوي اسمها pethadine

شخصيا انصح بهذه الابرة لانها تلين عضلات الرحم بعد وتساعد ع الولادة

اغلب الحريم ما يطيعن يفكرن مع هالابرة راح يروح اللألم وبالتالي تتأخر ولادتهن

بس غلط هالكلام ,, الألم يكون موجود بس انتي ما تحسي فيه تكوني متخدرة بعض الشئ لأن الابرة تدوخك

نجي الحين للحظة الولادة نفسها

طبعا فهاللحظة خلاص ماشئ دلع وغاز وحركات

هاللحظة تعتمد عليك انتي فالدرجة الاولى

لأنه وقت الزفرة ,, وكل ما كانت زفرتك قوية كل ما كان الوضع احسن وتولدي اسرع

ما بشرح الوضعية اللي تكوني عليها لان الاغلب عارف الوضعية

بس لما تزفري حطي يدينك على افخاذك من تحت وشديهن صوب بطنك وزفري

بهالطريقة راح يتوسع الحوض ويكون المجال اكبر للبيبي انه يطلع

اذا كنتي بكرية راح تحتاجي قص للمنطقة مساعده لك عشان يطلع الراس لان المنطقة تكون ضيقة اول مرة

مثل الصورة

مثل ما شايفة القص يكون ع جانب

بس لا تخافي ما بتحسي بالقص لأن الممرضة بتخدرك موضعي فالمنطقة قبل القص

وهذا سائل التخدير

وعاد بعد الولادة راح يخيطوك ويزيدوك تخدير عشان ما تحسي

ما بس البكرية تحتاج قص ,, احيانا حتى اللي عندها ولادات سابقة تحتاج قص مثل البكرية

ف حالة ان البيبي حجمه كبير ,, أو هي مباعدة سنوات طويلة والمنطقة رجعت تتضيق

واللي عندهن ولادات سابقة اغلبهن ما يحتاجن قص بس اثناء خروج البيبي تصير عندهن جروح بسيطة احيانا تحتاج لخياطة اذا كان تنزف

واذا جروح صغيرة وما تنزف ما يخيطوها لأن وحدها تلتئم ,,

سمعتي بشئ اسمه شفط أكيد

الشفط هذا يشفطوا البيبي من راسه ,, يعني يظطروا يسحبوه لعدة أسباب مثل :

1- اذا التخطيط صار سيئ وراس البيبي مبين راح يسحبوه
2- او اذا كان الحرمة فترة طويلة تمت تزفر والراس ما يتحرك من مكانه يظطروا يساعدوها بشفط

هذه صورة بعض الادوات المستخدمه فالشفط

الدائرة الصفرا تتثبت فـ رأس البيبي ويسحبوه ,,

وفي جهاز ثاني يتوصل بالكهرباء

الحين راح نتكلم عن حبيب الحوامل

الطلق الصناعي

متى الوحدة تحتاج للطلق ؟؟

1- اذا كانت داخله للولادة بس ألمها فجأه يروح او يكون خفيف وما كافي للولاده

2- اذا كانت معدية ع موعدها

3- اذا نزل عندها الماي وكملت 24 ساعه وما ولدت

في نوع الطلق اللي هو يكون مثل الجل من تحت يحطوه اذا كان الرحم منفتح 1 سم او 2 سم

بس اذا منفتح 3 سم يستخدموا طلق عن طريق السقاية

هذه صورة دوا الطلق

هذه الغرشة الصغيرونه مخوفتنكن وااااااااااخسارتكن ,,

ينضاف الدوا للسقاية ويمشي مع السقاية ويبدأ يأثر عاد

بس نفس الألم الطبيعي ماعرف ليش بعض الحريم مهولات الموضوع

يتبع ,,

**JuSt FeeliNg** · 20/03/2011 05:48 PM

العملية القيصريه

شو الاسباب اللي تستدعي العمليه ؟؟

1- احيانا الوحدة داخله تولد طبيعي عادي بس فجأه التخطيط يضعف مال البيبي

2- وضعية الجنين اذا كان الراس فوق

3- المشيمة نازلة واجد وتتسبب في نزيف

4- البيبي حجمه كبير

5- او الوحدة عندها عمليتين سابقات

بعد ما تولدي سواء طبيعي أو عملية

البيبي الحلو راح ينحط فهالسرير

مزود بوسائل تدفئه عشان ما يفقد حرارة

مثل ما شايفين فهالصورة الجهاز اللي فوق السرير يطلع حراره

وراح ينعطى ابرة فيتامين K بعد الولاده مباشرة

وينحط ع صراره هالشئ

وتتعبأ هالاوراق بيانات الطفل او الطفله

وبث ,,

مع تمنياتي لكل حامل ولادة سهله

ودعواتكم ,, تعبني هالموضوع

**أنين الجرح** · 20/03/2011 06:34 PM

لاتذكرني بحبك يا غناتي لا تذكرني بماضايك الجميل ذكرتيني بأشياء احاول اتناسى المها عالعموم مشكوره عالمجهود الطيب

**قلبي ملكي** · 20/03/2011 07:22 PM

جستوه
واااي واااي شو هاالإجهزه بو تخوف وابوي اسميني خفت وانا بعدني ماجربت..

الله يعينك شكلك كل يوم تشوفي هذا الشي

**ام رزان** · 20/03/2011 08:03 PM

الله يهديش الحين البنات والحوامل بيخافن من الصور الي حاطتنهن

الحمد لله انا خلصت وما اريد اتذكر ذيك الغرفه

الله يعطيكي العافيه مجهود تشكري عليه

**روعة السعدي** · 20/03/2011 08:14 PM

الله ذكرتيني بولادة صراااااحة اكشن حلو
انا كنت وايييد خايفة من الولادة بس من جربت خلاص تحمست اعيد التجربة
انا جربت الولادة الطبيعية والقيصرية والطلق والاسقاط بس مثل الطبيعي مااااشي
الله يرزق جميع الحوامل بولادة طبيعية ميسرة كل يوم اقراي سورة مريم

**مسك وجوري** · 20/03/2011 08:19 PM

دام ماجربتيها ليش منزله هالموضوع الا اذا كنتي دكتوره او ممرضه
دام مالك علاقه بهالموضوع
لو مجربتنها ماكنتي نزلتيه
بس مشكوره عالمجهود

**ريم الأريام** · 20/03/2011 09:36 PM

ووووووووووووووووووووووووو وووووووووووووواي جست ايش هذا

يخوف

الحمد لله ربيت قبل لا اشوف موضوعك ولا كنت بهون

الحمد لله كنت بكريه ورحت فاخر الدقائق والله سهل ولادتي

**البسمة الدائمة** · 20/03/2011 10:00 PM

هلا فدبتكم ..........

اشتقتلكم بصراحه مشغوله مع رنوسه الحلووووه ......... صياح وسهرررر واحليلها ضحية..........

اقول جست انا رحت مستعجله فاتح 3 سم بس وما رضوا اطلع وطبعا عانيت يوم كامل الين ولدت من 5 الفجر ولدت اليوم الثاني 5 الفجر......
الرحم كان بطي وسولي سقاية طلق ما شي فايده بنتي عنيده كانت ....... وبعدين قالوا عملية بس الحمدلله الدكتوره فيها صبر كان وقالت ننتظر كم ساعه بعد........

وفي النهاية البنوته طلعت عن طريق الشفط وطلعت بعد معاناه بس تنسي الالم ما تشوفي البيبي ودف جسمه ........

بس بأمانه عمري ما انسى كيف كانت الولاده وحبيت اقول شكرا لزوجي العزيز وقف جنبي كان عندي .........

لا تخافوا بنات تراه تكبروا وتنسوا ههههههههههههههه.............

**إشراقة ميلاد** · 20/03/2011 10:21 PM

مشكوووورة اختي صراحة مجهود تشكري عليه.. ربي يجزيكي خير
واتعجب من الردود اللي استنكرت مثل هالموضوع !!

بصراحة تحتاج كل وحدة تاخذ فكرة مبسطة على الامور اللي راح تصير لها وهي سايرة تولد عشان ما تكون الامور غامضه ومجهولة عليها فتقلق اكثر

**عطر رومانسي** · 20/03/2011 10:34 PM

JuSt FeeliNg
مشكوره ع الموضوع..بجد شكله متعوب فيه..
ما قصرتي شرحتي كل شئ...بس خوفتيني من الخاطر

**ياليت** · 21/03/2011 02:30 AM

واي واي واي
ياربي امي كيف تحملت كل هذا

دوم اسال ماماتي
كيف قدرتي تتحملي الالم الولادة تضحك علي تقول بهدلتيني في ولادتك ولما شفتك نسيت كل شئ

موضوع رائع جدا
عقبال كل محرومة دش ها الغرفة

**JuSt FeeliNg** · 21/03/2011 06:23 AM

أرسل أصلا بواسطة إشراقة ميلاد

مشكوووورة اختي صراحة مجهود تشكري عليه.. ربي يجزيكي خير
واتعجب من الردود اللي استنكرت مثل هالموضوع !!

بصراحة تحتاج كل وحدة تاخذ فكرة مبسطة على الامور اللي راح تصير لها وهي سايرة تولد عشان ما تكون الامور غامضه ومجهولة عليها فتقلق اكثر

هذا اول رد يثلج الصدر ويخلي الواحد ينسى التعب ف الموضوع وتنزيل الصور والخ

مشكورة اختي

لي عودة للتعقيب ع الجميع

**عاشقة الشروق** · 21/03/2011 07:32 AM

ايامي قربت
مشكوره جست ع الموضوع
زين افدتينا
ان شا الله ربنا يخفف علينا الالم بطلة البيبي الحلوه

**البسمه** · 21/03/2011 08:18 AM

مشكوووووووووووووووووووووو رة جست كنت متخيله شئ ثاني ولو يخوف بس الأفضل نعرف مانكون فحالة وضع وإحنا ماعارفين شئ

**عذبة الكلام** · 21/03/2011 08:25 AM

يار بيسر علي وعلي كل حامل أمر ولادتها ،،،،،،،،،، وخفف عليها يا رب ،،،،،،،،،،،،، مشكورة بقرأ الموضع ززززززززززززززين يوم قريب أدخل التاسع تو قريته ما سرعة مشكورة على الإفادة

**فيونكا** · 21/03/2011 08:26 AM

بقالي شهر عن موعد ولادتي وااااااااااغياااااااااااا ااااااابييييييييييييي

**أكسجين الحياة** · 21/03/2011 08:45 AM

اها ياقلبي يعوووووووووووووور يعوووووووووووووور

حالفه على نفسي اني وقت الولادة اريدتكون قيصرية

ما اريد طبيعية

اخاف المقص والخياطة

معلومات زينة والصور حلوة ونظيفة وتخوف بعض الشي
خاصة المقص

شكرا دكتووووووووووووورة

صحيح جستووه انتي دكتورة توليد او ممرضة مساعدة توليد؟؟؟

**الياسمينة** · 21/03/2011 08:45 AM

مشكورة اختي وفي ميزان حسناتك ان شاء الله,,

ويارب يسهل لكل حامل ولادتها ويرزق كل محرومة بالذرية الصالحة..

" وَزَكَرِيَّا إِذْ نَادَى رَبَّهُ رَبِّ لَا تَذَرْنِي فَرْداً وَأَنتَ خَيْرُ الْوَارِثِينَ " (الأنبياء، 89)

**بنت البلد22** · 21/03/2011 08:48 AM

وااااااااااااي يخوف كل هذا الشي بيصير

جست حرام عليك خوفتينا والله كلي أنتفض وأنا من أول أخاف اصلا

شكلي اذا حملت فالمستقبل ما بنام اذكر موضوعك

**ReeMaz** · 21/03/2011 09:02 AM

يوووووووووووووه اقراء الموضوع وأتذكر ولادتي

كأني في غرفة الولاده وانا اقراء خخخخ

موضوع جدا رائع ومفيد للحوامل ( مع شوية تخويف

)

اتوقع بيخافن من صورة القص خخ

اما هالجهاز اكره شي عندي

كرهته يوم تنومت عندهم كل شوي يجيوا يقيسوا

بس ف النهايه فرحة الولاده تنسي المستشفى وغيره

شكرا جست ع الموضوع المتميز والجرئ

**ضياء المساء** · 21/03/2011 09:03 AM

آآه يا جست
ذكرتيني بولاداتي
انعاد شريط ذكرياتي مع ولاداتي الثلاث
احس حتى الغرف نفسها
اذا ما خاب ظني
الصور كانت من المستشفى السلطاني

صح لحظات صعبة جدا وكل ولادة تختلف عن الثانية
بس الحمد لله على نعمة النسيان

مشكوورة حبيبتي على الموضوع اكيد تعبتي عليه
وزين الوحدة اللي ما مرت عليها تتعلم

جزاك الله ألف خير

**شبكات** · 21/03/2011 09:08 AM

الف شكر جست...

موضوع راااائع ومتعوب عليه...

رجعتيني لشريط ذكرياتي...

**JuSt FeeliNg** · 21/03/2011 09:37 AM

أرسل أصلا بواسطة أنين الجرح

لاتذكرني بحبك يا غناتي لا تذكرني بماضايك الجميل ذكرتيني بأشياء احاول اتناسى المها عالعموم مشكوره عالمجهود الطيب

خخخخ قمنا نغني اشوف ,,

مهما كان ألم هاللحظات بس تظل ذكريات حلوة بالمولود او المولوده

**شموخ ظفارية** · 21/03/2011 09:50 AM

يسلمووو عالموضوع الرائع.....

**باقة ورد** · 21/03/2011 10:21 AM

Just Feeling

موضوع رائع ومتكامل
واضح المجهود اللي بذلتيه في إعداده
المفروض أن كل حامل تكون ملمة بما ينتظرها في غرفة الولادة
بارك الله فيكِ ورزق جميع الحوامل بأطفال أصحاء وحلويـــــن

الله يعينا يوم يوصل دورنا،،
جو المستشفى والأجهزة بروحها تخوف
كيف عاد المقصات والسكاكين؟!!

ما تحسي نفسك كأنك يوم العيد تستعدوا تذبحوا؟!

**التاجرة شوق** · 21/03/2011 10:26 AM

JuSt FeeliNg

أبدعتي ,، غاليتي ,،

بس بصراحة خفت

**روند** · 21/03/2011 10:35 AM

موضوع رائع واستفدت منه كثيـــــــــــــــر عزيزتي

جزاك الله كل خير ....

**JuSt FeeliNg** · 21/03/2011 10:51 AM

أرسل أصلا بواسطة قلبي ملكي

جستوه
واااي واااي شو هاالإجهزه بو تخوف وابوي اسميني خفت وانا بعدني ماجربت..

الله يعينك شكلك كل يوم تشوفي هذا الشي

عادي ما يخوف

اهم شئ استفدتي وخذيتي فكرة وان شاء الله قريب تمري بهالتجربة آآمين

**The Face of Moon** · 21/03/2011 10:54 AM

رائع موضوعش اختي جست

شفتوا شكثر امهاتنا تحملن عشان يطلعنا لها الدنيا

في هذا اليوم و ف يوم عيدش يا اغلى ام اهديش دعوه صادقه من قلبي ان ربي يحفظش ويكتبلش السعاده في حياتش
ويقدرني اكون لش البنت الصالحه الباره لش

اختي جست انا ف ولاده وحده مريت بجميع المراحل بداية بالالم الطبيعي والطلق الصناعي ومن ثم العملية القيصريه
عانيت كثير لحد ماجبت بنوتي الي اليوم تكمل سنه ف نفس يوم عيد امها ربي يحفظها لي ويحفظلكم امهاتكم وعيالكم

اسم المؤسسة	موقع المؤسسة
الوظيفة	المستوى التعليمي
وقت الدوام	نوع عقد العمل

الموضوع: /\/\/\/\/\/\/| ( رحلـــة في عالــم الولادة ,, دليــلك في يوم ولادتــــك) |\/\/\/\/\/\/\/\

أدوات الموضوع

البحث في الموضوع

نمط العرض

/\/\/\/\/\/\/| ( رحلـــة في عالــم الولادة ,, دليــلك في يوم ولادتــــك) |\/\/\/\/\/\/\/\

مواضيع مشابهه

[[ رحلـــة أستكشــــاف الخــــط الســـريع :عيار: ]]

معاناة بعد الولادة

الولادة في مستشفى كيمز

الولادة في مستشفى الرفاعه

قواعد المشاركة