الشغالات وطلباتهن

[محب الجنان]

الواحد يدعوا قبل أي عمل
الشغالات الآن ليس كما سابق
ربما بسبب التحايل اكثر الآن
في نظري الواحد يطلع على القانون جيدا

لكن المشكلة إذا طلعت مشاكل العاملة بعد ستة اشهر
هنا المشكلة

[زعيم العماني]

موضوع الشغالات موضوع كبير وما ينتهي

فقط اقدر اختصرها بكلمتين .. حسن العامله يخلي الحيوان يصير ودود للانسان
وما بالك بالانسان لو تعامله حسن المعامله ؟ ( حاشاني لا اقارب الانسان بالحيوان فقط مجرد مثال لا اكثر )

نحن واعوذ بالله من كلمه نحن .. شغاله الحين مكمله 4 سنوات
والثانيه كملت سنتين وتو مسافره وبترجع بعد 3 اشهر ..

كلمه 3 اشهر مو كلمه بسيطه خاصتا لو بيت كبير وعائلة .. الشغاله وحده ما تكفي
وفوق هذا قبل لا تسافر نعطيهم فلوس من عدنا وفوق راتبها وراتب الاجازة
واذا شي وزن نساعدهم ف المبلغ .. هنا الشغاله ولو ما تحترمك راح تحترمك بسبب المعروف وحسن التعامل

اما شغاله الاولى .. يوم جات عمان طلع فحوصات انها مصابه بمرض معدي .. كان الخيار عدنا يا نعالجها بحسابنا الخاص
او يتم تسفيرها .. هنا الوالد قرر انها يعالجها ع حسابنا .. وتم اعطاء الوصفة الطبية .. تخيلو فوق خسارة الي خسرناها عليها
ع كل حقنه .. بـ 50 ريال عماني .. خسرنا عليها 150 ريال ع ثلاث مراحل علاج من غير الادوية
والحين هذا ترد الجميل الي سوينا لها .. يمكن ف حياتها ما راح تتعالج بهذا المرض لو رجعناها الى بلادها .. حسب التعامل مطلوب

مافي شغاله مافيها عيوب .. بس اهم شي التعامل كيف معها
وكيف تنصحيها وتكلمينها بكل هدوء بدون عصبية او شتمها او ضربها
مع الايام راح تتحسن وراح تتقبل كلامك لانك تتعاملي معها بحسن الاخلاق

بيت عمي بيت طابق واحد فقط و 4 اشخاص يعيشون ف البيت لا اكثر ... مع هذا مافي شغاله تجلس معهم سنة كامله
بسبب التعامل مو زين معهم ... اكثرهم الي نعرفهم يصرخون ويشتمون ع شغالات اذا سوت شي غلط
او يخصمون راتبها لو كسرت الصحن او ضيعت شي .. وكثير من الطرق والاساليب الي ما تخلص ولا تنتهي

صحيح في بعض الشغالات عندهم امراض نفسيه وبعدهم جايين من بيئة وسخه ف الطباع
بس شوي شوي الانسان يتغير للحسن وطبعاً ما بيتغير 100% .. بس ع اقل شي بيكون اطباعها احسن من قبل

اما الي مريضه نفسياً هذه ع طول مفروض يتم تسفيرها والقانون يحمينا من هذا الشي

من كذا اقول لكم شوي شوي عليهم .. لانكم ما تعرفون حياتهم وظروفهم معيشتهم كيف ف بلادهم
يكفي حالتهم ف بلادهم سيئة ويجيو هنا بعد نعاملهم اسوء ؟!

وطبعاً انا مو جاي ادافع عن الشغالات .. انما حبيت فقط انصح واتكلم انكم تحاولون تتفاهمون معهم وتنصحونهم
وربك كريم ورحيم انه يقلب الحال من اسوء الى احسن ع حسب تعاملكم معهم واسلوبكم وحواركم مع الشغالات

واسف ع الاطاله

بالتوفيق للجميع