ملف { طبخات أم زهر} الإخلاص

**الإخلاص** · 26/10/2016 10:17 AM

صبحكم الله بالخير جميعا

جايبه لكم حلى سهل جدا

سويته في عيدميلاد بنتي كان المفروض ازينه كريمة بس لضيق الوقت خليت بنت اخوي تزينه بسرعه

وكررته في عزومته صديقاتي نفس الشى كانت بنتي مريضة وماقدرت اكمله

سهل جدا

بسكويت الايسكريم
تحشية بخليط الكيك وتدخليه الفرن كانه كب كيك
ومن تطلعيه ويبرد سوي له كريمة وزينيه كأنه ايسكريم

او ممكن تجيبي كيك جاهزة وتعجنيها مع قشطة وتحشيها البسكويت وتزينيها بعد

والف صحة وعافية

**الإخلاص** · 26/10/2016 10:32 AM

صبحكم الله بالخير جميعا

بنزل لكم اليوم طريقة ميلك شيك سهلة جدا
ولذيذ كأنه من باسكن روبنز

اول شي ايسكريم فراولة وطبعا ايس كريم باسكن موجود الحين في المحلات
كريمة تزين
كيت كات مجمد ومكسر
صوص فراولة ممكن جاهز اللي يستخدم للشيزكيك
حليب طازج

نخلط في الخلاط ايسكريم الفراولة مع الحليب بس شوي حليب علشان يكون القوام ثقيل واضيف شوي من الفراولة

نزين الكوب بصوص الفراولة وبعدين نصب خليط الايسكريم واخر شى نحط الكريمة ونرشة بالكيت كات
وشوي من صوص الفراولة(ممكن تخلطي الصوص في الخلاط شوي علشان يسهل التزين فيه)

والف صحة وعافية

**الإخلاص** · 26/10/2016 10:37 AM

السلام عليكم

حلى من اختراعي

لاني غالبا ادخل المطبخ واسوي اشياء غريبة

بس غالبا تضبط والحمدلله واهم شئ زوجي يحبها

الحلى
عبارة عن خبز عماني
مع خليط عبارة عن نصف علبة حليب مكثف محلى
2علبة قشطة
نصف كوب كريمة خفق
وللتزين كاكاو بودر

[IMG]

[/IMG]

جهزي خليط الحليب والقشطة
بعدين اعملي طبقات للخبز وبعدها الخليط وبعدها رشة كاكاو بودر
ممكن يكون طبقتين او 3 حسب الرغبة

والف صحة وعافية

**mandos** · 26/10/2016 10:42 AM

ماشاءالله عليك أختي
أبداع x أبداع

تسلمي

**الإخلاص** · 26/10/2016 10:57 AM

السلام عليكم جميعا

امس حبيت اجرب اسوي بيتزا سريعة بطريقة السينابون بس بعجينة الباف بيستري
بس للاسف على ربشة بنتي والطباخة عندي تخرف احيانا
المهم جربت

الطعم كان حلو بس واجد دهني المرة الجاية بسوية بالعجينة العادية للفطائر

وللاسف انفتحن على لان العجينة كانت باف بيستري

الصور

**الإخلاص** · 26/10/2016 10:57 AM

أرسل أصلا بواسطة mandos

ماشاءالله عليك أختي
أبداع x أبداع

تسلمي

هلا اختي

الله يسلمك يارب

**الإخلاص** · 26/10/2016 11:01 AM

صبحكم الله وبالخير جميعا

انا من عشاق الشيز كيك والحمدلله لي كم سنة من جربته وصرت
في كثير مناسبات اسوية

عندي طريقتين اليوم بنزل طريقة الشيز البارد

نفس المقادير بس بدون سكر الافضل يكون حلو وخفيف
بدل الزبادي احيانا اسوي زبادي الفاكهة عدد 2 بدل الزبادي العادي يطلع الذ
طبعا الطبقة الاخيرة ممكن تسوي بلوباري او اي من الحشوات الخاصة للشيزكيك
وممكن جلي بس ماي سوي شوي نصف كوب للكيسة مال الجلي الوحدة
ممكن تسوي زبدة اللوتس
فيه افكار واجد

**الإخلاص** · 26/10/2016 11:11 AM

التمر من الاغذية الغنية بالفيتامينات والمعادن

وانا من محبي التمر جدا و الرطب ايضا وكل شئ في موسمه

ومكتبي لايخلوا من التمر وفي البيت ايضا او الرطب والحمدلله

واليوم كنت جايبة تمر للدوام

غالبا لما اشتري التمر او حد من الاهل يعطينا اذا كان حبه بحبه

اغسله وانشفه واخليه في محارم نشاف بعدها احطه في الاواني مع رش هيل و سمسم ان وجد

اليوم رشيت عليه طحينه

بس لذيذ فعلا

**Specialty English** · 26/10/2016 11:44 AM

أرسل أصلا بواسطة الإخلاص

صبحكم الله بالخير جميعا

جبت لكم اليوم حلى متعودة اسوية للمناسبات العائلية الخاصة والاعياد

الكل يحبه وخصوصا الصغار

هو حلى في 4 انواع

الاول (حلى كرات الشكليت)

علبة قشطة
علبة حليب مكثف محلى
2 ملعقة كاكاو بودر
2 بسكويت شاي (بسكويت ميري الدائري الكبير او 4 صغار)
شكليت خام للتغليف

الطريقة
نكسر البسكويت ناعم
ونضيف له باقي المقادير ما عدا الشكليت الخام

ويعجن جيدا ويترك في الثلاجة اقل شى ساعة يتماسك مع تغليفة جيدا
بعد ذلك نكوره وبعدها نغمسة في الشكليت الخام المذوب في حمام مائي

ويترك في الثلاجة لحين التقديم

الحلى الثاني ( حلى الكورن فليكس والمارس)

6 مارس
اصبع زبدة
علبة قشطة
كورن فليكس

نذوب المارس مع الزبدة في حمام مائي
وبعدين نضيف القشطة وبعدها نضيف الخليط على الكورن فليكس
ونكورة ويحط في صحن التقديم

الحلى الثالث( تمر مع طحينة وبسكويت ناعم ومكسرات)

الحلى الرابع (رافايلو)

المقاادير :
1 كوب حليب بودر
2 كوب جوز هند
1 كوب سكر مطحون
علبة قشطة
ويحشى مكسراات او شكليت مالتيز

تعجن المكوناات بالقشطة وبعدين تكور وترش اخر شئ بالنارجيل

والف صحة وعافية

ما شاء الله..
يكفيني صحن واحد ههه..
تسلمي خيتو

**Specialty English** · 26/10/2016 11:45 AM

عزيزتي الإخلاص..
كيف طريقتك للباكورة؟

**نور الكاف** · 26/10/2016 01:36 PM

هل الاخت الاخلاص ترد على عضوات معينات
سألتك وما جاوبتيني في صفحة 1

**بائعه الفراوله** · 26/10/2016 01:50 PM

أرسل أصلا بواسطة الإخلاص

صورة وقت التقطيع

تسلموا الايادي شكلها لذيذة

**الإخلاص** · 26/10/2016 06:27 PM

أرسل أصلا بواسطة نور الكاف

حلوو

ما شاء الله, اي فنجان اللي تستخدميه فنجان شاي ولا قهوة ؟ ممكن توضحي

@نور الكاف
هلا اختي
اولا
مشكورة على المرور والمشاركة
ثانيا
كنت انزل اكثر من وصفة و وقتي قصير
لانشغالي في الدوام فردك ما انتبهت له
اسمحي لي على التقصير

بخصوص القياس
الفنجان نستخدمه للقهوة
والكوب للشاي.
والكأس للماي

فاقصد هنا بفنجان القهوة

وشكرا

**الإخلاص** · 26/10/2016 06:28 PM

أرسل أصلا بواسطة Specialization English

عزيزتي الإخلاص..
كيف طريقتك للباكورة؟

هلا اختي
تسلمي بارب
الحين داخلة من التلفون
ان شاء الله بكرة بكتب لك بالتفصيل

**الإخلاص** · 26/10/2016 06:31 PM

أرسل أصلا بواسطة نور الكاف

هل الاخت الاخلاص ترد على عضوات معينات
سألتك وما جاوبتيني في صفحة 1

@نور الكاف

هلا اختي

والله لما شفت ردم دخلت عن طريق التلفون علشان ارد عليك بس
واذا قصرت في الرد على اي اخت تسمح لي
لانشغالي وعندي فترة بسيطه في وقت البريك ادخل فكنت اريد انزل اكبر قدر وصفات

صح اختي
من الاخوات اللي ارد عليهن بس ؟؟!!

**الإخلاص** · 26/10/2016 06:33 PM

أرسل أصلا بواسطة بائعه الفراوله

تسلموا الايادي شكلها لذيذة

هلا اختي
الله يسلمك يارب.
ايوى جدا وبشهادة الجميع والحمدلله

جربيها

**الإخلاص** · 27/10/2016 09:55 AM

صبحكم الله بالخير

قبل فترة كنت مسوية بكورة ولفائف جبن و سمبوسة
والحمدلله الكل حبها خصوصا البكورة كانت مقرمشة ولذيذة

نفس البكورة العادية لكني احبها بالبصل الاخضر واضيف مرات جزر مبشور وجلجلان حب
و خردل ورشة فلفل احمر وملح وكركم وتعجن مع طحين دنجو وعلى طول على نار حامية ماتترك تتخمر عن تطلع ماي

ولفائف الجبن
رشيت عليها حليب مكثف اخر شئ

السمبوسة تحشيها باللي تحبية كنت حاشتنها خضروات محمسة

والف صحة وعافية

**الإخلاص** · 27/10/2016 10:00 AM

روتي وبيض

اسويه بطريقتين
مرات مالح ومرات حلو

المالح
اسوي بيض ورشة ملح ورشة فلفل اسود وشوي حليب طازج او بودر وماي(لامي اسوية بدون حليب بس بيض مع الاضافات)
نخفقه زين وبعدين نضيف الروتي له ونقليه ويأكل مع شاي ساخن

الحلو
اسوي بيض وحليب طازج او بودر وسكر وماء ورد وزعفران

ونفس الطريقة الثانية

**الإخلاص** · 27/10/2016 10:02 AM

اسهل حلى لما يجيك ضيوف فجأة او للتحلية بعد الغداء او العشاء

او حتى للعصاري

والصغار يحبوها جدا

جيبي فواكة وقطعيها وحطي معاها عصيربرتقال شوي

وزينيها بدريم ويب
او الكريمة الجاهزة

او ايسكريم

وممكن تزينيها بالمكسرات

والف صحة وعافية

**الإخلاص** · 27/10/2016 10:08 AM

كنت اريد اسوي فطور سريع

وكان عندي خبز لبناني متبقي من يومين

ماحبيت ارميه

المهم سويت خليط بيض وحليب وسكر وماء ورد وزعفران

وحطيت فيه الخبز

شكلة كان كأنه خبز وعسل

المهم من خلصته

رشيت عليه عسل (دبس تمر)

واكلناه ساخن

**الإخلاص** · 27/10/2016 10:15 AM

في كان عندنا فطور جماعي في الدوام

وما كان عندي وقت اسوي شى بحكم ارجع البيت متأخر والبنات

بس جهزت حلاوة سريعة

عبارة عن كيك جاهز
وكريمة (4 قشطة 1 كريم كارميل 2 دريم ويب 1كوب حليب طازج)
الكريم كارميل اطبخها شوي من الكوب حليب للوقاية لانها من منتجات البيض
هيرشي
(الوسط ممكن فواكة مشكلة او طازجة او شكليت مكسر او هيرشي او تكتفي بالكريمة)

نقطع الكيك ونرصة في طبق التقديم

نرشه بهيرشي او حليب طازج مع شوي ماء ورد لترطيب الكيك

حطيت اناناس

نحط الكريمة

نكرر الطريقة

ممكن تحطي كريمة اخر شي وتزينيها باللي تحبي
لاني سويت صينيتين ماكفت الكريمة لطبقتين فزينتها بالهيرشي

بقى كمية بسيطة كيك

حطيت عليها ايسكريم وهيرشي واكلناها في الليل

والف صحة وعافية

**الإخلاص** · 27/10/2016 10:18 AM

تكساس فرايز

ولها طرق كثيرة وكلها متشابهة تقريبا

بنزل لكم طريقتي

المقادير:

بطاطا (شيبس) مقلي او مشوي

كفتة لحم مقلية

بصل وبهارات حسب الرغبة

صلصة البيتزاء الجاهزة

جبن بيتزاء

فلفل هلابينو مخلل

الطريقة
نقلي الشبس والكفتة

احمس البصل واضيف له ثوم وزنجبيل (اختياري)
اضيف البهارات وبعدها الصلصلة الجاهزة

وبعدها احط الكفتة واكسرها شوي

ومن تغلض

اجيب صينية فرن
اول شى حطي شوي من الصلصة
بعدين الشبس المقلي
بعدين باقي الصلصة
فوقها الجبن وكثري منه وممكن تسوي اكثر من نوع جبن حسب الموجود

اخر شى نحط الفلفل الهلابينو

وندخلها الفرن

**الإخلاص** · 27/10/2016 10:22 AM

قبل فترة دقت في راسي فكرة حلى غير

وسويته في عزومتي لصديقاتي والحمدلله الكل حبه جدا

بس متعب شوي لكن لذيذ مليون في المئة يدوخ
مستحيل احد ياكل منه ما يقولك كيف سويتيه

في الدوام افتكروني مشترتنه من حلويات اصفهان ههههههه تشجيع قوي منهم كان

اول شي تجيبي صواني السيلكون وتدهنيهم بطبقة من شكلاته جالكسي مذوب في حمام مائي وتخليه يجمد

بعدين حطي طبقات الشيو كيك بالترتيب العكسي
وجهزيهم قبل علشان يكون عليك بس الحشو وترجعي تحطي القوالب في الثلاجة عن تذوب

اول شئ الصلصة الاخيرة ان كانت بلوباري او فراولة

بعدين الحشوة الوسطي اللي تكون بالشيز

واخر شي ترشي عليه بسكويت الي مع الزبدة

وتعطيه في الثلاجة

وقت التقديم

**الإخلاص** · 27/10/2016 10:27 AM

اسهل حلى

بسكويت مربعات او مستطيل افضل اولكر

نوتيلا

ماارشمالوا

اول ندهن البسكويت بالنوتيلا ونحط فوقه مارشمالوا حبة او 2

ندخله الفرن يكون حامي دقائق من اعلى ينفش المرشملوا ويحمر

نطلعة ونحط عليه البسكويت الثاني المدهون بالنوتيلا

والف صحة وعافية

بس لازم يأكل ساخن وإلا يجمد

**الإخلاص** · 27/10/2016 10:30 AM

عشاء سريع بحكم ضيق الوقت وغيره

جبت خبز لبناني وحطيت عليه جبن اول دهنته بجبن مثلثات وبعدين رشيت عليه جبن شيدر( المرة الجاية بكتفي بجبن مثلثات)

ودخلته الفرن
ومن طلع رشيت عليه عسل

اكلناه ساخن

حلو بصراحة

اوقاتا نتكاسل عن الطبخ واحسها اكله حلوة وسهلة التحضير

لذيذ وخفيف وسريع

**الإخلاص** · 27/10/2016 10:33 AM

الايسكريم

عندي طريقتين

الطريقة الاولى

الي اخترعتها قبل كم سنة من محاولاتي اسوي الذ ايسكريم
اللي كنا ناكله واحنا صغار

اسميه
ايسكريم ام زهر

3 اكواب ماي
كوب حليب بودر
كوب شراب الورد

على النار وبعدها يترك يبرد ثم في الفريزر
لذيذ جدااااااا

الطريقة الثانية
الايسكريم الصحي

عبارة عن فواكة مجمدة في الخلاط مع كريمة خفق

يطلع بوظة بس جد روعة ولذيذ

جربت قبل كم يوم مسوية موز مجمد مع كريمة

**الإخلاص** · 27/10/2016 10:40 AM

عجينتي المعتمدة في كل المعجنات

هذي العجينة استخدمها للموالح والحلويات مثل السينابون
وتطلع هشة ولذيذة جدا
اسوي الكمية واقسمها لكم نوع فطائر والحلى

السينابون سهل

استخدم نفس العجينة

واحلج كمية من العجين بشكل مستطيل
بعدها ادهنها بزبدة لينة متروكة في حرارة الغرفة
بعدها ارش عليه خليط (سكر بودر + رشة قرفة+ كاكاو بودر)
اجهز الخليط قبل
وبعدها الف العجين مثل السويس رول واقطعه واخليه في صينية مدهونه
واتركه يتخمر ربع ساعه بعدها ادخله فرن مسخن مسبق

ولما اطلعه اصب عليه الصلصلة(1 علبة حليب مكثف+6 جبن كيري+1 قشطة تخلط في الخلاط)
واخر شى يزين بالهيرشي

**الإخلاص** · 27/10/2016 10:42 AM

قبل فترة جاني ضيوف فجأة

وعاد مو تسوي لهم
بسرعة كان عندي كيك جاهز
وسويت كستر
وزينتة بالهيرشي

والحمدلله طلع لذيذ

والكستر استخدمة مع الجلي احيانا للتغير
او حتي وحدة مع كريمة وقت التقديم
لذيذ
وطريقتي في الكستر حلوة وسريعة

3 اكواب ماء
1كوب حليب بودر
علبة قشطة
من 2 إلى 3 ملاعق كستر بودر
وسكر حسب الرغبة انا احط فنجان

ويخلط كله وبعدها مع التقليب على النار حتى يغلض والف صحة وعافية

**الإخلاص** · 27/10/2016 10:44 AM

خبز الشباتي (المرضوف)

اكثر شى اسوي خبز مرضوف
احبه كثير وامي تحبه

اسويه مرات بالتمر ومرات بدون تمر
واخر مرة سويته بالسمن العماني طلع لذيذ فوق الوصف(ما اكثر من السمن بس دهنه بسيطه لا اكثر

المقادير
مكيالين طحين رقم 2
مكيال طحين رقم 1
حليب بودر حسب الكمية (3 او 4 ملاعق اذا كمية طحين كبيرة)
ملح
ماي او ماي مخرس فيه تمر
شوي سمن عماني او زيت بمقدار فنجان

يعجن وتترك ترتاح
كل ماتركناها ترتاح اكثر تجي احلى

و وقت الحلج تحلج شوي وتدهن شوي سمن او زيت وعلى التاوة

**اميره ناصر** · 27/10/2016 11:46 AM

اريداتعلم لذيذ
تسلمي ع طبخات

اسم المؤسسة	موقع المؤسسة
الوظيفة	المستوى التعليمي
وقت الدوام	نوع عقد العمل

الموضوع: ملف { طبخات أم زهر} الإخلاص

أدوات الموضوع

البحث في الموضوع

نمط العرض

مواضيع مشابهه

[ معروض ] طبخات أم رتال للمناسبات

طبخات

[ معروض ] احلى طبخات مع ام منصوور

طبخات مختلفة

همسات في الإخلاص

قواعد المشاركة