تصرفات أخوي تصرفات شخص مسحور وش رأي القانون لو سمحتوا

[jamais]

السلام عليكم ورحمة الله وبركاته..
عندنا مشكلة في بيتنا ولو سمحتوا بغيت مساعدتكم

قبل كل شيء أشهد الله أن كل كلمة أكتبها هنا صارت معنا.
عندي أخ تزوج من سنوات وعنده ولدين كان يشتغل في جهة حكومية وكمل دراسته الجامعية في القانون واستقال ،اشتغل في جهة حكومية في مجال تخصصه.
وفي نفس الوقت كان يمارس المحاماة وناجح كثير وكان صاحب المكتب يعتمد عليه.

كان مرتاح مع زوجته وولده الأول اللي كان يحبه حب ما طبيعي.
بعد تقريبا سنتين من زواجه لاحظنا انه بدا يتغير ما صار يرجع البيت كثير واهمل زوجته وولده وكثير يودي زوجته بيت اهلها وما يهتم فيها.
زاد التغير لدرجة انه بدا يهجر امه وابوه. سألنا عدة مشائخ قالوا أنه وراه بنت مسوتله سحر.

اكتشفنا بعد فترة انه متزوج حرمة ارملة،عندها عيال كبار بدون مانعرف ومستأجر لها شقة في مسقط. اللي خوفنا بعدين انه كان يروح شغله ويرجعلها يوميا رغم ان المسافة رايح جاي 800 كم. ويمر نفس الطريق عند منطقتنا ولا يدخل.
يعني مستحيل واحد عاقل يقطع هالمسافة كله بشكل يومي ويسرع سرعة جنونية وصلت مخالفات سياراته فوق 2000 ريال.

بعد فترة مسكته الشرطة في قضية تزوير. والقضية فيها اخو زوجته الثانيه وربعه.
خلته يتسلف من البنك واكتشفنا انه عليه في البنك بحدود 48 ألف ريال وطبعا ماعنده لابيت لا شيء غير اللي متسلفهن من الناس.
كل فلوسه ورواتبه تروح لذيك البنت.

اكتشفنا هالشيء لما حجزته الشرطه قدرنا نتوصل للشقه اللي مستأجرنها للزوجة الثانية عن طريق واحد من الموكلين اللي كان يتعامل معاهم والمفاجأة اني لقيت البنت في الشقة ولما سألتها وش علاقتك فأخوي؟؟؟؟
قالت انا من أهله " طبعا ما تعرفني اني اخوه" قلت له انا اخوه انتي ما من اهلي ولا اعرفك. بعدين قالت انا واخوي نستخدم الشقة لما اخوك ما موجود. وطلعت من الشقة ، وبعدين هو في الحجز خبرني انه متزوجنها.

طلع من الحجز بكفالة ورجع للبنت مره ثانيه لنفس طبعه رغم انه كان يصيح في الحجز.
نصبوا عليه وخلوه يبيع سيارته وشلوا فلوسها
اضطريت اعطيه سيارتي راح وباعها بدون علمي المشكلة باعها لشخص من منطقتنا ووثق فيه وماطلب توكيل مني وبالأخير اضريت اوافق عالبيعة لأنه تصرف في الفلوس .

انحجز مره ثانيه علشان ايجار الشقه وشلته البنت يتسلف من عند شخص وتسلف اكثر من ايجار الشقه والفلوس تروح ياعندها يا عند اخوها وهو يوزع شيكات للي يتسلف منهم.

زوجته الاولى واهله وولده مايعرف عنهم شيء ابدا.
حتى ولده الثاني ماشافه لما جاء للدنيا ولا عرف ان زوجته تولد رغم انها مسكينه طلعت من تحت الموت بسبب تعبها النفسي من اللي صاير لزوجها.

انحجز مره ثانيه وكلمني يصيح يبا اكفله علشان يشوف ولده الجديد وزوجته. وكفلته ولما طلع من الحجز سيده راح عند البنت الثانيه وبند تلفونه علشان ما نقدر نوصله.
اجبرته يطلق زوجته الاولى وهي في الحمل الثاني بس لما كان في الحجز رجعها.

جاء موعد المحكمة في القضية اللي كفلته فيها وخفت مايحضر واتصلت فيه تلفونه مبند واضطريت اتصل في البنت الثانيه قالت اخوك ماعندي ولو اتصلت مره ثانيه ببلغ عليك الشرطة رغم اني كنت اكلمها بكل ادب.
بعد شوي رجع يتصل بنفسه وهذا دليل على انها تعرف مكانه او عندها وخبرته.

طبعا ماحضر الجلسه وكان بيورطني بس الله ستر.

جااء موعد جلساات قضية التزوير ولا حضر ولاجلسة ومانعرف وين رغم انه كان محامي ويعرف القانون وانا موكل له محامي بس بدون فائدة وانحكم عليه بالسجن 5 سنوات.
اكتشفنا بعدين انه يشتغل سائق في شركة بعد ما كان موظف حكومي ومحامي ناجح.

وصفولنا اياه مع هالبنت كم مره ونتفاجأ انه مقبوض عليه في قضايا شيكات تقديبا 17 الف ريال. وطبعا كل هالفلوس تروح عندها وهو ماعنده ولا ريال.
حتى زوجته الاولى كان بيورطها في قضية شيكات وبتدخل السجن بسببه لو ما تدخلنا والله ستر. وهو كان يحبها ويموت عليها ومابينهم مشاكل.

زوجته عانت وربت اولاده غير كلام الناس وهو مستعبدتنه البنت الثانيه ومن قضية لقضية ومن مصيبة لمصيبة.

في تفاصيل كثيرة بعد ما كتبتها عن معاناتنا مع هالوضع. وولده الثاني قديب يكمل سنة ونص وماشافه غير يمكن نص ساعة.
حاولنا نعالجه بالقرآن بس قالوا لا زم يحضر وحنا ما قادرين نوصل له ونجيبه ولما نسأل يقولوا مسوتله هالبنت سحر ربط ومسوتنه باشياء وصخه مثل دم الحيض الله يعزكم. وقالوا لنا انها معروفه هالبنت تسوي هالاشياء

حاول واحد عضو في السبله يعالجه بس قال ماقدرت لأن كل ما يبطل عنه السحر ترجع البنت تجدده وفعلا كنا نلاحظ عليه فترات يكون فيها احسن.
بس هي مستعبدتنه ومخلتنه وسيلة يجيب لها فلوس بأي طريقة.

هذا وضع اخوي: أرجوكم اللي عنده رأي يشير علينا لأن تعبنا واخاف على اخوي يجن من المشاكل اللي صارتله رغم انه لا يدخن ولا يشرب
وحياته كانت طبيعية معنا ومع زوجته ولا بينهم مشاكل ابدا ،لا كان راعي مشاكل.
والدتي مريضة واخوي تعبها اكثر.
كنا نشوفه من العيد للعيد وباقي الايام مايقدر يمر البيت لمدة 3 سنوات تقريبا نعاني.
ما هاين علي اخوي ينسجن بسبب تصرفات ما سواها بعقله رغم انه غلطته عرف هالبنت. وانا واثق انه لو وضعه طبيعي مستحيل يسوي هالشيء لأن كل هالمشاكل صارت من عرفت هالانسانه حسبي الله عليها. ولما نسأله ليش تسوي كذا يقول ماعرف.

وارجوكم لا تنسوا تدعوه له بهالشهر المبارك وتدعوا لأمه وابوه وزوجته اللي محرومه من زوجها وصابره واطفاله اللي محرومين من أب يحن عليهم مثل باقي الأطفال.

واخواني القانونيين وش الطريقة نوقف هالبنت عند حدها وتتعاقب بعد كل اللي سوته. اخوي يدخل السجن وهي واخوها مرتاحين بفلوسه
وكيف ممكن القانون يساعد اخوي وهو تو في الحجز.

[نسل الأشراف]

الله يشفيه يا رب بهذا الشهر المبارك ويرجعه سالم لعياله.
وحسبي الله ونعم الوكيل على كل أنسام يستخدم السحر ويفرق بين الزوج وزوجته وعياله.

[الصداقة كنزي]

هالقصة قاريتنها قبل ف السبلة اعتقد من زمان

نفس التفاصيل بالضبط

معقولة ما حصلتوا حل؟!!

الله يفرج كربتكم

[قاهر زمن]

وانا بعد قارينها قبل الحل واحد الساحر عادي تقتله دورلك سكين غاويه وقتلها وريح اخوك منها

[jamais]

ايوا كتبتها من فترة في السبلة الدينية ندور علاج بس للأسف المشرفين غلقوا الموضوع رغم انه السحر موجود في القرآن وواقع وناس تعيشه.
للأسف ما حصلنا حل من ٣ سنوات لين وصلوا اخوي السجن.

[الامل من الالم]

تأثرت كثيرا بالقصه وحاس فيك لان اخوي ايضا صارله قصه مشابهه لهذي القصه
والام هي من تدفع الثمن الله يشفيه ويرجعه
خلي امك تدعي له بقلب صادق

[تقنية]

اعوذ بالله من شياطين الانس ..

الله يفكه من السحر ويعين زوجته واولاده

الشرطة ما ممكن تحقق مع الزوجة الثانيه ؟؟

لا حول ولا قوة الا ب الله

[تقنية]

يصير اروح للشرطة اقولهم فلان مسولي عمل (سحر) ؟؟

ولا ما يخصهم ؟؟؟

[MISS LOPEZ]

لاحولة ولاقوة الا بالله !!
مستغلتنه ع الاخير الله لا بارك فيها !! ايش هالناس !!

الله يعينه صراحة على هالمصيبة
شكلها معتاشه عليه وع غيره بنفس الطريقة
صددق ماشي غير انها تقتل الساحره

[رقة الورد]

حسبي اللہ و نعم الوكيل
و اللہ ينتقم من كل ظالم
و اللہ يعينكم ؏‏ ما بلاكم

[ورود متساقطه]

مع مرور الوقت شوف شو يصير لها ...ربك يمهل ولا يهمل

[ibnalkhalij]

يصير اروح للشرطة اقولهم فلان مسولي عمل (سحر) ؟؟

ولا ما يخصهم ؟؟؟

شو الدليل علي وجود السحر

[ibnalkhalij]

اوال شي الشرطة والمحكمة تريد ادلة قطعية والسحر والجان عمل مخفي يصعب إثبات السحر
يعني ماينفعك لشرطة ولا محكمة

[مشاعر مهاجرة]

والله روح زنجبار هناك قوي شغلهم لأن شفت شخص قريب هالقصة وقرب يجن المهم طلع مسحور وجابولة علاج من زنجبار ... يعني أبطلوا السحر عاد كيف ماعرف بس حتى إن الشخص كان يرجع مثل الاصداف وأشياء غريبة أثناء العلاج
السحر موجود وشكلها مسوتلة سحر قوي ... ساعد أخوك قبل لا يضيع .

[ibnalkhalij]

في فضية كانت تتدوال في المحكمة الابتدائية واستمرات اربع سنوات كان عمل سحر تفريق بين الزوجين لكن رغم اثبات الزواج وقوع الضرر والسحر تم تفريق الزوجين

[ibnalkhalij]

والله روح زنجبار هناك قوي شغلهم لأن شفت شخص قريب هالقصة وقرب يجن المهم طلع مسحور وجابولة علاج من زنجبار ... يعني أبطلوا السحر عاد كيف ماعرف بس حتى إن الشخص كان يرجع مثل الاصداف وأشياء غريبة أثناء العلاج
السحر موجود وشكلها مسوتلة سحر قوي ... ساعد أخوك قبل لا يضيع .

هناك طرق شرعية أفضل من الوقوع في الشرك بالله

[ibnalkhalij]

سورة البقرة سلاح المؤمن بالله ومن يتوكل علي الله فهو حسبه

[black gold]

طيب ليش اطلعوه من السجن !!
خلوه يخيس في السجن وهناك تقدرو تجيبو معلم يعالجه ويضبط امواره ..

[حنيني لقلبي]

سبحان الله
نفوس سوداء!!

الله يشفي اخوك ويبعد عنه شر الناس

[Mr Yasser]

لا حول ولا قوة الا بالله العلي العظيم

[ibnalkhalij]

لاحول ولاقوة الا بالله

[ورود متساقطه]

الله يشفيه ويرجع الى صوابه

[jamais]

اوال شي الشرطة والمحكمة تريد ادلة قطعية والسحر والجان عمل مخفي يصعب إثبات السحر
يعني ماينفعك لشرطة ولا محكمة

هذي المشكلة كيف نقدر نثبت حسبي الله عليها.

[jamais]

والله روح زنجبار هناك قوي شغلهم لأن شفت شخص قريب هالقصة وقرب يجن المهم طلع مسحور وجابولة علاج من زنجبار ... يعني أبطلوا السحر عاد كيف ماعرف بس حتى إن الشخص كان يرجع مثل الاصداف وأشياء غريبة أثناء العلاج
السحر موجود وشكلها مسوتلة سحر قوي ... ساعد أخوك قبل لا يضيع .

والله حاولت ماعرفنا كيف نعالجه واخوي فعلا قرب يجن صحته تدهورت ولما يدخل الحجز يصيح واول ما يطلع ينسانا كلنا وينسى أمه وأبوه وزوجته وعياله ويركض لنفس البنت اللي ضرته

[jamais]

في فضية كانت تتدوال في المحكمة الابتدائية واستمرات اربع سنوات كان عمل سحر تفريق بين الزوجين لكن رغم اثبات الزواج وقوع الضرر والسحر تم تفريق الزوجين

أخوي انت قانوني؟ ممكن الدفع ان المتهم كان تحت تأثير السحر من البنت ؟ وممكن المحكمة تحقق في هذا الدفع؟ مثلا تطلب البنت اللي سوت؟ لأن يمكن كشوفات البنك تثبت وشهادة بعض الشهود اللي كانوا يشوفوها معه والشقة اللي مأجرنها

[jamais]

طيب ليش اطلعوه من السجن !!
خلوه يخيس في السجن وهناك تقدرو تجيبو معلم يعالجه ويضبط امواره ..

مشكله السجن ما سنه ولا شهور السجن سنوات يعني ضاعت حياته ومستقبله

[jamais]

اشكركم اخواني واخواتي على تعاطفكم ودعاءكم والله يجنبكم كل مكروه.

[jamais]

لاحولة ولاقوة الا بالله !!
مستغلتنه ع الاخير الله لا بارك فيها !! ايش هالناس !!

الله يعينه صراحة على هالمصيبة
شكلها معتاشه عليه وع غيره بنفس الطريقة
صددق ماشي غير انها تقتل الساحره

مستغلتنه ويمكن الفلوس اللي راحن عندها فوق ٧٠ الف اذا ما اكثر وهو ماعنده شيء بس يتسلف. وشيكات.
ومجننتنه اذكر مره اراقبه وشفته بالطريق اريد اوقفه كانت ايام العيد ولما شافني ما طاع يوقف ولحقته بسيارتي بعدين خفت عليه يسوي حادث وتركته وقلت الله يهديه.

[تيما]

قصص وعبر (1) فتاة سحرت وصبرت واجتهدت حتى شفيت الشيخ خالد الحبشي

http://youtu.be/QCDqCwfEkSw

[بنت السالم]

وانا بعد قارينها قبل الحل واحد الساحر عادي تقتله دورلك سكين غاويه وقتلها وريح اخوك منها

الله يهديك هذا ماحل
حسبي الله ونعم الوكيل
شوف أخوي جرب توصل لأخوك وتمسكه وتحبسة في مكان في بيتك بدون علم أحد وعالجوه وخلية محبوس سنة والبنت خبروها بعيد الشر عنه إن فلان مات عسى هذا الحل ينفع