مساء الخير


نخش في الموضوع دوغري


خلفان : بردان خدجدج ودفتي متلقلقه من البرد :بوضروسه يداقن داداداداداد:


خدجدج : مالك يو الغلا تهتز


خلفان : عمالي اليوم كاك مستوي أهجس عمري ما برابر نعم :داداداداددادادا:


خدجدج : أقوم أبوي أسويلك شاي وجولة عسل عشان تسخن دفتك شويه


خلفان : عمالش أنتيه نوبه خدجدج كيه ما مربيه تسويلي جوله وعسل
وبعدين الشاي في سكر والجوله فيها عسل والسكر + العسل ما يوالمني أحس كبادي تتناطح داخل
بس والله ما أردش سوي يــو الغالية ما تهوني على أشوفك نشيطة وباغية طعريني من الصبح عسل :دادادادادداداد:



وعندما دخلت خديجة للمطبخ دغر الولد علي على أباه




علي : يوباه


خلفان : موفيك


علي : جوخوه جايه عندنا وشكلها ناوية على شر


خلفان : قرعه تقرعكم انته واياها والله فوادي في جوله وعسل تو ذي تشم الطعران واموه
اقولك شي علي ناولني ذاك المصر والجاكيت



علي : باه ذا جاكيت ولا بدله




خلفان : مو دراك أنته في الملابس كبش طالع على امك خلا دهدايه طلعنا قبل لا توصل المقورفه بيبيتك
وتهلكنا جيب شغاله جيب شغاله وكأن الشغالة ببلاش يجيبوها ما كأنه بألف ريال يجيبوها و200 ريال
تخليص معاملتها



لحظه ولدي قرالي ذا المساج مال الواتس مو مكتوب فيه


علي : هذا ثني ود عامر يقول باغنك في سالفه تعال السبلة


خلفان : خلا عجب


ـــــــــــــــــــــــــ ـــــــــــــــــــــــــ ـــــــــــــــــــــــــ ــــــــــــــــــــ


في السبلة



ثني ود عامر : هينك خلفان ونحن ندورك من أمس


خلفان : مو عندكم اليوم


ثني : اليوم الدكتور هديب عنده نظريه وباغي يطبقها علينا وقبل لا يطبقها يريد يعمل اختبار


خلفان : بيحشرها عجب هديب اليوم
أقولك ثني قرالي باه ذا المساج مو مكتوب في


ثني : هذي حرمتك كاتبتلك أمها جايبه هريس حالك هين غبت انته


خلفان : تعرف تسويلها بلوك سويلها تغيب هي وامها ولا أقولك كتبلها تفيقلي في الترمس الصفرا
احتياط يمكن يجي فوادي على الهريس بعدين


د. هديب : سلام عليكم جماعه وجودمورنج ايفري بدي
انا بجلس خارج السبلة عند ذاك الجدار ويوم اخلص بقولكم نظريتي الجديدة
وارجوكم اللي يجي عندكم لا تخبروه على هذا الاتفاق قولوا بس ما نعرف


خلفان : مو باغي تسويلنا قانون جديد دختور


د. هديب : نو كومنت خلفان بعدين بخبركم سي يو



خلفان : تو ماله ذا ربيعك ثني مجينينه ما صاحي البر


ثني : ما عليك منه اليوم بيبهرنا بنظريته الجديدة



خلفان : أوين نظرية ويقعي عمره حيت الجدار عجب شبعنا نحن أبوي ما كاك
بو باغي يسوي نظريه روح علوى هناك جبال واشجار ويمكن يشوفه ضبع ويشله معاه ويريحنا منه نعم




بعد ربع ساعة وصول باقي أفراد الجلسة



ودشنون : قبل السلام
تو ماله دكتور هديب جالس هناك وحده لا يكون داحله شمبريشه أمس وناقعات كباده


خلفان : مجينينه مو يجي منه


ناصور النبقة : احساسي ومشاعري يقولن أنه هو وحرمته متضاربين


خصيب : أنا سمعت والله أعلم أنه أمس راح المدرسة وحصل ولده مضروب وما عجبه وجلس يضارب المعلمه
لحد ما فصلوه ولده



خلفان : استغفر



حميد : لا لا ما كذاك السالفة حبوب هذا أوين زعلان من جاره يعق الوسخ برع الدرام
وتو معصب عليه يقولوا ولاد الجيران نوبه قاحفيله ليت البيت وهو تو معصب وباغي يلاقيه قدام البيت



خلفان : ما رامو يقحفوله عينه ويريحونه منه



بعد ساعة من جلسه دكتور هديب بالخارج


صار المكان مزحوم من الناس وكلها تسأل عن سبب جلوسه واللي يتعب من الوقفة يدخل السبلة
ويسأل ليش هديب جالس بعيد عنكم أيش فيه وليش مزعلينه وكل واحد يشوف على الثاني
وقصص أنواع وأشكال تخترع ضد هديب وبقيه الشيوبه اللي داخل السبلة



خلفان : شوف اللي يريد يعرف سبب جلوس الدختور هناك يدفع 5 ريال ونخبركم ليش
مو الوازي يوم ماشي غوازي يغيب شيه يجلس حيت يبغى وأنا مالي




بعد ساعتين قام هديب من مكانه والناس تشوف عليه وما قال ولا كلمة دخل السبلة
ومشيت الناس وهي تتقمقم وفي ظرف دقايق صار المكان فاضي


د.هديب : آي ميسيو جايس


خلفان : تمسمسن سيقانك هلكتنا خليت الناس تقشبنا وماشي شي ما طلعوه علينا وعليك
لاتجلس قباله يوم غايته غيب فوق الجبل بعيد عنا ايش من نظريه عندك تو


د.هديب: ما قالوا السكوت من ذهب
أنا ساكت شفتوا شيء ذهب


خلفان : أستغفر



د.هديب: شوفوا يا جماعة أنا جلست بسكوتي كم قصة سمعتوا عني وكم إشاعة طلعت عني
حد يقول طلق حرمته وحد يقول ضارب جاري وحد يقول سارق بنك الخ ....



ثني: والزبده دكتور أن السكوت ليس من ذهب


د.هديب : نظريتي تقول السكوت يولد اشاعات وفتن مالها أول ولا تالي بس هذا سكوتي أنا وفي وضعي
و سكوت الغير هو من ذهب يعني شفتوا شيء في غير موضعه المعتاد ما شرط تتكلموا عنه
مرو مرور الكرام وخلوا عنكم القيل والقال لأنه ما يأكل عيش




خلفان: تو نته عمالك كاك هديب داقتنك الشمس واموه كذاك كالف على عمرك
وعاد دغمتك كلها زرارير ما شويه بو خاطف عليك



د.هديب: سمعوا قانوني الثاني عشر



لكل سكوت فلوس أدفع لتعرف السبب جيبك هو هدفنا



خلفان : يعني أنت تو تقصد لازم ندفعلك فلوس عشان نعرف سبب وقوفك في الشمس



د.هديب: الحين نعم ما تدفع بس بعدين بتدفع ويا خبر اليوم ببلاش بكره تدفعله فلوس




ثني : نعم صدقك يا دكتور
نحن نخترع القوانين وبعدها ندفع نحن واجيالنا القادمة وياليتنا ندفع حال شيء مفيد
نحن ضحيه القوانين والسبب اللي اخترع مثل هذي القانون



خلفان : نعم والله تو الفلوس بو نجلس ندفعهن حال الشغالة من اخترعهن ومن يزيدهن
وحاموه يوم يطيرن ندفعلهن نوبه عشان نسفرهن مالنا تو نحن كذاك حوسين ما كما غيرنا
أقول ثني قرالي ذي المساج



ثني : هذي حرمتك تقولك مو سويت بخصوص الشغالة



خلفان: احيدني قايلك سويلها بلوك



ثني :أمزح معاك هذي رسالة من البلدية غرامه أوين ما دافع فلوس الموقف قيمتها 10 ريال
ورسالة ثانية لقد استهلكت بيانات الانترنت 90%



خلفان : وافقري تو من ذا بو يخترع ذي القوانين