مو حالكم ...وموباينين ...ومو صبحتوا وعساكم بعافية
اكيد ماحد مستنكرني كالعادة
خلا تفضلوا ...هبشوا هبشوا ..ماحد يخجل ..,
صاة ما نعازم ..كل واحد بو يوكله حال كرشه ..



بو يغنملكم كل واحد فنجان


وصاه بو ما يهز الفنجان فأزيدة فنجان غيرة
عاد اليوم باغي اخبركم عن هز الفنجان بعد الإكتفاء من القهوة
يعني يوم يكون الواحد في مجلس ولا ساير عند حد ولا في مناسبة
ويجيه الي يغنم القهوة و يغنمله فنجان قهوة فاذا سده فنجان واحد فيهز الفنجان
و يقول للي يغنم شكرا كفاية ...اما اذا بعده باغي زياده فيناول الفنجان بدون هز
وايفهم الي يغنم انه يبا فنجان زيادة ..وهذي شفرة معروفة عند العمانيين كافة
انه اذا ما هزيت الفنجان فايجيك فنجان غيرة تماتيكي من عند بو يغنم


اخبركم بقصة
يوم من الايام كان معنا موظف سوداني
وسرنا ذك اليوم في جولة ميدانية وشليناه معانا
المهم مرينا حيت ناس وقالولنا اتتقهوي
قلنالهم في مهمة عمل تو حنوه ما يستوي نجلس نتقهوى
وتعرفوا انتيوه المعازمة :وهذي العادة كتبت عنها قبل
وصاه جلسنا مال لا حولة ولا قوة في العريش بو مسواي برع


وجابولنا الفوالة وضربنا فواكة ..


وخلاف ضربنا السح والحلواه علين قلنا بس _مال جوعة_


وعاد جاء الولد بو يغنم
ومر علينا كل واحد فنجان وشربنا فنجانين وهزينا الفنجان وخلصنا

المهم السوداني كل ما خلص الفنجان رجعه للي يغنم القهوة
وهذاك مستعد يسكبله فنجان غيرة

والسوداني يردة خلي وهذاك يسكبله ويردله اياه تارس
وكذاك السالفة علين تقريبا صبله عشرة فناجين

قال السوداني يازووول يازززول بالله عليك انت عاوز تموتيني
وضحكنا كلنا
قلناله مالك استاذ عثمان
قال انا كافيني فنجان واحد وهو يصب للحين وصلنا عشرة
قاله وانا مو ادراني انه مكفنك تراك ما هزيت الفنجان
قال الزول السوداني بالله عليك وانا شنو دراني بهز الفنجان
عاد خبرناه قلناله من تكتفي من القهوة لازم ترجع الفجان مع هز للفنجان للشخص الي سكب لك القوة
حتى يعرف انه خلاص كافنك الي شربته
قال بالله عليكم يازول ... هذي شفرة خاصة ليكم

وشتلينا من عند الناس الي قهويونا ..وعثمان يتقمقم وكرشه تتلقلق من القهوة


الموهيم أعتقد ان هذي العادة موجودة في كل ربوع عمان
ماحد اليوم ايطلعلي و ايقول انها العادة ما موجودة معاهم
اليوم بايين مواقف اذا شيء حد منكم نسى يهز الفنجان والي يغنم يصبله ويصبله علين
ترست كرشه قهوة وتمت تتلالأ بالقهوة