لأصحاب الخبرة بسيارات الجيب خاصة ومن له خبره بعادم الصوت عامة (الإجزوز)

[One_In_Million]

السلام عليكم ورحمة الله وبركاته جميعاً ،،

امتلك سيارة جيب من نوع شيروكي (Cherokee XJ) موديل 2000 ..

استفساري بخصوص الإجزوز (عادم الصوت) بالجيب شيروكي ..

من الوكالة العادم يكون فيه فلتر (ما أدري اذا له مسمى آخر) وفيه دبه في الوسط .. انا اشتريت السيارة وارد ومن جبتها غيرت دبه الوكالة الى دبة صوت (فلوماستر)
وكان الاجزوز ما فيه فلتر من الاساس ..

واستفساري هو كالتالي :-

1. ما هي فائدة (وظيفته) هذا الفلتر بالضبط او اش هو دور هذا الفلتر في العادم؟

2. هل فيه آثار سلبيه على محرك السيارة اذا انا شلته؟

3. اذا السيارة فيها دبة صوت والصوت طبعاً عجييب ، هل الفلتر هذا يقلل من الصوت بشكل كبير او شي بسيط فقط او لا يوجد فرق؟

4. وهل تنصحوني اركبه او لا؟


شاكراً لكم تعاونكم معي وتمنياتي بأنكم تفيدوني قدر المستطاع بهالمعلومات ..

حاولت ابحث من خلال شبكة الانترنت بس ما حصلت شي نهائياً.

[CarGuy]

1 وظيفته يحول الغازات من المكينة الى غازات اقل تلوثا.
2 ما اعتقد انه في اثار سلبيه غير انه الصوت يكون اعلى و ريحة البترول في الكابينة (بالعكس يعطي قوة زيادة)
3 الفلتر ينقص من صوت السيارة خاصة لو الاكزوز بدون مفلر (مفلر = دبة؟؟ افيدوني شباب )
4 عاد انته شوف النقاط اللي فوق و قرر اذا تريد فلتر او لا

الفلتر ما اعرف لو له اسم بالعربي بس بالعنجليزي catalytic converter

[NITRO]

ماقصر الاخ كار جاي

الشيروكي مالنا كذلك الان بدون فلتر ، وبجزوز الوكالة ولما تضغطها واجد صوت ينسمع وماشي ريحة بترول ولله الحمد
بس اللي لاحظته انه لما تكون بدون فلتر احيانا تشوف دخان يطلع

عالعموم كان الشيروكي مالنا بدبات بورلا وكانن مبهدلات السيارة
حاقنات العزم + اهتزاز في المكينة
وخبرونا نصف الجراجات المكينة ميتة

الا جراج واحد قال بطلو الدبات وركبو جزوز الوكالة وخصلنا واحد من الشباب وبادلناه راس براس

وبالفعل كلامه السيارة جت انشط عن قبل والمكينة الحمدلله سليمة

فالحذر من دبات الصوت
مايغرك صوت الزعيق مالهن وهن يحقنن عليك القوة

[One_In_Million]

شكرا لكم اخواني CarGuy و NITRO على الإفادة