ايهما افضل : انترنت عمانتل ام اوريدو ؟؟

اريد اوصل انترنت منزلي
والحمد لله كل الخدمات موجوده سواء عمانتل ام اوريدو ..
الحين السؤال :
ايهما افضل واقوى واثبت ...
عمانتل ( adsl ) باقة ٥ ميجا
ام اوريدو ( 4G) طبعا ٥ ميجا

يهمني السرعه والثبات

مثل ما قلت لكم التغطيه موجودة لكلا الشبكتين ..

انترنت عمانتل اهون وليس افضل خيار :مفتر: ,,,
يعني قدام الباقي يعتبر افضل

اول كان عندي انترنت النورس وايماكس وكان زفت بصراحه ... وتعبااان
الحين تم تحديث اشتراكي للخدمة الجديدة lte اللي هي الفورجي وبصراحه اشوفها ممتااازة وزينه
لكن فكرت اغير لعمانتل adsl باقة ال ٢٥ ريال الشهريه ..
فهل تعتبر افضل واسرع ام الفورجي افضل ؟؟

انا من زمااان كان عندي النورس او اوريدو حاليا
بس انتقلت لعمانتل

مثل ما قالوا البقيه مش من زينها بس ارحم من اوريدو

ما اعرف اخبارهم الحين كيف اذا تحسن النت معهم او لا

بس لو حاب تروح لعمانتل افضلك باقة ال35 ريال
بالاخص لوووو كنت تستخدم لتحمل ملفات فوق ال1 جي بي او عشان تلعب اون لاين ع البلايستيشن او الاكس بوكس

بس لو استخدامك عادي .... تصفح ويوتيوب وتحميل ملفات عاديه
تكفيك مال 25 ريال بالاخص لو كنت ف حدود مسقط

تسلم اخوي على ردك وتوضيحك.اذا تنصحني على عمانتل ؟؟
بالرغم من ان كلا الباقتين سرعتها ٥ ميجا لكن اعتقد عمانتل بتكون اثبت وافضل ..

عمانتل افضل لان السرعة ثابته
lte يعتمد على الابراج وقوة الشبكة ولكن وقة الذروة سرعة النت تصير بطيئة (من تجربة شخصية - انا ساكن الخوير والتغطية ممتازة , لكن وقت المساء أحيانا اليوتيوب يقطع !! )

مشكلة عمانتل توصيل الخدمه عندهم بطئ ..

مثل ما قالولك الاخوه فوق عمانتل ما يتقطع ويمشي معاك و ثابت
النورس يروح ويجي معاك واسمع الناس تتشكى منه
موفق

الاثنين سيما خت مقزح ههه ...

كان عندي النورس 24 شهريا اول الاشهر فقط كان يمشي الحال
اما الاربعة اشهر الاخيره كنت ادفع عالفاضي لان من ضعفه كان يلتوي فوادي
لين ينزل فيديو حجمه واحد ام بي ! ولا نقدر نرسل ايميل ولا شي ..
رحت غيرته لعمانتل ركبوه خلال يومين والحين الامور طيبه !

اوريدو تستخدم الواي ماكس ف يكون نقل النت هوائي يعني احيانا بيتقطع عندك بالاخص لو الجو مغيم بس التوصيل سريع تفتح الخدمه ويعطوك مودم وتستخدم النت ع طول
عمانتل التوصيل ارضي

بس عمانتل شوووي بيذلوك لين يجوا يركبولك النت بس لو تاذيهم بيجوا بسرعه ههههه

صدقت اخوي
انا قدمت طلب توصيل الانترنت وظل كم شهر
واخر شي قدمت شكوى لهيئة تنظيم الاتصالات وبعد فترة صدر قرار من الهيئة بسرعة توصيل الخدمة لي خلال اسبوع من تاريخه
المهم الواحد مايسكت عن حقه ويتااابع ..

نورسسسسس وبسسسسس

سالت كم واحد من الاخوه قالوولي عمانتل افضل واثبت ..

انا لي خمس سنين استخدم النورس والله انترنت فاشل قسم بالله وكله ييفصل ومن غير جابت لي المرض، ومن غير ما تقدر تتصفح ويخلص 1 جيجا
حتى ما تقدر تشوف شي ابداً واذا دخلت اليوتيوب بيفصل، انا صراحه استخدمت النورس اليومي والشهري + الواي فاي : وكله نفس الشيء
الحمد لله غيرته ل عمانتل , اول النورس فاقرتني :ضحك:
ولي اسبوع استخدم عمانتل
اشوف التصفح صاروخ
بس مشكله وقت لم تنزل حاجه شوي يتاخر عليك ما ادرى ليش
بس في التصفح سريع جداً وحتى لليوتيوب
باقة 25 ولكن سيتم تغييرها غداً ل باقة 20 , لانه اغلب الشباب ماخذين باقة 20 , وطبعا السرعه نفسها بتكون

كيف السرعه نفسها ؟؟!!
باقة ال٢٠ ريال سرعتها حدها ٤ ميجا بس
اما باقة ال ٢٥ سرعتها بين ٥ - ٦ ميجا

عمانتل يمشي الحال رغم خدمتهم زبالة ، أوريدو ما أعرف إيش مشكلتهم فعمان النت تُعباُنٌ صراحة بس فقطر عندهم الألياف البصرية والنت سريع جدا ،، عندهم باقتين 16 ميغا بــ25ر. و 32 ميغا 35ر.ع

اذن خلااص بناء على نصيحتكم ونصيحة اغلب اللي استشرناهم بنركب عمانتل

بس انا قدمت على عمانتل من فتره اريد الكيبل الأرضي قالولي رح يتاخر ..كيف كذا ؟؟
والموظف عطاني خيار قالي بنركب لك واير كما واير التلفون بس انا رفضت ، قلت يمكن رح يكون بطيء .!!

ف اريد اعرف كيف نظامهم ،، @هدي السنة @مغرد بلحن الامل @goodness90

اقتباس:

---

أرسل أصلا بواسطة هدي السنة

كيف السرعه نفسها ؟؟!!
باقة ال٢٠ ريال سرعتها حدها ٤ ميجا بس
اما باقة ال ٢٥ سرعتها بين ٥ - ٦ ميجا

---

بالعكس اخ وي , 20 او 25 السرعه نفسها ما تتغير سريع جداً في التصفح
وما في فرق اصلاً
بس وقت لم تنزل حاجات من الانترنت، يحتاج وقت لين ينزل ولكن في التصفح سريع جداً حتى لو تنزل ملفات كثيره

اقتباس:

---

أرسل أصلا بواسطة هدي السنة

اول كان عندي انترنت النورس وايماكس وكان زفت بصراحه ... وتعبااان
الحين تم تحديث اشتراكي للخدمة الجديدة lte اللي هي الفورجي وبصراحه اشوفها ممتااازة وزينه
لكن فكرت اغير لعمانتل adsl باقة ال ٢٥ ريال الشهريه ..
فهل تعتبر افضل واسرع ام الفورجي افضل ؟؟

---

@هدى السنة
كيف حدثتي الباقه ؟

انا مقدم طلب جديد
واخترت باقة ٢٥ ريال منذ البدايه
علشان السرعه

ماجربت باقة ال ٢٠ علشان احكم عليها ..

نحن في البيت معنا مال 20 واشوفها تمشي حال تصفح ويوتيوب وتحميل

وف السكن مع الشباب مال 25

وبصراحة ما احس شي فرق بين مال 20 و25

اقتباس:

---

أرسل أصلا بواسطة mssm555

نحن في البيت معنا مال 20 واشوفها تمشي حال تصفح ويوتيوب وتحميل

وف السكن مع الشباب مال 25

وبصراحة ما احس شي فرق بين مال 20 و25

---

نفس الحاله ترا
بعدك عن المقسم يأثر ويقلل السرعه دامك بعيد

اقتباس:

---

أرسل أصلا بواسطة هدي السنة

انا مقدم طلب جديد
واخترت باقة ٢٥ ريال منذ البدايه
علشان السرعه

ماجربت باقة ال ٢٠ علشان احكم عليها ..

---

انا ترى نفسك سويت اول ما قدمت سويت مال 25 :كاشخ:
بس راح اغيرها ل 20 , كل الشباب ماخذين مال عشرين سرعه نفسهااا مافي فرق ابداً
بالتوفيق لك اخي @هدى السنة
للعلم بما انك اليوم قدمت، يعني يحتاج لهم [ اسبوعين الى 3 اسابيع ] وبعدها يركبوه خلي تلفونك شغال عشان يتصلو فيك
بعد ما يركبوه ما بياخذو منك شي، وعاد تستخدم النت كامل وتتصفح وبداية الشهر القادم تحول لهم
بالتوفيق مره اخرى اخي
_
صور

الله يوفقك اخوي
اشكر الجميع على ردووودكم الطيبه وتفاعلكم
وبالنسبة للباقة بشوف اذا كان نفس السرعه الباقتين خلاص بستقر على باقة ال ٢٠
بجرب هذا الشهر ..

تو بصور لك سرعة الانترنت المنزلي 4g

اقتباس:

---

أرسل أصلا بواسطة طموحي تقني

@هدى السنة
كيف حدثتي الباقه ؟

---

@طموحي تقني
شل المودم القديم وروح اقرب صالة

اقتباس:

---

أرسل أصلا بواسطة NITRO

@طموحي تقني
شل المودم القديم وروح اقرب صالة

---

@NITRO

,وهل ياخذو رسوم للتغير ؟؟ او للتفعيل ؟؟
وبخصوص الاشتراك كيف ؟ يعني نفس التسعيره ولا بعد يختلف ؟

اقتباس:

---

أرسل أصلا بواسطة طموحي تقني

@NITRO

,وهل ياخذو رسوم للتغير ؟؟ او للتفعيل ؟؟
وبخصوص الاشتراك كيف ؟ يعني نفس التسعيره ولا بعد يختلف ؟

---

@طموحي تقني
لا ماياخذو لو كنت من المميزين
والاشتراك نفسه بدون تغير

تم التركيب اليوم الحمد لله
انترنت عمانتل adsl
هل تنصحوني اغير المودم ام المودم ماله دور ؟؟
عطوني مودم نوع هواويHG532s