- محرك البحث العام
- المركبات
- الأراضي
- العقارات
- الوظائف
رؤية النتائج 1 إلى 30 من 928
الموضوع: oO~مو تبغيولها الشغالة؟!!~Oo
-
22/10/2018 11:08 PM #1
oO~مو تبغيولها الشغالة؟!!~Oo
.
.
.
بعد مصارعة مع الافكار فترة طويلة وعدم اقتناعي بوجود عامله للمنزل ف بيتي الا بعد ما احس نفسي اني تعبانه ومحتاجتنها.. اخيرا قررت اقدم طلب ولكن في البداية قرأت وتثقفت في كيفية التعامل معهن.. والحمدلله استفدت كثير .. لكن بعض الاشياء حسيتها ما زينه.. ما يعتبروها بشر.. المفروض نكسبها وما ننفرها منا..
المهم قبل شهرين وصلت عاملة المنزل بسلام..
اولادي فرحانين اكثر مني
وبنتي عاد من وصلت قالت انام معها
قلتلها مستحيل تنامي مع حد غريب.. خلي عنش.. المهم هيه مصرة بس طبعا ما خليتها وفهمتها السبب واقتنعت
تو ما كذا.. هي يااا حليلها طيبة ومسالمة ولكن ياخي ارحمها مشتغله اكثر من 20 سنه وفي التقرير مكتوب اقل بواجد
تو عاد انا دار راسي وتعاييت.. ارجعها او لا؟!!
المهم استخرت ربي وما رجعتها..
طلعت شاطره وتعرف تطبخ الوجبات الرئيسية.. تبقى مهمة الخبز العماني.. وانا عاد ما فيني بارض نعم اعلمها.. المهم لما اشلها البيت العود بديت تتعلم منهم والحمدلله تو تعرف.. بس يبالها لين تتقنه..
ياخي انا ما اعرف اتعامل مع شغالات.. يعني ما انازعهن بس لما اشوف شي يحتاج تعديل اعلمها واكلمها بهدوء والحمدلله الامور طيبه..
عندي مشكله وحده معها.. ما تحب يأمروها ف بيت ما بيتي.. انا عادي ما تقول شي.. بس حد غيري تسويه بس تتضايق.. لدرجة مرة شفتها تصيح
وجلست معها وفهمتها بهدوء وبمنطق.. المهم اليوم اللي بعده شفتها تساعد عادي ونفسيتها زينه
وكل مرة مسكينة مريضة حلقها وبلاعيم وكحة.. شليناها العياده وتعالجت بس بعدها .. لكنها تعبتني.. ما توكل زين.. والحبوب توكله بعد الاكل المفروض.. نعم ساير راد اقولها اول لازم توكلي شي وبعدين الحبوب والا ترا ماشي فايده.. والحمدلله قامت تاكل رطب ع الاقل..
نعم معاناة ..
تصابي عمرك والا اولادك والا بيتك ..
وبعده زدنا عمرنا بشغالة
لكن داخلي اقول كله خير وأجر.. والحمدلله
وفي الاخير
@ عندكم شغالة؟
@ كيف تعاملوها ان غلطت ف شي؟
@ ويش تنصحوا الناس اللي تترك اولادها للشغالة؟!!
@ هل تعتبروها فرد ف الاسره ام انكم عازلينها عنكم عزل تام؟
.
ملاحظة: كتبت هالموضوع قبل شهر من الان والشغاله رجعتها المكتب من كمين يوم لا تسالوني حموه
.
-
مادة إعلانية
-
22/10/2018 11:09 PM #2
@شواطئ الذكريات @روح الزهور @ابتسامة الشمس @العذراء الحزين
تعالن .. واخيرا نزلته الموضوع
-
سأعود بـ الغد لأقرأ
لروحكِ وردات
-
22/10/2018 11:17 PM #4
قبل شفتها ها الموضوع لمحته محطتنه لاه ..
@ عندكم شغالة؟
نعم عدنا هندية وايد طيبه وحبوبه قبل كانت معنا وحده ما زينه بدلناها ..
@ ويش تنصحوا الناس اللي تترك اولادها للشغالة؟!!
طبعا اذا كان عمر طفل ما بين شهور الي 3 سنوات لا تحطيه معها لانهن ما تعلمي شو يسون وايد نسمع كلام عنهم حتي عند كبار سن لا تحطوهن شغالات شي منهن ما زينات
@ هل تعتبروها فرد ف الاسره ام انكم عازلينها عنكم عزل تام؟
طبعا بحدود ما كل شي تخبروها عنكم او عند الوجبات لا تحطوها تاكل وياكم
بس حرام هي تنرحم ف بلاد بعيد عن بلادها حسسوها انها من عيلتكم ..
-
22/10/2018 11:28 PM #5
ـ
مرات بسبب ضغوطات الحياة
وكثرة الاشغال تحتاجي حد يساعدك
عالاقل يقط بعض الامور ..
الشغالة ما مهمه هي فقـط للحالات
الضروريـه او يد ثالثه مساعده للام
في امور المطبخ والتنظيف ..
وللاسف الشديد الحين
صارت بمقام الام لدي الابناء
ما معنا شغالة والحمد لله
بس محد يعلم شو يصير من تغيرات
وان شاء الله ما نحتاجها ابدا
تو ما تحصلي شغالة اتم شهرين زمان
عاد يشردن
ذاك اليوم شغالة جيرانا تصرخ ف الشارع
اوين ودوني المكتب
وهي جايه من كم يوم
اول يوم يخبرونا الجيران حتى
الدرايش من برع تنظفهن ومراوح المظلة.. ..
حسدوها بيكون
-
22/10/2018 11:28 PM #6
-
22/10/2018 11:31 PM #7
-
22/10/2018 11:33 PM #8
-
23/10/2018 08:18 AM #9السلام عليكم ..
صبحكم الله بالخير..
موضوع مهم !!
اشرتي لنقاط كثيره الحاصله
خاصه في زمن..
كثره الاستعانه ب عاملات المنزل..
للضروه وغير للضرورية..
امم ..
صراحه هو موضوع يحمل جوانب كثيره ..
خاصه تو صار تضارب بين ..
واجبات واعمال العامله
الاساسية ..
وبين واجبات ربه المنزل ..
وهذا سبب لوجود سلبيات كثيره ..
برأيي الشخصي ..
انا ضد الاستعانه ب عاملة المنزل..
الا في حالات خاصه ..
واستغرب من اللي يتركن اطفالهن بين يدي العامله ..
لنصبح لهم هي الام الثانيه..
حتى ينسون من هي امهم ..
هل هذا اتكال ؟ للعامله !..
أم هروب من تأديه بعض الالزامات
الامانه ايضا ب الاهتمام بالطفل وتربيه..
لازم ان تحفظ هذه الامانه!!
المشكله ما هنا !! فقط
المشكله بعد ذلك ..
هذا الطفل يتعلم وينشأ بثقافه اخرى ..
وهي تقول من وين تعلمه!!!
مثل تعلمه لمصطلحات ليست عربيه ..
اذا تريدي تجيبي عامله فصلي بين واجباتك ..
والاعمال المنزليه الاخرى ..
لانه رح يصير خلل بعدين..
يمكن ما يظهر بالمره لكن ..
مع الوقت رح تظهر نتائجه
.
.
فيه امر اخر استوقفني !
تعامل البعض مع العاملة
وكأنه اليه فقط جايه لتسوي شغل ...
مشكله كل شيء ع العامله ..
حتى لو الماي ع الطاولع قريب ..
صار فيه عجز اوين ..
البعض يخلي العامله تجيبه لهم ..
ليش العجز!!
.
.
وغيره البعض يصرخ بوجههن..
اذا ما صار شيء مثل اللي يريدنه ..
احييك ع تصرفك خيتو ..
بالفعل بالهدوء كل شيء يوضح ..
هي انسانه قبل ما تكون عامله ..
ويمكن تعامل ك فرد ..
لكن ليس بالضروره الثقه المطلقه..
يعني هي جايه تساعد وتخفف الشغل بعد ..
ما جايه تاخذ كل الشغل ..
احسنتي
-
23/10/2018 08:55 AM #10موضوع جميل وواقع
حقيقة مثل ما قلتي انا كنت رافضه فكرة العاملة
لكن اضطرينا نستقدم واحده ، اول وحده استقدمناها كانت مريضه بمرض معدي واضطرينا نرجعها وكان الكل متعاطف معها
المكتب عوضنا بدلها ، والحمد لله للحين أمورها طيبه صار لها 8 أشهر
حقيقة نعاملها كـ فرد من العائلة نضحك ونسولف معها وطبعا بحدود معقول
حتى هي جدا مرتاحه الحمد لله
بس نصيحه العاملة في حالة سويت خطأ الأفضل يتعامل معها الرجال من واقع تجربة
يحتاج لهم هزبه يالكلام ف حالة غلطن
نصيحة لا تعتمدوا اعتماد تام ع العاملة لأنه تعلم الأجيال التخاذل بشكل كبير
وبعد عاملة للاطفال بصراحة ما اقتنع فيه نهائيا
افضل يشلوا حضانة ولا نخليهم عند العاملة
موضوع جميل
-
23/10/2018 10:54 AM #11
هلا بالطش والرش وماء الورد بالغرش
واجد مشتاقه لك وفاقدتك وما أقول إلا الله يعينك ويسهل كل امورك
ويعينيي معك
العاملات نغباها وما نبغاهن
بعدم وجودهن راحة نفسيه ولو انه تعب جسدي وارهاق
ولكن تحسي بانك مرتاحة وما تحاتي اولادك او بيتك وتأكلي نفسك طول اليوم من المحاته
ولكن كما يقول المثل شر لا بد منه وخاصه للموظفه
بصراحه معنا عامله وفيه منهن الشين وامنهن كان الشين
بعض الجنسيات اه من لسانهن(بنغاياليات) حوه لسان جاعده ماكلات
وبعضهن مالهن حس تحصلي (هنديات) والحين اكثر شيء هدلا نجيب وامورهن اوكيه
بس انتي لازم تتحكمي بكل شيء وتعلميها وافضل تجيبي وحده ما اشتغلت قبل لان الي مشتغله قبل راح تطفحك بالمقارنات ويكون لها معارف وووو يعني ما راح تسلمي منها
اعطيها وقت للراحة مثلا الظهر ترتاح وبالليل ما تتأخر في انها تنام، لان مره جبنا عامله
مسترجعه والكفيل ضاربنها الله يهديه لما سالنا لمكتب عن سبب الاسترجاع قال الكفيل ضاربنها واتصلنا بالكفيل نعرف السبب فقال اوين بسبب الحرمه ولما سالنها هي قالت
ما يخلوني انام من الفجر لحد ما ينام اخر واحد بالبيت وكل شي اسويه بروحي والاكل يعطوني المتبقي ووو عدا من نصدق ما نعرف بس اثار الضرب واضح علبها وحتى اسنانها متكسرات وعيونها وديناها كم مره المستشفى بس بصراحه رجعناها بعد شهرين لان كل يوم مستشفى وكل يوم تعب نص اليوم ما تقدر تشتغل بسبب عيونها فنحن محتاجين لعون وليس العكس فالرحمة واجبه وارحموا من في الأرض يرحمكم من في السماء
طبعا مساله الهواتف ولو اني ما احبذ وجود واتس اب معهن ولكن بعضهن تصر علي الواتس، طبعا الهاتف حق لها وضروري ولكن الواتس ما اشجع عليه
الطبخ لما تعلميها عطيها دفتر صغير تكتب مواصفات كل طبخه تعلميهعا لها عشان يسهل عليها الامر وتتعود ع الطباخ
المعاملة بالين وانت ما شاء الله عليش والنعم فيك واولادك بعد خبريهم يعاملوها بلين والشيء الي يقدروا يسويوه ما يعتمدوا عليها فيه .
الكشرة لا تخليها تروح توديها ابدا خلي أبو العيال يرميها بالليل لان اغلب ضياه العمالات
من الكشرة ومن العاملات الاخريات ، فلا تخليها تختلط كثير مع العاملات الثانيات اكتفي بعاملات العائلة ولو انه بعد شر لكن مشيء الحال
ويش بعد يا ربي
غرفتك الخاصة لا تخليها تدخلها واذا شيء حصالات او شيء مع اولادك لا تخليها قباله
بعهن يدهن خفيفة وبعضهن حتى لو طفل نسى 100 بيسه تجيبها لك ويمكن هان تسوي اختبار بعد ، مثلا لما توصل تخلي مبلغ بسيط في مكان هي تنظفه فغذا كانت امينه فراح ترجع لك المبلغ وان كان ما امينه فتعرفي ومسكيها من البداية وخبريها على الي سويته والافضل اوب العيال ينازعها فهن يخاف اذا الرجال نازعنهن
ولكن ان الرجال وقف معهن فواه خراب الديار منهن
اولادك لا تخليهم معها بروحها يعين وانت في الدوام خذيها هي والابناء مع أمك بحيث امك تشرف على كل شيء وهي مجرد معين لها
لا تخليها تروح الدكان بروحها انتبهي اذا عرفت طريق الدكان وانه مسموح لها فعاد ما تتوقف
بس بيكون واجد لعيت واذا تذكرت شيء بجيك عاد الصوب الثاني
والله يرزقك خيرها ويبعد عنك شرها يا كريم
شكرا على المنشن
-
ليش رجعتيها
وبعدين عاد ناقش لموضوع
-
@العذراء الحزين
لو كنا نعرف كذا تردي كان نزلناه موضوع ..
أقصد شكرا على مداخلتك الهادفة
-
23/10/2018 03:44 PM #14
عادي كان تبغى انزل لك مواضيع
طال عمرك بس خلي يجي لبارض
والفاقه @الرجل الخفي. العاملات
خبيثات جدا حتى بو تشوفها طيبه
وراها شر بعضهن ولذلك يجب
الانتباه لكل صغيره وكبيره
في التعامل معهن
عادي معهن تدخل بيتك رجال
في غيابك او نص الليل وانت نايم
يعني ما يتعاين بشي واي فجوه بسيطه
يخططن لها
-
23/10/2018 04:28 PM #15
بالنسبه للشغاله @رياح الصدق
لا تخبيها تجلس معكم يوم تجلسي
انت وعايلتك لان بعضهن ينقلن
اسرار البيوت وينشحنها
وانتبهي لها بعد بعضهن يصورن
اصحاب البيت في هواتفهن
فاتفقي معها باغيه واتس اب
لا تشغله الا بوقتها يعني ما بكل وقت
يكون بيدها
-
ما تقصري ،،وزين البارض يجي ولو بين فترات ،،نتعلم من تجاربكم والدرر اللي تنثروهن
صحيح كلامك،، شرار ممكن تجنبه
@العذراء الحزينة
-
23/10/2018 04:37 PM #17
ممكن تجنبه ولكن على حساب الصحه
فالموطفه تجي لبيت توصل تعبانه.
تطبخ تغسل تراجع لاولادها
او او لانه كل شي لازم تسويه
الفتره المسائيه فتحتاج لمساعده @الرجل الخفي
-
24/10/2018 10:30 AM #18
مرحبل بكم ..
الشغاله شر لا بد منه وقد تكون الظروف تجبرك احيانا... لكن في كثير من الحالات اصبحت الشغاله في المنازل مجرد شكليات وغيره بعض النسوه .. المعنى تضغط ع زوجهاتقول له هيا هيا اود الحصول ع شغاله جارتي ليست افضل مني ... واحيانا تجد مثلا زوجه لا تعمل بلا وظيفه ومع هذا تجدها في المنزل كسوله تعتمد ع الغير ... وهنا تضغط ع زوجها المسكين التعيس والمصيبه اذا راتبه ضعيف ... شوف شوف اما تاتي لي بشغاله او اشل حقيبتي التعيسه الممزقه الى بيت امي .... لهذا من الطبيعي تجد نسوة تعيسات شريرات الجهل ينخر في عقولهن ...
بالمقابل يارياح هناك البعض في حاجه لتك الشغالات والظروف تحكم عليهن ربما بسبب ارتباطهن بوظيفه مما تكون الشغاله حاجه ملحه..
لو جئنا لسلبيات الشغاله بالمنزل طبعا تجدها تفوق الايجابيات بل تمسحها ع الأرض وكما يقال اضرارهن اكثر من فائدتهن .... والدليل نجدالكثير من المواقف السلبيه سواء ع المرئي والسمعي والمواقع الاجتماعيه ...
اما لو سئلت عن نفسي انا لا احب الشغالات
واجد في بيتي كائن غريب والمصيبه اذا كانت الشغاله من الجنسيه الافريقيه قدتسبب لي رعب والمصيبه بلا نظافه والشعر مجعد يشعرك انك تشاهد فلم زومبي ...
والعاملات مصائبهن تنعكس ع بيئه المنزل والاطفال والحياة .. وايضا المصاريف والراتب اصبح يرتفع في العلالي تجي تقولك يا اخي كل شي غالي .. المشط ارتفع سعره وما عاد هناك وقت بالانتظار الئ اخر الشهر .... هيا اود كرت اتصل الئ بيت اهلي. بالمقابل تتصل تواعد بنجالي قد يقتحم بيتك في اي لحظه .....
كثير كثير من المواقف السلبيه ...
مع هذا الممكن تفادى هذه العقبات بالمتابعه وعدم اعطاءها فرصه للسيطره ..
اعذروني الكلام لا ينتهي ولن ينتهي عن الشغالات المجنونات التعيسات الرشيقات
-
24/10/2018 10:39 AM #19
عجبني الحوار في ما بينكم ..
اتمنئ الأستمرار ....
وافتح معكم باب الحوار من يود معي
-
24/10/2018 11:08 AM #20
صباح الخير
الحمدالله ماعندنا شغاله ولا عامله منزل
امي تقول يوم رجولي يشلني ماابغى شغاله
وعاد احنا نسمع الكلام
الله يحفظ امي وامهاتكم
-
24/10/2018 06:35 PM #21
العفو .. مشرفتي الجميله @رياح الصدق
والله يعينج ع بلاويهن مشاكلهن اكثر من منفعتهن ها شغالات
-
25/10/2018 07:48 AM #22عضو نشيط
- تاريخ الانضمام
- 29/12/2016
- الجنس
- أنثى
- المشاركات
- 238
طفره من تطفرهن كيدهن عظيم
-
25/10/2018 10:25 PM #23
-
25/10/2018 10:30 PM #24
اشرتي لنقطة مهمه ولاحظتها ع اولادي
كثرة الدلع والصايح لأتفه الاسباب خاصه بنتي زادبها
والاتكاليه لدرجة اشوف ولدي يبري قلمه ع الارض ويقول بصوت واطي ان الشغاله بتنظفه
لكن قلتله انت موسخ.. يعني انت تنظفه وبضرابه استوعب كلامي ونظفته
ومن يرجع قام يرمي ملابسه ف الارض وفهمته هالشي غلط.. خلي كل شي ف مكانه بس تجاوب بالمرة الحمدلله
.
.
المهم بنتي من سارت الشغاله خف دلعها وقل الصايح اليومي المتعب للنفس
شكرا لك @حبات البرد
-
25/10/2018 10:37 PM #25
هلا بالغالية.. امين لكل دعواتك الطيبه ولك بالمثل يا وب
،
.
انا فعلا نويت هالمره اجيب وحده جديده ما مشتغله قبل
وجبنا طلبات من المكتب كلهن اعمارهن ٤٥ وفوق وقلت ما اباهن.. يجين عاد مدقدقات وتعبانات ف بلادهن مسكينات ونجلس نحن نراكض مستشفيات وعيادات
.
.
دعواتك بس نتوفق ف وحده تنفعنا وتعينا @العذراء الحزين
-
25/10/2018 10:38 PM #26
لو قلته هنا بيكون كلها بلادي تعرفني @الرجل الخفي
-
25/10/2018 10:42 PM #27
الرشيقات هاه
.
.
صحيح بعضهم صار وجود الشغالة كمظهر فقط .. حتى لو الزوج تعبان ماديا بتقول ابا شغالة..
لكن ان كان اموره متسهله فما يمنع يريح زوجته باحضار شغالة ولكن لابد من قوانين حتى لا يكون وجودها سلبيا ع اطباع من ف البيت
.
.
شكرا اك @دمعة النورس
-
25/10/2018 10:44 PM #28
مساء الورد @واسطة العقد
هيه نعم لو رجولنا تشلنا ما حتجنا شغالة
مع كثرة اعباء الحياة من اطفال ووظيفة ووو.. صرنا نحتاج لها
ما ف الطبخ ولا اولاد.. نحتاجها ف التنظيف فقط.. خاصة بلادنا مغبره
.
عسى بس يجي يوم وما حد يحتاج للشغاله
شكرا لك
-
25/10/2018 10:45 PM #29
-
25/10/2018 10:48 PM #30
شكلش متعقدة منهن برابر @لؤلؤة مصونه
مواضيع مشابهه
-
تم حجز الشغالة ...
بواسطة النفيس في القسم: خدمات جلب عمال وعاملات المنازلالردود: 4آخر مشاركة: 06/08/2016, 12:59 PM -
( تم حجز الشغالة )
بواسطة Abu Moaiad في القسم: خدمات جلب عمال وعاملات المنازلالردود: 0آخر مشاركة: 18/01/2016, 11:59 AM -
تم حجز الشغالة
بواسطة فرسان في القسم: خدمات جلب عمال وعاملات المنازلالردود: 0آخر مشاركة: 02/12/2011, 04:45 PM -
مشوره عن جلب الشغالة
بواسطة نجم الساكن في القسم: السبلة القانونيةالردود: 11آخر مشاركة: 26/04/2011, 02:51 PM