- محرك البحث العام
- المركبات
- الأراضي
- العقارات
- الوظائف
رؤية النتائج 1 إلى 29 من 29
الموضوع: طلب مشورة
-
19/02/2018 11:07 PM #1
طلب مشورة
مرحبا اخواتي في سبلة حواء..
اريد اعطيكم موقف صار لربيعتي الاسبوع الماضي ..جايه تشاورني بس بصراحه ما عرفت شو ارد عليها..
المهم سمعن مو تقول..
انه معها اولاد وفي بيت وحدها تسكن بعيد عن زوجها..يجي زوجها مال يومين في الاسبوع ..وهي بصراحه تنتظر الخميس بفارغ الصبر تنظف البيت وتجهز اولاده وتسوي العشاء اللي يحبه ..
وتتكشخ له وتلبس غاوي ..ولكن الزوج ابدا ما يلاحظ هالاشياء كانه عادي ساكن معهم ولا شي جديد..حتى كلمه حلوة ما شي..
صديقتي جدا متواضعه ما تطلب منه شي فوق طاقته وكثير تساعده وحتى لما يتأزم ماديا تعطيه بعض من ذهبها او فلوس عشان يمشي اموره..ولكن كانك تنفخ في جدار ..
فيه مرة استوى موقف معها وعصبت عليه وما كلمته قالها بنروح عند امي وسوقي عني لانه راجع من العمل ..الحرمه سمعت الكلام والا تتفاجا انه راكب وراء عند الاولاد وخلى البنت تركب عند الام قدام..ما كلمته وعصبت عليه كثير لانها جالسه تنتظره بفارغ الصبر لحد ما يوصل البيت ..وعادي عنده الامور طيبه كانه ما مسوي حاجه ..وربيعتي اعتبرتها اهانه حالها ..وهو يقول عادي نغير ما كل يوم قدام..
ما موقفكن من هالتصرف؟؟
وهل تقبلي لو زوجك تصرف معك نفس التصرف؟؟
-
مادة إعلانية
-
19/02/2018 11:09 PM #2
وبعد عادي معه رجع الدوام وبدون ما يراضيها باي كلمه ..بس قالها تراه واجد حساسه
-
19/02/2018 11:26 PM #3
كم عمر زواجهم
وعدد عيالهم
هل جلست مع زوجها
تناقشت معه وأسباب تعامله معها
-
19/02/2018 11:55 PM #4
بعض الازواج عندهم بروود في إظهار مشاعرهم وحبهم إتجاه الحرمه واتوقع لو ناقشته وكلمته بيقولها عادي ترا احبك وما ادري شوو بس هو طبعه ما يظهر هالمشاعر وجاف جدا..
بس الافضل تناقشه وتصارحه ولا تسكت لانه من حقها تشوف حب زوجها وشوقه لها
-
20/02/2018 08:44 AM #5
السلام عليكم
يا اختي جاوبيني على هالاسئلة من فضلك
هل الزوج عنده عادات سيئة؟!
هل يشرب او مدمن مخدرات؟!
ويش هي الصفات الحسنة اللي لاحظتها الزوجة في زوجها خلال سنوات الزواج؟!
@فرح اليقين
-
20/02/2018 08:47 AM #6
حبيبتي خليها تجلس معاه وتناقشه
لاتخلي الامور تتراكم بينهم عشان لا توصل لباب مسدود
ثاني شي
خلها هي تبادر في المدح والاطراء
وشوي شوي تسأله عن رايه ف لبسها ميكبها اغراضها كذا يعني حبه حبه لحد ما يتعود هو يبادر من نفسه
هالنوع م الرجال يبيلهم بارض وذكاء في التعامل
وطولة بااااااااال
لحد مايتغير
بس نصيحه لا تخليها تسكت
وتتفاهم بعقل وحكمه مو بصراخ وعناد
الحياه محتاجه شوية تنازلات ومنا ومناك وتمشي بإذن الله
الله يألف بين قلوبهم ويسخره لها
-
20/02/2018 09:33 AM #7
هي ادرى بعلاقتها مع زوجها احنه ماعندنا فكره حتى عن ابسط الامور كيف تريد مشورة شخص مايعرف عنهم غير الي سمعه منها فقط
اذا ف موقف بسيط ماعارفه تحل مشكلتها رغم اني ما اعتبرها مشكله لو تجلس بكل هدوء وتناقشه بتفهم الي تريد تفهمه وبتعرف الاسباب ابدا لاتضم شي ف خاطرها خل تناقشه ترا الرجال مايفهم حركات زعل ما زعل تكلمه مباشره بكل هدوء وخلها تاخذ وتعطي بالكلام
-
20/02/2018 09:37 AM #8
يووووه وصلت مخدرات ما مخدرات
هذي النتيجه لماتشاور ناس لاتعرفك ولاتعرفها
ابسط الامور تشاور فيها فلان وعلان
خبري صاحبتك البيوت اسرار تحافظ ع علاقتها مع زوجها بذكائها وفطنتها وخبرتها بسنوات زواجهم مثل ماقالت الاخت جوري. السلطنه تسأله شو رايك بلبسي شو رايك ببخوري وكذااااا والحياه اخذ وعطا يا حبيبتي. ما كل شي ينقال للغير والنقاش مع الزوج خير من طلب المشوره من اشخاص غرباء
-
20/02/2018 10:13 AM #9
صباح الخير اخواتي
لفت انتباهي التعليق هذا عزيزتي
كيف الزوج ما يعرف زعل ما زعل
اذا ما يعرف هذي بروحها مصيبه
يلي اعرفه في الحياه الزوجيه الزوجين من قوة الترابط بينهم
قادر كل واحد فيهم يقرا ملامح الطرف الثاني
وفي ازواج حتى في التلفون يسال زوجته
فلانه صوتك فيه شي والعكس صحيح
ما في شي اسمه ما يعرف زعل او غيره
الا اذا كان مشاعره مايته وما يحس بزوجته ابدا
-
20/02/2018 10:18 AM #10
-
20/02/2018 10:31 AM #11
ردة الفعل في مثل هذي المواقف تعتمد على أشياء كثيرة - في أكثر من طريقة ننظر فيها للموضوع:
(1) الزوج أصلا طبعه كذا ما يجامل ابد
(2) خلى بنتها تركب قدام هذاك اليوم لأنه فعلاً تعبان ويمكن بنتها أكبر الأولاد ف عشان كذا خلاها قدام عشان تنتبه في الشارع ويا أمها
(3) إنه هو متغير - ما هو نفس الشخص اللي تزوجته .. عشان كذا الحين ألف فكرة وفكرة في راسها
في كل الأحوال عليها تأخذ يمكن أصعب خيار وهو المواجهة .. والمواجهة ما تعني الصراخ وضرابة ومعركة طاحنة .. باختصار تجلس مع زوجها بهدوء وتقوله فلان الموضوع كذا .. برأيي هذي الطريقة الوحيدة عشان تفهم الموضوع وتوصل لحل .. أما توقف هي شايلة في خاطرها وفكرة توديها وفكرة تجيبها ما ينفع.
-
20/02/2018 10:33 AM #12عضو مميز
- تاريخ الانضمام
- 13/09/2014
- الجنس
- أنثى
- المشاركات
- 3,595
خبريها تمسك فلوسها وذهبها لنفسها ومستقبلها
نفس هالاشكال قد يكون تلعب يمين ويسار
خلي يتأزم ماديا ليش هي تساعده
هو مارجال يتصرف وحده
ليش الزوجه تساعده ؟؟؟
ترا ماحلو الزوجه تسوي نفسها سوبرمان قادره ع كل شي
قالها سوقي عني انا تعبان
تقوله ما اقدر أسوِّق خلينا نأجل المشوار
الله يكون ف عونها
الحل تجلس وتتناقش معه وتشوف الأسباب
-
20/02/2018 10:54 AM #13
لو فاهمة المغزى من الاسئلة كان ما كتبتي هذا الرد
ما كل الحريم يفهمن طريقة محاورة الزوج ولا كل الازواج يتقبلوا الحوار
المهم هالاسئلة لصاحبة الموضوع وليست لكِ @muqaimi
-
20/02/2018 11:08 AM #14
-
20/02/2018 01:49 PM #15
مشكورات كل اللي اعطن رايهن في الموضوع ..
صراحه امر محير ما نعرف ويش نرد على كذا مواضيع ..
-
20/02/2018 01:50 PM #16
-
20/02/2018 01:56 PM #17
زوجها انسان زين لا يشرب مخدرات ولا شي ..بس هذي المشكله عدم الاهتمام وبعض التصرفات التطنيش وعدم الاحترام
-
20/02/2018 01:59 PM #18
-
20/02/2018 01:59 PM #19
-
20/02/2018 03:32 PM #20
اذا هي تعترف بأن زوجها زين وما عليه سوالف ولا كلام
اذا فلتتغاضى عن بعض الامور لتكون الحياة سعيدة
دايماًالمفروض نفكر في ايجابيات الانسان عندما تواجهين اي مشكلة مع الطرف الاخر
الحل يكمن في التغاضي وعدم اعطاء الموضوع اكبر من حجمه
طبيعة المرأة انها تريد تلفت انتباه زوجها باللبس والتجميل وطبخ الاكلات الشهية له ولكن هل هي حاولت تغري زوجها؟!
ضروري تركز على هالامور بعض الرجال اخر همهم لبس الزوجة ولكن هي كمرأة وانثى بدال ما تزعل تبدأ هي بمدحه والثناء عليه حتى على ابسط شي سواه لها
واذا مافي نتيجة تتغاضي عن السلبيات وتركز في ايجابيات شريك حياتها
آخر تحرير بواسطة بودي سباركلز : 20/02/2018 الساعة 03:39 PM
-
20/02/2018 10:02 PM #21
-
20/02/2018 11:16 PM #22
هو من قبل كذا معاها ولا تغير فجأة؟؟
-
21/02/2018 11:03 AM #23
اجعلي لكي هدف في يومك ان تسعدي شريك حياتك بما يدخل السرور عليه
تارة رسالة جوال من كتابتك وتارة رسالة صوتية وتارة ثناء ومديح وتارة موقف وفعل...
ولا تنتظري المكافئة عليها بل اجعليها عمل صالح تتقربي به الى الله وزيادة في ميزان حسناتك...
-
21/02/2018 11:25 AM #24
@فرح اليقين أختي أساسا ما في مشكلة فالموضوع كله
صاحبتك تنتظر من زوجها الاهتمام وكلام الحب والغزل هذي رغبة كل متزوجة
عندي لها نصيحتين:
أول نصيحة: دائما الشيء الي ننتظره ما يصير لكن بمجرد أننا ما نركز فيه يصير بمعنى هي تتمنى زوجها يقولها أحبك وأنتي حلوة وتجلس تفكر وتنتظر بأهتمام لدرجة ممكن تسأله او تطالبه بالكلام الحلو فيصير بخيل عناد لها ولانه يحس نفسه مجبور والرجل ما يحب يحس نفسه مجبور
الحل هنا تهتم بنفسها وتتكشخ وتجهز العشى او الغدا وما تعطي زوجها أهمية بمعنى تسوي نفسها مشغولة بأولادها وأكلهم ودراستهم وممكن تجلس تقرأ كتاب أو مجلة أو حتى كتاب الله فهذي الحالة بس راح تشغل تفكير زوجها وراح يسعى عشان يعرف ايش سبب التغير أهتمام المرأة بنفسها وذاتها وحبها لنفسها راح يخلي الاخرين يحبونها وأول الناس زوجها المهم تكون غامضة ومهم ما تعطيه كلام الحب طول الوقت عشان ما يمل وبعد تحاول ما أي موقف تزعل بالعكس تسوي نفسها ما عندها الوقت للزعل لان عقلها أكبر من كذا دايما المواقف الي تصير اليوم أنساها لكن اذا صارت فرصة واشوفه هادي أناقشه وأقوله فلان هذا الموقف ضايقني أو هذي الكلمة ضايقتني ويكون كلامها بكل هدوء وبكل احترام ودايما تختار الكلمات الي ترفع من شأنه عشان يظل يفكر في كل كلمة قالتها له
وعشان يفكر فيها وما ينساها ويشتاق أنه يرجع لها_ فاليوم الي تجهز شنطته للدوام تحط بين أغارضه ورقة ملونة صغيرة فيها كلام حب وكم انها راح تشتاقه وممكن تكتب له كيف ان اولادهم دايما يسألونها عنه وحلو لو عطرت الورقة بعطر من عطورها الي هو يحبها او ممكن تخصص عطر تتعطر منه هذاك اليوم ونفس هذا العطر ترشه فهذه الورقة
النصيحة الثانية: تقلل من مساندتها لزوجها ماديا بمعنى ما لازم تعطيه اذا تأزم خاصة اذا ما طلب منها بمعنى ما تعرض عليه مساعدتها لان هذا الشي يخلي الزوج يحس ان ماله قيمة فالبيت وأن هي ما محتاجتنه كونها مقتدرة بالعكس الرجال يحب الزوجه الي تحسسه بحاجتها له مثلا فلان من فضلك ركب سلندر الغاز وأشتري فاكهة وخضرة وعبي الثلاجة دجاج وسمك تراني ما أقدر أروح أتسوق أكون تعبانة وأولادك ماشاء الله محتاجين أهتمام وأبصراحة البيت بدونك ما له قيمة أنا والأولاد نحتاجك فلا تتأخر علينا.
موقف أنه ركب ورا وخلا بنته قدام ما يزعل يمكن الرجال مشتاق أولاده وحب يجلس معهم بس بعدها تناقشه فيه وتقوله حبيبي جلوسك قربي يحسسني بالأمان
وحتى فسياقة السيارة اذا تعبان تقوله نروح بكرة دامك تعبان لاني بعد تعبانة وما أقدر أسوق
المهم هو يتولى السياقة عشان يحس بأهميته
-
21/02/2018 11:29 AM #25
-
22/03/2018 09:42 PM #26خاطر
- تاريخ الانضمام
- 21/10/2016
- الجنس
- أنثى
- المشاركات
- 15
في ظني تكون عاقله وتحاول تنصح وتحاول تشوف طريقه حسب ما قريت أنها لها فتره متزوجه يعني عارفه شخصية زوجها
-
23/03/2018 12:12 PM #27عضو مميز
- تاريخ الانضمام
- 18/05/2010
- الجنس
- أنثى
- المشاركات
- 3,035
-
24/03/2018 10:58 AM #28
هذي مشكلة بعض الحريم الله يهديهن تعطي وتعطي وما تاخذ،
تتنازل عن حقوقها، تعتذر في كل الحالات سواء كانت غلطانه او لا، تلعب دورها ودور الرجل، كل هالشي تسويه عشان بس يرضى الزوج ويعتبرها الزوجه المثاليه، بس حبيت اقولك ان تختلف شخصية الرجال، في منهم يحب الزوجه اللي تطيعه الطاعه العمياء لكن عليها ان ما تتنازل عن حقوقها، وفيه رجال يحبوا الزوجه اللي تعتمد على زوجها وتعتبره هو السند والمنقذ وتطلب أكثر من ما تعطي، فيه منهم يحب المرأه المتمرده لانه يشوف فيها قوة الشخصيه وممكن الاعتماد عليها، وفيه منهم يحب المرأه الوسطيه تعطي وتاخذ في نفس الوقت، يعني هي أدرى بشخصية زوجها دام عاشت معه سنوات تراه الرجال تجيه فترات يمل فيها حتى زوجته واولاده هذي طبيعه بشريه والمرأه كذلك، فالحل هو انها تعرف وتدرس شخصية زوجها أكثر
-
25/03/2018 09:45 AM #29
الرجال فيه نسبة كبيرة من الانانية وطبيعة اغلب الرجال يحبو اان الزوجة تتحمل كل المسؤوليات تركب الغاز اليت تنظف وتطبخ وتربي ولو غلطت غلطة او قصرت يا ويلها
وهنا الوم الزوجة لان بعض الحريم تحس انها واو ومسوية انجاز تركب الغاز يا ماما لا تتحملي كل شيء بتندمي حتى لو انتي شاطرة بكل حاجة لا تخبريه
عطيه بعض من المسؤولية اغلب الحريم الحين يشتكوا ان الزوج ما يصرف عليها لانها تشتغل لو تشتغلي خذي منه حتى لو 50 ريال ولما يحتاج كوني عون وسند بس لا تحسسييه انك البنك المركزي الي يضخ بالفلوس وما يخلص
اعرف حريم يشتغلوا ورواتبهم اعلى من رواتب ازواجهم بس ما تساهم ف البيت حتى بريال
ما نقدم تنازلات كبيرة ف الزواج لانه كله بياثر علينا
مواضيع مشابهه
-
[ معروض ] صناعية مسورة مسفاة مرحلة2 رقم 526 مساح 1000 م وسطية مسورة بها مكتب مطبخ حمام مطلوب 145 ألف ص مباشرة
بواسطة السمري الشامخ في القسم: عقارات زراعية وصناعية وسياحيةالردود: 75آخر مشاركة: 20/09/2018, 07:52 AM -
طلب مشورة
بواسطة الزاوية الحادة في القسم: سبلة السياراتالردود: 12آخر مشاركة: 02/07/2013, 10:34 PM -
مطلوب مصورة فيديو + مصورة فوتوغراف + موظفة استقبال
بواسطة روتانا للتصوير في القسم: إعلانات وظائف الشركات والمؤسسات الأخرى المحليةالردود: 4آخر مشاركة: 31/03/2013, 09:33 AM -
تلاوة خاشعة لسورة القيامة مع مشاهد مصورة اتحداك ما تبكي- مشهد مؤثر جدا جدا
بواسطة هاني هشام في القسم: السبلة الدينيةالردود: 3آخر مشاركة: 29/01/2012, 10:46 AM -
[تغظية مصورة ] [ عُمان X السعودية ] [ تصفيات كأس العالم 2014م ] [تغظية مصورة ]
بواسطة القوات الفنية في القسم: السبلة الرياضيةالردود: 28آخر مشاركة: 06/09/2011, 06:48 AM