- محرك البحث العام
- المركبات
- الأراضي
- العقارات
- الوظائف
رؤية النتائج 1 إلى 30 من 921
الموضوع: السقاط/السموم/لسبني
-
12/11/2017 08:13 AM #1
السقاط/السموم/لسبني
يا مرحبا مرحبا يا مرحبا بكـم """ يا مرحبا ذات تبذير وإســراف
وإن تكن مرحبا إكثارها سرف """فليس إكثارها فيكم بإســــــراف.
جئت إليكم وذاكرتي مثقوبة بحاجة إلى بعض الترميم لأعيد لها نشاطها السابق
فبأي شيء تنصحوني أرممها
لنقلب الشريط قليلا ونعود إلى زوينة وخلفان
* دخل خلفان البيت ووجده الصالة معفوسة فوق تحت بلح عيونه
وفك حلقه وأبوي موه مستوي ليوم ببيتي كيه أحيد الزون أوووووم
الترتيب مالها ليوم وبدأت عيون تبحث عن الزون ولم يرها
صرخت عليه زوينه وطلعت له بشعرها المنفوش من خلف
الكنبه (خلفوني أنا هنا)
خلفان: بسم الله الرحمن الرحيم اللهم سكنهم مساكنهم من انتيه انس ولا جن
زوينة: :خلفوني انا زوينة حرمتك ،أنا زوينة عين السيح :متغرل:
خلفان :مالش كذا زوينة موه مسويه بعمرش ومالش مقلوعه لبيت فوق تحت
وويش ذا الابيض بو راشتنه في الارض
زوينه :موه مالني حلفان موه اقولك
وموه اشكي لك سقاطين تارس البيت تعايت موه اسوي بهن يتمخطرن على كيفهن (واتمخري يا حلوه يا زينه)وناخرات الارض كله مطلعات تربة،وكل ساعه يلسبنا ؛سويت لهن بيف باف بودره ما نفع ؛قالوا لي صابون لوكس مع ديتول ما نفع وقالوا فازلين مع بودرة بيف باف وما نفع تعايت بعمري موه اسوي لهن
خلفان :كلذا الشي عشان سقاط يا زون ترا لدغته زينه اونه، يقولوا دواء فيها، الزون معاليق الفؤاد كأنك دلوعه عن يكون باغيه تجي كما قوم شكليته تخاف من كل شيء
زوينة:هيه متدلعني تارسني ذهب من رجولي لراسي ،لكن ما دام انت معي خليني ادلع شيه شويه وادلعك معي موه ناقص علييي نزين
وبينما زوينة وخلفان يتحدثون صرخت روان وااااااي ماهاااااااااه ماااااااه تعالييييي ليييييي
زوينة: طاح قلب زوينة بين رجولها :قلب مشطوف:- بنتي موه
استوى لها وركضت وتبعها خلفان وكل منهم يقول مالك ريان ماه
موه يعورك موه استواء لك ، تكلمي خبريني ، حد ضربك ، حد قالك شيْ
روان :لدغني سقاط
خلفان .بعيد الشر كل ذي الصرخة عشان سقاط، ما تطلعي احسن عن
أمك أنتيه ذليله بالمره عب سقاط محتاج ذا الصريخ كله
زوينه :انت لو يلسبك سقاط كان تعرف كيف يعور ولا هاعه
لكن أقولك تو خليني نشوف لبنيه وقوم سير جيب عطر [دريس]
خلفان:عطر دريس تو موه ذا بعده دريس
زوينه:هذك شيه خلفان عطر مخنوق واموه يسمى جيبه نسوي لها
منه تراه يبرد الدغه شويه
-
مادة إعلانية
-
12/11/2017 08:18 AM #2المشهد الثاني:
خلفان :زون موه ناويه تطبخي لنا ليوم من يدش الغاوية
زوينه:فديتك يو خلفوني بو في خاطرك اطبخه تدلل انت يا نور عيني تدل
جهز الغداء وتم القضاء عليه بنجاح
وخلفان عس يده بوزاره وانسدح ع صوب وزوينه راحت تغسل
لوعيان وتنظف المطبخ وهي جالسه تكرف وتنظف
وابو الشباب يشرخ وفجاه انتزق بسبب كزة بسيطة من سقاط
وتم يحكك ويتألم ويصرخ زوينة تعالي الشيمة جيبي لي عطر مخنوق تراني
ما رايم اجلس واهجع احس جسمي كله يعورني زيونه تتحلطم
تو عرفت ان السقاط يعور حموه تو عاد ذوقه والله ما حد أذل عن بو وزار
تستهل دواك
خلفان :ترومي تسكتي تو انتيه جالسه تضحكي عليي وأن تشوفيني
حالتي حالة خلاء وديني الدختر الدهدية
ودوه خلفان الدختر وضربوه أبره وسوا له سقاية والسبب كله كزه سقاط
سؤال خاص للأعضاء الغبرين لان قوم شكليته ما أظن يعرفوا يجاوبوا عليه
ويش اسم العطر إلي في الصورة وييش استخداماته
سوال للجميع
كم مره لدغك السقاط؟وويش كان شعورك؟
نصائحكم للقضاء على السقاطين؟
ما المقصود بلسبني ، كزني؟
-
12/11/2017 09:15 AM #3السلام عليكم ورحمه الله وبركاته
صبحكم الله بالخير
،،
لحظه
يستاهل خلفان عجب كان يتمسخر ع زوينوه .. وتو حس اه
،،
بالنسبه للسقاط او السمسوم ترا صدق لدغته تعور وايد جالي لادغني نعم .. بس ما اصرخ .. هو صحيح تحس الالم في الدم
،،
العطر مزنوط نسميه نحن شيه لين تو اترشس منه يوم اشم الاطفال فيهم .. ريحته وحدها ماركه ..
،،
بس بلدغه السمسوم .. كل انواع العطور احطيهن ف مكان اللدغه عشان يخف
،،
للقضاء ع السقاط .. عليك بسكر وفلفل اسود وحصى صغار . بحيث السكر يجذبهن والفلفل يسبب العطس ويضربن راسهن بحجاره
وبس
-
12/11/2017 10:04 AM #4
صباح الخير
يستاهلوا بو يستهينوا بالسماسيم
كذاك نخليهم مربطيين ونجيب ماي وسكر وزيله سماسيم
السمسوم وحده سالفه.. عضته ما تخف بالمره
وتخلي الجسم يتورم ..ااذكر امي كدعها سمسوم ف يدها
بالمره تحسست مسكينة وورمت يدها وكل جسمها تورم
وراحت المستشفى..
قالوا حشى ذا ما سمسوم بو كادعنك
ع بالهم دبية.
تو اشوفهن زايدات'
وما يردهن لا فليت ولا شئ
-
12/11/2017 01:53 PM #5
كان في دندنه قديمه يقولنها الامهات للطفل الذي يلذغه السقاط:
يا سقاط يا نقاط قالت أمه ويه ويه قال أبو معليه
شبطوه وربطوه بمريبيط الجعد لا يأكل ولا يشرب
ولا يلذغ ولد العرب
-
12/11/2017 03:39 PM #6
-
حجز ولي عودة
-
12/11/2017 07:41 PM #8
كم مره اخذت نصيبي من لدغه السماسيم
كأنه كهرباء نعم قشعريره..
نصيحتي للقضاء على السماسيم:اقصهن بمقص اذا لقيتهن او افركهن فالارض اقسمهن نصين.. بعضهن يلسبن ويهربن
معنى كلمه لسبني:لدغني كذا تقريبا
شكرا ع الطرح الجمييل
ومسائكم لدغات سماسيم
-
13/11/2017 12:56 AM #9
هؤ هؤ حجية العذراء اليوم هنا ذكر الله
زين نورتينا ,قلنا بيكونشي ذي الحرمة زعلانة علاينا يوم مانهارجها
ولاترقيت في الشغل
نجي للحبكة
لكشاخين والسقاطين والضرة موسمهن تو
ذيك الحينة جالس يقولي اخوي مسوي مادة في بيته حال الرمة وساكرة البيت سكرة
كم مره لدغك السقاط؟وويش كان شعورك؟
ونعم افوادي احكك رجلي بس ماقادر
نصائحكم للقضاء على السقاطين؟
واخوي يقول مسوي مادة وفيها ريحة ماعرف موه سماها اجرب اسئله
ما المقصود بلسبني ، كزني؟
وكزني كدعني او لدغني بيكونشي
ابدعتي استادة حجية
-
13/11/2017 12:58 AM #10
ختينا شواتي تو نتيه من هين يوم تقولي سمسوم ماسمسوم؟
ماجالني سمعتش فالبيت لبر تقولي سمسوم
تو وا لبرستيج هنا مايسمحلش تقولي سقاطين؟؟
قولي تو هنا حيت العرب
@شواطئ الذكريات
-
13/11/2017 02:38 AM #11
صباح الخير ...
يا هلا و سهلا بعذرذر .. موضوع جميل كجمال وجودي هنا
بصراحة الرجال دلوعين .. مسوين نفسهم قوة و مرة هنا الدنيا بس اذا عورهم شي بسيط ايشلوا الدنيا شل .. كنه منقعين ما كنه شي خفيف .. بس سبحان الله ما يستحملوا كما الحريم البر.
نجي لموضوع العطر .. بصراحة هالعطر له مسمى الله يهديهم مال اول ...ما ينفع اقول به ذا الاسم و اتوقع تعرفيه .
أما بالنسبة للسقاطين .. و *الفشاخين* @NITRO اسمهن فشاخبن ما كشاخين .. شي ضرة حمرا و شي شودا و اوين الضرة السودا ما تخوزوه تجلب البركة و الضرة الحمرة دليل ما اعرف مو هناك شي سيئ .. حسد واموه
و هذي اصلا متواجدة اكثر شي ف البيوت اللي جنبها مال او مزرعة .. شي طبيعي تطلع
حوار جميل عذرذر .. و ولكم باك
@العذراء الحزين
-
13/11/2017 07:28 AM #12
-
ضحكتينيّه :
.. صباحنا ابتسامه جميلة من حروفكمـ
ربي يحرســــــــــــــــك خالتيّه ..
-
13/11/2017 10:43 AM #14
-
13/11/2017 10:44 AM #15
-
13/11/2017 10:45 AM #16
-
13/11/2017 10:47 AM #17
-
13/11/2017 10:50 AM #18
-
13/11/2017 10:52 AM #19
-
13/11/2017 10:53 AM #20
-
13/11/2017 10:57 AM #21
-
13/11/2017 01:27 PM #22
-
13/11/2017 02:01 PM #23
كل ماينطق يكتب
انا اقول كشاخين,ماعلي منكم تحرفو الكلامنج
ومرة ثانية لاتعدليلي حيت العرب
@نور الهدى 11 وعن الخرافات بو بركة مابركة
-
13/11/2017 02:03 PM #24
ماتقصري جزاكم الله خيرا
الصاع بالصاع,يوم انا جيت صوبكم ماطيوتوني حتى لقب
ياخي فعلا سبحان الله كأنه فيهن مناعة
اول لفليت يفيدهن تو ماشي يصدهن الا بالحظ شي منهن يموتن
الله يعين بس نعم
تو الواحي احسنله يتجنب يسوي شي فيه سكر في الطاولة بو المطبخ
ويضمه فالفرم(الفرن) ولا نوبه يدخلن؟؟
اول مرة اسمعبها ،اسمع لزني بس
آخر تحرير بواسطة NITRO : 13/11/2017 الساعة 07:09 PM
-
13/11/2017 02:42 PM #25
قلتلك انا صح اختك بو انت مرباي بعدها مباشرة..بس انا فرع مسكد عشان كاك اقول سمسوم
وقدام امينا اقول سقاط عن تنازعني
لا تخبرها وتواشي عليي
ولا بيردوني نزوى
@NITRO
-
13/11/2017 02:43 PM #26
اول مره اعرف كلمه لبسني
من هين ذي الكلمه جات
احنا نقول قرصني / لدغني
-
13/11/2017 04:27 PM #27السلام عليكم ورحمة الله وبركاته
يستاهل خلفوون دوااااه ما يحس بغيره
إلا لما جرب بنفسه!
ياخي أحس بعض الرجال أنانيين
ما يفكروا إلا بنفسهم وبس..
عذور اللي بالصوره
سمسوم والا جعروف؟؟
اللي أعرفه إن السمسوم الأصغر من هذا!!
وبصراحه شي كلمات ما فهمتها..
السمسوم من فتره طويله ما أذكر أنه لدغني
أمشي على قاعدة أمي لا تأذي الدواب فما بتأذيك..
عادي مرات أشوف سمسوم يتمشى بس ما أحاول أقتله
فما يقرب مني سبحان الله وإذا قرب هرسيه في مكانه..
بالنسبه للعطر أحب ريحته ويحطوه
لليهالوه معنا للحين وأنا بعد أحط منه
ريحته هااديه وبارده أرتاح لها وأمي كل ما تأخذ
لأولاد أخواني تأخذ لي معهم
هذا عطري وأمس مخلصه واحد
حلووو الموضوع العذراء..
-
13/11/2017 07:08 PM #28
-
13/11/2017 07:37 PM #29
-
13/11/2017 07:38 PM #30
مواضيع مشابهه
-
[ معروض ] جهاز قياس مستوى الكيماويات السموم والاشعاعات في الفواكه والخضروات واللحوم
بواسطة محمد 995 في القسم: اجهزة إلكترونية مختلفةالردود: 37آخر مشاركة: 16/07/2017, 10:28 PM -
[ مطلوب ] دواء ضد السقاط
بواسطة ولسون 145 في القسم: سوق السلع الاخرىالردود: 14آخر مشاركة: 06/08/2013, 03:27 AM -
ظاهرت قتل النمل الاسود في المنازل ( السقاط / السمسوم )
بواسطة فادي العماني في القسم: السبلة العامةالردود: 5آخر مشاركة: 30/05/2012, 11:37 PM -
فوائد الصرصور(السقاط)
بواسطة نديم السلام في القسم: سبلة ترويح القلوبالردود: 212آخر مشاركة: 21/06/2011, 12:19 AM