- محرك البحث العام
- المركبات
- الأراضي
- العقارات
- الوظائف
رؤية النتائج 1 إلى 30 من 913
-
11/09/2017 10:38 AM #1
مراحل تطور الانسان العماني في قيادة السيكل
كان اول الانسان القديم و الحليان
انه يطلع من البيت يوم يأذن الفجر
و يروح يصلي و يرجع البيت يضرب سح وقهوه و يعدل مزاجه ببوري
و يروح المزرعه يسقي و ينازع الهنود و يبيع و يشتري
وبعدها يرجع الظهر يتقمقم و يتازع مع زوجته لان الغدا ما عاجبنه
و يااكل لين يشبع و يشرب فوقه لبن و يرقد
و يقوم لصلاة العصر ويروح يصلي العصر و يرجع المزرعه ولا يروح المقهى عند الشياب
و يشرب شاي سليماني ف صحن لين يجي المغرب يروح يصلي و يرجع البيت يتفصخ و يلبس فانيله ووزار
ويشغل المروحه على رقم 3 و يغفي و يستعد لصياح الديك لليوم الثاني يقوم هذا قديما
وحديثا
نقوم الصباح بعد 3 مرات نسوي غفوه للتلفون يوم يسوي منبه
و نشيك ع التلفون اذا حد متصل او جايه رساله
و نقوم دهديه دهديه و نروح نتسبح ونتصفد و يدور دشداشه نظيفه و نشرب شاي و نسخن السياره و نلبس المصر اوالكمه و نتحرك ف السياره
و نحرص ف الزحمه و نسب بو يمشي قدامنا شويه شويه لين نوصل الدوام
نوقع و نجلس ف الكرسي اذا شي شغل نخلصه
و اذا ماشي شغل نفتح الجهاز و ندخل السبله السياحيه و نشوف اذا شي رحلات حال أبو فيصل
ونشوف الساعه لين يخلص الدوام
و نرجع البيت نتغدا و نشرب عصير و نرقد لين المغرب
وبعدها يطلع مع الشباب او يترمس ف الجلسات او يدور ب سيارته و ليت البترول والع و يروح يشتري صاروخ من مطعم تركي و يطلع مايونيز زياده
و بعد الاكل يدور حد جالس و يروح يتجلس ف الجلسه لين تجي الساعه 12 او 1 و يروح البيت و يدخل البيت شوي شوي علشان محد يسمعه
و يتقلب ف الفراش و يلعب ف التلفون و يقرا المسجات ويقلب مليون برنامج وراه
ليين يرقد حال يوم الثاني
خلونا فموضوعنا المهم هذاك مقدمة بس تعرفو منجود المواضيع بدون مقدمات
البدايات والانطلاقة في عالم الاحتراف القيادي فالسلطنة كنا نسوق زوره بعد من نخوز الخوص من النص عشان هذا مكان الركاب
بعد ذلك يتطور المحرك هوندا الى عسو اقصد بعد ما نجد النخله ناخذ السح ونخزنه والعسقه نيبسها ونسويها سيكل لأنه بها شكل رهيب أكثر من الزوره فتأتي منحنية الشكل
ثم يأتي التطور والطفرة الجيني من عالم السعفيات الى عالم الحديد ههههههه وهنا بدأ الأنسان يسوق اول رنج فالتاريخ
أكيد فكرتو ف سيارة الرنج
بعدين شويه تطورنا قمنا نسوق عربانه لأنه فيها مكان مهيأ أكثر للركوب فقط شخص يدف وتحمل ثلاثة أشخاص أنجلهم فأقرب طوي هههههه
كبرنا شويه جابو لنا سيكل بو ثلاث تواير بو دكية بعدين جابو لنا سيكل بو تايرتين فيه ورا سبورت تايريين اقصد تواير صغار مسانده ومساعده عن نطيح في الارض
طبعا اللي اقصده الدكية ماله اطول وما كذاك شكله شوية قديم شكله جاي هههه
بعدين تطورنا شويه سيكل بيلون ويوم كبرنا عودين عوين تفيشرنا قمنا نسوق السياكل اللي يسوقهن الهنود تو
هذي قصة التطور الانسان العماني في سياقة السياكل
فمنذ أن كنا أطفالاً ونحن نحب ركوب السياكل وأكيد بعد الحوادث والمفاجاءات والمشاكل حصلت عندك والضرابه مع أخوانك على ذاك السيكل
ناهيك عن التشميخ فالصيم وأصابع رجلك لما تدخل مع السنجل أو لما ما يكون في السيكل بريك وتحاول توقفه برجلك
بعض القصص اللي صارلي في فترة التألق القيادي بالسيكل هههههه
من المواقف:
مره يو عيني جالس اتمدح قدام واحد "غريب بالحله" ويدور بسيكله وتو انا المسكين جالس اتمدح إلا وانكب على ثمي قدامه.."مو هالحاله"
ومره نازل من مطلاع "دك عووووووووود" ومكلووووووز علين قايل بس لكن بدل عن اضرب بريك ورراني دقيت بريك قدداااااااااامي وما شفت غير السيكل مشلق من ورا ومتقدمني
قدامي..."وعادت ما حاله طالع من ذاك الدك..
الله يرحمك يالـــباااليووون ويالبريك بيدره...
صراحةً ايام لاتنسى مع السياكل...
دهر لمسابقه والترغيده بالسكيك والاموال...
الصبح والظهر والعصر دواره ومن بعد المغرب تصليح وترقيع التيوبات...
عاد أحلى شي اذا شفت بنت تتمشى فالحاره أفلت حال السكان ( أحتراف طال عمرك )
قصة صديق الطفولة ( H )
هذا صديقي الروح بالروح معاه كان سيكل معطنه اسم بعده مسمنه تيسير الأمير
هذا تيسير الأميرعليه قصه بعده
تراه هو اشتريوله سيكل جديد كبير لانه ابوه وعده يشتريله سيكل جديد بعد صف ثالث اعدادي اعتقد ..المهم هو ما يهون عليه تيسير الأمير يعقه فقال يعطيه اخته اصغر منه وهي طبعا
فرحت واي فخر اكثر من ان تمتلك تيسير الأمير بس المسكينه بعد 3 ايام جاها قاللها اسف اختي باخذ تيسير الأمير منش قالت ليش قاللها ..تيسير الأمير شي عظيم وانا لازم اتبرع
به لاحد الاولاد مسكين والله ما عنده سيكل وانا قلت اعطيه اياه هديه
عصبت هي طبعا المهم تيسير الأمير قد تم التبرع به
تو باقي متفكر الواحد على كل شهرين قام يغير سياره أسميها دنيا وبعده ما حد بو مستقنع
كل واحد يسدحلنا قصة مؤلمة أو مشوقة مرت عليه في أحتراف قيادة السيكل
THE END
-
مادة إعلانية
-
11/09/2017 10:51 AM #2
السلام عليكم
انا ما اقود السيكل .. بس جيت ارد ع الموضوع
ممكن ارجع مره
آخر تحرير بواسطة ابتسامة الشمس : 11/09/2017 الساعة 10:31 PM
-
اهلا بك اخينا @ليث الصحراء
ماشاءالله تبارك الرحمن بلفعل مراحل التطور شيء جميل لكن مازال الذكريات جميله باقيه ولها اثار جميله في اذهاننا !!!
بصراحه ضحك من خاطري على سيكل بو تفوشربه
وذكرتني ايام تيوبات اذكر اخواني يوم كانو صغار نعم حصين لين اليوم مااعرف ايش سالفه يسووا عجين ماي وطيحن حالتيوب ويطلع ريحه اتوقع الحشرات هيموتن منها
بنسبه للسيكل كنا انا واختي نسرق سيكل اخونا الاصغر ونسوقه وطبعا ماحد يعرفنا بدسيه
ومن المواقف الصعبه اللي شفتها اخوي طيح السيكل في رجله وضربه في الصبع والى اليوم الظفر يطلع متشوه بسبب ضربة السيكل شقاوة بلا حدود
-
11/09/2017 01:43 PM #4مشرفة سابقة
- تاريخ الانضمام
- 26/11/2009
- الجنس
- أنثى
- المشاركات
- 15,607
- مشاركات المدونة
- 1
يغربل بليسك كل هذي مقدمه
متعه قياده السيكل حقيقه ولكني فشلت فشلا كبيرامنذ نعومه ظفوراتي في خلق توازن عليه ولو لدقيقه
شكرا ليثون
-
11/09/2017 10:15 PM #5
حياك استادنا @ ليت @ليث الصحراء
حموه معصب يوم ماجيت ارد,تراه تعرفني لين انقلع يبغالي
زمن اول الشيوبة او الناس مريين عمارهم ماكمانا بو تلفونات وانترنت واشبياء ماخذه وقتهم
كل حياتهم كانت طبيعية ع لزارعة والسقية والسح والرطب والقهوة
والسواحل واحيبهن بو زورة وسويناها قبل لانكون اغنياء
وشترينا السكوتر والسواكل بو جامبين والخ..
وكنا نسوي غرشة فالدروجة عشان تطلع صوت كنها دراج
وزيناهن فالسبوكات وشترينا ليتات
عيشة زمن اول وقاصر كليوم ينبززج ذاك السيكل
اهلا بعودتك استادي
آخر تحرير بواسطة NITRO : 12/09/2017 الساعة 11:05 PM
-
12/09/2017 07:32 AM #6
بصراحه تواجدك بحد ذاته محفز نكتب موضوع غيره ما شي منه البر
@ابتسامة الشمس
-
12/09/2017 07:37 AM #7
للعلم السيكل موجود لحد لحين بس مراعاة لشعور الآخرين ما حبيت اعرضه ههههههههه
عادي قوليله يسويله تيزاب وأموره طيبة بيرجع الظفر نفس أول وأحلى :ضحكة مضمومة:
@زهور الظاهرة
-
12/09/2017 07:40 AM #8
خلي عنك عطينا القصة يوم منفلعة فنغاغتك
العفو رفرف
@رهايف
-
12/09/2017 07:41 AM #9
معناته ما جاي تجي
ترااه هذا الكرسي مدفوعله إيجار لو ما جيت
@NITRO
-
12/09/2017 07:44 AM #10
أول موضوع حالي فالترويح ما بغيله يوم وحدة كان منقول من السبلة العامة حال الترويح وقمت أتقمقم ليش أنغلق الموضوع
بعدين عرفت أنه اذا وصل 1000 رد يعني خلاص يغلق
ليت ذاك الزمان يعود يوما حتى صفحة الردود ما جايات
-
12/09/2017 08:46 AM #11
ادري انه ما شي منه @ليث الصحراء
كيف احوال فيصل .. المهم علمه قيادة السيكل
حفظكم الرحمن
-
12/09/2017 08:53 AM #12محظور
- تاريخ الانضمام
- 12/04/2016
- الجنس
- ذكر
- المشاركات
- 1,270
ذكريات السيكل ...
الوالد الله يبارك ف عمره ويمد لنا في صحته ... ما يرضى نشتري سيكل .. عاد إحنا كيف الطريقة عشان نشتري السيكل ..
سبحان الله أنا وأخي إشترينا السيكل بنفس الطريقة ..
كانت معنا مدرسة لتعليم وتحفيظ القرآن الكريم .. وفي الصيف تقام مسابقة لتحفيظ القرآن الكريم تحت إشراف وزارة الأوقاف
اللي حافظ جزء له 15 ريال واللي حافظ جزئين له 30 ريال وهكذا ...
في يوم التسميع للحفظة أخذنا معلم القرآن الكريم في الباص إلى مقر وزارة الأوقاف في مسقط .. الحمد لله أنا كنت حافظ جزئين وعطوني مبلغ 30 ريال
طبعا مشروع شراء السيكل هوه الهدف الأساسي من الحفظ
بعد ما رجعنا على طول ذهبت الى السوق واشتريت السيكل .. طبعا والدي لم يعارض لأني اشتريته على حسابي
وأخي الأكبر إشترى سيكل بنفس الطريقة من خلال حفظه للقرآن الكريم .
ذكريات لا تنسى .
-
12/09/2017 08:53 AM #13محظور
- تاريخ الانضمام
- 12/04/2016
- الجنس
- ذكر
- المشاركات
- 1,270
ذكريات السيكل ...
الوالد الله يبارك ف عمره ويمد لنا في صحته ... ما يرضى نشتري سيكل .. عاد إحنا كيف الطريقة عشان نشتري السيكل ..
سبحان الله أنا وأخي إشترينا السيكل بنفس الطريقة ..
كانت معنا مدرسة لتعليم وتحفيظ القرآن الكريم .. وفي الصيف تقام مسابقة لتحفيظ القرآن الكريم تحت إشراف وزارة الأوقاف
اللي حافظ جزء له 15 ريال واللي حافظ جزئين له 30 ريال وهكذا ...
في يوم التسميع للحفظة أخذنا معلم القرآن الكريم في الباص إلى مقر وزارة الأوقاف في مسقط .. الحمد لله أنا كنت حافظ جزئين وعطوني مبلغ 30 ريال
طبعا مشروع شراء السيكل هوه الهدف الأساسي من الحفظ
بعد ما رجعنا على طول ذهبت الى السوق واشتريت السيكل .. طبعا والدي لم يعارض لأني اشتريته على حسابي
وأخي الأكبر إشترى سيكل بنفس الطريقة من خلال حفظه للقرآن الكريم .
من إشتريت السيكل أولاد الحلة كلهم وين ما أروح وراي ..
وكل واحد منهم يريد يسوق السيكل مسافة معينة ( يضرب لفة ) يدفع لي 50 بيسة .. إستثمار منذ الصغر
ذكريات جميلة لا تنسى .
-
ماشاءالله محتفظ بذكريات اخينا @ليث الصحراء
رايك كذا
-
ماشاءالله @منبع الخيرات
والله شيء جميل عليكم افكارجميله وبلفعل هذا ذكريات ترتسم في الذهون على عكس جيلنا حاليا مارسوا طفولتهم بعيده عن ذكريات هذا لذلك مااتوقع عاشوا بطعم الطفوله اللي احنا عشنها
-
ماشاءالله @منبع الخيرات
والله شيء جميل عليكم افكارجميله وبلفعل هذا ذكريات ترتسم في الذهون على عكس جيلنا حاليا مارسوا طفولتهم بعيده عن ذكريات هذا لذلك مااتوقع عاشوا بطعم الطفوله اللي احنا عشنها
-
12/09/2017 10:24 AM #17عضو نشيط
- تاريخ الانضمام
- 11/09/2011
- الجنس
- أنثى
- المشاركات
- 146
السيكل وما أدراك ما السيكل.
ألا ليت الزمان يعود يوماً
شكرا ع الطرح الغاوي
مفروض توزع سواكل نحوط بهن طشه ف السبلة
-
12/09/2017 10:39 AM #18
اذا وصل الالف .. دقه بحظر هذا بو اعرفه عنكم
@ليث الصحراء
زين ترجعو الزمان وتقضو ع الموضوع ترا التخميس يعتبر نوع من انواع رياضه
-
12/09/2017 10:41 AM #19
-
12/09/2017 11:09 AM #20السلام عليكم ورحمة الله وبركاته
بالمقدمه قلت أنكم تتغدوا وتدقوها رقده للمغرب
نزين وين صلاة العصر هنا؟؟!!
بالنسبه للسياكل ما سقت نفس مال الهنود واللي بالصوره
كان أبوي يجيبلي سياكل كيوتات وأولاد عمي وبناتهم يضيعوهن عني!!
شكرآ على الموضوع مشرفنا السابق..
-
12/09/2017 11:14 AM #21عضو عميد
- تاريخ الانضمام
- 28/03/2012
- الجنس
- أنثى
- المشاركات
- 26,676
يوم كنا صغار الوالد يشتريلنا سياكل
بس كنا ف البيت حتى ف الخوش نادرا نطلعبه
جالي شفت اختي تسوي تايرة مال السيكل ف الدرج الخارجي
كم مره تسويه
فقررت انا نوبا اسوي واتذكر الظهر كان قرب صلاة الظهر
وجيت وسويت
وتقندلت من الدرجة
الجلد مال جبهتي انقلع بقى بس تشه
واتذكر الوالد والوالده جلسوا يربطوني بغدفه ف المطبخ
عدت ما اتذكر شيء ودوني المشفى او لا
عدت من ذاك اليوم ما سويت شيء
بس صح
يوم كنت صف ثامن وسابع
واجد احب السيكل وبسببب اختي الدميرة
ف البيت اسوق مال اهوي يوم يكون طالع اما يوكلني
ويوم اروح عند حبرتي اسوق مال خالي سيكل لكبير
ودايما اتقندل واتعور منه
بس ما شيء فايده اسوق يعني اسوق
-
12/09/2017 03:45 PM #22
السلام عليكم. @ليث الصحراء
بو فلوق مسوي موضوع
والله احلى مرحلة كانت مرحلة في الطفولة والمتعة هي سياقة السياكل
بصراحة جربت كل الانواع لاني اسرق مال اخواني ..اول شئ كنت اسوق سيكل بو تايرين كبار وفيهن تواير صغار.. عبارة تتونة ما اعرف اتوازن
بعدين اطورنا وصرنا بو تايرين
سباق عالمزرعة بالسياكل
ايام ياليتها تنعاد
خاصة ماشي شمخ ما جانا في اليد والركب
بس ما يعور ..اهم شئ نلعب
اخبار فيصل
-
13/09/2017 07:48 AM #23
تعرف الغالي حد منهم يحجزو وما يجيو وطيح فظهري وحدي لكن يوم يجيو ويشاركو تزيد عدد المشاهدات والارباح تزيد
لا عاد أحلى شي دبة الصوت اللي نسويها بتقول مكينة هندل ما دراج
أهلا بكم كيف ما شي عزيمة
@NITRO
-
13/09/2017 07:51 AM #24
الحمدلله يسرك الحال أخباره طيبة ولله الحمد
عاد مرحلة السيكل معدي منها عاد تو أعلمه يسوق هارلي
جميعا يا رب
@ابتسامة الشمس
-
13/09/2017 07:54 AM #25
هههههههههههه بصراحه كفو عليكم
أحب الناس المكافحة من صغرها ما مثل بعض الناس يروحو يسرقو من دكان بابوه
ما شي قصة تشميخ تفليع صارتلك مع أحتراف القيادة
@منبع الخيرات
-
13/09/2017 07:55 AM #26
ناوي أوزع آخر السنه خلك متواجدة
بس عليك المحشي
@نكهة جفاء
-
13/09/2017 07:58 AM #27
خلاص ما حد ياخذ دهره ودهر غيره ... هذا دهر مستربغام والطويطر وسنام شاش وراح دهر السبلة مسكينة
ما جالي أحظر حد
@ابتسامة الشمس
-
13/09/2017 08:00 AM #28
نجمع خالوه نجمع
لو أنا من اولاد عمك كنت أشل من سياكلك قطع غيار عشان التفشيرة قدام الشباب
العفو أختينا اسعدني مرورك
@@ بنت صحار @
-
13/09/2017 08:05 AM #29
أهم شي الواحد أول اذا يتعور يسواله كل أنواع الاعشاب والمسكنات جزع وملح وريحان وشخر وقهوه وتيزاب
أتوقع الجرح يصرخ ويقول أسف ما قصدي والله
طلعتي ما سهله افواق ههههه اللي مر بمثل هذي الطفولة لازم يشكر ربه صراحه ..... تو حدهم خرسانين على التابات والاي بادات
@أفواق الوصف
-
13/09/2017 08:11 AM #30
هههههه حسيت عمري فاضي وما معي شغل قلت خليني اشخبط مال ذكرياتي تشه
أكيد كنتي تتفشري وتحولي ترفعي التاير القدامي
صح أهم شي المتعة اذا ما شي تشميخ وتفليع ما ترتسخ الذكريات
الحمدله يسرك حاله يسلم عليكم
@شواطئ الذكريات
مواضيع مشابهه
-
[ تقرير ] [صورة] مراحل تطور أجهزة سامسونج جالكسي اس
بواسطة Scan-Over في القسم: سبلة أخبار التقنيةالردود: 4آخر مشاركة: 14/05/2012, 06:32 PM -
مراحل تطور الخطبة عبر الزمن
بواسطة صدف البحار في القسم: سبلة ترويح القلوبالردود: 119آخر مشاركة: 05/02/2012, 11:29 PM -
الغمارية تروي مراحل تطور المرأة العمانية عبر مسيرة عصر النهضة
بواسطة الوسط العربي في القسم: سبلة السياسة والاقتصادالردود: 5آخر مشاركة: 01/12/2011, 01:59 PM -
[ فيديو ] : مراحل تطور محرك بحث جوجل
بواسطة BlackDisk في القسم: سبلة أخبار التقنيةالردود: 2آخر مشاركة: 30/11/2011, 04:22 PM -
مراحل الانسان في القبر
بواسطة خافق احساس في القسم: السبلة الدينيةالردود: 11آخر مشاركة: 27/12/2010, 06:31 AM