- محرك البحث العام
- المركبات
- الأراضي
- العقارات
- الوظائف
رؤية النتائج 1 إلى 27 من 27
-
أخلاقنآ عنوآن حضآرتنآ ـ الرفق بالحيوآن ـ (الإسبوع الثانـي) ..
بسم الله الرحمن الرحيم
والصلآة والسلآم على أشرف المرسلين ..
أمآ بعد هذآ أول موضوع لي بالترويح وأخر موضوع إن شآء الله
يعني يعتمد على أستقبآلكم لي وحسن ردودكم وكذآ يعني
ـ أبوي والسنآنير ـ
المهم خلينا نبدأ
الله يسلمكم إحنآ نعيش بحآرة السنآنير يتكآثرن تبآركـ الرحمآن :كاشح:
وبآدنآ الخير مع كم سنورة وولادهن وتعرفوآ السنآنير خليط من ملوقية وسموجية
وإنهن مآ يشبعن كله بس نيآو نيآو لو تعطيهن كيلو سمك
الموهيم يعني معنآ أبوي مآ يطيق أبدأ السنورة السمجة كلة يعفطهن(يضربهن ) بحصى وإذآ ماسك عصاه يضربهن به
وعآد إذآ ذاك اليوم كان مزآجة رآيق مآ يسويبهن شي
ومن غير انة يأمر الأحفآد الصغار يلايعوهن ويضربوهن بحصى المهم مآ يشوفهن قدامة
بيوم من الأيآم عصب عليهن البآبآ ووصل حدة من سموجيتهن الزآيدة وقال للأحفآد بو يمسك السنآنير بعطية ريآل ع كل سنورة
شمروآ الأحفاد أيآديهم وخططوآ يسويوآ مصيدة وبصرآحة كنت أرآقبهم وبنفس الوقت أتدعى إن مآ يمسكوا ولا سنور
أرحمهن يآخي ع قولتهم مآحد مدلع السنآنير غيرش ربيعآتي يآخي مآ يهونن عليي ..
حآولوآ الأحفآد يوم يومين وثلاثة وفشلوآ .. من دعواتي المستجآبة عسى دوم مُجابة
وشاف البآبآ مآ شي فايدة من الأحفآد وخطط وحدة يمسك سنور وآحد ع الأقل سوى وعدل ومآ أعرف مو جاب المهم بعد التخطيط مآ شآء الله عليه
سمعنآ السنورة تصيح بالجونية ورابطنهآ وموثقنهآ ومخلينها السنورة من الظهر لحد بعد صلاة العصر بالجونية ـ مآ هانت عليي مع هين تصيح بس مو
أسوي بيتنازع البابا وبيعصب ع تعبة وأنآ مآ يهون عليي بآبآتي ـ كان باغي يوديهآ قريب المركز الصحي تبع البلدة
مال 2 كيلوعن بيتنا عشآن مآ تعرف دربهآ ومآ ترجع صوب البيت ويفتك من وحدة .. وشلهآ بالبيكب وهو مسوي إنجاز وكاشخ وكأنة
يقول بذرة تو مآ فيهآ فايدة حتى سنور مآ قدروآ يمسكوه موعاد نخلة يركبوهآ ويخرفوهآ ..
بعد هالإنجاز كآن خآطري أسألة كيف مسكت السنور بس خفت ع نفسي من القصف والعسف وأنه يجيب القديم والجديد
ويقول مآحد مثلك مدلع السنآنير وتعطيهن أكل وو قلت أبركلي ما أسأله
والريال ع كل سنورة طآرن من يدين الأحفآد وشكلهن جين ع البترول مآل توصيل السنور
ولحد يومكم هذا وهو يقول ياليت لو مآسكنهن كلهن صآرن يولدن ويجيبن ولادهن وتارسآت المكآن
وذلا السنآنير ما مثل سنانير أول حآقيآت(جالسات) إلا تحت المطبخ سنآنير أول يروحن يدورن
أكل وحدهن وذلا بآيآت الرآحة كلة بآيآتنة تحت رجولهن عآد تعرفوآ الشيآب كلامهم كيف وأنآ سآكتة واتكشخ عن
أنق بكلمة وحدة وأروح فيهآ بخبطة غاوية من ذيك العصآ بو تحتة
عموما إخوآنـي وأخوآتـي
الحيوآنآت مثل السنآنير بإعتبآر إني ذكرتهن بالقصة كيف مآ كانن لازم نرفق فيهن وما نعلم أولادنآ إنهم يضربوهن بعصآ
أو بحصى ويجلسوآ يلايعوهن من مكآن لمكآن ومجرد مآ يشوفوهن مآ يخلوهن بحآل سبيلهن ويحبسوهن بجوآني لسآعات طويلة..
ع العكس نعلمهم إن الرفق بالحيوآن وآجب سواء للسنور وغيرة من الحيوآنآت الأليفة . ولازم نعلمهم إن أي أحد قال لهم ضربوهن
بحصى أو عصى أو إنهم يلايعوهن إن هذا السلوك خطأ وإنهم مآ يسمعوآ الكلآم حتى إحنآ الكبآر لزوم نكرم أي حيوآن أليف
بغض النظر عن تصرفآت كبآر السن مثل أبوي الله يحفظه مآ يشوف سنور إلا ضاربنة بحصى أو عصى أو يأمر الصغار يضربوهن
أو يلايعوهن ومن هالقبيل رآح يترسخ فيهم هالشي فمجرد مآ يشوفوهن ع طول يجلسوآ يسويوا السلوكيآت الخأطئة .. *
وعندنآ أقرب مثال المرأه الي حبست السنورة وكآنت تمنعهآ من الأكل والشرآب وسجنتهآ ألين مآتت وبسبب ذلك دخلت النآر ..
بـ النهآية حيوآن أليف كيف مآ كان سمج أو يصيح ومآ يشبع هذاك حيوآن وإكرآمة والإحسآن له وآجب علينآ ومآ نعرف أي
عمل خير وإن كآن أبسطة ممكن يدخلنآ الجنة ..*
الرفق جآء من مفهوم الرحمة والعطف فـ يعني لازم نتحلى بالرحمة سوآء أتجآه إنسآن أو حيوآن والمعآملة باللطف واللين
وآجب على كل مسلم ومسلمة ونعلم أطفالنآ كل سلوكـ فية الخير لهم .*
وتو رمضآن أكرموآ سنآنيركم الأكل فايش
والخير مضآعف أضعآف لا تكونوا حآسدين الحسد يقولوا عنة اوين مآ زين
والسلآم عليكم ورحمة الله وبركآتة
تقبلوآ تحيآتـي زهـرة الإجتمآعية
آخر تحرير بواسطة رياح الصدق : 04/06/2017 الساعة 02:02 PM
-
مادة إعلانية
-
04/06/2017 01:53 PM #2عضو عميد
- تاريخ الانضمام
- 28/03/2012
- الجنس
- أنثى
- المشاركات
- 26,676
وعليكم السلام ورحمة الله وبركاته
اكره اروح بيت حبوتي
من كثر السنانير بو فيه
الغم يوم تجي ف رجولنا
نعم اصرخ فيهن من الفزعه
ومن غير يقمشن الصغار
الرفق بالحيوان واجب علينا
بس يوم يضايقنا نعم مو نسويبهن
-
@شواطئ الذكريات
سويت الموضوع عسى يروق لكم
أول مرة أكتب موضوع ترويحي يعني إنجآز بس مآ أعرفه زين أو شين
-
04/06/2017 01:58 PM #4
السلام عليكم ورحمة الله
السنانير يدخلن صاحبهن الجنة
فايزة ان شاء الله
-
هن صرآحة مو أقولش سمجآت ويقمشن بس مو أنسوي
يعني إن قمشن حد كمثآال مآ نجلس عآد نضربهن ضرب
ونأمر الصغآر يسويولهن هجوم
نليعهن بس بشويش .. نرمي لهن لحم أو دجآج بآقي مآ مبغآي أو فاضل
بأبعد مكآن ويلتهين فية لمآ يآكلن نقس عليهن يعني
اما عن الصغار وحدهم يلايعوهن من مكآن لمكآن وأيبدهم قمشة تأديب
-
وعليكم السلآم ورحمة الله وبركآتة ..
السنآنير كونهن الحيوآن المنتشر بأغلب البيوت
حلو نستغل إكرآمهن بالشي إلي يرجع لنآ بالخير بالمعآملة
الحسنة والرفق فيهن خآصة بعضهن أحيآنآ يكون فيهن عطش وجوع وتو
برمضآن نآدر النآس تسوي أكل طول اليوم عآد بالليل زين حد يعطيهن شي ..*
الفوز بالجنة أسمـى وأجل وكلنآ بالجنة فآيزين بإذن الله
-
04/06/2017 02:03 PM #7
كم جميلة هذه الصفة @روح الزهور
.
السنانير محتلات بيت اهلي من يوم كنا صغار.. وابوي عكس ابوش
يحب السنانير ويهتم فيهن
بس اهم شي ما يدخلن المطبخ او داخل البيت
وامي الله يحفظها تتنازع اذا عطيناهن اكل داخل المطبخ.. تقول عقولهن برع
.
.
في بيتي سنوره والده من قريب سنورين .. ومستظلة تخت اللوماه واولادي كل يوم يلتوهن وانا اتنازع وافهمهم انه مازين
.
.
الرفق بمخلوقات الله من اجمل الصفات
شكرا لك وتعالي كل يوم زورينا وشاركينا بمواضيعك الترويحيه
آخر تحرير بواسطة رياح الصدق : 05/06/2017 الساعة 12:51 AM
-
-
04/06/2017 02:58 PM #9
@روح الزهور
السنانير سالفتهن سالفه
انا بعد لا ادنيهن ولا اطيقهن عاد يوم تدخلي مطبخ وتحصليه وراك
ولكن يعني عاد ما نعقهن ونكفخن كيه بعيد شر انسأل عنهن وسبحان لله
لازم تحصلي ف كل بيت سنور
عاد يوم العيد نخاف ع اللحم من السنانير
-
04/06/2017 05:53 PM #10
حياش الله @روح الزهور
ياخي اشبهبش بوحدة نوبه سماها كما اسمش كل ما اشوفها اقول هذي هي بس نوبه هو روه وزهور اعتقد واتقولي نتيه نوبه تموت فالسنانير
ف جيبي اجرب @روح وزهور
ف هل انتي هي وهي نتيه وامهوه تو؟
نجي للحبكة بو الموضوع
هو حقيقة زمان اول نلايع السنانير ونبغاهن بس يجلسن حيتنا وهن يشردن,تو لازقات فينا لزقة وعدنا نستكايدهن
وللاسف ماكما سنانير اول,كله حياتهن نوم ومايروحن يبحثن عن الاكل وقوت يومهن معتمدات علينا
واذكر مرة وحده فاعي جاي صوب المتبخ,وشافه السنور وراح يمسكه والوالدة تضرب الفاعي والسنور ماسكنه
حقيقة استغربنا من المشهد ف سبحان الله كأنه كان يحمينا ,بس مسكين توفى بعد فترة ذاك السنور
ماعرف موه جاه
وعادن جين سنانير غيرهن
وهذا السنور بو تو اراويش اياه تاررك صوب الباب ومراتا ننساه ونوكيه ,مراتا نفتح الباب فيه بقوة
وهو مايطاخ بس جالس هناك مكانه ولايحس
وفعلا نحن مطالبين بالرفق بالحيوان , وترانا ماخسرانين شي بو يبقى من العظمان ولاتشة لحمة ناطيهن اياه
بدال لايرمى وهن عادن يقومن يتضاربن
هين سنانير اليابان عنا؟
آخر تحرير بواسطة NITRO : 05/06/2017 الساعة 02:35 PM
-
ما شاء. الله الشعب طلع ما يحب السنانير
عكسي انا احبهن .. احيانا ما اطيقهن اذا زعجني اوشمخني
يوم تعرفوهن موجودات ضموا لحمكم ودجاجكم وسمكم والله منكم
هن ع طول يلقفنة
بس اها وتضربوهن بو لقفنة حلال عليهن عآد ما بعد العافيه دواء
@نزف الدموع
-
@NITRO
غاوي السنور لا يكون بو يلقف اللحم مالكم والدجاج. والسمك
-
05/06/2017 12:17 AM #13
صباحك عومة وقاشع
عشان الكلام يواكب المضمون
نورتي الحته
بو تعطي سنانيركم كيلو سمك
انا ما احب الحيوانات
عادي يجلسن ولو قريب مني بس اهم
شئ ما فيه تتش.. لاني اتحسس
زميل اخوي معطي اخوي سنوو شيرازي
واحيده من كم يوم يقول ساير اشتري قفص كتكوت
وداعيه عليه عساك ما تحصل قفص
واجد سنانير نعم.. ياليتهن يجلسن ف قرنه وحده
وبعد الغم يطلعلك نصاص الليالي فجأة..
وما تحسي ع عمرك غير باطتنها صرخة محترمة
بصراحه ف المزرعه محطية لهن نفس البيت مسوتنه من الطابوق
..معدلتنه
واعطيهن اكل وماي كل يوم..
امس مجيوب لحم وسرت اخذ شطفة واعطيهن بس طبعا محد عنده خبر
اعقد صداقة معهن عشان ما ينزقني ويجن تحت رجولي
احسنتِ @روح الزهور
تعالي كل يوم
بالتوفيق
.
-
يالله على الي يتحسس
عب شكلي بسفر سنانيرنا صوبكم ايبين منش كيف التتش
ما شاء الله طلعتي طيبه مسوتلهن بيت بعدش
هذا كله عشان ما يقربن صوبش...لو يفهمن خطتش ما كان شفتيهن
جالسات هناك كانن بيقربن صوبش ويسوين شويه اكشن وتندثر
الصداقه
بس حمدي ربش انهن ما يفهمن
@شواطئ الذكريات
-
05/06/2017 12:47 AM #15
-
يالله سلامتش من حساسية الحقيقة ما بو الدلع
يعجبني يوم يكونن هاديات جالسات اديبات لا يقمشن ولا يصورخن
تجيني رحمه عليهن واعطيهن اكل اول امس مخلصين من صحن السحور
مال العيش وقمت اغسل وعيان وخليت الصحن حالها وامي تتنازع اقولها ِما وحدها ِ
يبغالها اكل تو زيادة بتجيب ولاد قريب .. الين ما شفتها شبعت ما هان عليي اشل
الصحن عنها
ع فكرة لاحظت ع السنانير حاجة حلوة الاطفال الصغار ما يهجمن عليهم
ع العكس يجلسن مكانهن يو طفل يقرب عدالهن ولو يمسكن ذيلهن يكونن هاديات
بعكس لما حد كبير يمر تشوفهن طاشات طشة شويه وايهجمن عليك
اهم شي صغارنا ما يسويبهم شيء
-
@رياح الصدق
السنانير هن المنتشرات ما شاء الله نادر تلاقي بيت ما تزورة سنورة
هاذي هدية ربانية احيانا يكون بيت ما في حيوان مرباي فية فـ السنور
بصفتة حيوان منتشر حلو نرفق فيه ونستغل وجودة لكل خير بدل ما نعلم
اولادنا انه.بلايعوهن ويضاربوهن
مثل اولادنا. الصغار تعلموا من جدهم لو تنازعيهم يعطوش راس اصم
اهم شيء يمسكوا الذيل بس نوبة تجيهم شمخة غاوية ما كل يوم يسلموا منهن
عندنا جارة كبيرة سن بس تحب السنانير لما تطبخ اي شيء تزيد للسنانير من الأكل
وبعد كل وجبة تعطيهن اياة ومن غير العصر باختصار تحب السنانير ومدلعتهن
يوم ادخل البيت احصل سنور نايم بالصالة او جالس متسدح
يجي مع ابوي ايذوقه النوم والتسديحة غاوي بالبيت
واذا طلعت للحوش كم سنور وراها لما حد يضرب الجرس ما شاء الله عليها
كيف محببه السنانير فيها
-
05/06/2017 01:08 PM #18
-
05/06/2017 01:08 PM #19
-
رآحماتنش عن ترجي الحآرة بصريخش
سبحآن ليش مع الأطفآال مآ أعرف عآد
والله رحمة نعم ..
شفتي كيف حتى السنآنير فيهن رحمة ع أطفالنآ
مو عآد أحنا البشر مثل مآ هي تحسن لأطفالنآ خلونآ إحنآ نحسن فيهن
هن وولادهن
@شواطئ الذكريات
-
هآذيك أسمهآ ورد وزهور وأنا روح الزهور مآ أنآ نعم
وتو صآيمة بعدني بآغي تصدق صدق مآ بآغي تصدق أشوش ع سنوركم
يشمخك
أول نحب السنآنير ومآ يحبنآ يشردن عنآ وتو هن لازقآت فينآ
صآر عكس لاه
السنآنير فآيدتهن للفيرآن والأفاعي تحسهن صيآدآت وبنفس الوقت سريعآت البديهه
ع طول يحسن إن كآن فيه فار يخرب أو غول يقترب منآ حمآية 24 سآعة ـ كآنهن ديتول ولايفبوي ـ
تو صحيح سمجآت ومآحد يطيقهن بس أكرآمهن وآجب كيف مآ كآنن وهن فيهن فآيدة صرآحة أحنآ مقابل
فايدتهن نحسن لهن ـ أخذ وعطى يعني ـ
السنآنير يتكاثرن تفقد وآحد يجيك وآحد غيرة يعني مآ نخآف إنه مآ نشوفهن تبآرك الرحمآن
غآوي السنور الله يخليه لكم جآالس حآرس حآالكم مع البآب
الرفق مطلوب منا إحنآ الكبآر ونعلم الصغأر صفه جميلة تهب فيك الرحمة والعطف ع الحيوآن @NITRO
-
05/06/2017 11:27 PM #22
-
أعرفهآ لإني متآبعة الترويح من سنة 2012
والشي الثآنـي حد أتهمني ع إنهآ أنآ مثلك إلحين فـ يعني أعرفهآ
انآ أحبهن صح بس مآ لدرجة أربيهن بالبيت أبوي مآ يخليني
وإحبهن لإني مسمآية السنورة يوم صغيرة من قبل أحد شيوخ البلدة بو سآكنة فيهآ
مآ ينآديني غير السنورة والسنورة وحبيتهن وعقدت علاقة صدآقة
أهتمآم وكذآ يعني
هي إلي أحيدهآ معهآ سنآنير مدلعتهن وتسويلهن أشرطة وتدخلهن البيت
يعني مآ أنآ يسدكم إتهآمآت يآخي ..
تكآثرهن عجيب وحلو ومفيد يجب إستغلالة
أهم شي عطوهن الفاضل من ألأكل @NITRO
-
06/06/2017 03:32 AM #24
السلام عليكم
بالفعل وجب الرفق بالحيوان
تو صحيح القطط متواجده ووجب اكرامها وما نزعقها
موضوع جميل ابدعتي
-
06/06/2017 10:21 AM #25
السنور العماني شري مامثل السنانير الشيرازيه
-
-
08/07/2017 08:18 PM #27
يرفع للفائدة
تكرسو
مواضيع مشابهه
-
التسجيـل للفـرز الثانـي
بواسطة منبع الطيبة في القسم: سبلة التعليم والأنشطة التربويةالردود: 1آخر مشاركة: 03/09/2014, 10:45 PM -
بدون عنوآن :/
بواسطة صنم مرتاح في القسم: سبلة ترويح القلوبالردود: 28آخر مشاركة: 04/03/2014, 04:40 PM -
الحب عنوآن عنــــد .........
بواسطة Izoo في القسم: سبلة التصوير الضوئي والتصميم والخطوطالردود: 15آخر مشاركة: 28/04/2013, 11:01 AM