السلام عليكم
الاطفال يعتبروا بهجة هذه الحياة وزينتها
وكل بيت بدون طفل يكون كئيب
طبعا سوالف الاطفال كثيرة و معظمها مضحكة
اليوم راح اشارككم بعض من مواقف و سوالف اطفال عائلتنا
الموقف الاول:
اخوي الصغير اسمه احمد جاي يسألني و يقول يصير انا اتزوج رحاب( رحاب تكون اختي الصغيرة بعد بس اكبر من احمد)؟
قلتله لا قالي ليش انا اريد اتزوج رحاب وكان مصر انه يتزوجها سمعته رحاب وقالت انا ما اريد اتزوجك
رد احمد: ما كيفش اتزوجش يعني اتزوجش

الموقف الثاني
حفيدة عمتي تقول لامها ليش ما اشترتي طفل صغير من اللولو ؟
الام قالت ما حصلنا الي احنا نريده هناك
سمعتها بنت خالتها و قالت : لا تروح اللولو روحوا سفير يبعوا اطفال واجد
نحن اشترينا اخوي من سفير

الموقف الثالث
بنت خالي لما كان عمرها سنه مستحيل تخلي اي ولد يحملها او يلاعبها الا ابوها
لما كبرت شوي( سنتين و نص) صارت طابقة في الشباب لما سألناها عن السبب قالت:
البنات ما يودوني الدكان لكن الاولاد يودوني و يشتريولي كل الي اريده
(طلعت مصلجية درجة اولى)

الموقف الاخير
كنت مجمعه اخواني و اولاد خالي في الغرفة عشان يناموا
قلت كل واحد فيكم يختار المكان الي يريده يوم ارجع ابى اشوفكم في الفراش
طلعت شوي عنهم لما رجعت حصلت بنت خالي نايمة مع اخوي في نفس السرير
وولد خالي نايم مع بنت خالتي في نفس السرير و حاطين حوجز بينهم
لما سألت عن السبب قالوا نحن متزوجين و المتزوجين يناموا في نفس الكرفاية
ساعتها ما عرفت ايش ارد عليهم غير ان فرقت بينهم بالقوة و بدون ما اعطيهم الاسباب

فيه طفله كل ما تشوف احد يصيح تقول سالي (شكلها مرة متأثرة بسالي )
ومره طفل جمع كلمة رجال الى رجالات و هندي الى هنودين للمثنى و هنادي للجمع


هذي مواقف اطفالنا والحين كل واحد يقول مواقف اطافلهم الكوميدية