- محرك البحث العام
- المركبات
- الأراضي
- العقارات
- الوظائف
رؤية النتائج 1 إلى 30 من 51
الموضوع: الاكلات العمانية الشعبية
-
01/03/2012 01:10 AM #1خاطر
- تاريخ الانضمام
- 09/02/2012
- الجنس
- أنثى
- المشاركات
- 11
الاكلات العمانية الشعبية
صباح الخير صبايا
الاكلات العمانية الشعبية واللي غالبية البنات صارن ما يعرفن يطبخنها
اصلا ما يعرفن الطبخ كلش . ,,,,,,,,, بس عسى يطيحلهن ازواج يخلوهن غصبا عنهن يطبخن
موضوعي يا أخواتي الحلوات تعرفن تطبخن الاكلات الشعبية مثل العرسية والهريس والمصانف والخبز العماني
ولا
انتظر ردودكن مع الاكلات الي تعوفن تطبخهن وقصتك مع الطبخة .
-
مادة إعلانية
-
01/03/2012 01:17 AM #2عضو مميز
- تاريخ الانضمام
- 16/06/2011
- الجنس
- أنثى
- المشاركات
- 4,902
موضوع حلو...بس مثل ما قلتي الاغلب منا فاشل من هذه الناحية للاسف!!!
المفروض نكون عكس ذلك..رغم ان في بنات ماشالله يعرفن يطبخن بعض هالاكلات...
عن نفسي اعرف الكوتين(المضروبة) +خبز جاباتي+بيض طماط+ شاي كرك+عيش ميش!!! بعد مكبوس+قبولي+
الحمدلله (نعمة) احسن من ماشي...
-
01/03/2012 01:22 AM #3
يعني شوي شوي
بس الخبز ما اعرف ومستحيل اتعلم اخاف احترق
-
01/03/2012 10:30 AM #4موضوع حلووو ،،، وفــ بالي انزله من فترة بس مو ملحقة
أكلاتنا الشعبية تعتبر جزء من موروثنا والمفروض نحافظ عليه من الإندثار ،،،
وشخصيا الحمد لله أتقن معظم الأكلات الشعبية مع بعض الإضافات الخاصة ،،،
شوي وبنزل لكم اللي أعرفه
-
01/03/2012 10:32 AM #5من مطبخي الخاص
ْْ عرسية دجاج مع الترشة ْْْ
العرسية طبق خفيف ينفع كغدا وكعشا ،،،
والناس اللي يقولون ثقيلة عالعشا بالعكس فــ هي خفيفة خاصة لو أكلتوها من وقت شوية وما خليتوها لآخر الليل
مقادير العرسية :
- كالعادة كوبين عيش مغسول قبل الطبخ بساعه عالأقل
- هيل وقرفه ناعم من كل شيء نص ملعقة صغيرة
- مكعب ماجي
- زبدة وملح حسب الرغبة
- ماي والمقياس ما أقدر أحدده لأنه يعتمد على نوعية العيش اللي عندك لأن في انواع تحتاج لكمية كبيرة
الطريقة :
- تسلقي الدجاج وبعد ما يبدأ يطلع ريم تشيليه وعجبها تضيفي الهيل والقرفة والملح والماجي
- بعد ثلث ساعه طلعي الدجاج وفتتيه وضيفي العيش لماي سلق الدجاج وعاد خليه عالنار لين ما ينضرب
وكل ما حسيتي حبات العيش بعدها ضيفي لها ماي مع ملاحظة إن النار لازم تكون هااااااادية وتحركي العرسية بين فترة وفترة
بالإضافة إلى غنك لما تضربي العرسية وقت الطبخ يساعد على إنها تجهز بسرعه
- لما تحسي إن العرسية جهزة ضيفي لها زبدة وضربيها مرة ثانية ووقت التقديم ممكن تتدهني سطح العرسية بالزبدة بعد
الترشة
المقادير :
سكر
زبيب مضروب فالخلاط
بطاطس مسلوق ومهروس
تمر هندي (صبار)
ثوم مع فلفل احمر وبهار عماني
طماطم صلصة
علبة حمص
لحم او دجاج أو كبده
الطريقة
نذوب السكر على نار هاديه ،، وبعدها نضيف له ماي وراح نلاحظ تكتل السكر بس عادي راح يذوب على الحرارة
بعد ما يذوب السكر فالماي نضيف له الثوم المخلوط مع البهارات + صلصلة الطماط
بعد ما يتمازجوا نضيف الزبيب المضروب فالخلاط ،،، وبعدها باقي المكونات بالتدريج
وعاد نخليهم على نار هادية ونتحكم ف غلظه حسب الرغبه
-
01/03/2012 10:36 AM #6من مطبخي الخاص
" الهريس العجيب "
المقادير
- كوب ونص حب هريس
- دجاجة ( انا إستخدمت حجم 1200 جرام ) ويطلع الهريس متماسك أكثر وطعمه ألذ
- ربع ملعقة صغيرة هيل - قرفه - سنوت مطحون
- سمن مقشود ( يفضل المقشود العماني )
- حبتين طماط
- ماي ( بدون تحديد )
- ملح حسب الرغبة
- فنجان رز
الطريقة
- نغسل الحب وننقعه في الماي مدة من ساعتين إلى 4 ساعات
- نقطع الدجاج ونغسله ونسلقه ،،، وأول ما يبدأ يغلي نضيف حب الهريس عليه
- نخلي الطبخة على النار مدة ساعة ونص مع مراعاة إن النار تكون هاااادية ونحركها بين فترة وفترة عسب ما يحترق وطبعا ما ننسى الماي
نضيفه كل فترة وفترة وكل ما حسينا إن الهريس بعده ما منطبخ ،،،
- الدجاج مع الوقت راح يتفتت بروحه ،،، ف ما لازم تطلعوه وتفتتوه وتعبون عماركم
- خلال هالفترة وبعد جوالي ساعة نضيف الرز واللي لازم يكون مغسول ومنقوع في ماي ( الهدف من إضافته هو تماسك الهريس )
- بعد الساعه ونص نضيف الطماط ونرجع نحرك الطبخة
- بعد ما نحس إن الهريس أصبح متماسك نضيف البهارات والسمن ،،، وبعد 10 دقائق نطفي على الهريس ونبدأ نضربه ضرب مبرح
وبالهنا والعافية
السر في وصفتي هاذي هي الطماط والسنوت
جربوه وإدعوا لي
-
01/03/2012 10:41 AM #7من مطبخي الخاص
ْْ المصانف ْْْ
مقادير العجين :
2 كاس طحين
كاس ماي
ذرة ملح
الطريقة
نخلط مقادير العجين مع بعض لغاية ما نحصل على عجينة قريبة من عجينة خبز الرخال ،،
ونكون مجهزين الحشوة اللي نبي ،،،سواء بالدجاج أو اللحم وممكن بالتونه
نجيب التاوه " الطوبج " ونخليه يسخن ،،،
ناخذ شوي من العجين ونفرده في كف اليد ونحط شوي من الحشوه فيه ونسكرها
نحطها فالتاوه ،،، ونستمر نسوي نفس الطريقة مع البقيه لغاية ما تملى التاوه
نقلب المصانف على الجهة الثانية ونضغط عليها بالملعقة اللي نقلبها فيه ونسوي له شوية سمن
ونرجع نقلبها مرة ثانية لغاية ما تستوي ...
-
01/03/2012 11:25 AM #8
الحمدلله رب العالمين انا اعرف اسوي الاكلات الشعبيه أكثر من الاكلات الثانيه المقبلات وتوابعها
-
01/03/2012 11:55 AM #9
ياحظكم والله
نفسي أكون فنانة ف الأكلات الشعبية بس ماشي فايدة
يعني لما أبا أسوي طبخة مثلا " مكبوس " أو " مرق دجاج ، مرق سمك ..... " لازم تكون عندي أمي تقولي سوي كذا وسوي كذا
ماأحفظ وحدي ماعرف ليش
الخبز العماني والهريس والعرسية هذولا من سابع المستحيلات اسويهم لأني ماعرف فيهم شي أبدا
يعني فالحة أكثر شي ف المعجنات والحلويات
-
01/03/2012 01:06 PM #10
ما شاء الله عليج غلاي عندك نفس في طبخ
طيب شو رايك تعملينا كورس في طبخ يوم يكون عندك اجازة اكيد في بنات في سبلة بيشاتركو انا وحدة منهم طبعاً
والله تكسبي فينا اجر غلاي يعني تحدديلنا شو نعمل من طبخة اليوم وتخبرينا بالمقادير وكل بنات يلي مشاركين يجيبو حاجه من مقادير
علشان ما يكون كل شي عليج
ها شو رايك نقول تم ولا
-
01/03/2012 01:18 PM #11خاطر
- تاريخ الانضمام
- 09/02/2012
- الجنس
- أنثى
- المشاركات
- 11
ماشاء الله على غلاي
والله يا بختك في الاكل عليكي نفس حلو كثير جدا جدا
انا اعرف اسوي المصانف واعرف الخبز العماني مع والشباتي بعد
بعد العرسية والهريس لسه ما اتقنتنهن
بس اختي غلاي راح اخذ طريقتك واجرب وربي يوفقك
-
01/03/2012 03:14 PM #12
انا زمان كنت ماعرف بس الضروف اجبرتني تزوجت وانا شاطرة في البيتزا والكيكة بس زوجي ماشبعته الكيكة!!!!!!!
قال وين العيش وين المرق وين الخبز؟؟؟؟؟؟؟
قام هو يخبص مقادير وانا اخبص معه
وشوي ابحث وشوي اشوف امي وشوي عمتي وشوي قريبتي واثابر واجتهد
لان ابوي كان مايحبني ادخل المطبخ بس مذاكرة كان يحب يشوفنا دوم متفوقين بدراستنا
كنت ادخل المطبخ بدون مايعرف عشان كذا مااتقنت الطبخ
بس الحمدلله حاليا اعرف اكلات زمان واكلات تو
اعرف رخال وخبز عماني وشواب
واعرف قبولي وبرياني ومعكوسة
واعرف عرسية وهريس
وعاد نتذكر ايام العيش المالح والدجاج المحروق والمرق المقرمشة ونضحك والحمدلله على نعمة
-
01/03/2012 06:43 PM #13عضو مميز
- تاريخ الانضمام
- 08/02/2010
- الجنس
- أنثى
- المشاركات
- 1,297
انا اعرف اطبخ الحمدلله والكل يحب طبخي بس ما عرف اخبز مع ان زوجي يحب الخبز العماني
ويحب العوال عاد تعلمت اسوي معصور عوال
وبعدني ماعرف اخبز وهو عادي طبعا مطنش اهم شي العوال ع قولته
-
01/03/2012 08:18 PM #14
الحمدلله كل الا كلات الشعبيه أعرفها
-
02/03/2012 08:22 AM #15
يبغاااااااالكن حد يسوي لكن كورسااااااااااات في الطبخ الشعبي
أستغرب أغلب البناااااات يقولن نفزع نخبز أيحترقن يدينا وصعب وما أعرف شو بالعكس ما بااااغي شئ بس يحتااااااااج ممارسة وعاااااااادي بسيط
وأحلا عن الروتي
-
03/03/2012 12:02 PM #16عضو نشيط
- تاريخ الانضمام
- 03/03/2008
- الجنس
- أنثى
- المشاركات
- 402
ابوي نعرف نسوي كل شي حتى انا ممكن اطبخ ذبيحه كامله وما عندي مشكله ولما يجيوا ضيوف عند زوجي مستحيل يجيب اكل من المطعم
ما يريد اكل جاهز ولما يكون موجود ف البيت كل يوم اخبز خبز رخال مع سمن عماني
وبعد لا تنسين الفندال مع الحليب او البوبر مع الحليب ولما ياكل مع الخبز العماني ما تشبعى منه
واي وحده تريد مساعده انا جاهزه ف الخدمه
-
03/03/2012 12:21 PM #17
انا اليوم امي بتعلمني طريقه المصانف
-
03/03/2012 01:27 PM #18خاطر
- تاريخ الانضمام
- 26/05/2011
- الجنس
- أنثى
- المشاركات
- 29
غلاي حبييتي ممكن توصفيلي زين طريقة المصانف او المصائف اول مره اشوفها
-
03/03/2012 01:49 PM #19
مرحبااااااا..:
الله يخلي أمي الغاليه علمتني الطبخ الله يعطيه العافيه.
-
03/03/2012 03:39 PM #20
-
03/03/2012 05:01 PM #21
بالعكس اشوف اغلبنا احنا البنات تعلم في بداية الاكلات عمانية من ايدي امهاتنا ...
يمكن شوي يجنا صعب الخبز العماني والرخال ...
والهريس والعرسيه الانهن اغلب شي مرتبطات بالمناسبات ...
-
03/03/2012 05:12 PM #22عضو مميز جداً
- تاريخ الانضمام
- 19/09/2010
- الجنس
- أنثى
- المشاركات
- 8,024
انا نفسي ومنى عيني اتعلم الخبز حاولت كذا مره بس من اهيس الطوبج حار ارفع واحترقت كم مره فاصابعي
يقولو التكرار يعلم الشطار بس انا فاشله
العرسيه والهريس ماتعلمتهن
بس الباقي العيوش اعرفلهن
والمعجنات اعتمد ع عجينه الكنز واسوي طبخات من النت
احب اطبخ بس شغلي من الصبح لمغرب ميخلي عندي وقت ابدا
-
أعرف كل شي أسوي فالطبخ إلا الخبز العماني حاولت أتعلمه بس ما عرفت
-
03/03/2012 09:12 PM #24
-
04/03/2012 11:08 AM #25
الخبز العماني احلى شي
احكر وطشيه شوية سمنه
يا الله حلاته
الله يرحم امي ما خلت شي ما علمتنا ياه
-
04/03/2012 11:15 AM #26
أعرف أسوي عيوش و مصانف
الهريس أعرف طريقته بس ما جالي جربت أسويها
الخبز العماني أعرف أسويه و أحلى شي تعلمته بصراحة البدايات صح بتكون صعبة شوي
بس واااجد ممتع و حلو
-
25/10/2013 09:43 AM #27خاطر
- تاريخ الانضمام
- 12/06/2011
- الجنس
- أنثى
- المشاركات
- 23
كيف يسوا مكبوس لحم؟
-
25/10/2013 12:41 PM #28
اعرف اسوي عرسية ومسوية ف العيد تقريبا ربع مرجل وحدي ..
وهريس جربت كم مرة وشوربه حب واخبز اعرف بس ما واجد ههههههه .وخبز وعسل وقروص ومبصلات ومضروبة وفته وثريد..كله اعرفه مال قبل والحين..
-
25/10/2013 11:15 PM #29عضو مميز
- تاريخ الانضمام
- 08/07/2008
- الجنس
- أنثى
- المشاركات
- 1,719
انا اعرف اكل كل الاكلاتنا الشعبية
-
26/10/2013 02:42 PM #30عضو مميز
- تاريخ الانضمام
- 18/05/2010
- الجنس
- أنثى
- المشاركات
- 3,035
حرام تظلمينا نعرف نطبخ
انا هريس وعرسيه للاكانه معرف وخاطري اجرب هريس
بس طبخ اعرف اطبخ
مواضيع مشابهه
-
المقشود الجعلاني اكلة من الاكلات العمانية
بواسطة من اولاد شمس في القسم: السبلة العامةالردود: 140آخر مشاركة: 22/11/2011, 11:30 PM -
الي يحب التصوير - دعوة لحضور مناسبة عرض للخيول العمانية والفرق الشعبية
بواسطة انسان راقي في القسم: سبلة التصوير الضوئي والتصميم والخطوطالردود: 5آخر مشاركة: 30/07/2011, 01:16 PM -
بنك مسقط يفتتح المقر الرئيسي على أنغام الفنون الشعبية وصهيل الخيول العمانية
بواسطة rsaleh في القسم: السبلة العامةالردود: 26آخر مشاركة: 16/12/2010, 01:32 AM