صباح الورد: معلومات دقيقه للأنتقال من لنكاوي - بنانج ومن بنانج - كامرون في ماليزيا تحياتي لكم

[خندق مسقط]

مناظر وموسيقى من "بيروو" في أمريكا الاتينيه


خلوني أقول
السلام عليكم ورحمة الله وبركاته
وصباحكم ورد..وزهور
وسعاده يارب



البعض منا يسافر لأول مره الى ماليزيا..وما يعرف أيش يسوي..وكيف يتصرف..وهل فيه طريقه مثاليه..وحد مجربنها
يود لو حد يساعده..أو يتصل بصديق وعزيز

لا تخافوا..انتم أعزاء على قلبي..وبدونكم الحياه ما حلوه أبدا

بالنسبه الى جزيرة لنكاوي

طبعا فيه ناس تحبها وتعشقها الى درجة الغرام..انا واحد منهم
مستعد أكتب فيها روايات وقصص جميله
عقوني في هذه الجزيره من الطائره..وبجلس فيها شهر.شهرين.سنه..10 سنوات..مثل ما يقولوا الهنود..مافي مشكله..بس أهم شي طرشوا لي فلوس

الجزيره كبيره وفي داخلها 99 جزيره...وهي أكبر من مملكة البحرين يمكن ب 3 الى 5 مرات..والله أعلم

اللي يحب الأكل..أنصحه بالذهاب الى هذا المطعم التايلندي الرائع جدا..وياكل سمك بالبخار أو ربيان مع الخضار..مع شوربة "التم يم"









سمك على البخار..بالطريقه التايلنديه




الأنتقال..من والى الجزيره بتم عبر البحر وعبر الطيران,,,وهي محاطه ببحر "اندمان" قرب تايلتند..وأيضا ب جزيرة برليس..وكوالا كيداه..وعلى بعد مسافة ساعتين تقريبا تتواجد جزيرة بنانج



من تجاربي الشخصيه..للأستمتاع..يفضل أن يزور الأشخاص جزيرة بنانج
لشهر العسل 4 ليالي تكفي
للعزاب..حسب ميوله.وثقافته وجيبه

أنصحكم لا تبخلوا على نفسكم..شلوا فلوس كفايه..وأعطوا زوجاتكم فلوس..وريحوا الأطفال..ولا تبخلوا على اي شخص في العايله...موه فايده الفلوس مدعايه في البنوك

للكتاب والمصورين..ومحبي الطبيبعه...أسبوع أو أسبوعين..أنا واحد منهم







عشان تنتقل من كوالمبور..يفضل تاخذ طيران "اير أسيا" الرخيص..أو الخطوط الماليزيه..وهي رحله لمدة ساعه..وهي رحله أقتصاديه جدا

رحلة الباص مكلفه ومتعبه..وغير مجديه أبدا..تصور تشل شنط..وعندك أطفال..وهذا ظهره يعوره..وهذه تصرخ..وهذا يريد أكل..في النهاية بتقول الشيمه..ما بروح لا لنكاوي ولا غيرها..جلسوا على الغربي في نزوى..ولا حرارة البريمي ولا رطوية قريات...يالله رحمهم شويه..انت قلبك طيب...عشان خاطري الحبيب

لكن..شخصيا..أود ان أقترح للجميع..أن ياخذ وقته ويجلس في لنكاوي شوي..ويرتاح من زحمة المدن...طبعا الحريم يعجبنهن التسوق..في لنكاوي فيه 3 مراكز تسوق بسيطه...بس جيده...واحد منهن في قرية "كواه تاون"..مركز بسيط..وجميل..وخفيف على القلب

بالنسبه للأنتقال من لنكاوي الى جزيرة بنانج..أفضل طريقه هي الطائره بكل تأكيد..لكن هذه الطريقه تقليديه وكلاسكيه..انا ما أحبها أبدا

أحب أتعب نفسي وأتعرف على الناس..وأقاوم الظروف..فافضل طريقه تاخذ عباره الى مرفأ "كوالا كيداه" مسافة ساعه وربع عبر البحر..مناظر جميله جدا خصوصا لما تركب في الطابق العلوي..يسمى المرفا kuala kedah jetty

هذه السفينه والعباره اللي تشلوكم الى كوالا كيداه على بعد ساعتين من جزيرة بنانج..بس يعرف فلم في العباره.بس شلوا معكم شيبس وعصاير..ومكسرات وشويه ماي..وريحوا عماركم..الكرسي مكتوب على التذكره..والتذاكر رخيصه.يمكن 4 ريالات فقط..لو عمان ب 20 ريال..وجلس في الشمس حرص يلين حد يجيك...والهنود يضاروك على الكراسي وكل ساعه يدحروا عيونهم...الشيمه..المره الجايه ما أركب عبارة مصيره..أحسن أروح لنكاوي..أطلع من سيح الخضراء في البريمي..ولا من ربشة الحيل الجنوبيه...وعاد ذك أصوات تخميس سمايل...الشيمه..أحسن اروح بنانج..على الأقل تضربني ذك الهبوبه الغاويه

خليني "اتخرس" في ذاك المطر الغاوي..على الأقل أجيب قوطي أجمع مياه المطر





أول 10 دقايق..اذا فيه موج..تبدا تتحرك العباره..تجلس تمسك في الكرسي..وتقرا أيات وسور صغيره..تحسب نفسك خلاص رايح فيها..وتقول سامحوني..بريوني..وما أعود مره ثانيه أجي لنكاوي..طبعا هذا تفكير العجايز...لكن نحن شباب..متحمسين جدا..والرحله فهيا سلامه..وفيها 3 مهندسين..وقبطان..وفيها gps يكشف السفن..انت ركبت من القبطان وأعرف هذه التفاصيل

عذرا..لازم أخبركم شي...نظافة دورات المياه في العباره لاباس فيها...والنتبهوا على ركوب العباره...وأذا معاكم أطفال أنتبهوا عليكم..ومافيه داعي لأستخدام الأحذيه اللي طيح..قد يكون الجو ممطر في الخارج مثلا..وأعتقد من المناسب أن تصلوا الى مرفا لنكاوي في حدود الساعه 12..تصليوا وتتغديوا في مطعم |كيني روجرز"..خذوا دجاج مع البهارات ..وتستخدموا دورات المياره في داخل مركز بيع التذاكر



عند الوصول الى كوالا كيداه..عباره عن مدينه متكامله فيها مرفأ..الأن وصلوتوا بالسلامه الى مرفا كوالكيداه..لا تتسرعوا..خلي الماليزين يخصلوا ويطلعوا..وانتوا على مهلكم..طلعوا من العباره..اذا تريدوا حد يساعدكم..فيه حماليه..ناس تساعد..اعطيهم 20 رنجت..ويوصلوا لكم الشنط الى التكاسي برع

بتحصلوا صفة تكاسي..خبروهم تريدوا تروحوا بنانج وأعطوهم الموقع...بس ركزا عاى نوعية التكاسي..يفضل يكون تكسي زين...وشوفوا على وجهه السائق..اذا شفتوه حبوب..وطيب ومبتسم خذوه..بس اذا شفتوه وجهه غير مبتسم...وشويه قاسي في التعامل..لا تاخذوه.بينكد عليهم الرحله
وأتفقوا معه عن السعر..عادة السعر في حدود 250 الى 300 رنجت (عن كل المسافرين) والباص ل 7 أشخاص من 400 رنجت..وقفوه فيه الشارع خبرهوه تريدوا كنتاكي ولا مكدونالد...وتكلموا معه (ابا كبار..كبر بايه...دري مناه؟ داري أومان)...بالماليزي..كيف حالك..الحمد لله بخير..من وين انت؟ من عمان...

لأ أنصحكم بأخذ عباره من لنكاوي الى بنانج مباشرة..بطيئه..ومسافتها ساعتين..

طبعا..أنتبهوا...هناك زحمه شديده بين الساعه 4 الى 6 مساء على جسر بنانج..حاولوا تكون في الشارع قبل هذه الفتره تجنيا للأزدحام

الجسر طويل..على ما أظن 15 كيلو متر..لكن أصبح الأن مزدوج..وقوي جدا..لم تؤثر عليه موجات سونامي





بالنسبه للرحله من بنانج الى مرتفعات كامرون



المسافه تقريبا في حدود 4 ساعات ونصف في أتجاه مدينة "ايبوه" لمسافة ساعتين ونصف..وبعدها عن طريق مخرج 137 صعودا الى مرتفعات كامرون

بس حبيت أقترح لكم..تطلعوا من الفندق في حدود 12 الظهر..تاخذوا الباص السياحي الخاص أذا كان عدككم أكثر من 4 أشخاص..وفي الطريق تتغدوا..وتستعملوا دورات مياه وتصليوا..وتاذخوا عصاير وشيبس وبسكوت وماي قبل مخرج 137 لأن المرتفعات مافيه دورات مياه ولا محلات

طبعا..لازم أخبركم...مرتفعات كامرون جميله جدا..بس بعد الساعه 6 مساء ما ينصح الشخص يسوق السياره وهو طالع أو نازل منها..ضباب..والشارع مافيه ليتات..وقد تنعدم الرؤيه..وممكن تتواجد بعض الحيوانات في الشارع

بالنسبه للصعود من كوالمبور الى كارمون..هناك طريق قديم عبر مخرج "تاباه" لكن الشارع فيه لفات كثيره..والحريم يتعبن في الشارع وكذلك الأطفال..بس فيه دواء يمنع "دوران الراس"

أي الحل؟

تتفقوا مع السايق يروح عن طريق اطول شوي بمسافة 45 كيلو..عن مخرج 137
وبعدها تصعد بأتجاه كامرون...لمسافه ساعه وربع..وتشوف لافته على اليمين تخبرك انك انت الأن في "النهر الأزرق" وأن فندق أكوا توريل يبعد على مسافة 30 دقيقه تقريبا





شكرا لكم جميعا

رحله سعيده

[ahmed1111]

يشرفني أكون أول شخص يرد عليك أخ "خندق مسقط"

يعطيك العافيه على هالمعلومات المفيده

بس حبيت اوضح نقطه انه العباره شوي مزعجه خصوصا في الطابق السفلي بسبب صوت المحرك

[خندق مسقط]

يشرفني أكون أول شخص يرد عليك أخ "خندق مسقط"

يعطيك العافيه على هالمعلومات المفيده

بس حبيت اوضح نقطه انه العباره شوي مزعجه خصوصا في الطابق السفلي بسبب صوت المحرك

تشريف طال عمرك الحبيب
كلامك صحيح
بس أنت أيش ممكن تعمل
تحجز من الصباح الى رحلة الظهر.بحيث تكون في المقاعد العلويه وتسمتع بالمناظر الرائعه

[يانجم ياساهر]

عمو خندق مسقط .........اخبارك الغالي؟

بارك الله فيك على هذا الموضوع الجميل يا جميل انته

بصراحة استفدت كثير

باغنك ف كلمة راس ....براسلك ع الخاص تمامو

[خندق مسقط]

عمو خندق مسقط .........اخبارك الغالي؟

بارك الله فيك على هذا الموضوع الجميل يا جميل انته

بصراحة استفدت كثير

باغنك ف كلمة راس ....براسلك ع الخاص تمامو

بمناسبة أنعقاد القمه في العراق
خليني "أحشي" معاتش عراقي
شلونك أغاتي
شلونك يا ورده

أحب أن أهديك قصيده للمتنبي


خلاص..أنا شفت رسالتك على الخاص ورديت عليها
أنت حبيب ألبي..
ويسعدني تواصلك معي
تشريف طال عمرك

[خندق مسقط]

يوم تكونوا في جزيرة بتانج
أريدكم تجربوا أكله حلوه
أسمها Char Koay Teow



شويه تحرق
بس لذيذه لما تؤكل ساخنه

عباره عن "نودل" يتم قليه مع اضافة زيت الصويا..واضافة حبار وربيان وقليل من الخضروات

[ندى مسقط]

الاكل يشهي
شكرا لك علي المجهود الرائع

[خندق مسقط]

الاكل يشهي
شكرا لك علي المجهود الرائع

!!!!!!!!!!

[الحياة والأمل]

الاكل يشهي
شكرا لك علي المجهود الرائع

هههههههه حلوه منك
الموضوع طول وعرض ما لفت انتباهك غير الأكل!!!
ماتنلامي أخونا حاط صورة هيش كبرها للروبيان

[يانجم ياساهر]

بمناسبة أنعقاد القمه في العراق
خليني "أحشي" معاتش عراقي
شلونك أغاتي
شلونك يا ورده

أحب أن أهديك قصيده للمتنبي


خلاص..أنا شفت رسالتك على الخاص ورديت عليها
أنت حبيب ألبي..
ويسعدني تواصلك معي
تشريف طال عمرك

ما اقدر اقول شي غير الف شكر على هذي القصيده ..

ومشكور على الرد في الخاص ....

اتمنالك التوفيق ما قصرت

[صاحب الظل الطويل]

مشكور الحبيب أنا متابع ومستفيد من مواضيعك الشيقه