"مطـبخ كنايـخ التـرويـح"

[زين ابوها]

السلام عليكم ورحمة الله وبركاته ,

صبحكم الله بالخير ,


من تلفزيون سبلة الترويح يشرفنا ان نقدم لكم:.






تقول @غلاي مشرفة سبلة حواء :.

الطبخ فن :: من حبه أبدع فيه وتفنن ،،،
والمرأة لا تكتمل صفاتها ما لم يكن لديها حس مطبخي

من هنا ,نقدم لكم مجموعة مقابلات مع بعض الكنايخ ,

للأمن والسلامة ,
1-الجلوس بالقرب من النافذة ف حالة نشوب حريق او ماشابه ,
2-عدم المجازفة بتناول الطعام مباشرة بعد الطبخ الا بعد"تيست"من قبل الطباخة ,
3-ارتداء نظارات وقائية من أجل سلامة الاعين من الدخاخين والروائح المنبعثة ,
4-ارتداء كمامات حتى تتجنب شم الطعام المحروق والاكل بسلام
5-راجع الطبيب فورا بعد تناولك للطعام ,

رافقتكم السلامة





الراعي الرسمي للبرنامج,
@ابتسامه حنونه

[زين ابوها]

نبدي بمقابلتنا مع المتسابقة الثانية من مسابقة الابداع ,
نتمنى لها التوفيق @صبا الحب ,
تقول :.

1-من علمك الطبخ ؟وكيف تعلمتيه ؟
علمتني ماماتي الله يجزيها خير
رغم اني كنت ما احب ادخل المطبخ اطبخ
ليس تعاليا بل لانه ليس من اهتماماتي ولا اعرف مدى اهمية الطبخ
باديء ذي بدء كانت الماما تأمرني بأبسط الامور كانت ذكيه
تأمرني افسخ ثوم وادقه


كنت اعصب بس اسكت و اركض اخلصه بسرعه علشان انحاش من المطبخ
ظليت فترة كذا لين تعودت والعصبيه راحت عني
بعديها بد دور البصل كإضافة مع الثوم


بديت اتضايق من تقطيعه لين اعتدت عليه
وهكذا كل مره تضيف شيء اتعمله من غسيل وتقطيع خضار اخرى
بعدها بدت تأمرني احط الخضار عالنار للحمس والطبخ وكانت هي تقدر امور الملح والبهارات بروحها
بس لم اكن اخذ الامور بأهميه كبيره
الى ان اتى يوم من الايام وفيها تغيبت امي عن البيت

عمري كان 12 سنة
وطبعا مافيه بنت غيري بالبيت الباقي كلهم ذكور
اذكر اني يومها جالسه ع رز الباب كني مزهريه وحاطه رجل على رجل
اليين سمعت صوت ابوي وهو يقول لي :سويي الغدا وراح غرفته ينام بعد ما كان راجع من عمله
ياااااه:مغتر: هنا حسيت ان الدنيا وقفت فجأة عن الحركة
واكرر كلمتين في عقلي ( اسوي غدا

اسوي الغداء

)
وابيلييي كيف اسويه من وين ابداء

قمت رحت المطبخ
طلعت دجاجه وحطيتها تنصهر منها الثلج وانا متوتره
جهزت الخضار لاول مره بدون امارة وتدفيش
بس حسيت كأني اني اول مره اعمل هالعمل
وبدأت اتذكر ايش كانت الماما تعمل وتأمرني حسيت كان الذاكره ممتسحة
بس تمشكلت اكثر فالمدة اللي متى ينضج

وخصوصا الدجاج
كنت اروح واجي على ابوي وانا اقول له : باه تعال شوف المرق يسده؟؟
باه تعال شوف الدجاج يسده؟؟
طيب العيش !!؟
وابوي يرد عليي : تصرفي تصرفي تصرفييي


المهوهيم نهاية الغداء كانت كالتالي المرق مالح والدجاج عص والعيش مندعص وتفل

والله هذه حالة الغداء
غرفت العيش فالصينية بل صبيت العصيدة ف الصينية
لانه ما ينغرف مستوي صبة من كثر ما قلبته بالمقمشة
عبالي يقلب

ورشيته بمرق وحطيت الدجاج فوق


جلسنا عالصينية آكل واشوف عليهم كان الكل ياكل وهو ساكت :متبهت:
يوم ما حد نطق
سألتهم غاوي الغدا؟؟؟!!!

كأني عطيتهم اشارة خضرا للنقد .....
الموهيم من بعد ذاك اليوم وبعد تلك المسؤلية بدأت اركز فالطبخ اكثر
وسأل امي كثير ايش اعمل وايش احط وكيف اتذوق ....
والحمد لله تعلمت اعمل الغداء والعشاء والريوق واقلب المجلات لعمل بعض الامور اللي امي ما تعرف تعملها كالكيك والبسكوت
انهض عن امي من اذان الفجر ظلام واعمل الريوق واجهزة والبس واروح المدرسة
وكنت اخاف شي واحد لما انهض اعمل الريوق

جلست سنوات على خوفي من شي واحد


اخاف من دريشة المطبخ

مفتوحه بس شبك فيها ومطله ع المزرعه وظلام واقول اكيد الوحوش والجن والسحر يشوفوني وانا تحت اضائة المطبخ وانا ما اشوفهم لانهم فالظلام

وسواس الله يزوله
اظل طول الوقت ملتصقه عالفرن والجدران عن امشي صوبها


بسكم عاد يسدكم

ننتقل للسؤال الثاني


2-لو كنتي ست بيت كم مدة الطبخ معك ؟
اعتبريني ست بيت
مدة الطبخ على حسب الاكله
اذا متعودة عليها بخلصها في اقل من ساعة واعمل اكثر من شيئين او ثلاثة في آن واحد
اما اذا الاكله جديدة هنا اظل اطول وقت
علشان اركز لا اغلط وعلى مهلي


3-شو المهم عندك بالاكل ؟ الطعم او الشكل ؟
وليش؟
غالبا الطعم اهم شي عندي اكثر من الشكل
لأن اذا الطعم مو حلوا فالشكل ما راح يفيد بشي ما بيصلح الطعم بس فيه اكلات حلو نعمل لهن حركات
خصوصا الحلويات
واحيانا فيه مأكولات ما يحبوها الاطفال ولهذا نعمل لها تشكيلات لجذبهم للأكلها
ولفتح الشهيه
احنا عندنا بالبيت ما اعمل شي فيها حركات كثير

يجلسوا يتمصخروا ويعلقوا مو ذا اليوم موه كأننا في مطعم خمس نجوم
ما شايفين خير ولا خضرة


ما وجه حركات بو معنا البر

رغم اني حاسه اني شاطره فالتنسيق


4- شو رأيك بالوجبات السريعة ؟
اكيد غير صحيه اغلبها دائما وخصوصا الكفتيريات على الشوارع والمطاعم الصغيرة
اولا لانها تطهى بعيدا عن اعيننا بأيدي اناس لا نعلم مدى امانتهم في طبخهم وصحتهم
والاكلات السريعه دائما ما تكون مجهولة الهوية في موادها
حتى العصائر الطبيعيه فريش لا امان فيها حيث يضيفون بها خلطات غير طبيعيه وسكريات من اجل الربح
هدفها الربح وترس البطون لا صحة المستهلك

ماقصرت ,




وكانت لنا وقفة جميلة خفيفة لطيفة مع الحلوة @هنا الدنيا ,
تقول هنا الدنيا :,

1-أول مرة دشيتي المطبخ ,كم كان عمرك ؟
يمكن سنة لما بديت امشي

وشو نوع الاكلة ؟
ما كليت شي بس كنت اشوفهم و هم يطبخوا
و اطلع

2- مثلا شفتي أكلة بكتاب او بمكان ,
تروحي تطبقيها او لا ؟
لا اشوفها ، و اقول لما اكبر ان شاء الله اسويها
اذا كان لا ,ليش؟
اذا كان نعم ,ليش؟

3- عطينا خمس وجبات تحبي تطبخيهن ,
اندومي - الشاي - الحليب - القهوة - و نسكويك


4-شو رايك بالوجبات السريعة ؟

يعورن البطن و ساعات اضطر آكل

[زين ابوها]

توجهنا مع قشارنا لسبلة الشعر لمقابلة صاحبة القلم الجميل @بنت الراشد2009

1- ايش مكانتك ف المطبخ ؟
طباخة ماهرة ,عادية ,او همك تأكلي وانتي ساكته ؟
أنا أحب الطبخ ومكانتي به تقدري تقولي إني سيدته هههه
أنا شاطرة ولله الحمد بالطبخ وأتعلم الطبخة بس من ريحتها أجيب مكوناتها هههن عن حد يجيب عندي طبخة خاصة بكشف سرها

2- متى تعلمتي الطبخ ؟ ومن علمك ؟وايش اول اكلة طبختيها ؟
تعلمت الطبخ من أنا عمري 10 سنوات تعلمته من الوالد الله يرحمه هو طبعا من سحبني من يدي عشان أطبخ مدللني وخواتي ربي يرحم ترابه آمييين
بس كنت أدخل وياه المطبخ واشوف ايش يسوي وأكل طبخة سويتها كانت )اللولاه( اكله هندية تشبه المندازي

3-هل انتي من النوع اللي يحب يجرب طبخ اكلات البلدان العربية ؟

أنا أفضل اﻷكلات العمانية أكثر شيء والخليجية
نادر جدا أتعلم أكله عربية

4-مقلب صار لك ف الطبخ او المطبخ ؟

مقلب صارلي بالمطبخ لليوم ما صارلي أي مقلب بس أتذكر فأول مرة سويت شاي حطيت ورق شاي زياده ومحد قدر يشربه

بعد الشعر توجهنا للعامة ,طبعا كان الموضوع صعب عشان مشرفة وكذا يعني
بس هي ع طول وافقت ودخلتنا واستضافتنا بعصير تانج وبدينا النقاش وخلصنا ,
تقول سعادة @مطلع الاشراق :.

1-اول مرة دشيتي المطبخ ,كم كان عمرك ؟
- أول مره ادش المطبخ كنت بالصف الرابع
رجعت من المدرسه وامي كانت تنتظرني
عند المطبخ وقالت يلاه تعالي طبخي
العيش يومها ماكنت اعرف اي
حاجه بس هي كانت معي
خطوطه بخطوه بس
بعده العيش احترق .

وشو نوع الاكلة ؟
اول طبخه هي عيش ابيض

2- ايش مكانتك ف المطبخ ؟
حبايب نحب بعض ولا بد من اختلااع طبخه
بين فترات متقاربه .

ماهرة ,عادية,او تأكلي وساكتة ؟
الحمدلله ماهره جدا بالطبخ
وهذا وراثه من العائله
امي ماهره وجدتي الله
يرحمها كانت ممتازه
في الطبخ

3-مقلب صار لك ,ف الطبخ او المطبخ
كثير والله
انا واختي نبع الوفاء لنا مقالب
خصوصا في رمضان ياما حرقنا الصفاري وخبيناها
عشان امي ماتشوفهن وكم من اكلات
رميناها بتجربه فاشله .

4-ايش رأيك ف الوجبات السريعة ؟
حلوه ولكن بشهر أو الشهرين مره
ممكن اتناولها غير كذا لا.

[زين ابوها]

تعبنا من الروحة والجية ,قلنا نشوف حد من أهل الترويح ,
حصلنا وحدة جالسة تسير المدرستها مسكناها قلنا لها تعطينا شوي من وقتها الثمين
ف البداية رفضت بعدين وافقت بعد ما عطيناها شوكليت , @التيتشر غزلان ,أهلا وسهلا ,

1- متى بدأتي الطبخ ؟وايش الطبخة اللي طبختيها ؟
بدأت اطبخ في الثانوية

2-من علمك الطبخ ؟وكيف تعلمتيه ؟
امي علمتني واخواتي بعد
اطبخ عيوش برياني وهالسوالف ههه

3- لو حصلتي وصفة ف كتاب او مكان ,
بتطبقيها او لا ؟
اذا نعم ,ليش؟
اذا لا ,ليش؟ كنت ما اطبق اخاف اجازف بس الحين ما شاء الله علي طباخة ماهرة

4-انتي من النوع اللي يطبخ ويصور ؟ هي نعم ما اروم اطبخ ولا اصور
اذا نعم ممكن تسدحي لنا كمين صورة ؟ لوكنت اعرف اسد صور من عيوني بس للاسف ما اعرف

وايش افضل 5 طبخات تتقنيهن ؟
المسقعة , العيوش بأنواعهن , المعكرونة بأنواعها باشميل وغيره , تقريبا اعرف معظم الاشياء

وع دربنا حصلنا وحدة صغنونة جالسة ع الزاوية كانت زعلانة ,ورحنا نراضيها واستضفناها معنا
وفرحت قامت تنط وعزمتنا عندها تطبخ لنا بس للامن والسلامة رفضنا
الامبراطورة @الامبراطورة 22

1-متى بدأتي الطبخ ؟وايش اول طبخة طبختيها ؟
وايش كان رأي الجماعة ؟
بديت اطبخ عمري 8 سنوات تقريبا طبخت كيكة بالشوكولا .. طبعا يقولوا عجبتهم لكن الله العالم

2-لما تطبخي يهمك الشكل او الطعم ؟
أكيد الطعم قبل بعدين الديكوريشن

3-لما تطبخي لازم تصوري الاكل ؟
اذا هيه ممكن نشوف ؟ لا م احب اصور الأكل احس فضاوة تصوري الأكل

مع احترامي للجميع طبعا
وايش افضل 5 طبختها تتقنيها ؟ اممممم كيك اول شي و قبولي وعصير وسلطة وصلصه للعيش

والله يخلي كتب الطبخ للرمضان

4- مقلب صار لك ف المطبخ او ف الطبخ ؟
او سويتي مقلب لشخص ف الاكل ؟ والله لازم مقالب


كنت جالسه ف الرمضان اطبخ كيك لأن كانت العايله متجمعه بيت جدتي

و عندنا ولد خالتي لااااازم يعار لو م لقي حد يعاره ان شاء الله يعار جدتي بكبرها

و كنت داخله و باديه الم المكونات من الثلاجه والرفوف وكذا

و جا جلس ف المطبخ و استوا كل م احط شي يعلق مثلا انا احط البيض يقول يالذكيه هذا واجد بيض خفيه
قلتله اعرف الكميه قال انتي م عندش خبر انا معلم منال العالم الكيك

قلتله ايوا واضح واضح
و كل مره يعلق و يوم شافني م عصبت جا يحط كل مرة شي لأنه اوين خبير اكثر مني
و عاد كنت صايمه وعصبت و صرختلهم يا ناس تعالوا طفروبه مصخني اذا المخلوق


و عاد طار قال عسى م تطلع كيكتش صايبه

قلتله دواك حد قالك تجي تعار .. ومن ذاك اليوم حرم يدخل مطبخ أنا فيه

ترجمة بعض الكلمات ,
الم = اجمع
يعار =يغاير
صايبه =مستوية ,زينة
طفروبه= شلوه بعيد
مصخني=اعتقد زعجني

[زين ابوها]

كان لنا مشوار صوب الاجتماعية ,يعني نشوف المجلة وكذا ,
حصلنا مميزة الاجتماعية متربعة هناك ,جالسة تطبخ سلطة
وسرنا لها ورحبت بنا و @عذبةالمشاعر قالت:.

1-متى بدأتي الطبخ ؟ وايش اول أكلة ؟

[ من وأنا صغيره وعاد شو أول أكله نسيانه وحدي ]


2- من علمك الطبخ ؟ وكيف تعلمتي ؟
برغبتك ولا غصب ؟

[ محد علمني بروحي تعلمت ..طبعآ برغبتي ﻷني أحب الطبخ ]


3- ايش مكانتك ف المطبخ ؟
"محترفة ,عادية,او تأكلي وانتي ساكتة

[ تقدري تقولي نصف محترفه

وأحيانآ آكل وأنا ساكته ]


4- صار معك مقلب ف المطبخ او ف الطبخ ؟

[ هآعه ما أذكر ]

تنبيه ,عذبةالمشاعر بدون سبيس بين الكلمتين , عن تتعبوا عمركم مثلي ادورها بـ سبيس
ومسكينة @عذبة المشاعر ذي اللي بـ سبيس تأذيت من الرنات


ومن نفس المكان ف الاجتماعية حصلنا وحدة ما غريبة علينا طلعت مميزة تفاعل الهادف ف ساحة الترويح ,
وفرحت لما قلنا لها @بنت الذئب تقول :,

1- متى بدأتي الطبخ ؟وايش اول طبخة طبختيها ؟


- اول مره طبخت كنت في الصف الثاني الإعدادي (الثامن )


طبخت صالونة دجاج بالدنجو وطلعت مالحة واجد بس كلوها عشان يشجعوني



2- كيف تعلمتي الطبخ ؟ ومن علمك ؟
غصب او عن رغبة ؟


- تعلمته بنفسي كنت ادخل مع امي المطبح احب اقلب الحمسات معاها واشوفها تضيف البهارات وأحاول اطبق مثلها لما تطلع من البيت


وأحياناً أضيف أشياء من عندي مثل اول طبخة حطيت الدنجو مع الدجاج



3-بنت الذيب من النوع اللي يطبخ ويصور ؟
اذا نعم ممكن تسدحي صورة ؟
وايش افضل 5 طبخات تتقنيهن ؟


- لا ما احب اصور اخاف من الحسد


هي طبخة وحده اتفنن فيها صينية الدجاج بالفرن


وأحب اطبخ بعد المعجنات بس ما دائماً انجح لأني اطبخ حسب مزاجي



4- اذا كنتي ربة بيت ,كم من الوقت يلزمك للطبخ ؟


اذا غداء او عشاء مرتب ساعه بالكثير


اذا اي شي اقل من النص ساعه

[زين ابوها]

وبين الحارات شمينا ريحة طعام لذيذ ,
تتبعنا الريحة طلعت الطباخة المميزة : @حكاية بحر

1- متى بدأتي الطبخ ؟ وايش اول طبخة ؟
بدأت اطبخ لما كنت في الصف السابع..صغنونه واحليلي
اول طبخه كانت اظني عيش مهروس

2- من علمك الطبخ ؟وكيف تعلمتيه ؟
ماماتي الله يحفظها لي علمتني يوم صرت البنت الكبيره في البيت (يعني بالصف السابع)
عشان اساعدها واشل البيت عنها
برغبة او غصب ؟
برغبه جبااااره
تحملت المسوؤلية من وقت وصار الطبخ عندي متعه وفن

3- مقلب صار لك ف المطبخ او الطبخ؟
واااجد مقالب هين اتذكر عت
واحد من المقالب كنت جالسه اسوي فطائر للعشاء وجا اخوي عوين يساعدني ومسك الزعتر ورشه عليهن من فوق وسوى حرفه
ودمرهن
ونوبا مره جالسه اسوي سمبوسه وجا اخوي يقليهن فالزيت كمساعده حالي وقلى 4 حبات وشلهن يجرعهن وراح عني
وبقيت اعابل

4- ايش رأيك ف الوجبات السريعة ؟
حلوة وغاويه تغيير عن اكل البيت
هذا اذا كانت ما يوميا
مدمنة وجبات سريعة ؟
هائه ما اعتبر نفسي مدمنة وجبات سريعه
مرات يوم يشطح الراس لازم يحققله ويجابلي

القاموس العماني
هائه=لا
غاوية=جميلة
عت=كلمة مصاحبة مفيدة للجملة السابقة #شردة
عوين=أوين
يجرعهن =يأكلهن

اشل البيت تعبير مجازي عن تحمل المسؤولية ,





وأخر طباخة ,كانت مشرفة سبلة حواء الطباخة القديرة المميزة ,
@غلاي
,
كانت بتعطيني كنافة لكن خلصت قبل عن ألحق

1-متى بدأتي الطبخ ؟ وايش اول طبخة طبختيها؟
فالإبتدائية
أعتقد فاصوليا

2-ايش رتبتك ف المطبخ ؟
طباخة ماهرة ,عادية ,او بس تأكلي ؟
من تواضع لله رفعه
عادية

3- لما تطبخي لازم تصوري او لا ؟
اذا نعم ممكن نشوف صورة ؟
وايش افضل 5 طبخات تتقنيهن ؟
زمان لاااا
بس ألحين 200 على 200








4-ايش رأيك بالوجبات السريعة ؟
وهل غلاي مدمنة الوجبات السريعة ؟
مرات تنفع فأوقات الأزمات
بس الحمد لله ما وصلت لدرجة الإدمان

[زين ابوها]

@غلاي @حكاية بحر @عذبةالمشاعر @بنت الراشد2009 @الامبراطورة 22 @هنا الدنيا @صبا الحب @بنت الذئب @مطلع الاشراق @التيتشر غزلان


شكرا لكم ,شكرا لـ وقتكم وجهدكم




ف الحلقة الاخيرة ,وقت الطعام ,

هذي الصورة ما مقصودة




ولا ذي



وكذاك ,
وخلصنا من الموضوع
وشكرا لحسن متابعتكم ,
ولكم حرية التعبير والمشاركة ,

ترقبوا جديدنا ,
@ابتسامه حنونه ,شي جديد؟

[جوهرة الملوك]

إبـــداع



تعرفي انش مبدعه
موضوع رائع يستحق 5 نجوم
وصاحبة الموضوع اروع بكثير
حفظك المولى عزيزتي
و دمتِ للترويح فخرا يفتخر به و يعلو
بجمال اعضاءه و مواضيعهم الرائعه ..


ممتازة
و بجدارة

[ورد وزهور]

واوووووووووووووو حلو صراحه

موضوع تحفه تشكري زين ابوها وابتساموه

أجاوب عن الأسئله

1- متى بدأتي الطبخ ؟وايش اول طبخة طبختيها ؟

يوم كنت بـــــ الاعدادي اول طبخه اذكر كيك
كنا نتعلم في مادة التربية الأسريه الكيك وسجلت الخطوات ورحت البيت اسويها
أمي تخاف اطبخ وترفض اطبخ نهائي كون الفرن خطر علينا خبرت أخوي وقالي أنا بساعدك
كان فيه مخبز قريب من بيتنا نسير نشتري سمبوسه منه قاله أخوي يريد هذي بنيه يسوي كيك يخلي فرن مال أنت
واق هذاك الهندي كانت ساعه 2 الظهر ولكل نايم وسويتها الخلطه
ورحنا أنا وأخوي المخبز وعطيناه أذكر يوم كامل هذيك الكيكه في الفرن خلها الهندي والله ما انسيه هذا اليوم

2- كيف تعلمتي الطبخ ؟ ومن علمك ؟

تعلمت بروحي من الكتب لما كبرت
أمي كوني البنت الصغيره وأخر وحده ترفض اطبخ وما علمتني

غصب او عن رغبة ؟

رغبتي كان كبيره بس تعلمت لما خلصت دراسه وبوجود الكتب واشوف بنات الجيران وأمي كنت احفظ بس

3-هل من النوع اللي يطبخ ويصور ؟
اذا نعم ممكن تسدحي صورة ؟
وايش افضل 5 طبخات تتقنيهن ؟

نعم اصور ما عندي بعدين انزل صور من الفون

الكيك
المعجنات
البسكويت
المحشي
البقلاوه

[ابتسامه حنونه]

حجز الين ما نشوف ابداع زينووه

[هنا الدنيا]

بس سألتي اثنين

كأنك خليتيني في وجه المدفع


ا

[fox 1919]

سوف نعود لاحقا لتصفح والمشاركه

جمعه مباركه عليكم جميعا

[ابتسامه حنونه]

ماشاء الله تبارك الرحمن مبدعه حبيبتي زينوووه .. الموضوع جميل جدا

العضوات مبدعاات فديتهن وابدعهن زاد الموضوع جمال فوق جماله

العضوات بو طابخات العيش عصيده ذكرني بكرخه ع الظهر من الوالده بسبب اني هرست العيش

شكرا لك المبدعه @زين ابوها
والجديد واايد خلينا نخلص من هذا عن الحسد
انتظروا ألجديد من المبدعه زينوووه ..


اقوول زينووه الصورتين الاخيرات كنهن مقصودات وعرفتهن حال من

انتظروا ابداعي محشي ومندي ومكبوس وبرياني جراد و قرير
وكاسترد بالعقارب وعصير دال حال @نبراس المجد

[نون]

كل الكنااايخ اللي مذكورات

ما اظن يعرفن يخبزن اصلاً


ينقل لسبلة حواء

يحتاج تسوين مسابقه للطبخ هنا واحنا الشباب نصوت للوجبة الأفضل

شكراً لكم

[ورد وزهور]

كل الكنااايخ اللي مذكورات

ما اظن يعرفن يخبزن اصلاً


ينقل لسبلة حواء

يحتاج تسوين مسابقه للطبخ هنا واحنا الشباب نصوت للوجبة الأفضل

شكراً لكم

تطلع وحده من سبله تعرف تخبز وتسويلنا الخطوات من هذيلا الموجودات

شورك كيه لازم الطعم

@نون
@نون

[جوهرة الملوك]

[الفتى الشمالي]

ما شاء الله من تميز ألتى تميز

الحين كيف ترتيب البطن وشو ذنبي أني اقرا الموضوع وانا أهيس ف الدوام حرام ياخي

الحين تصرفوا وعملولي بيتزا وبرسلوها الدوام

على فكره الموضوع يستحق التنجيم ل جهود الاخت زين ابوها وفرقوا جح على قولت أبونا الدختر :لسان:

[الفتى الشمالي]

بنسوي حلقه خاصه ل أدم من طبخ وشيه نعرف نطبخ ترانا

خاصه انا أحب اسوي خليه النحل وعيش أبيض

[حكاية بحر]

احم احم

[حدي غير]

مبدعه ما شاء الله في طرح المواضيع ..

ما شاء الله عليكم شو هالزين شو هالطباخ شو هالصور
بس الصور يوعتنا .. شسمه .. بنروح نتغدى .. هني وعافيه ع قليباتي ..

[الوميض الأزرق]

السلام عليكم
..جميل جدا ...
... اهم شي عندي اعرف اخبز واقلي سمك

[نون]

تطلع وحده من سبله تعرف تخبز وتسويلنا الخطوات من هذيلا الموجودات

شورك كيه لازم الطعم

@نون
@نون

فوادي اسوي مسابقه

للي يسويلي رنه بيدخل على سحب لاندكروزر ٢٠١٦

[الرجوع من الماضي]

أكل
طعام
مم
موضوع شكله رهييييب حجز صاروخي ولي عوده
أكل

عسى احصل كيما في الموضوع

[نبراس المجد]

الموضوع مقصود مع اقتراب رمضان

صراحة ضحكت كثير وانا اقرأ تجارب أهل الخبره ومواقفهم المطبخيه خصوصا صبا الحب


حقيقتن وصراحتن ما شاء الله السبله زاخره بمحترفين في الطبخ
@غلاي @حكاية بحر @عذبةالمشاعر @بنت الراشد2009 @الامبراطورة 22 @هنا الدنيا @صبا الحب @بنت الذئب @مطلع الاشراق @التيتشر غزلان


و اتمنى قريب اينزل موضوع قنبلة اينسف هذا الموضوع نسفاً يُعرض فيه إبداعات الشباب الخورافيه في الطبخ
@الرجوع من الماضي
اكيد عندك تجارب كيميائيه ونوويه في المطبخ :


جهد كبير للمميزة @زين ابوها في فكرة وإعداد واخراج ممتع للموضوع بقالب ترويحي ولا اروع في شاشة الترويح
يستاهل يرصع بسبعطعشر نجمه *************



واخيرا من هذاك الطاحونه في آخر صوره

[الرجوع من الماضي]

الموضوع مقصود مع اقتراب رمضان

صراحة ضحكت كثير وانا اقرأ تجارب أهل الخبره ومواقفهم المطبخيه خصوصا صبا الحب


حقيقتن وصراحتن ما شاء الله السبله زاخره بمحترفين في الطبخ
@غلاي @حكاية بحر @عذبةالمشاعر @بنت الراشد2009 @الامبراطورة 22 @هنا الدنيا @صبا الحب @بنت الذئب @مطلع الاشراق @التيتشر غزلان


و اتمنى قريب اينزل موضوع قنبلة اينسف هذا الموضوع نسفاً يُعرض فيه إبداعات الشباب الخورافيه في الطبخ
@الرجوع من الماضي
اكيد عندك تجارب كيميائيه ونوويه في المطبخ :


جهد كبير للمميزة @زين ابوها في فكرة وإعداد واخراج ممتع للموضوع بقالب ترويحي ولا اروع في شاشة الترويح
يستاهل يرصع بسبعطعشر نجمه *************



واخيرا من هذاك الطاحونه في آخر صوره

تجارب الشباب

انته تباهم يضحكون علينا اظن لكن فكرة غاوية جبتلي :هيار:

غايته الغدا :توزيع: @نبراس المجد

[حكاية بحر]

الموضوع مقصود مع اقتراب رمضان

صراحة ضحكت كثير وانا اقرأ تجارب أهل الخبره ومواقفهم المطبخيه خصوصا صبا الحب


حقيقتن وصراحتن ما شاء الله السبله زاخره بمحترفين في الطبخ
@غلاي @حكاية بحر @عذبةالمشاعر @بنت الراشد2009 @الامبراطورة 22 @هنا الدنيا @صبا الحب @بنت الذئب @مطلع الاشراق @التيتشر غزلان


و اتمنى قريب اينزل موضوع قنبلة اينسف هذا الموضوع نسفاً يُعرض فيه إبداعات الشباب الخورافيه في الطبخ
@الرجوع من الماضي
اكيد عندك تجارب كيميائيه ونوويه في المطبخ :


جهد كبير للمميزة @زين ابوها في فكرة وإعداد واخراج ممتع للموضوع بقالب ترويحي ولا اروع في شاشة الترويح
يستاهل يرصع بسبعطعشر نجمه *************



واخيرا من هذاك الطاحونه في آخر صوره

ما قصرت @زين ابوها
الله يعطيها العافية

بايين تجارب الشباب قريبا وفي اسرع وقت
مع الصور اجباري حالهم

[عاشقة عيون البدر]

جريت ع السريع المسرع

واو جميل...ليش ماسويتولي مكابله اني بعد @زين ابوها

كنت افكر انزل طبخه مع الطريقه خطوه بخطوه بس دام نزل ذا الموضوع خلاص مب لازم

[عاشقة عيون البدر]

@نبراس المجد هينهن الـ سبعطعشر نجمه

يستاهل اكثر

[نبراس المجد]

تجارب الشباب

انته تباهم يضحكون علينا اظن لكن فكرة غاوية جبتلي :هيار:

غايته الغدا :توزيع: @نبراس المجد

بالعكس يتعلمو الابداع والخلطات السحريه

عافيه على الكرش

ما قصرت @زين ابوها
الله يعطيها العافية

بايين تجارب الشباب قريبا وفي اسرع وقت
مع الصور اجباري حالهم

إنفجارات ف المطبخ أتقال حرب

[عذبةالمشاعر]

أحم أحم
أهم شئ سمعتوا ويش قالت لكم ؟
لما تكتبوا عذبةالمشاعر .. لا تسوا سبيس

ما دزيت لقطات .. ما يحتاج
موفقين ..

لعيونك زين