و عليكم السلام و رحمة الله و بركاته
من الناحية الإدارية و التنظيمية و العلمية الكليات التقنية تتفوق على الجامعة الألمانية في الكثير من الامور مثلا:
1- الكليات التقنية الطالب بنفسه يختار المعلم اللي يريده و يختار توقيت المحاضرة يعني الطالب يضبط جدوله على راحته أهم شي كل فصل يأخذ المواد اللي مقرره عليه. بينما الجامعة الألمانية ماعندك حرية اختيار المعلم ولا توقيت المحاضرة يعني جدولك تضبطه الإدارة و انت عليك التنفيذ.
2- المعلمين في الكليات التقنية ثابتين و لكل مادة أكثر من معلم فالطالب عنده حرية الاختيار. بينما المعلمين في الجامعة الألمانية ما كلهم ثابتين (بعض المعلمين يجي اسبوعين او ثلاثة اسابيع يلقي محاضرات و يسافر) و معلم واحد فقط يعلم المادة فأنت مجبر على ذاك المعلم حتى لو كان ما يقدر يوصل المعلومة للطلاب و المعلم الواحد يعلم أكثر من مادة يعني عادي نفس المعلم يعلمك مادتين أو ثلاث في نفس الفصل الدراسي :مغتم:
3- بعض القاعات الدراسية في الجامعة الألمانية غير مهيئة لاستقبال عدد كبير من الطلاب و تحصل القاعة فيها 120 طالب و تنقلب سوق إلا إذا كان المعلم شديد و مسيطر على الوضع.
4- المناهج في الجامعة الألمانية صعبة مقارنة بمناهج الكليات التقنية. و الكليات التقنية مركزه على الجانب العملي بينما الألمانية مركزه كثير على الجانب النظري بس في السنوات الأخيرة بدت شوي تشتغل على الجانب العملي بس بعدهم ما وصلو لمرحلة جيده.
5- الكليات التقنية فيها فصل صيفي يساعدك تخلص مواد و تضبط أمورك. الجامعة الألمانية ما فيها صيفي و حاليا يدرسو الموضوع علشان يسيو فصل صيفي.
6- الجامعة الألمانية تتفوق من ناحية الفعاليات التي تقام داخل الجامعة و تتفوق من ناحية التسويق للجامعة بإعتبارها جامعة خاصة.
7- الجامعة الألمانية في السنة فصلين في كل فصل الطالب يدرس من 6 إلى 7 مواد و بعض الفصول يمكن أكثر من 7 هذا يعتمد على تنسيق الجدول الدراسي اللي تقوم به الجامعة و توفر المعلمين.
8- المادة في الجامعة الألمانية تنزل في السنة مره وحده فقط يعني اذا رسبت في مادة تنتظر سنة علشان تعيد المادة و كل مادة مرتبطة بمواد ثانية. علشان تمشي صح لازم تنجح بأي طريقة و إذا رسبت في احتمالية كبيرة انك تتاخر في الدراسة.
. . . . . . . .
اعطيك نصيحتي من الآخر بحكم اني درست في الكليات التقنية و حاليا في الجامعة الألمانية، ابتعد عن الجامعة الألمانية و الأسباب مثل ما ذكرت فوق. البعض بيقولك شهادة و سمعة الجامعة الألمانية قوية بحكم ارتباطها بجامعة اخن الألمانية ولكن مو فايدة السمعة و قوة الشهادة اذا لا قدر الله واجهت صعوبات و تخرجت بمعدل أقل من 2 و في المقابل ربعك في الكليات و الجامعات الثانية يتخرجو بمعدل جميل ياهلهم للتسجيل و المنافسة على وظائف في الشركات و المؤسسات الكبار.
. . . . . . . . . . . . . . .
إذا تريد أي معلومات عن تخصص هندسة العمليات و الهندسة الميكانيكية في الجامعة الألمانية ما يردك غير لسانك و أن شاء الله بنجاوبك.
@
mkindi