1-Click Setup for WordPress, Drupal & Joomla!

حصانٌ جافلٌ يتحرك صوب الشمس ..

قصة اختفاء دشداشاتي الاربع.

قيّم هذه المشاركة
السلام عليكم ورحمة الله وبركاته
...


عندي اربع دشداشات بيضاء اللون احبهن كثير ، فصلتهن قبل اربع شهور تقريبا
دولابي مليئ بالدهاديش ولكني دائما افضل البس الدشداشات اللي ذكرتهن ..
... نوعية قماش الدشداشات الاربع (زبدة) هالنوعية من الخام ارتاح لهن كثير ..

قبل ثلاث شهور تقريبا .. اختفت دشداشه وحده منهن .. ولما اسأل الاهل في البيت يقولوا مانعرف وينها
حققت مع الشغالة .. نفس الشيء تقولي ما اعرف شيء عنها او بمعنى اصح ماشفتها ..
قلت يمكن شلها الهوى لما كانت معلقة في الغدان فوق السطح وطارت لمكان بعيد ..
المهم نسيت امرها وقلت خيرها في غيرها .. عندي ثلاث غيرهن نفس القماش ..

وبعدها باسبوع اختفت الثانية ،،، وصار نفس التحقيق معهم وكلامهم مايتغير .... ماشفناها وماشفناها وماعندنا خبر عنها .
استغربت وعشت في قلق ... خيبة دشداشتين يختفن في اقل من شهر .. شو هالسالفه الملغة اللي حلت عليي.:
بقن دشداشتين معي وخايف مصيرهن الاختفاء بعد مده ..
مر شهر من بعد اختفاء القبليات .. والحمد لله الوضع صار جيد ..

قبل شهر تقريبا اختفت الثالثة .. وهنا دقني وسواس كبير ... لاني حققت مع الاهل نفس التحقيق والشغاله ايضا ونفس الكلام مايعرفوا شيء عنها
قلت ف نفسي شو صاير ؟؟ لايكون الجن شلوهن ؟ او حد باغي يسوي لي عمل (حرز او سحر او اي شيء ) فزعت كثير . بغيت اتشوف عل نفسي
بس الحمد لله انا مافيني شيء يخوف ! وضعي جيد عدا اختفاء الدهاديش الثلاث! ..

حتى لدرجة اني صرت ما البس الدشداشه المتبقية ... مخلنها ف الدولاب مكوايه ومعلقه كل يوم اشوف عليها . ..
عندي ملابس كثيرة صرت البسهن بعد ما تركتهن في الدولاب فترة كبيرة ما اتقربهن ع اعتبار وجود العزيزات على قلبي ..
وقبل اسبوعين لبستها وفي نفس اليوم بالليل فسختها عشان تتغسل مع الملابس الثانية .. ومرن كمين يوم ولما شفت دولابي والملابس المعلقه فيه ... ماوجدتها معهن .. قلت وابويي حق وثبت .. شكلهم الجن شلوها ... وجن جنوني وقمت اتنازع واصرخ عليهم في البيت ! الشغاله شوي واكفخها لانها هي المسؤولة عن غسيل الملابس وكوائهن فاكيد لها دخل باختفائهن كلهن .. عصبت عليها ونازعتها وهددتها باشياء كثيرة ... وهي ابدا تحلف وتتقصف انها ماتعرف عنهن شيء ولاشافتهن ..

.
حزنت جدا على اختفائهن كلهن بشكل متلاحق ! وخفت يكون مصير ملابسي الباقيات نفس الشيء .. وصرت ما البس دهاديش فترة اسبوعين
مستوي كني بنجابي بقميص وبنطلون حتى استايلي تغير .. لمدة سبوعين وانا مبهت ماعارف شو اللي جالس يصير معي .
.. وحلفت اني مابفصل ملابس نفس النوعية واكتفي باللي عندي !

قبل ثلاث ايام في البيت كنت ابحث عن شنطة سفر .. اخوي باغي يسافر وباغي شنطة اضافية له وكان يسالني عن هالشنطة تحديدا لانها حلوه وانا عاقنها مع الادوات اللي مانستحدمهن كثير ف غرفة على السطح .. هالغرفة مخلينها كنها مستودع للاغراض الزايدة اللي مايلنا حاجه فيهن ... جلست ادور هالشنطه لحد ماحصلتها .. ولما فتحتها .. حصلت الدشداشات الاربع حبيبات قلبي فيها

وقمت انتفض واقول بسم الله بسم الله اعوذ بالله من الشيطان الرجيم من انتم من انتم ايها الجن ماذا تريدون مني
المهم قويت قلبي .. وطلعت الملابس من الشنطة وهنا كانت المفاجأة .


.




الملابس محروقات
الشغاله السخيفه كانت تحرقهن لما تكويهن . لان قماش الملابس من نوعية الزبدة ... فكانت ماتقلل من حرارة الكواي وماتنتبه وتحرقهن ..
والمصيبة انها كانت تكذب ماتعترف !
وعشان تخبي جريمتها . تروح تخبيهن في هالشنطة .. بس حبل الكذب قصير .
وعاقبتها عقاب مابخبركم ايش سويت فيها

.

الخوف والقلق انتهى... لاني كانت عايش في لغز محير .
ورحت فصلت اربع غيرهن نفس النوعية .. ولكني هالمره بوديهن المغسلة بدل عبث الشغاله قرعه من تقرع بليسها ..


المجموعات
غير مصنف

تعقيبات

  1. صورة عضوية روح الزهور
    استمتعت وأنا أقرأ إستاذي ...
    تشوقت أعرف نهاية الحلقة الأخيرة بعد 4 شهور
    من الخوف والقلق والرعب وتغير الستايل إلي حصل
    وبالنهاية الشغاله حارقتنهن وضامتنهن عنك بشنطة بغرفه مستودع اغراض
    البيت

    موقف طريف وحلو استاذي ما اعتقد راح تنساه لإنه عيشك في رعب

    اسلوب جميل ومشوق كعادتك
  2. صورة عضوية بنت الذئب
    قصه حلو بس توقعت نهايتها
    لأن كان عندنا شغاله تحرق وترمي الملابس المحروقه ولما سافرت اعترفت زميلتها انها هي الي ترمي الملابس المحروقه
    لكن الحين عندما اخس منها تحرق وتخيط مكان الحرق
    تصور تلبس ملابسك مخيوطه وانت ما عندك خبر عنها
  3. صورة عضوية نقاء حرف
    خذلك قماش بيبسي
    يوصفوه كثير حلو
  4. صورة عضوية homcom
    روح الزهور ..
    اهديني قماش بيبسي
    نقاء تقول انه حلو

    ...


    بنت الذيب الشغاله الثانية مالكم عندها انسانيه..
    عاد لازم تنتبهوا بعد مب حلوه تروحي مكان والعباية مرقعه

    ..

    نقاء حرف... بجرب البيبسي ولايهمك


    شكرا لتواجدكم
  5. صورة عضوية كيان أنثى
    أتوقع لو كنت أكثر لطافة مع العاملة ما كان راح يصير شيء من الي صار
  6. صورة عضوية روح الزهور
    @homcom

    أنا كريمة وإنت تستاهل
    يبالك هدية ع قوة قلبك لما شفت ملابسك بالشنطة وطلعتهن
    بعد رعب وخوف ..لو كنت مكانك بتشوف غبار وراي من أشوفهن
    بعد ذاك.الإختفآء المفاجئ

    بس كيف شكلة قماش بيبسي بعد ..
    ما شآء الله حتى البيبسي خلو لة نوعية قماش ما شي نوعية إسمها
    جلكسي ولا تويكس
  7. صورة عضوية زين ابوها

    وايش كانت ردت فعل الشغالة لما عرفت انك اكتشفت ؟
    رحمتها
    ماضبطت للنهاية خطتها ..

    اهمشي 4 الجدد يعوضن 4 المفقودات
  8. صورة عضوية homcom
    اقتباس أرسل أصلا بواسطة كيان أنثى
    أتوقع لو كنت أكثر لطافة مع العاملة ما كان راح يصير شيء من الي صار
    لو كنت اكثر لطافه ..لحرقتني بكاملي
  9. صورة عضوية homcom
    اقتباس أرسل أصلا بواسطة روح الزهور
    @homcom

    أنا كريمة وإنت تستاهل
    يبالك هدية ع قوة قلبك لما شفت ملابسك بالشنطة وطلعتهن
    بعد رعب وخوف ..لو كنت مكانك بتشوف غبار وراي من أشوفهن
    بعد ذاك.الإختفآء المفاجئ

    بس كيف شكلة قماش بيبسي بعد ..
    ما شآء الله حتى البيبسي خلو لة نوعية قماش ما شي نوعية إسمها
    جلكسي ولا تويكس
    مشكورة ماتقصري .. اشتري كرتون بيبسي ووزعيه في القسم الاجتماعي
  10. صورة عضوية homcom
    اقتباس أرسل أصلا بواسطة زين ابوها

    وايش كانت ردت فعل الشغالة لما عرفت انك اكتشفت ؟
    رحمتها
    ماضبطت للنهاية خطتها ..

    اهمشي 4 الجدد يعوضن 4 المفقودات
    انا ارتحت لما عرفت الحقيقة عشان ما اعيش بوساوس طول عمري
    لما عرفت الشغاله اني اكتشفت الجريمة طول وقتها منزله راسها الارض
  11. صورة عضوية روح الزهور
    اقتباس أرسل أصلا بواسطة homcom
    مشكورة ماتقصري .. اشتري كرتون بيبسي ووزعيه في القسم الاجتماعي
    ما بيسدهم كرتون وكرتونين عشان اوزعلهم
    بس ما عليه لزوم إحتفالية بمعرفتك الحقيقة بعد 4 شهور من اختفاء
    دشاديشك المفضلات

    ربي يسعدك
  12. صورة عضوية نقاء حرف
    الزبدة افضل الانواع حاليا
    الشباب يفضلوه هو وقماش البيبسي
    وانا اقول لو كانت ام عيالك تتابع الشغاله اكثر ما كانت قدرت تعيشك في حيرة طول الاربع اشهر
  13. صورة عضوية homcom
    اقتباس أرسل أصلا بواسطة نقاء حرف
    الزبدة افضل الانواع حاليا
    الشباب يفضلوه هو وقماش البيبسي
    وانا اقول لو كانت ام عيالك تتابع الشغاله اكثر ما كانت قدرت تعيشك في حيرة طول الاربع اشهر
    عندي اربع حريم ومامنهن فايدة، كل همهن في بطنهن ياكلن واجد وكنت خايف لايكونن ماكلات الدشداشات الاربع كل وحده دشداشه
  14. صورة عضوية سحر العيون 22
    @homcom
    ياابوووووو ياابووووه

    خلا بنفصل مع بعض والدفع ع حساب السبله الاجتماعيه بيقطعونه من اشتراكي ..

  15. صورة عضوية أفواق الوصف

    ضحكني الوقف

    خسارة الدهاديش راحن

    وبعدهن ما هاينات عليك
  16. صورة عضوية pink berry
    الحمدلله على سلامة دشاديشك
  17. صورة عضوية Elec Eng
    هههه ضحكتني بس عن جد حكايه جميله
  18. صورة عضوية life rose
    كله تفكيرك في الجن ...
    ابوي الشغالات مشاكل
  19. صورة عضوية توليب96
    ههههههه ضحكت
    شكا على القصة
  20. صورة عضوية امير الهنائي
    حلوة القصة بس عاد ابي اعرف شو سويت بشغالتكم ...؟